Zezi in kit en legzanp limilite

“Annefe, mon’n donn zot en legzanp pour ki zot osi, zot a fer parey mon’n fer pour zot.”​—ZAN 13:15.

KI OU POU REPONN?

Ki mannyer Garson Bondye ti demontre limilite avan i ti vin lo later?

Konman en imen, ki mannyer Zezi ti demontre limilite?

Lefet ki Zezi ti demontre limilite, ki byenfe sa ti anmennen?

1, 2. Pandan sa dernyen swar dan lavi Zezi, ki leson remarkab i ti ansenny son bann zapot?

ITI son dernyen swar lo later e Zezi ti pas sa letan avek son bann zapot anler dan en lasanm dan en lakaz Zerizalenm. Pandan repa, Zezi ti leve e anmar en servyet otour li. Apre i ti vid delo dan en kivet e konmans lav lipye son bann disip e eswiy zot lipye avek sa servyet. Akoz Zezi ti fer sa aksyon ranpli avek limilite?​—Zan 13:3-5.

² Zezi li menm ti eksplike: “Eski zot in konpran ki savedir sa ki mon’n fek fer? . . . Si mwan zot Senyer e zot Met, mon’n lav zot lipye, zot osi, zot devre lav lipye kanmarad. Annefe, mon’n donn zot en legzanp pour ki zot osi, zot a fer parey mon’n fer pour zot.” (Zan 13:12-15) Lefet ki Zezi ti volonterman abes son lekor par lav lipye son bann zapot, i ti pe donn zot en leson remarkab ki ti pou grave dan zot lespri e ankouraz zot pour annan limilite dan lavenir.

 3. (a) Dan de lokazyon, ki mannyer Zezi ti montre lenportans limilite? (b) Ki nou pou diskite dan sa lartik?

³ Kan Zezi ti lav lipye son bann zapot, sa pa ti premye fwa ki i ti montre lenportans limilite. Pli boner kan son bann zapot ti pe montre en leta lespri konpetitif, Zezi ti fer en pti zanfan asiz o bor li e i ti dir zot: “Sa ki resevwar sa zanfan an mon non, i resevwar mwanmenm, e sa ki resevwar mwan, i resevwar sa enn ki’n anvoy mwan. Sa ki pli pti parmi zot, limenm ki pli enportan.” (Lik 9:46-48) Vi ki i ti konnen bann Farizyen ti pe rod pozisyon, plitar dan son minister Zezi ti dir: “Sa ki mont tro o, pou bezwen desann, e sa ki abes limenm, i a mont pli o.” (Lik 14:11) I kler ki Zezi ti anvi ki son bann disip i annan limilite, setadir abes zot lekor e pa montre zot orgeye ni arogan. Pour kapab imit li, annou egzamin atantivman son legzanp limilite. Nou pou vwar ki sa kalite pa benefisye zis bann ki demontre li me lezot osi.

“MON PA’N TOURN DAN LOT DIREKSYON”

 4. Ki mannyer sel Garson Bondye ti demontre limilite avan i ti vin lo later?

⁴ Sa sel Garson Bondye ti demontre limilite menm avan i ti vin lo later. Zezi ti’n deza pas plizyer lannen avek son Papa dan lesyel. Liv Izai i fer resorti sa relasyon pros ki sa Garson ti annan avek son Papa par dir: “Souvren Senyer Zeova li menm in donn mwan lalang bann ki’n ganny ansennyen, pour ki mon kapab konnen konman pour reponn bann ki fatige avek en parol. I leve bomaten apre bomaten; i ouver mon zorey pour antann parey bann ki’n ganny ansennyen. Souvren Senyer Zeova li menm in ouver mon zorey, e mwan mon pa’n rebele. Mon pa’n tourn dan lot direksyon.” (Iza. 50:4, 5) Garson Bondye ti demontre limilite e ekout byen tou sa ki Zeova ti ansenny li. I ti vreman anvi aprann avek sa vre Bondye. I ti’n bezwen obzerv atantivman limilite Zeova kan Zeova ti demontre mizerikord anver bann imen enparfe.

 5. Konman Misel arkanz, ki mannyer Zezi in kit en legzanp limilite ek modesti dan lafason i ti reakte avek Dyab?

⁵ Pa tou lanz dan lesyel ki ti annan sa menm latitid parey sa sel Garson Bondye. Dan plas anvi aprann avek Zeova, sa lanz ki ti vin Satan ti les li ganny enfliyanse avek bann tre ki ti tou lekontrer avek limilite. I ti orgeye, annan en tro gran lopinyon lo li menm e finalman, i ti rebel kont Zeova. De lot kote, Zezi ti satisfe avek son pozisyon dan lesyel, e i ti servi son lotorite dan en bon fason. Konman Misel arkanz, Zezi pa ti al par lao son lotorite kan i ti ganny en “diskisyon avek dyab konsernan lekor Moiz.” O kontrer, Garson Bondye ti demontre limilite, e i ti modes. I ti plito les Zeova, Ziz Siprenm liniver, pran ka avek sa sityasyon dan Son prop fason ek letan apropriye.​—Lir Zid 9.

 6. Lefet ki Zezi ti aksepte pour vin Mesi, ki mannyer sa i montre ki i ti annan limilite?

⁶ Parmi bann keksoz Zezi ti aprann dan lesyel, ti bann profesi konsernan son lavi lo later konman Mesi. Probableman, i ti deza konn bann difikilte ki ti pe esper li. Kantmenm sa, Zezi ti aksepte sa latas pour vin lo later e mor konman sa Mesi ki ti’n ganny promet. Akoz? Zapot Pol ti montre ki sel Garson Bondye ti annan limilite. I ti ekrir: “Menm ki i ti posed natir Bondye i pa ti [“anvi,” NW] ran egal avek Bondye. Me, o kontrer, par son prop volonte, i ti renons tou sa ki i posede pour pran kondisyon lesklav. I ti pran natir imen.”​—Fili. 2:6, 7.

KONMAN EN IMEN, I TI “VIV DAN LIMILITE”

7, 8. Dan ki fason Zezi ti demontre limilite pandan son lanfans e osi dan son minister?

⁷ “Konman en zonm, [Zezi] ti aksepte viv dan limilite e montre li obeisan ziska lanmor, menm lanmor lo [“en poto martir,” NW].” (Fili. 2:8) Depi son lanfans, Zezi in kit en legzanp limilite. Menm si Zezi ti ganny elve par Zozef ek Mari, bann paran enparfe, i ti demontre limilite par “kontinyen obei zot.” (Lik 2:51) Pa sa i en bon legzanp pour swiv! Bondye pou beni bann zenn ki obei zot paran.

⁸ Konman en adilt, Zezi ti demontre limilite par fer lavolonte Zeova son priyorite e non pa son prop lavolonte. (Zan 4:34) Pandan son minister, Zezi Kri ti servi non Bondye, e ed bann ki ti annan leker senser ganny konnesans egzakt lo bann kalite ki Zeova i annan ek Son plan pour limanite. Zezi ti osi viv an armoni avek sa ki i ti pe ansennyen lo Zeova. Dan son model lapriyer par egzanp, premye pwen Zezi ti adrese se: “Nou Papa ki dan lesyel Ki ou non sen i ganny [“sanktifye,” NW].” (Mat. 6:9, nou ki’n met an italik.) Annefe, Zezi ti enstri son bann disip pour fer sanktifikasyon non Zeova vin sa keksoz pli enportan dan zot lavi. Se sa fason ki i ti viv. Ver lafen son minister, Zezi ti kapab dir avek Zeova dan lapriyer: “Mon’n fer zot konn ou, e mon pou kontinyen fer li.” (Zan 17:26) Pandan son minister, Zezi ti dir ki i pa ti pou kapab fer okenn keksoz san led Zeova.​—Zan 5:19.

 9. Ki Zekarya ti profetize konsernan Mesi, e ki mannyer sa ti ganny akonplir par Zezi?

⁹ Konsernan Mesi, Zekarya ti profetize: “O fiy Siyon, ou devret dan lazwa! Kriye avek lazwa, O fiy Zerizalenm. Gete! Ou lerwa pe vin kot ou. I drwat, wi i’n ganny sove; i annan limilite, e i pe monte lo en bourik, wi lo en mal bourik, piti en femel bourik.” (Zeka. 9:9) Sa ti ganny akonplir kan Zezi ti antre Zerizalenm avan Lapannkot lannen 33 N.L. En gran lafoul ti tal zot lenz lo semen. Lezot ti koup brans dibwa e tal lo semen e lavil antye ti dan en gran leksitasyon. Menm kan i ti ganny pran konman Lerwa, Zezi ti annan limilite.​—Mat. 21:4-11.

10. Ki Zezi ti prouve par volonterman obeir ziska lanmor?

¹⁰ Kan i ti lo later, Zezi Kri ti demontre limilite ek lobeisans ziska lanmor lo en poto matir. Par sa, i’n prouve ki imen i kapab reste fidel avek Zeova menm kan i ganny teste severman. Zezi in osi montre ki Satan ti en manter kan i ti dir ki imen i servi Bondye pour bann rezon egois. (Zob 1:9-11; 2:4) Par son lobeisans parfe anver son Papa, Kris ti defann drwa Zeova pour dirize e prouve ki son fason dirize i pli meyer. Zeova ti san dout rezwir kan i ti vwar fidelite ek limilite son Garson.​—Lir Proverb 27:11.a

11. Ki loportinite bann dimoun ki annan lafwa dan sakrifis Zezi in gannyen?

¹¹ Par son lanmor lo en poto martir, Zezi ti pey en ranson pour limanite. (Mat. 20:28) Sa in donn imen enparfe loportinite pour viv eternelman dapre standar drwat Bondye. Pol ti ekrir: “Par laksyon zis en sel zonm Bondye in akit e donn lavi tou dimoun.” (Rom. 5:18) Lanmor Zezi in fer posib pour bann Kretyen swazir ganny lavi imortel dan lesyel e “lezot mouton” lavi eternel lo later.​—Zan 10:16, NW; Rom. 8:16, 17.

MON ANNAN “LIMILITE DAN MON LEKER”

12. Ki mannyer Zezi ti demontre ladouser ek limilite anver bann imen enparfe?

¹² Zezi ti envit tou bann “ki fatige e ki pe anmenn en fardo” pour vin kot li. I ti dir: “Pran mon zoug e aksepte mon legzanp akoz mon dou e mon annan limilite dan mon leker e zot a ganny repo.” (Mat. 11:28, 29) Lefet ki Zezi i annan ladouser ek limilite, sa ti pous li pour tret tou dimoun dan en fason zantiy e san fer lapliferans. I ti rezonnab dan sa ki i ti ekspekte avek son bann disip. I ti felisit e ankouraz zot. I pa ti fer zot santi ki zot ti bann enbesil oubyen pa vo nanryen. I pa ti tret zot dir ni met presyon lo zot. O kontrer, Zezi ti asir zot ki si zot ti vin pli pros avek li e met an pratik son lansennyman, zot ti pou ganny soulaze akoz son zoug i fasil pour siporte e son fardo i leze. I pa drol alor ki dimoun tou laz, msye konman madanm, ti santi zot alez avek Zezi.​—Mat. 11:30.

13. Ki mannyer Zezi ti demontre konpasyon anver bann ki ti annan en lavi difisil?

¹³ Zezi ti ranpli avek konpasyon kan i ti vwar bann ki ti annan en lavi difisil an Izrael e i ti fer tou pour ed zot. O bor Zeriko, i ti rankontre de mandyan aveg. Enn ti apel Bartime me non sa lot pa ganny mansyonnen dan Labib. Zot ti kontinyen persiste ki Zezi i ed zot, me lafoul ti dir zot reste trankil. Pa i ti pou fasil pour Zezi inyor demann sa de aveg! O kontrer Zezi ti pran pitye pour zot. I ti demande ki zot ganny anmennen kot li e i ti fer zot vwar kler. Wi, Zezi ti imit Zeova son Papa par demontre limilite ek pitye pour bann senp peser.​—Mat. 20:29-34; Mark 10:46-52.

“SA ENN KI ABES SON LEKOR POU VIN ENPORTAN”

14. Ki byenfe nou gannyen avek limilite Zezi?

¹⁴ Limilite ki Zezi Kri ti demontre i en sours lazwa ek benediksyon pour bokou dimoun. Zeova ti rezwir kan i ti vwar lobeisans son Garson. Bann zapot ek disip ti soulaze par ladouser ek limilite Zezi. Par son legzanp, lansennyman, ek felisitasyon, i ti motiv zot pour fer progre spirityel. Apard ki son bann zapot, lezot dimoun osi ti benefisye avek lafason ki Zezi ti demontre limilite akoz i ti ansenny, ankouraz, e ed zot. Annefe, akoz sakrifis Zezi, tou imen ki annan lafwa dan li pou ganny beni pour touzour.

15. Ki byenfe Zezi ti gannyen vi ki i ti demontre limilite?

¹⁵ Me Zezi, eski son limilite ti benefisye li? Wi, akoz i ti dir son bann disip: “Sa enn ki abes son lekor pou vin enportan.” (Mat. 23:12) Dan son ka, sa parol ti vre. Pol ti eksplike: “Bondye in elev [Zezi] pli o ki tou, e donn li en non pli enportan ki tou lezot non, pour ki devan non Zezi tou sa ki dan lesyel, lo later e dan lemonn pli ba ki later i tonm azenou, [e] ki tou lalang i proklanmen, ki Zezi-Kri i Senyer pour laglwar Bondye, Papa.” Vi ki Zezi ti demontre limilite ek fidelite kan i ti lo later, Zeova ti fer son Garson vin pli o ki tou par donn li lotorite lo tou lanz ek imen.​—Fili. 2:9-11.

ZEZI POU “DEFANN LAVERITE EK LIMILITE”

16. Kwa ki montre ki Garson Bondye pou kontinyen demontre limilite dan tou sa ki i fer?

¹⁶ Garson Bondye pou kontinyen demontre limilite dan tou sa ki i pou fer. En psalmis ti predir ki mannyer Zezi, konman Lerwa dan lesyel pou azir kont Son bann lennmi an dizan: “Dan ou splander ale pour ou reisi; mont ou seval pour defann laverite ek limilite ek ladrwatir.” (Ps. 45:4) Zour lager Amargedon, Zezi Kri pou defann bann ki drwat, kontan laverite, e ki annan limilite. Me ki pou arive a lafen sa Renny Mil An kan Mesi sa Lerwa pou’n “detri tou lotorite, pouvwar spirityel ek tou pisans”? Eski Zezi pou kontinyen demontre limilite? Wi, parski i pou “remet Rwayonm dan lanmen Bondye, son Papa.”​—Lir 1 Korentyen 15:24-28.

17, 18. (a) Akoz i enportan ki nou imit limilite Zezi? (b) Ki nou pou diskite dan lartik ki swiv?

¹⁷ Be nou, eski nou pou swiv legzanp Zezi e demontre limilite? Ki pou arive avek nou kan Lerwa Zezi Kri i vin egzekit zizman zour Amargedon? Zezi pou sov zis bann ki drwat e annan limilite. Sa i montre ki limilite i vreman esansyel pour nou ganny sove. Deplis, zis parey limilite ti anmenn byenfe pour Zezi Kri ek lezot, alor kan nou demontre limilite sa pou benefisye nou dan plizyer fason.

¹⁸ Kwa ki kapab ed nou imit limilite Zezi? Ki mannyer nou kapab fer zefor pour demontre limilite menm si i pa fasil? Nou pou egzamin sa bann kestyon dan lartik ki swiv.

[Not anba lo paz]

[Portre lo paz 15]

Ki byenfe nou kapab gannyen si nou imit limilite Zezi?

[Portre lo paz 16]

Nou devret imit konpasyon Zezi