VIV KONMAN EN KRETYEN

Nouvo keksoz dan renyon lasemenn

Konmansman Zanvye 2018, dan renyon lasemenn nou pou diskit lo bann portre, video ek lenformasyon pour etidye ki sorti dan Labib New World Translation of the Holy Scriptures, edisyon letid (nwtsty) ki deza disponib lo Enternet. Nou pou diskit lo sa bann lenformasyon menm si sa Labib edisyon letid pa ankor disponib dan nou langaz. San dout, sa lenformasyon pour ed ou prepar pli byen ou renyon. Me pli enportan ankor, i kapab fer ou vin pli pros avek nou Papa Zeova ki kontan nou!

LENFORMASYON POUR ETIDYE

Sa bann lenformasyon pour etidye pour ed nou konpran pli byen kiltir, landrwa ek bann lekspresyon ki dan plizyer verse Labib.

Matye 12:20

En lanmes ki pros pour tennyen: En lalanp ki ti ganny ranpli avek delwil zoliv ti ganny servi kot lakour. Ler ou ti alim sa lalanp sa lanmes ki ti dan sa delwil ti alimen. Sa lekspresyon Grek pour “en lanmes ki pros pour tennyen” i kapab refer avek en lanmes ki pe sorti lafimen e ki pros pou tennyen oubyen in fini tennyen. Sa profesi dan Izai 42:3 ti koz lo konpasyon Zezi. I pa ti pou zanmen tenny sa dernyen pti lespwar ki en dimoun ki annan limilite e dekouraze ti annan.

Matye 26:13

Laverite: Sa mo Grek a·menʹ e an Ebre ʼa·menʹ i vedir “sirman” oubyen “dakor.” Avan ki Zezi ti konmans koz lo en keksoz enportan, fer en promes oubyen profetize, i ti souvan servi sa lekspresyon pour montre ki sa ki i pe al dir i vre e diny konfyans. Dan Labib, zis Zezi ki ti servi sa lekspresyon “laverite” oubyen amenn dan sa fason. Ler amenn i ganny repete (a·menʹ a·menʹ) parey i leka dan Levanzil Zan, sa lekspresyon i ganny tradwir konman “vreman mon dir zot laverite.”—Zan 1:51.

BANN PORTRE EK VIDEO

Bann portre, desen, video ki napa son ek bann desen animen ki montre diferan detay dan Labib.

Betfaze, Montanny Pye Zoliv ek Zerizalenm

Sa pti video i montre en pti semen sorti les pour al Zerizalenm. Sa semen i sorti dan en vilaz ki ozordi i apel et-Tur me ki dan letan Labib ti apel Betfaze, enn parmi bann landrwa pli o lo Montanny Pye Zoliv. Betani i sitye les avek Betfaze lo kote les Montanny Pye Zoliv. Ler Zezi ti Zerizalenm ek son bann disip, zot ti souvan pas lannwit Betani ki ozordi i apel lavil el-ʽAzariyeh (El ʽEizariya), ki an Arab i vedir “Landrwa Lazar.” San dout, Zezi ti reste kot Mart, Mari ek Lazar. (Mt 21:17; Mr 11:11; Lik 21:37; Zan 11:1) Ler zot ti pe vwayaze sorti kot zot pour al Zerizalenm, i paret ki Zezi ti pran en semen parey sa enn ki’n montre dan sa video. Le 9 Nizan lannen 33, ler Zezi ti mont lo en bourik lo Montanny Pye Zoliv pour al Zerizalenm, i kapab ki i ti’n pran sa semen sorti Betfaze pour al Zerizalenm.

Semen sorti Betani pour al Betfaze
Betfaze
Montanny Pye Zoliv
Vale Kidronn
Montanny tanp

En lezo talon ki’n ganny pike avek en klou

Sa portre i montre en lezo talon ki’n ganny pike avek en klou ki ti 11.5 santimet longer. Sa lezo ti ganny dekouver anba later an 1968 dan Nor Zerizalenm e i date depi letan bann Romen. I en levidans arkeolozik ki prouve ki klou ti ganny servi pour klout bann dimoun lo en poto pour ekzekit zot. Sa klou i en pe parey bann klou ki larme Romen ti servi pour klout Zezi lo poto. Sa lezo ti ganny trouve dan en kof an ros kot lezo en dimoun mor ti ganny mete apre ki i ti’n fini dekonpoze. Sa i montre ki en dimoun ki ti ganny kloute lo en poto ti kapab ganny antere.—Mt 27:35.