Parol Zeova i vivan

Bann pwen enteresan dan liv Agai ek Zekarya

NOU dan lannen 520 A.N.L. I ti fer sez an depi ki bann Zwif ki ti’n retournen sorti legzil an Babilonn ti’n fer fondasyon dan tanp Zeova. Me selman, tanp pa ti ankor fini e sa travay konstriksyon ti’n ganny enterdi. Zeova ti apwent profet Agai e de mwan plitar profet Zekarya pour anons Son parol.

Agai ek Zekarya ti annan menm lobzektif: Pour motiv sa pep pour rekonmans sa travay lo rekonstriksyon tanp. Sa de profet ti reisi dan zot zefor e sa tanp ti fini ganny konstrir senk an plitar. Sa ki Agai ek Zekarya ti prese in ganny rikorde dan liv Labib ki port zot non. Liv Agai ti ganny konplete dan lannen 520 A.N.L. e Zekarya dan lannen 518 A.N.L. Parey sa bann profet, Bondye in donn nou osi en travay ki nou bezwen fini avan lafen sa sistenm. Sa i sa travay predikasyon e fer disip. Annou vwar ki lankourazman nou kapab tire dan liv Agai ek Zekarya.

“FIKSE ZOT LEKER LO ZOT SEMEN”

(Agai 1:1–2:23)

Dan en lespas 112 zour Agai ti anons kat mesaz ki ti pou motiv bann Zwif. Sa enn premye ti: “‘Fikse zot leker lo zot semen. Al lo montanny, e zot devret anmenn dibwa. E konstrir sa lakaz pour mon kapab pran plezir ladan e pour ki mon kapab ganny glorifye,’ Zeova ti dir.” (Agai 1:7, 8) Sa pep ti reazir dan en bon fason. Dan sa dezyenm mesaz ti annan sa promes: “Mon [Zeova] pou ranpli sa lakaz avek laglwar.”—Agai 2:7.

Dapre sa trwazyenm mesaz, vi ki zot ti’n negliz travay rekonstriksyon tanp sa ti fer ‘sa pep ek tou travay zot lanmen’ sal devan Zeova. Me, depi sa zour ki travay reparasyon ti konmanse, Zeova ti “pou beni” zot. Parey in ganny dir dan sa katriyenm mesaz, Zeova ti pou “detrir lafors rwayonm bann nasyon” e etablir Gouverner Zorobabel parey “en bag pour sele.”—Agai 2:14, 19, 22, 23.

Larepons pour bann kestyon lo Labib:

1:6—Ki savedir sa lekspresyon “zot bwar, me pa ziska zot sou”? Sa lekspresyon i senpleman montre ki diven ti limite. Akoz Zeova pa ti beni zot, diven ki zot ti fer ti limite e pa ti ase pou fer zot sou.

2:6, 7, 21, 22—Lekel oubyen kwa ki pe provok sa sekous e ki lefe sa i anmennen? Zeova ki pe “sekwe tou bann nasyon” par sa travay predikasyon mondyal konsernan mesaz Rwayonm. Sa travay predikasyon i osi fer ki “bann keksoz presye sorti dan tou nasyon” i ganny anmennen dan lakaz Zeova, ki alors ranpli li avek laglwar. Avek letan, “Zeova bann larme” pou sekwe “lesyel ek later, lanmer ek later sek,” pour fer disparet sa move lemonn ki egziste ozordi.—Ebre 12:26, 27.

2:9—Dan ki fason ‘laglwar sa dezyenm lakaz pou vin pli gran ki sa enn premye’? Sa ti pou leka dan omwen trwa fason: Premyerman lefet ki tanp ti’n egziste pour en kantite lannen, dezyenmman akoz sa enn ki ti pou ansenny ladan e trwazyenmman akoz sa bann ki ti zwenn ansanm ladan pour ador Zeova. Menm si tanp Salomon ki ti byen zoli ti egziste pour 420 lannen, depi 1027 A.N.L. ziska 607 A.N.L., sa “dernyen lakaz” ti egziste pour 580 lannen, depi ki i ti fini ganny konstrir an 515 A.N.L. ziska son destriksyon lannen 70 N.L. Deplis, Mesi setadir Zezi Kri ki ti ansenny dan sa “dernyen lakaz” e i ti annan plis dimoun ki ti vin ladan, ki dan “sa enn premye” pour ador Bondye.—Akt 2:1-11.

Leson pour nou:

1:2-4. Lopozisyon ki nou gannyen dan nou travay predikasyon pa devret fer nou sanz nou priyorite par rod plito nou prop lentere olye ki “rod plito Rwayonm.”—Matye 6:33.

1:5, 7. I saz pour nou ‘fikse nou leker lo nou semen’ e reflesir lo ki mannyer nou pe anmenn nou lavi i kapab annan en lefe lo nou relasyon avek Bondye.

1:6, 9-11; 2:14-17. Bann Zwif dan letan Agai ti pe travay dir pour fer zot bann aktivite personnel me zot pa ti satisfe avek sa ki zot ti rekolte pour zot travay dir. Zot ti pe negliz tanp, alor zot pa ti ganny benediksyon Bondye. Nou devret fer nou bann aktivite spirityel pas an premye e donn Bondye en servis avek tou nou leker, e gard antet ki swa nou annan ptigin oubyen bokou lo kote materyel, se ‘benediksyon Zeova ki fer ris.’—Proverb 10:22.

2:15, 18. Zeova ti ankouraz bann Zwif depi sa zour pour fikse zot leker, pa lo zot neglizans dan lepase, me lo sa travay rekonstriksyon. Pareyman nou devret fer en gran zefor pour konsantre lo sa ki devan nou anmezir ki nou ador Bondye.

‘PA PAR POUVWAR, ME PAR MON LESPRI’

(Zekarya 1:1–14:21)

Zekarya ti konmans son aktivite profetik par envit bann Zwif pour ‘retourn ver Zeova.’ (Zekarya 1:3) Sa wit vizyon ki ti swiv ti donn lasirans ki Bondye ti pou siport sa travay pour rekonstrir tanp. (Vwar bwat “Wit vizyon senbolik Zekarya.”) Sa travay konstriksyon ti pou terminen, “pa par en lafors militer, ni par pwisans, me par lespri [Zeova].” (Zekarya 4:6) Sa zonm ki ti apel Bourzon ti “pou batir tanp Zeova” e i ti “bezwen vin en pret lo son tronn.”—Zekarya 6:12, 13.

En delegasyon sorti Betel ti ganny anvoye pour demann kestyon bann pret konsernan lefet ki zot ti pe zennen pour komemor destriksyon Zerizalenm. Zeova ti dir avek Zekarya ki sa dey ki zot ti ladan pandan sa kat fwa ki zot ti zennen pour komemor sa maler ki ti ariv avek Zerizalenm ti pou ganny ranplase par “en gran lazwa ek bann bon sezon lafet.” (Zekarya 7:2; 8:19) Sa de mesaz ki ti swiv ti enkli zizman kont bann nasyon ek bann fo profet, bann profesi konsernan Mesi ek en mesaz restorasyon pour pep Bondye.—Zekarya 9:1; 12:1.

Larepons pour bann kestyon lo Labib:

2:1—Akoz en zonm ti pe mezir Zerizalenm avek en lakord? Aparaman sa aksyon ti pe donn sa lide en miray proteksyon ki’n ganny konstri toultour sa lavil. Sa lanz ti enform sa zonm ki Zerizalenm ti pou vin deplizanpli gran e ganny proteksyon Zeova.—Zekarya 2:3-5.

6:11-13—Eski lefet ki Gran Pret Zozye ti ganny kouronnen sa ti fer li vin an menm tan lerwa ek pret? Non, Zozye pa ti sorti dan laliny rwayal desandans David. Me lefet ki i ti ganny kouronnen, sa ti en fason pour montre ki i ti pe reprezant Mesi. (Ebre 6:20) Sa profesi konsernan “Bourzon” ti akonplir lo Zezi Kri ki sa Lerwa ek Pret dan lesyel. (Zeremi 23:5) Parey Zozye ti servi bann Zwif konman gran pret pour rekonstrir tanp, pareyman Zezi i sa Gran Pret pour vre ladorasyon kot tanp spirityel Zeova.

8:1-23—Kan eski sa dis mesaz ki’n ganny mansyonnen dan sa bann verse ti akonplir? Avan sak mesaz i annan sa lekspresyon “La sa ki Zeova bann larme in dir” e i sa promes ki Bondye pou donn lape son pep. Serten sa bann mesaz ti ganny akonplir dan sizyenm syek A.N.L., me zot tou zot in ganny akonplir swa depi 1919 N.L. oubyen zot pe ganny akonplir denozour.a

8:3—Akoz Zerizalenm ti ganny apele “sa lavil fidel”? Avan son destriksyon an 607 A.N.L., Zerizalenm ti “sa lavil kriyel,” son bann profet ek pret ti koronpi e son bann zabitan ti enfidel. (Tsefanya 3:1; Zeremi 6:13; 7:29-34) Me aprezan ki tanp ti’n fini ganny rebatir e ki bann dimoun ti’n angaz zot pour ador Zeova, toudmenm sa bann laverite ti bezwen ganny anonse e Zerizalenm ti merit ganny apele “sa lavil fidel.”

11:7-14—Ki sa ti vedir kan Zekarya ti kas sa baton ki ti apel “Agreab” e sa lot ki ti apel “Linyon”? Zekarya ti ganny dekrir konman sa enn ki ti ganny anvoye pour “pran swen avek sa troupo ki ti sipoze ganny touye,” setadir bann dimoun parey bann mouton ki ti pe ganny eksplwate par zot bann dirizan. Dan son rol konman en berze, Zekarya ti pe reprezant Zezi Kri ki ti’n ganny anvoye par Bondye ver sa pep ki Bondye ti’n fer en lalyans avek, me zot ti rezet li. Par kas “Agreab” sa i en senbol ki Bondye pou met en lafen avek sa lalyans Lalwa ki i ti fer avek bann Zwif e aret annan sa relasyon agreab avek zot. E par kas “Linyon” sa ti vedir ki sa relasyon fraternel ki ti egziste oparavan ant Zida ek Zerizalenm baze lo zot ladorasyon pour Zeova ti pou nepli egziste.

12:11—Ki si sa “sa gran leokri Adadrimonn dan vale laplenn Megido”? Lerwa Yosiya sorti Zida, ti ganny touye dan en lager avek Faraon Neko sorti Lezip dan sa “vale laplenn Megido” e dey pour son lanmor ti ganny fer pandan plizyer lannen, par sant bann sanson tris. (2 Kronik 35:25) Alors, “sa gran leokri Adadrimonn” i kapab pe refer avek dey ki ti ganny fer pour lanmor Yosiya.

Leson pour nou:

1:2-6; 7:11-14. Zeova i apresye e retourn ver bann ki repantir e ki aksepte reprimann e retourn kot li par ofer li en ladorasyon avek tou zot leker. De lot kote i pa reponn bann ki demann led me ki ‘kontinyen refize port latansyon, kontinyen rebele e bous zot zorey’ anver son mesaz.

4:6, 7. Napa okenn lobstak ki ti tro gran ki lespri Zeova pa ti kapab sirmonte pour fer ki travay rekonstriksyon tanp ti reisi ganny terminen. Nenport ki problenm ki nou kapab rankontre dan nou servis pour Bondye i kapab ganny sirmonte si nou egzers lafwa dan Zeova.—Matye 17:20.

4:10. Anba sirveyans Zeova, Zorobabel ek son pep ti fini fer sa tanp dapre standar o nivo Bondye. I pa tro difisil pour bann imen enparfe viv an armoni avek sa ki Zeova i ekspekte nou fer.

7:8-10; 8:16, 17. Pour ganny faver Zeova, nou bezwen demontre lazistis ek mizerikord, annan labonte leker, e koz laverite avek kanmarad.

8:9-13. Nou ganny benediksyon Zeova ler ‘nou lanmen i for’ an fezan sa travay ki i donn nou pour fer. Sa bann benediksyon i enkli lape, sekirite e lefet ki nou progrese spirityelman.

12:6. Sa bann ki annan sa rol sirveyan parmi pep Zeova i devret “parey en flanbo” setadir vreman annan sa devouman.

13:3. Nou fidelite anver sa vre Bondye ek son lorganizasyon i devret depas sa fidelite ki nou annan pour okenn imen, menm si nou vreman pros avek zot.

13:8, 9. Ti annan en gran kantite aposta ki ti ganny rezete par Zeova, sa ti enkli de group dimoun ki sorti dan sa pei. Zis en tyer ki ti ganny rafinen konmsi atraver dife. Denozour lamazorite bann ki pretann ki zot Kretyen in ganny rezete par Zeova. Zis en ptigin, bann Kretyen swazir, ki ‘kriy lo non Zeova’ e aksepte pour les zot ganny rafinen. Bann Kretyen swazir ek zot bann konpanyon Kretyen i montre ki zot fer plis ki zis dir ki zot Temwen Zeova.

Pouse pour fer plis aksyon ki ranpli avek devouman

Ki mannyer sa ki Agai ek Zekarya ti anonse i annan en lefe lo nou ozordi? Kan nou reflesir lo ki mannyer zot mesaz ti motiv bann Zwif pour konsantre lo sa travay rekonstriksyon tanp, eski pa nou santi nou pouse pour partisip avek plis devouman dan sa travay predikasyon e fer disip?

Zekarya ti predir ki Mesi ti pou vini, “pe monte lo en bourik,” ki i ti pou ganny trai pour “trant pyes larzan,” ki i ti pou ganny bate e ki “bann mouton dan troupo [ti pou] disperse.” (Zekarya 9:9; 11:12; 13:7) Ler nou medit lo lakonplisman bann tel profesi ki Zekarya in ekrir, pa sa i annan en gran lenpak lo nou lafwa! (Matye 21:1-9; 26:31, 56; 27:3-10) Nou konfyans dan Parol Zeova ek son bann dispozisyon pour nou delivrans i vin pli for.—Ebre 4:12.

[Not anba lo paz]

[Bwat lo paz 19]

WIT VIZYON SENBOLIK ZEKARYA

1:8-17: I garanti ki tanp pou ganny konplete e ki lezot lavil dan Zida pou ganny beni.

1:18-21: I promet destriksyon sa ‘kat korn ki’n fer Zida disperse,’ setadir tou bann gouvernman ki ti opoz ladorasyon Zeova.

2:1-13: I montre ki Zerizalenm pou agrandi son teritwar e ki Zeova pou vin en “miray dife toultour li,” setadir en proteksyon.

3:1-10: I montre ki Satan ti konplis pour opoz sa travay lo tanp e ki pese Gran Pret Zozye ti pou ganny efase.

4:1-14: I donn lasirans ki bann lobstak ki parey en montanny setadir ki ti paret enposib pour sirmonte ti pou ganny retire e ki Gouverner Zorobabel ti pou fini konstrir sa tanp.

5:1-4: En maler ti ganny prononse lo bann mesan ki pa ti’n ganny pini.

5:5-11: I predir ki pou annan en lafen avek mesanste.

6:1-8: I promet sirveyans ek proteksyon bann lanz.

[Portre lo paz 16]

Ki ti lobzektif bann mesaz Agai ek Zekarya?

[Portre lo paz 18]

Ki mannyer bann ki annan sa rol sirveyan i “parey en flanbo”?