Kestyon Lekter

Pour plizyer lannen, nou bann piblikasyon in eksplike ki Gog sorti Magog pe refer avek Satan oubyen Dyab apre ki i’n ganny pouse dan lesyel. Akoz? Parski nou’n aprann dan liv Revelasyon ki Satan ti pou sa enn ki diriz latak kont pep Bondye dan lemonn antye. (Rev. 12:1-17) Alor nou ti krwar ki Gog i en lot non profetik pour Satan.

Par kont, sa leksplikasyon ti soulev plizyer kestyon enportan. Annou vwar enn de legzanp. Ler Zeova ti koz konsernan destriksyon Gog, i ti dir: “Mon pou fer tou sort kalite gro zwazo ek bann bebet sovaz dan lakanpanny manz ou.” (Ezek. 39:4) Apre Zeova ti azoute: “Sa zour mon pou donn Gog en latonm laba Izrael . . . Zot pou anter Gog laba ansanm avek son lafoul.” (Ezek. 39:11) Ki mannyer bann “gro zwazo ek bann bebet sovaz dan lakanpanny” i kapab manz Satan? Ki mannyer Satan i kapab ganny “en latonm” lo later? Labib i klerman montre nou ki Satan pou ganny zete dan labim pour 1,000 an, me i pa pou ganny manze oubyen antere.​—Rev. 20:1, 2.

Labib i osi dir ki a lafen sa 1,000 an, Satan pou ganny large dan labim e “i pou sorti pour tronp bann nasyon dan tou kwen later, Gog ek Magog, pour rasanble zot pour lager.” (Rev. 20:8) Be ki mannyer Satan i kapab tronp Gog si i li menm li Gog? Alor “Gog” pa pe refer avek Satan dan profesi Ezekyel ni dan liv Revelasyon.

Alor, lekel Gog sorti Magog? Pour nou kapab reponn sa kestyon, nou bezwen egzamin Labib pour vwar lekel ki atak pep Bondye. Labib pa zis koz lo latak “Gog sorti Magog,” me i osi refer avek en latak par “lerwa nor” e osi en latak par “bann lerwa later.” (Ezek. 38:2, 10-13; Dan. 11:40, 44, 45; Rev. 17:14; 19:19) Eski sak sa bann resi pe refer avek diferan latak? I pa paret. I tre probab ki Labib pe servi diferan non pour dekrir menm latak. Kwa ki fer nou dir sa? Parski nou aprann dan Labib ki tou bann nasyon lo later pou partisip dan sa dernyen latak ki pou fer lager Armagedon konmanse.​—Rev. 16:14, 16.

Ler nou konpar tou sa bann verse Labib konsernan sa dernyen latak kont pep Bondye, i evidan ki sa non Gog sorti Magog pa pe refer avek Satan me avek plizyer nasyon ki’n ralye ansanm. Eski sa bann nasyon pou ganny dirize par “lerwa nor”? Nou pa asire. Me sa nide i paret an armoni avek sa ki Zeova ti dir konsernan Gog: “Ou pou sorti kot ou, sa landrwa pli lwen dan nor, ou avek bokou pep, zot tou lo zot seval, en gran lafoul, en gran larme.”​—Ezek. 38:6, 15.

Pareyman, get sa ki profet Danyel ki ti viv dan menm letan ki Ezekyel ti dir konsernan lerwa nor: “Bann rapor sorti dan les e dan nor pou trouble li e i pou ale avek en gran lakoler pour ekstermin e detri bokou. I pou met son bann latant rwayal ant sa gran lanmer ek sa zoli montanny sen e ler son lafen pou arive, i pou napa personn pour ed li.” (Dan. 11:44, 45) Sa i annakor avek sa ki liv Ezekyel i dir lo sa ki Gog pou fer.​—Ezek. 38:8-12, 16.

Ki pou arive apre sa dernyen latak? Danyel i dir nou: “Pandan sa letan, Misel [Zezi Kri] pou pran aksyon [pandan Armagedon], sa gran prens ki pe debout [depi 1914] an faver ou pep. I pou annan en ladetres [sa gran ladetres], enn ki pa’n zanmen arive depi ki en nasyon i egziste ziska sa letan. Pandan sa letan ou pep pou ganny delivre, tou dimoun ki son non in ganny ekrir dan sa liv.” (Dan. 12:1) Sa ki Zezi, reprezantan Bondye, pou fer i osi ganny dekrir dan Revelasyon 19:11-21.

Me lekel “Gog ek Magog” dan Revelasyon 20:8? Sa i bann ki rebel kont Zeova e ki pou atak son pep pandan sa tes final apre sa 1,000 an. Zot pou annan menm latitid vyolan ki ‘Gog sorti Magog,’ setadir sa bann nasyon ki pou atak pep Bondye a lafen sa gran ladetres. Tou le de group pou ganny detrir pour touzour. (Rev. 19:20, 21; 20:9) Alor, i paret fer sans ki tou sa bann ki pou rebel apre lafen sa 1,000 an i ganny apele “Gog ek Magog.”

Nou kontan etidye Parol Bondye e nou esper avek enpasyans pour konnen lekel “lerwa nor.” Me nenport ki ki pou fer bann nasyon atak pep Bondye, nou asire ki (1) Gog sorti Magog ek son bann larme pou ganny defet e ganny detrir, (2) nou Lerwa ki pe rennyen, Zezi Kri pou sov pep Bondye e anmenn zot dan en nouvo lemonn kot i pou annan lape ek sekirite.​—Rev. 7:14-17.