Sapit Enn

Ini dan Ladorasyon dan nou Letan—Ki i vedir?

1, 2. (a) Ki progresyon remarkab ki pe arive dan nou lepok? (b) Ki lesperans merveye bann dimoun ki annan leker senser i annan?

DAN lemonn antye i annan en progresyon remarkab anver linite dan ladorasyon. I pe ini plizyer milyon dimoun dan tou nasyon, tribi, ek lalang. Bokou plis dimoun pe ganny rasanble sak lannen. Sa bann dimoun i ganny idantifye dan Labib konman “bann temwen” Zeova e zot ganny apele konman “en gran lafoul.” Zot ofer Bondye “ladorasyon lizour konman aswar.” (Izai 43:10-12; Revelasyon 7:9-15) Akoz zot fer sa? Parski zot in reisi konn Zeova konman sa sel vre Bondye. Sa i motiv zot pour viv zot lavi an armoni avek son bann prensip drwat. Deplis, zot in aprann ki nou pe viv dan “bann dernyen zour” sa monn mesan, ki Bondye pou detri byento, e ranplas li avek son nouvo monn merveye.—2 Timote 3:1-5, 13; 2 Pyer 3:10-13.

² Parol Bondye i fer sa bann promes swivan: “En pti pe letan ankor, e sa enn mesan pou nepli la . . . Me bann ki annan limilite pou posed later, e zot pou vreman rezwir dan labondans lape.” (Psonm 37:10, 11) “Bann dimoun drwat pou posed later, e zot pou reste lo la pour touzour.” (Psonm 37:29) “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”—Revelasyon 21:4.

 3. Konman ki vre linite dan ladorasyon pe ganny akonpli?

³ Sa bann ki ini dan vre ladorasyon ozordi pou vin bann premye rezidan sa nouvo monn. Zot in aprann kisisa lavolonte Bondye e zot pe fer li otan ki zot kapab. Pour montre lenportans konn e fer lavolonte Bondye, Zezi ti dir: “[Lavi eternel, NW] savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:3) Zapot Zan ti ekri: “Lemonn pou disparet ek tou son bann dezir; me sa ki fer lavolonte Bondye i reste eternelman.”—1 Zan 2:17.

Ki i vreman sinifye

 4. (a) Ki rasanbleman sa kantite dimoun dan ladorasyon ini dan nou lepok i vreman sinifye? (b) Konman Labib i dekrir sa rasanbleman?

⁴ Ki rasanbleman sa kantite dimoun dan ladorasyon ini dan nou lepok i sinifye? I levidans kler ki nou vreman pros avek lafen sa monn mesan, e ki nouvo monn Bondye pou konmans toudswit apre. Nou pe temwanny lakonplisman bann profesi Labib ki’n predir sa rasanbleman enportan. Enn sa profesi i dir: “I pou arive dan parti final bann zour [sa bann dernyen zour] ki montanny lakaz Zeova [son ladorasyon eleve] pou ganny solidman etabli parlao bann montanny [parlao nenport ki lezot ladorasyon], . . . e la ki bann pep pou rasanble. E bokou nasyon pou sertennman ale e dir: ‘Vini, zot bann pep, e annou mont lo montanny Zeova e kot lakaz Bondye Zakob; e i pou enstri nou konsernan son semen, e nou pou mars dan son santye.’”—Mika 4:1, 2; Psonm 37:34.

5, 6. (a) Dan ki sans ki bann nasyon pe tourn anver Zeova? (b) Ki bann kestyon ki nou devret demann nou lekor?

⁵ Kantmenm bann nasyon antye pa pe vin dan lakaz spirityel Zeova pour ador li, plizyer milyon endividi sorti dan tou nasyon pe fer li. Anmezir ki zot aprann konsernan plan Zeova ki ranpli avek lanmour ek son personnalite atiran, zot leker i ganny touse oprofon. Avek limilite, zot rod sa ki Bondye i ekspekte zot fer. Zot lapriyer i parey sa enn ki sa psalmis ti fer: “Ansenny mwan pour fer ou lavolonte, akoz ou mon Bondye.”—Psonm 143:10.

⁶ Eski ou kapab vwar ou parmi sa gran lafoul dimoun ki Zeova pe anmenn ansanm pour ador li dan linite? Eski ou mannyer azir anver lenstriksyon ki ou’n gannyen sorti dan son Parol i montre ki ou vreman rekonnet ki i sorti kot Zeova li menm? Ziska ki degre ou pou “mars dan son santye”?

Ki mannyer i ganny akonpli

 7. (a) Ziska ki degre linite dan ladorasyon pou finalman ganny akonpli? (b) Akoz i irzan pour vin en adorater Zeova konmela menm, e ki mannyer nou kapab ed lezot pour fer sa?

⁷ Plan Zeova se ki tou bann kreatir ki annan lentelizans i ganny inifye dan vre ladorasyon. Nou pe esper avek enpasyans sa moman kot tou dimoun pou ador sa sel vre Bondye! (Psonm 103:19-22) Me avan ki sa i arive, Zeova pou bezwen elimin tou sa bann ki refize fer son lavolonte drwat. Avek mizerikord, i donn lavertisman davans, afen ki tou dimoun i kapab ganny sa loportinite pour sanz zot fason viv. (Izai 55:6, 7) Alor, denozour sa lapel irzan pe ganny fer avek “tou nasyon, tribi, lalang ek pep” pour “donn Bondye loner e rann li laglwar, parski ler son zizman in arive. Ador sa Enn ki’n fer lesyel, later, lanmer ek bann sours delo!” (Revelasyon 14:6, 7) Eski ou’n aksepte sa lenvitasyon? Si wi, ou annan sa privilez pour envit lezot pour konn e ador sa vre Bondye.

 8. Apre ki nou’n aprann bann lansennyman debaz lo Labib, ki lezot progre nou devret seryezman esey fer?

⁸ I pa dan plan Zeova pour li ganny adore par bann dimoun ki dir ki zot krwar dan li me selman zot kontinyen resers zot prop lentere. Bondye i oule ki bann dimoun i “ranpli zot avek konnesans [egzakt, NW] son lavolonte” e demontre sa dan zot lavi. (Kolosyen 1:9, 10) Alor, bann dimoun rekonesan ki aprann bann lansennyman debaz lo Labib i anvi progrese ver matirite Kretyen. Zot dezir se pour konn Zeova pli oprofon, pour elarzi e ogmant zot konprenezon lo son Parol, e pour aplik li pli plennman dan zot lavi. Zot esey reflekte bann kalite nou Papa seles e vwar bann keksoz parey li i vwar. Sa i pous zot pour rod bann fason pour partisip dan sa travay ki Zeova in demann son bann serviter pour fer lo later dan nou lepok. Eski ou osi ou annan sa dezir?—Mark 13:10; Ebre 5:12–6:3.

 9. Dan ki fason vre linite i kapab posib ozordi?

⁹ Labib i montre ki sa bann ki servi Zeova i bezwen vin en pep ini. (Efezyen 4:1-3) Sa linite i bezwen egziste konmela, kantmenm nou pe viv dan en monn divize e nou ankor pe esey konbat avek nou lenperfeksyon. Zezi ti senserman priye ki tou son bann disip i vin en sel, e ki zot rezwir vre linite. Ki sa i vedir? Premyerman, ki zot pou annan en bon relasyon avek Zeova ek son Garson. Dezyenmman, zot pou ini avek kanmarad. (Zan 17:20, 21) Pour akonpli sa lobzektif, kongregasyon Kretyen i servi konman sa lorganizasyon atraver ki Zeova i enstri son pep.

Ki bann Fakter ki kontribye ver Linite?

10. (a) Ki nou devlope kan nou personnelman servi Labib pour rod larepons bann kestyon ki annan pour fer avek nou? (b) Analiz bann fakter ki kontribye pour linite Kretyen par reponn sa bann kestyon dan paragraf.

¹⁰ Set fakter prensipal ki kontribye pour anmenn linite dan ladorasyon in ganny ekri pli ba. Kan ou pe reponn sa bann kestyon, reflesir lo ki mannyer sak pwen i annan en lefe lo ou relasyon avek Zeova ek ou bann konpanyon Kretyen. Rezonn lo sa bann pwen e regard bann verse ki’n ganny mansyonnen pour ed ou devlop lasazes Bondye, abilite pour reflesir, ek disernman—bann kalite ki nou tou nou bezwen. (Proverb 5:1, 2; Filipyen 1:9-11) Egzamin sa bann fakter enn par enn.

(1) Nou rekonnet drwa Zeova pour etabli bann standar pour sa ki byen ek sa ki mal. “Met ou konfyans dan Zeova avek tou ou leker e pa apiy lo ou prop lentelizans. Dan tou ou semen port latansyon lo li, e li i pou fer drwat tou ou santye.”—Proverb 3:5, 6.

Akoz nou bezwen rod konsey ek gidans Zeova kan nou pe fer bann desizyon? (Psonm 146:3-5; Izai 48:17)

(2) Nou annan Parol Bondye pour gid nou. “Kan nou ti anons zot parol Bondye, zot ti ekoute e aksepte li, non pa konman parol zonm, me konman parol Bondye parey i ete, e ki aktif dan zot bann krwaryan.”—1 Tesalonisyen 2:13.

Ki danze i annan pour fer keksoz zis akoz nou “santi” i byen? (Proverb 14:12; Zeremi 10:23, 24; 17:9)

Si nou pa konnen ki konsey Labib i donnen lo en serten keksoz, ki nou devret fer? (Proverb 2:3-5; 2 Timote 3:16, 17)

(3) Nou tou nou benefisye avek menm progranm nouritir spirityel. “Tou ou bann garson pou bann dimoun ki pou ganny ansennyen par Zeova.” (Izai 54:13) “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour [destriksyon] Senyer pe aprose.”—Ebre 10:24, 25.

Konman ki sa bann ki profit bann dispozisyon ki Zeova in donnen pour nouritir spirityel pou benefisye? (Izai 65:13, 14)

(4) Zezi Kri, e non pa okenn imen, ki nou Sef. “Zot pa devre apel personn ‘Met’ akoz zot tou, zot frer e zot annan zis en sel Met. E pa apel personn isi lo later ‘Papa’, akoz zot annan zis en sel Papa ki dan lesyel. Pa fer apel zot ‘sef’ akoz zot annan en sel ‘Sef’, limenm Mesi.”—Matye 23:8-10.

Eski okenn antre nou i devret krwar ki nou pli enportan ki lezot? (Romen 3:23, 24; 12:3)

(5) Nou vwar gouvernman Rwayonm Bondye konman sa sel lespwar pour limanite. “La ki mannyer zot devre priye: ‘Nou Papa ki dan lesyel ki ou non sen i ganny glorifye; ki ou Renny i ganny etabli; ki ou lavolonte i ganny akonpli lo later parey dan lesyel.’ Rod plito Rwayonm Bondye ek son lazistis.”—Matye 6:9, 10, 33.

Ki mannyer “rod plito Rwayonm” i ede protez nou linite? (Mika 4:3; 1 Zan 3:10-12)

(6) Lespri sen i prodwir bann kalite dan bann serviter Zeova ki esansyel pour linite Kretyen. “Fri lespri se lanmour, lazwa, lape, pasyans, bonte, [lafwa, NW], ladouser, kontrol lo son prop lekor.”—Galat 5:22, 23.

Ki nou bezwen fer pour ki lespri Bondye i prodwir son fri dan nou? (Akt 5:32)

Konman ki ler nou annan lespri Bondye, sa i annan en lefe lo nou relasyon avek lezot Kretyen? (Zan 13:35; 1 Zan 4:8, 20, 21)

(7) Bann vre serviter Bondye i partisip dan predikasyon sa bon nouvel Rwayonm. “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Matye 24:14.

Kwa ki devret motiv nou pour anvi partisip plennman dan sa aktivite predikasyon? (Matye 22:37-39; Romen 10:10)

11. Ki lefe i annan lo nou, kan nou aplik bann laverite Biblik dan nou lavi?

¹¹ Ador Zeova dan linite i anmenn nou pli pre avek li e permet nou pour rezwir lasosyasyon ankourazan avek nou bann konpanyon Kretyen. Psonm 133:1 i dir: “Regarde! Konman i byen e konman i agreab pour bann frer viv ansanm dan linite!” Pa i en soulazman pour elwanny nou avek sa monn avek tou son bann dezir egois, imoralite, ek vyolans e pour rasanble avek sa bann ki vreman kontan Zeova e ki obei son lalwa!

Evit bann Tandans ki kree Divizyon

12. Akoz nou bezwen evit en leta lespri endepandan?

¹² Pour pa gat nou linite presye, nou bezwen evit bann tandans ki kree divizyon. Enn parmi se lespri endepandan avek Bondye ek son bann lalwa. Zeova i ed nou pour evit sa par revel nou sa enn ki responsab pour sa, Satan Dyab. (2 Korentyen 4:4; Revelasyon 12:9) Satan i sa enn ki ti enfliyans Adan ek Ev pour inyor sa ki Bondye ti’n dir e pour fer bann desizyon ki kontrer avek lavolonte Bondye. An rezilta, sa in anmenn maler pour zot e pour nou osi. (Zenez 3:1-6, 17-19) Sa lemonn i ranpli avek leta lespri endepandan avek Bondye ek son lalwa. Alor nou bezwen retir sa leta lespri dan nou.

13. Kwa ki pou montre si nou senserman pe prepare pour viv dan nouvo monn drwat Bondye?

¹³ Par egzanp, konsider promes merveye Zeova pour ranplas sa monn mesan ki nou pe viv ladan avek nouvo lesyel ek en nouvo later “kot pou annan lazistis.” (2 Pyer 3:13) Eski sa pa i pous nou pour konmans prepar nou pour viv dan sa letan kot lazistis pou rennyen? Sa i enplik port latansyon lo sa konsey kler dan Labib: “Pa bezwen kontan lemonn ni sa bann keksoz ki dan lemonn. Si en dimoun i kontan lemonn, i napa lanmour pour nou Papa dan li.” (1 Zan 2:15) Alor, nou evit leta lespri sa monn—son latitid endepandan, son dezir egois, son imoralite ek vyolans. Nou fer li konman en labitid pour ekout Zeova e pour obei li avek tou nou leker, kantmenm nou lekor enparfe i tant pour dir nou fer lekontrer. Dan tou laspe nou lavi nou donn levidans ki nou fason panse ek nou motivasyon i konsantre lo fer lavolonte Bondye.​—Psonm 40:8.

14. (a) Akoz i enportan pour sezi sa loportinite konmela menm pour aprann bann prensip Zeova e aplik zot dan nou lavi? (b) Sa bann verse ki’n ganny site dan sa paragraf i sinifye kwa pour nou personnelman?

¹⁴ Kan sa letan fikse i arive pour Zeova detri sa move sistenm ek tou sa bann ki prefer son bann fason viv, Zeova li menm pa pou retard sa zour. I pa pou kennsel sa letan e anvoy li pour plitar oubyen sanz son standar pour satisfer sa bann ki ankor atase avek sa monn anmenmtan ki zot pe aprann e fer lavolonte Bondye avek de leker. La i letan pour pran aksyon! (Lik 13:23, 24; 17:32; 21:34-36) Pa i en lazwa pour vwar sa gran lafoul pe sezi sa loportinite presye, e avek lantouzyasm pe resers lenstriksyon ki Zeova in donnen atraver son Parol ek son lorganizasyon e pe mars dan linite dan son santye ver sa nouvo monn! E pli nou aprann konsernan Zeova, pli nou pou kontan li e anvi servi li.

Revizyon

• Ki plan Zeova konsernan ladorasyon?

• Ki lezot progre nou merit seryezman fer apre ki nou’n aprann bann lansennyman debaz dan Labib?

• Ki nou kapab fer personnelman pour nou ini avek lezot adorater Zeova?

[Portre lo paz 4]

‘Bann ki annan limilite pou posed later, e rezwir dan labondans lape’