LESON 32

Rwayonm Bondye pe dirize!

Edisyon ki enprimen

Rwayonm Bondye ti konmans dirize dan lesyel an 1914. Sa menm lannen, bann dernyen zour ti konmanse, setadir bann gouvernman imen i pros pour fini. Ki mannyer nou konn sa? Nou pou vwar sa ki Labib in predir, sa ki pe arive dan sa lemonn e ki mannyer dimoun i azir depi 1914.

1. Ki profesi Labib i montre?

Liv Danyel dan Labib i montre ki Rwayonm Bondye ti pou konmans dirize a lafen en peryod letan ki ganny apele “set letan.” (Danyel 4:16, 17) Plizyer syek pli tar, Zezi ti refer avek sa menm peryod letan konman “letan fikse bann nasyon” e i ti dir ki sa peryod letan pa ti ankor fini. (Lik 21:24) Parey nou pou vwar, sa set peryod letan ti fini an 1914.

2. Ki pe arive dan lemonn e ki mannyer dimoun pe azir depi 1914?

Bann disip Zezi ti demann li: “Ki siny ki pou montre ki ou la e ki lafen sa lemonn i pros pour arive?” (Matye 24:3) Dan son larepons, Zezi ti predir ki bokou keksoz ti pou arive apre ki i’n konmans dirize dan lesyel konman lerwa dan Rwayonm Bondye. Sa i enkli lager, mankman manze ek tranblemandter. (Lir Matye 24:7.) Labib ti osi predir ki latitid dimoun dan “bann dernyen zour” ti pou fer lavi “vreman difisil.” (2 Timote 3:1-5) Sa bann keksoz ki pe pase dan lemonn ensi ki move latitid dimoun in vin pli evidan depi 1914.

3. Akoz keksoz in vin sitan move depi ki Rwayonm Bondye in konmans dirize?

Dek ki Zezi ti vin Lerwa dan Rwayonm Bondye, i ti lager kont Satan ek son bann demon dan lesyel. Satan ti perdi sa lager. Labib i dir ki “[Satan] ek son bann lanz ti ganny zete lo later.” (Revelasyon 12:9, 10, 12) Satan i vreman ankoler akoz i konnen i pou ganny detrir. Alor akoz sa, en kantite dimoun pe soufer partou lo later. Sanmenm sa lemonn i sitan dan mal! Me Rwayonm Bondye pou retir tou sa bann problenm.

AL PLI O PROFON

Gete ki mannyer nou konnen ki Rwayonm Bondye ti konmans dirize an 1914 e ki sa i vedir pour nou.

4. Kalkilasyon baze lo profesi Labib i anmenn nou lo 1914

Zwe sa VIDEO.

VIDEO: Rwayonm Bondye ti konmans dirize an 1914 (5:02)

Bondye ti fer lerwa ansyen Babilonn, Neboukadnezar, ganny en rev ki ti predir sa ki pou arive dan lavenir. Dapre lenterpretasyon Danyel, sa rev ti aplik avek dominasyon Neboukadnezar ensi ki Rwayonm Bondye.—Lir Danyel 4:17.a

Lir Danyel 4:20-26 e apre servi sa latab pour reponn sa bann kestyon:

(A) Ki Neboukadnezar ti vwar dan son rev?—Vwar verse 20 ek 21.
(B) Ki ti pou arive avek sa pye dibwa?—Vwar verse 23.
(C) Ki ti pou arive a lafen sa “set letan”?—Vwar verse 26.

Ki sa pye dibwa i annan pour fer avek Rwayonm Bondye

PROFESI (Danyel 4:20-36)

Dominasyon

(A) En gro pye dibwa

Dominasyon ti ganny enteronpe

(B) “Koup sa pye dibwa” e les “set letan” pase

Siko sa pye dibwa ki ganny sere avek en serk an fer ek kwiv.

Dominasyon ti rekonmanse

(C) “Ou pou reganny ou rwayonm”

Dan premye lakonplisman sa profesi . . .

(D) Ki sa pye dibwa ti reprezante?—Vwar verse 22.
(E) Ki mannyer son dominasyon ti ganny enteronpe?—Lir Danyel 4:29-33.
(F) Ki ti arive avek Neboukadnezar a lafen sa “set letan”?—Lir Danyel 4:34-36.

PREMYE LAKONPLISMAN

Dominasyon

(D) Neboukadnezar, Lerwa Babilonn

Dominasyon ti ganny enteronpe

(E) Apre 606 avan Kris, Neboukadnezar ti perdi lespri e i pa ti kapab dirize pour set an

Neboukadnezar ater pe manz zerb parey zannimo.

Dominasyon ti rekonmanse

(F) Neboukadnezar ti revin byen e i ti rekonmans dirize

Dan dezyenm lakonplisman sa profesi . . .

(G) Ki sa pye dibwa i reprezante?—Lir 1 Kronik 29:23.
(H) Ki mannyer dominasyon sa bann lerwa ti ganny enteronpe? Ki mannyer nou konnen ki sa ti ankor leka ler Zezi ti lo later?—Lir Lik 21:24.
(I) Kan e kote sa dominasyon ti rekonmanse?

DEZYENM LAKONPLISMAN

Dominasyon

(G) Bann lerwa Izraelit ki reprezant dominasyon Bondye

Bann lerwa Izraelit lo tronn. Lalimyer pe kler lo zot.

Dominasyon ti ganny enteronpe

(H) Zerizalenm ti ganny detrir e bann lerwa Izraelit ti nepli dirize pour 2,520 lannen

Zerizalenm pe ganny detrir an 607 avan Kris. Apre 2,520 an i pase.

Dominasyon ti rekonmanse

(I) Zezi i konmans dirize konman Lerwa dan Rwayonm Bondye dan lesyel

Zezi lo son tronn dan lesyel pe diriz lo later an 1914. Lalimyer pe kler lo li.

Ki kantite letan sa “set letan” ti dire?

Serten verse dan Labib i ed nou pour konpran lezot verse. Par egzanp, liv Revelasyon dan Labib i dir ki trwa letan edmi i egal 1,260 zour. (Revelasyon 12:6, 14) Set letan i fer de fwa plis setadir 2,520 zour. Parfwa Labib i servi en zour pour reprezant en lannen. (Ezekyel 4:6) Sa i leka avek sa profesi dan liv Danyel konsernan sa set letan. Sa set letan i reprezant 2,520 lannen.

5. Lemonn in sanze depi 1914

Zwe sa VIDEO.

VIDEO: Lemonn in sanze depi 1914 (1:10)

Zezi ti predir ki mannyer sa lemonn ti pou ete apre ki i’n vin Lerwa. Lir Lik 21:9-11 e apre reponn sa kestyon:

Eski i annan serten sa bann keksoz ki ou menm ou’n vwar oubyen ou’n tann koz lo la?

Zapot Pol ti dir ki mannyer dimoun ti pou ete dan bann dernyen zour. Lir 2 Timote 3:1-5 e apre reponn sa kestyon:

Ki serten latitid ki ou menm ou’n remarke dan dimoun ozordi?

Diferan portre: Bann diferan senn ki montre kondisyon lemonn dan bann dernyen zour. 1. En sef larme lo en platform pe kriye lebra anler. 2. Bann batiman ki’n ganny detrir par en tranblemandter. 3. Bann avyon lager. 4. Bann dimoun avek mask. 5. Bann Twin Towers New York ki pe brile apre en latak teroris. 6. En zonm pe servi drog. 7. En msye pe maltret son madanm. 8. Drog ek lalkol. 9. De madanm avek lenz lanmod pe tir en selfi. 10. En lafoul pe danse. 11. Bann protestasyon dan semen.

6. Lefet ki Rwayonm Bondye pe dirize, sa i devret motiv nou

Lir Matye 24:3, 14 e apre reponn sa bann kestyon:

Ki travay enportan ki montre ki Rwayonm Bondye pe dirize?
Ki mannyer ou kapab partisip dan sa travay?

Rwayonm Bondye pe dirize dan lesyel e byento, i pou diriz lo later. Lir Ebre 10:24, 25 e apre reponn sa kestyon:

Ki nou tou nou devret fer vi ki nou “vwar sa zour pe aprose”?

Diferan portre: 1. En etidyan pe asiste en renyon Temwen Zeova. 2. Sa menm etidyan Labib pe prese avek en dimoun ki’n zwenn. — Si ou aprann en keksoz ki kapab ed e sov lezot dimoun, ki ou pou fer?

SI EN DIMOUN I DEMANDE: “Akoz Temwen Zeova pe toultan koz 1914?”

Ki ou ti pou dir li?

REZIMEN

Profesi Labib e sa ki pe arive dan lemonn ozordi i montre ki Rwayonm Bondye pe dirize. Nou montre ki nou krwar sa, ler nou pres lo sa Rwayonm e asiste renyon kongregasyon.