“Anmenn bon Nouvel konsernan en Keksoz meyer”

“Pa i zoli pour vwar lipye sa enn ki pe anmenn bon nouvel lo bann montanny . . . konsernan en keksoz meyer.”​—IZAI 52:7.

 1, 2. (a) Ki bann keksoz efreyan ki pe arive toulezour? (b) Ki mannyer bokou dimoun i reazir ler zot tann move nouvel toulezour?

OZORDI dimoun dan lemonn antye i santi ki zot pe ganny bonbarde avek move nouvel. Zot ouver radyo, zot tann nouvel efreyan konsernan bann maladi san gerizon ki pe menas lemonn. Zot get nouvel lo televizyon, zot vwar bann zanfan lafen ki pe sipliye pour ganny led e sa i trouble zot apre. Kan zot get zournal, zot lir konsernan bonm ki’n eksploze dan bann batiman, e ki’n pran lavi plizyer inosan.

² Wi, bann keksoz efreyan pe arive toulezour. Vreman sa lemonn pe sanze, e i pe vin pli pir. (1 Korentyen 7:31) En magazin dan was Lerop ti dir ki parfwa i paret ki lemonn antye i “pros pour koule.” I pa drol alor ki en kantite dimoun i enkyet! En dimoun ki ti ganny kestyonnen dan en serve konsernan nouvel lo televizyon Letazini, i eksprim menm santiman avek plizyer milyon dimoun kan i ti dir: ‘Apre ki mon’n fini get nouvel, mon santi mwan tris en kantite. Ou antann zis move nouvel. I tro bokou.’

Nouvel ki tou Dimoun i bezwen tande

 3. (a) Ki bon nouvel Labib i anonse? (b) Akoz ou apresye sa bon nouvel Rwayonm?

³ Eski nou kapab tann bon nouvel dan sa lemonn troublan? Wi, nou kapab tann bon nouvel! I rekonfortan pour konnen ki Labib i anons bon nouvel. Sa i nouvel ki Rwayonm Bondye pou met en lafen avek maladi, lafamin, krim, lager ek tou sort kalite problenm. (Psonm 46:9; 72:12) Eski pa sa nouvel ki tou dimoun i bezwen tande? Bann Temwen Zeova i krwar ki tou dimoun i bezwen antann sa nouvel. Se pour sa rezon zot renonmen partou dan lemonn pour sa zefor kontinyel ki zot fer, pour partaz sa bon nouvel lo Rwayonm Bondye avek dimoun dan tou nasyon.—Matye 24:14.

 4. Ki laspe nou predikasyon ki nou pou egzaminen dan sa lartik, e dan lartik swivan?

⁴ Me ki nou kapab fer pour kontinyen annan en bon partisipasyon dan sa travay pour pres sa bon nouvel, menm dan bann teritwar ki dimoun pa tro enterese? (Lik 8:15) En pti revizyon lo trwa laspe enportan nou travay predikasyon pou san dout ed nou. Nou kapab egzamin premyerman nou motivasyon, oubyen akoz nou pe prese. Dezyenmman, nou mesaz, oubyen kwa ki nou prese, e trwazyenmman nou metod oubyen ki mannyer nou prese. Par kontinyen annan en bon motivasyon, gard nou mesaz kler e kontinyen servi bann metod efikas, nou pou donn diferan kalite dimoun sa loportinite pour antann sa pli bon nouvel ki egziste. Sa i bon nouvel lo Rwayonm Bondye.a

Akoz nou pres sa bon Nouvel

 5. (a) Premyerman, kwa ki motiv nou pour pres sa bon nouvel? (b) Akoz nou kapab dir ki nou pe demontre nou lanmour pour Bondye, ler nou obeir sa komannman pour al prese?

⁵ Annou konsider sa premye laspe—nou motivasyon. Akoz nou pres sa bon nouvel? Pour menm rezon ki Zezi ti fer li. I ti dir: “Mon kontan mon Papa.” (Zan 14:31; Psonm 40:8) Premyerman, nou lanmour pour Bondye ki motiv nou pour pres sa bon nouvel. (Matye 22:37, 38) Labib i asosye lanmour pour Bondye ansanm avek predikasyon, parski i dir: “La lanmour Bondye: ki nou obei son konmannman.” (1 Zan 5:3; Zan 14:21) Eski sa lord pour ‘ale e fer disip’ i enkli dan komannman Bondye? (Matye 28:19) Wi. I vre, Zezi ki ti dir sa parol, me finalman i sorti kot Zeova. Ki mannyer sa? Zezi ti eksplike: “Mon pa fer nanryen par mwanmenm, me mon dir zis sa ki mon Papa in dir mwan dir.” (Zan 8:28; Matye 17:5) Alor, par obeir sa komannman pour al prese, nou pe montre Zeova ki nou kontan li.

 6. Dan ki fason lanmour pour Bondye i motiv nou pour prese?

⁶ Anplis ki sa, lanmour pour Zeova i motiv nou pour al prese akoz nou anvi fer bann mansonz ki Satan pe fannen lo li napa valer. (2 Korentyen 4:4) Satan in kestyonn sa drwa ki Bondye i annan pour dirize. (Zenez 3:1-5) Konman bann Temwen Zeova, nou vreman anvi donn lanmen devwal bann fo lakizasyon Satan e glorifye non Bondye devan tou imen. (Izai 43:10-12) Deplis, nou partisip dan predikasyon akoz nou’n konn bann kalite ek fason azir Zeova. Nou santi nou pros avek li e nou vreman anvi koz avek lezot lo nou Bondye. Anfet, labonte Zeova ek son fason azir ki drwat i donn nou bokou lazwa ki fer nou pa kapab aret koz lo li. (Psonm 145:7-12) Nou santi nou pouse pour loue li e koz lo son bann “keksoz merveye” avek bann ki pou ekoute.—1 Pyer 2:9; Izai 43:21.

 7. Apard ki lanmour pour Bondye, ki sa lot rezon enportan ki nou partisip dan travay predikasyon?

⁷ I annan en lot rezon enportan akoz nou kontinyen partisip dan predikasyon: Nou senserman anvi anmenn konsolasyon pour bann dimoun ki pe ganny bonbarde avek sa kantite move nouvel toulezour ek bann ki pe soufer dan en fason ou en lot. Nou fer bokou zefor pour imit Zezi dan sa travay pour konsol lezot. Par egzanp, remarke ki Mark sapit 6 i fer resorti.

 8. Ki sa resi dan Mark 6 i montre nou lo santiman ki Zezi ti annan pour dimoun?

⁸ En zour apre ki zot ti’n fini prese, bann zapot ti retourn kot Zezi e rakont li tou sa ki zot ti’n fer e ansennyen. Zezi ti remarke ki bann zapot ti fatige, alor i ti dir zot vin avek li pour zot kapab “repoze.” Alor, zot ti anbark dan en kannot e vwayaz ziska kot en landrwa trankil. Bann dimoun ti swiv zot an tayan toudilon lo lans e pa bokou letan apre zot ti zwenn Zezi ek son bann zapot. Me ki Zezi ti fer? Labib i dir: “I ti war en gran lafoul e son leker ti touse avek konpasyon. I ti pran pitye pour zot, akoz zot ti parey bann mouton ki napa berze; e i ti konmans ansenny zot bokou keksoz.” (Mark 6:31-34, nou ki’n met an italik.) Sa pitye ki Zezi ti annan, ti pous li pour kontinyen partaz sa bon nouvel menm si i ti fatige. I kler ki Zezi ti vreman enterese avek sa bann dimoun. I ti annan konpasyon pour zot.

 9. Ki nou aprann atraver sa resi dan Mark sapit 6 konsernan sa bon motivasyon pour prese?

⁹ Ki sa resi i ansenny nou? Konman Kretyen, nou santi nou oblize pour pres sa bon nouvel e fer disip. Lefe ki i lavolonte Bondye “ki tou dimoun i ganny sove,” nou rekonnet ki nou annan sa responsabilite pour anons sa bon nouvel. (1 Timote 2:4) Me nou pa al prese zis akoz i en lobligasyon, nou fer li osi akoz nou annan konpasyon pour dimoun. Si parey Zezi nou annan konpasyon pour dimoun, nou leker pou pous nou pour fer tou sa ki nou kapab pour kontinyen partaz sa bon nouvel avek zot. (Matye 22:39) Kan nou al prese avek sa bon motivasyon, nou pa pou zanmen aret pres sa bon nouvel.

Nou Mesaz—Bon Nouvel lo Rwayonm Bondye

10, 11. (a) Konman Izai i dekrir sa mesaz ki nou prese? (b) Dan ki fason Zezi ti anmenn bon nouvel konsernan en keksoz meyer, e ki mannyer bann serviter Bondye dan nou letan in swiv legzanp Zezi?

¹⁰ Ki nou pou dir lo nou mesaz, ki dezyenm laspe dan nou predikasyon? Ki nou prese? Profet Izai ti donn en zoli deskripsyon lo sa mesaz ki nou prese. I ti dir: “Pa i zoli pour vwar lipye sa enn ki pe anmenn bon nouvel lo bann montanny, sa enn ki pe anons lape, sa enn ki pe anmenn bon nouvel konsernan en keksoz meyer, sa enn ki pe anons delivrans, sa enn ki pe dir avek Siyon: ‘Ou Bondye in vin lerwa!’ ”—Izai 52:7.

¹¹ Sa lekspresyon ki enportan dan sa verse i “ou Bondye in vin lerwa.” Sa i fer nou mazin sa mesaz ki nou devret anonse, sa bon nouvel lo Rwayonm Bondye. (Mark 13:10) Remarke ki sa verse i osi revel sa bon tenm nou mesaz. Izai i servi bann term parey “delivrans,” “bon nouvel,” “lape,” ek “en keksoz meyer.” Dan premye syek N.L., savedir plizyer syek apre Izai, Zezi ti akonpli sa profesi dan en fason remarkab par donn en legzanp ranpli avek devouman pour anons en keksoz meyer, sa i Rwayonm Bondye ki pe aprose. (Lik 4:43) Dan nou letan, sirtou depi 1919, bann Temwen Zeova in swiv legzanp Zezi par anons avek devouman sa bon nouvel lo Rwayonm Bondye ek benediksyon ki i pou anmennen.

12. Ki lefe sa bon mesaz Rwayonm i fer lo bann ki aksepte sa li?

¹² Ki lefe sa bon mesaz Rwayonm i fer lo bann ki aksepte li? Parey dan letan Zezi, ozordi sa bon nouvel i donn lespwar ek rekonfor. (Romen 12:12; 15:4) Sa bon nouvel i donn lespwar bann dimoun senser, akoz zot aprann ki i annan bann rezon solid pour krwar ki lavi pou pli gou alavenir. (Matye 6:9, 10; 2 Pyer 3:13) Sa lespwar i ed bann ki annan lakrent pour Bondye gard en pwennvi pozitif. En psalmis ti dir ki zot “pa pou ni menm per move nouvel.”—Psonm 112:1, 7.

En Mesaz ki pou “pans sa bann ki annan Leker brize”

13. Konman profet Izai i dekrir benediksyon ki bann dimoun i gannyen konmela menm ler zot aksepte sa bon nouvel?

¹³ Deplis, sa bon nouvel ki nou prese i anmenn soulazman ek benediksyon pour bann ki ekoute konmela menm. Konman? Profet Izai ti fer resorti serten sa bann benediksyon, kan i ti predir: “Lespri Souvren Senyer Zeova i lo mwan, se pour sa rezon Zeova in swazir mwan pour anons bon nouvel bann ki annan limilite. I’n anvoy mwan pour pans sa bann ki annan leker brize, pour anons laliberte bann ki’n ganny anprizonnen e pour ouver gran lizye bann prizonnyen, pour anons lannen faver delapar Zeova ek zour vanzans nou Bondye; pour konsol tou bann ki an dey.”—Izai 61:1, 2; Lik 4:16-21.

14. (a) Ki sa lekspresyon “pans sa bann ki annan leker brize” i montre lo sa mesaz Rwayonm? (b) Konman nou demontre menm lentere avek Zeova pour bann ki annan leker brize?

¹⁴ Dapre sa profesi, Zezi ti pou “pans sa bann ki annan leker brize,” par pres sa bon nouvel. Pa sa parol ki Izai in servi i kree en portre dan nou lespri! Dapre en diksyonner Labib, sa mo “pans,” in ganny tradwir apartir en mo Ebre ki “souvannfwa ganny servi ler en dimoun pe ganny panse pour tret e geri son boubou.” En bon ners i kapab met en bann oubyen en konpres lo landrwa kot sa pasyan in ganny tape. Sa bandaz i soulaz douler sa dimoun. Pareyman, kan zot pe pres sa mesaz Rwayonm, bann proklanmater ki enterese avek dimoun i soulaz tou bann ki aksepte sa mesaz ki pe soufer dan serten fason. Par soulaz bann ki dan bezwen zot pe demontre menm lentere ki Zeova i annan pour dimoun. (Ezekyel 34:15, 16) Remarke ki en psalmis i dir lo Bondye: “I pe geri sa bann ki zot leker in brize e i pe pans zot blesir.”—Psonm 147:3.

Konman Mesaz Rwayonm i fer en Diferans

15, 16. Mansyonn bann resi lo lavi dimoun ki montre konman mesaz Rwayonm in soulaz e fortifye sa bann ki dan bezwen.

¹⁵ I annan plizyer resi lo lavi dimoun ki montre konman mesaz Rwayonm i vreman soulaz e fortifye sa bann ki annan leker brize. Annou vwar legzanp Oreanna, en madanm aze ki sorti Sid Lanmerik ki ti nepli anvi kontinyen viv. En Temwen Zeova ti vizit li e lir Labib ek sa piblikasyon Mon Liv Zistwar Labib avek li.b Okonmansman, sa madanm ki ti dan depresyon ti ekoute anmenmtan ki i ti alonze lo lili, lizye fermen, e tanzantan pran bann gran respirasyon. Pa bokou letan apre, i ti konmans fer zefor pour asize lo son lili anmezir ki i ekout lektir. En pe plitar, i ti pe asiz dan en sez dan salon pe esper son ansennyan Labib vini. Apre, Oreanna ti konmans asiste bann renyon Kretyen kot Lasal Rwayonm. Vi ki i ti ganny ankouraze par sa ki i ti aprann dan renyon, i ti konmans ofer tou dimoun ki pas obor son lakaz bann piblikasyon baze lo Labib. Alaz 93 zan, Oreanna ti batize konman en Temwen Zeova. Sa mesaz Rwayonm ti’n redonn li sa lanvi pour viv.—Proverb 15:30; 16:24.

¹⁶ Mesaz Rwayonm i soulaz menm bann ki konnen zot pres pour mor akoz en maladi. Par egzanp, Maria ki sorti dan was Lerop ti pe soufer avek en maladi ki napa gerizon e i ti’n perdi tou lespwar. Kan bann Temwen Zeova ti rankontre li, i ti dan en gro depresyon. Me kan i ti aprann konsernan plan Bondye, pour ankor enn fwa son lavi ti annan en bi. I ti batize e vin en proklanmater vreman devoue. Pandan sa de dernyen lannen ki ti reste li pour viv, i ti vreman annan lespwar ek lazwa. Maria ti mor avek en lespwar solid dan rezireksyon.—Romen 8:38, 39.

17. (a) Ki mannyer mesaz Rwayonm pe fer en diferans dan lavi sa bann ki aksepte sa mesaz? (b) Dan ki fason ou’n personnelman eksperyanse ki mannyer Zeova pe “redres tou bann ki’n kourbe”?

¹⁷ Sa bann resi i montre konman mesaz Rwayonm i kapab fer en diferans dan lavi bann dimoun ki vreman anvi konn laverite dan Labib. Bann ki dan dey akoz lanmor en dimoun ki zot ti kontan i ganny lafors kan zot aprann ki pou annan en rezireksyon. (1 Tesalonisyen 4:13) Bann dimoun ki viv dan lamizer e ki pe triyange pour sonny zot fanmiy, i ganny dinite ek kouraz kan zot aprann ki Zeova pa pou zanmen abandonn zot si zot fidel avek li. (Psonm 37:28) Avek led Zeova, bokou ki dan gro depresyon ptit-a-pti zot ganny sa lafors ki zot bezwen pour fer fas avek sa sitiasyon. Dan serten ka zot in menm kapab sirmont konpletman sa problenm. (Psonm 40:1, 2) Anfet, gras a sa pwisans ki i donnen atraver son Parol, Zeova pe “redres tou sa bann ki’n kourbe.” (Psonm 145:14) Kan nou obzerve konman sa bon nouvel Rwayonm i anmenn rekonfor pour bann ki annan leker brize dan nou teritwar e dan kongregasyon, nou pe konstaman ganny rapele ki nou annan sa pli bon nouvel ki egziste ozordi!—Psonm 51:17.

“Mon demann Bondye pour bann Zwif”

18. Ki mannyer Pol ti ganny afekte ler bann Zwif ti rezet sa bon nouvel, e akoz?

¹⁸ Kantmenm nou pe anmenn sa pli bon nouvel, bokou i rezet sa nouvel. Ki lefe sa i kapab fer lo nou? Menm lefe ki i ti fer lo zapot Pol. Souvan i ti pres avek bann Zwif, me lamazorite ti rezet sa mesaz delivrans. Sa ti afekte Pol en kantite. I ti dir: “Mon dan en gran tristes e mon annan en sagren kontinyel dan mon leker.” (Romen 9:2) Pol ti annan konpasyon pour bann Zwif ki i ti pres avek. Kan zot ti rezet sa bon nouvel, sa ti fer li sagren.

19. (a) Akoz i normal ki parfwa nou kapab santi nou dekouraze? (b) Kwa ki ti ed Pol pour kontinyen prese?

¹⁹ Nou osi nou pres sa bon nouvel akoz nou annan konpasyon pour lezot. Alor, i normal ki nou kapab santi nou dekouraze kan bokou dimoun i rezet sa mesaz Rwayonm. Si nou santi koumsa, sa i montre ki nou senserman enterese avek bezwen spirityel bann dimoun ki nou pres avek. Me nou devret rapel legzanp zapot Pol. Kwa ki ti ed li kontiny son travay predikasyon? Menm si i ti sagren e soufer akoz bann Zwif ti rezet sa bon nouvel, Pol pa ti perdi lespwar dan tou bann Zwif, konmsi zot pa ti pou kapab ganny ede. I ti swete ki i annan ankor lezot ki ti pou aksepte Kris. Alor, i ti ekrir lo fason ki i ti santi anver bann Zwif: “Mon swete avek tou mon leker e ki mon demann Bondye pour bann Zwif, se ki zot tou zot ganny sove.”—Romen 10:1.

20, 21. (a) Ki mannyer nou kapab imit legzanp Pol dan predikasyon? (b) Ki sa lot laspe dan predikasyon ki nou pou diskite dan lartik swivan?

²⁰ Remark sa de keksoz ki Pol ti met lanfaz lo la. Dan son leker i ti anvi ki serten i ganny sove, e i ti sipliy Bondye pour sa. Nou osi nou swiv legzanp Pol ozordi. Nou toultan annan sa dezir senser pour rod sa bann ki pare pour aksepte sa bon nouvel. Nou kontinyen priy Zeova pour ed nou vwar sa bann kalite dimoun, pour nou kapab ed zot swiv sa semen ki anmenn ver delivrans.—Proverb 11:30; Ezekyel 33:11; Zan 6:44.

²¹ Me pour kapab partaz sa mesaz Rwayonm avek otan dimoun, nou bezwen port latansyon pa zis lo rezon akoz nou prese oubyen lo kwa nou prese, me osi ki mannyer nou prese. Lartik swivan pou diskit sa size.

[Not anba lo paz]

Ki ou’n aprann?

• Pour ki rezon nou al prese?

• Ki sa mesaz prensipal ki nou prese?

• Ki benediksyon bann ki aksepte sa mesaz Rwayonm i gannyen?

• Kwa ki pou ed nou kontinyen prese?

[Portre lo paz 26]

Lapriyer i ed nou andire dan predikasyon