Lafen tou move keksoz pou arive!

BONDYE in donn nou son Parol enspire ki eksplik nou akoz dimoun i fer bann move keksoz. Bondye in osi donn nou sa liberte pour swazir ek sa abilite pour annan kontrol lo nou prop lekor, ki fer li posib pour nou kapab swazir pour pa fer bann move keksoz. (Deterononm 30:15, 16, 19) Alor, nou kapab servi sa bann abilite pour idantifye okenn move tandans ki nou annan e pran bann pa neseser pour koriz zot. Finalman, si nou pa fer bann move keksoz, sa pou fer nou ek bann ki otour nou ere.—Psonm 1:1.

Me malgre tou sa kantite zefor ki nou fer endividyelman pour esey reziste pour pa fer keksoz mal, sa lemonn i touzour ranpli avek bann move keksoz ki lezot dimoun i fer. Labib i averti nou: “Rapel sa byen: dan bann dernyen zour pou annan letan difisil.” Pour montre kwa ki fer sa letan “difisil,” i kontinyen pour dir: “Zonm pou vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye, zot pou montre en laparans lapiete, me rezet son vre pisans. Pa asosye ou avek bann dimoun koumsa.”—2 Timote 3:1-5.

Petet ou’n remark sa lekspresyon “bann dernyen zour” dan sa profesi ki’n ganny mansyonnen anler. Ki sa i vedir pour ou? Parey laplipar dimoun i normalman konpran, kan nou dir “dernyen zour” sa i donn lide ki en keksoz pe apros son lafen. Kwa ki pe apros son lafen? Get sa ki Bondye i promet dan son Parol.

Bann move dimoun pou konpletman ganny detrir.

“Dan ankor en ptigin letan, sa enn move pou nepli la; ou pou al get dan son landrwa e i pa pou la. Me bann dimoun ki annan limilite pou posed later, e zot pou sirman trouv bokou plezir dan labondans lape.”—PSONM 37:10, 11.

“Zeova pe protez tou sa bann ki kontan li, me i pou detrir tou bann move dimoun.”—PSONM 145:20.

Pou nepli annan lopresyon.

“Akoz i pou delivre sa enn pov ki pe kriy o sekour, osi sa enn ki pe soufer e nenport ki, ki napa personn pour vin ed li. I pou liber zot avek vyolans ek lopresyon.”—PSONM 72:12, 14.

“Sa kreasyon pou ganny libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye.”—ROMEN 8:21.

Tou dimoun pou satisfe lo plan materyel.

“Zot pou vreman asize, sakenn anba son pye rezen e anba son pye fig, e pou napa personn ki pou fer zot tranble.”—MIKA 4:4.

“Zot pou konstrir lakaz e zot pou reste ladan; wi, zot pou plant pye rezen e zot pou manz son fri. Zot pa pou konstrir pour en lot reste, e zot pa pou plante pour en lot manze. Parski lakantite letan ki mon pep pou viv pou parey lakantite letan ki en pye dibwa i viv; e sa bann ki mon’n swazir pou profit plennman travay zot lanmen.”—IZAI 65:21, 22.

Pou annan lazistis.

“Eski zot pa krwar ki Bondye pou rann lazistis bann ki i’n swazir e ki priy li lizour konman lannwit? . . .  Mon dir zot, i pou rann zot lazistis vitman.”—LIK 18:7, 8.

“Parski Zeova i kontan lazistis, e i pa pou kit son bann fidel. Sirman zot pou ganny garde pour en letan endefini.”—PSONM 37:28.

Olye vorasite pou annan ladrwatir.

“Se ladrwatir ki bann zabitan later pou vreman aprann.”—IZAI 26:9.

“Me nou, nou pe espere dapre son promes en nouvo lesyel ek en nouvo later kot pou annan lazistis [oubyen “ladrwatir,” NW].”—2 PYER 3:13.

Dimoun pe sanze depi la konmela menm

San dout, nou tou nou pou byen kontan vwar sa bann promes vin vre. Ki lasirans nou annan ki zot pou ganny akonplir? Annefe, levidans ki promes Bondye pou vin vre i deza la. Ki sa levidans? Ozordi plizyer milyon dimoun dan lemonn antye in deza reisi retir dan zot sa tandans pour vin egois, imoral oubyen vyolan, e zot in aprann pour vin onnet, zantiy e viv anpe avek lezot. I annan plis ki set milyon Temwen Zeova ki form parti en lasosyasyon frer ek ser enternasyonal. Zot in reisi kas tou baryer rasyal, etnik, nasyonal, politik ek finansyel ki’n lakoz plizyer ka kot laenn, vyolans ek versman disan in enplike tou dilon listwar imen.a Sa bann sanzman ki nou vwar pe arive ozordi i donn nou sa baz solid pour krwar ki promes Bondye pou ganny akonplir lo en pli gran lesel.

Kwa, alor, ki anmenn sa bann sanzman? Nou pou trouv larepons dan en lot promes dan Labib, ki’n ganny rikorde par profet Izai. I ti ekrir:

“Lelou pou vreman reste avek en pti mal mouton pour en serten letan, e en leopar pou dormi avek en pti kabri. En pti bef, en zenn lyon for, ek bann zannimo ki ganny byen nouri, zot tou zot pou ansanm; e en pti garson pou gid zot. . . . Menm en lyon pou manz lapay zis parey en toro. En nourison pou sirman zwe lo trou kobra; e lo trou en serpan anpwazonnen en pti zanfan ki’n sevre pou met son lanmen. Zot pa pou fer okenn keksoz mal oubyen koz okenn destriksyon dan tou mon montanny sen, akoz later pou vreman ranpli avek konnesans Zeova zis parey delo i kouver lanmer.”—Izai 11:6-9.

Eski sa profesi pe zis predir en letan kan bann zannimo pou viv an armoni avek bann imen? Non. I enplik plis ki sa. Remarke ki dernyen bout sa pasaz i montre kwa ki fer sa transformasyon arive: “Later pou vreman ranpli avek konnesans Zeova.” Eski konnesans lo Bondye i kapab sanz fason azir bann zannimo? Non, me i kapab sanz dimoun! Sa profesi i predir ki bann ki petet ti annan sa tandans pour azir parey zannimo pou rezet sa tandans e devlop en personnalite parey pour Kris akoz zot in aprann e aplik sa ki Labib i dir.

Par egzanp pran legzanp Pedro.b Kan i ti zwenn en lorganizasyon teroris i ti krwar ki i ti pe lager pour lazistis. Apre ki i ti’n ganny en formasyon, i ti ganny lord pour met leksplozyon dan en kan gard. Kan i ti pe fer preparasyon pour fer sa, i ti ganny arete. Pedro ti pas 18 mwan dan prizon kot i ti kontiny son konplo kont gouvernman. Antretan, madanm Pedro ti konmans etidye Labib avek Temwen Zeova. Kan i ti ganny large, Pedro ti osi konmans etidye Labib e sa ki i ti aprann lo Zeova ti pous li pour fer bann gran sanzman dan son latitid ek lafason ki i ti konsider lavi. I ti dir: “Mon remersi Zeova ki mon pa’n zanmen touy personn pandan ki mon ti en teroris. Aprezan mon servi lepe lespri, Labib, pour donn dimoun en mesaz lo vre lape ek lazistis andotmo sa bon nouvel lo Rwayonm Bondye.” Pedro ti menm vizit sa kan ki i ti pe plàn detrir pour partaz son mesaz lo lape ek en lemonn san vyolans.

Sa lefe pwisan ki Parol Bondye i kapab annan lo dimoun i donn nou plis rezon pour nou annan lafwa dan promes Bondye ki lafen tou bann move keksoz pou arive. Wi, dimoun pa pou fer bann move keksoz pour touzour me zot pou sanze pour le meyer. Byento, Zeova pou retir Dyab, sa enn ki’n konmans tou bann move keksoz, ki pe kontrol tou bann zafer sa lemonn. Labib i dir: “Lemonn antye i dan pouvwar dyab.” (1 Zan 5:19) Me byento i pou ganny detrir. Bann ki refize aret fer bann move keksoz pou osi ganny detrir. Pa i pou merveye pour viv dan en moman koumsa!

Ki en dimoun i bezwen fer pour fer sir i ganny en lavenir koumsa? Rapel byen ki se “konnesans Zeova” ki pe fer bann dimoun sanze ozordi e ki pou anmenn sa bann sanzman dan lemonn antye byento. Par pran konnesans egzakt lo Labib e aplik li dan ou lavi parey Pedro, ou osi ou kapab esper avek enpasyans pour viv dan en lemonn kot “pou annan lazistis.” (2 Pyer 3:13) Alor, nou ankouraz ou pour sezi sa loportinite pour pran konnesans lo Bondye ek Zezi Kri ki ankor disponib la konmela, parski sa i kapab vedir lavi eternel pour ou.—Zan 17:2, 3.

[Not anba lo paz]

[Pwen adisyonnel lo paz 9]

Ou osi ou kapab esper avek enpasyans pour viv dan en lemonn kot “pou annan lazistis.”—2 PYER 3:13