Napa Zarm Ki Pou Ganny Formen Kont Ou Ki Pou Reisi

“Nenport ki zarm ki pou ganny formen kont ou pa pou reisi.”—IZAI 54:17.

1, 2. Ki mannyer leksperyans bann Temwen Zeova Albani i demontre ki sa ki Izai 54:17 ti dir i vre?

DAN lepase, ti annan en pti group Kretyen ki pa ti per nanryen dan en pti pei avek bokou montanny dan sid les Lerop. En gouvernman Kominis ki pa ti krwar dan Bondye ti esey tou zot mye pour detrir sa group Kretyen. Kantmenm zot ti tortir e fors sa group pour fer bann travay dir e osi atak zot atraver medya, sa gouvernman pa ti kapab detrir sa group. Lekel zot? Zot ti bann Temwen Zeova Lalbani. Menm si pour zot zwenn ansanm pour renyon e pour prese ti vreman difisil, zot perseverans pandan sa bann letan in anmenn loner lo bann Kretyen ek louanz lo non Zeova. Lannen pase pandan dedikasyon zot nouvo fasilite biro brans, en frer ki’n fidel pour bokou lannen ti dir: “Menm si Satan in fer tou sa ki i kapab, i touzour perdi e Zeova i kontinyen ranport laviktwar!”

² Tousala i bann laprev solid ki montre ki sa promes ki Zeova ti fer avek son pep dan Izai 54:17 i vre. Sa verse i dir: “Nenport ki zarm ki pou ganny formen kont ou pa pou reisi, e nenport ki lalang ki pou lev kont ou dan zizman ou pou kondannen.” Listwar i prouve ki napa nanryen ki lemonn Satan i kapab fer ki pou anpes bann vre serviter Zeova ador zot Bondye.

Bann zefor Satan pa pou reisi

3, 4. (a) Kwa ki enplike dan bann zarm ki Satan i servi? (b) Dan ki fason bann zarm Dyab pa’n reisi?

³ Bann zarm ki ganny servi pour atak bann vre adorater Bondye i enkli restriksyon, latak vyolan par bann group dimoun, ganny met dan prizon, e osi ‘servi lalwa pour kree problenm.’ (Psonm 94:20) Aktyelman la konmela pandan ki serten Temwen Zeova pe etidye sa lartik, bokou zot pe ganny “teste” an rapor avek zot fidelite anver Bondye.—Revelasyon 2:10.

⁴ Par egzanp, en biro brans Temwen Zeova ti raporte ki pandan zis enn an ti annan 32 ka kot serviter Bondye ti ganny atake fizikman kan zot ti pe prese. Deplis ti annan 59 lensidan kot lapolis ti detenir bann Temwen Zeova, zenn konman vye e zonm konman fanm ki ti pe prese an piblik. Zot ti tir portre serten, mark zot lanprent ledwa, e met zot dan prizon konman bann kriminel. Lezot ti ganny menase fizikman. Dan en lot pei, i annan plis ki 1,100 dokiman lo bann ka kot bann Temwen Zeova in ganny arete, sarze, oubyen ganny bate. Plis ki 200 parmi sa bann ka ti arive zour zot ti’n rasanble pour komemor lanmor Kris! Kantmenm sa, lespri sen Zeova in ed son pep pour andir sa bann sitiasyon kritik ki swa dan sa bann pei ouswa dan lezot pei. (Zekarya 4:6) Sa gran lakoler ki nou lennmi i annan pa pou aret bann ki pe loue Zeova. Wi, nou asire ki napa okenn zarm ki kapab anpes plan Zeova reisi.

Fo lakizasyon i ganny kondannen

 5. Ki fo lakizasyon ki ti leve kont bann serviter Zeova dan premye syek?

⁵ Izai ti profetize ki pep Bondye ti pou kondann nenport ki lalang ki ti lev kont zot. Dan premye syek, bann Kretyen ti souvan ganny mal reprezante, serten ti dir ki zot ti bann move dimoun. Sa bann parol ki ganny trouve dan Akt 16:20, 21 i zis en legzanp sa bann kalite lakizasyon. Zot ti dir: “Sa bann zonm pe met dezord dan nou lavil, . . . [zot] pe ansenny bann koutim ki nou lalwa i defann nou konman Romen aksepte e pratike.” Dan en lot lokazyon, bann adverser relizye ti esey ensit bann dirizan sa pei pour azir an mal anver bann disip Kris, zot ti dir: “Sa bann zonm in met dezord partou. La aprezan zot in ariv dan nou lavil, e . . . zot tou zot pe fer en bann keksoz kont lalwa Sezar.” (Akt 17:6, 7) Zot ti apel zapot Pol “en nwizans” ek sef bann sekt ki ensit rayot “dan lemonn antye.”—Akt 24:2-5.

6, 7. Dan ki fason bann vre Kretyen i kondann bann fo lakizasyon kont zot?

⁶ Pareyman i pa sirprann nou ki bann vre Kretyen osi ozordi zot fer fas avek bann fo lakizasyon, bann mansonz ki ganny fer avek move lentansyon, ek bann kanpanny ki ganny fer avek zefor pour andomaz zot repitasyon. Me alors, ki mannyer nou kondann sa bann fo lakizasyon?—Izai 54:17.

⁷ Sa bann kalite lakizasyon ek propagann i souvandfwa ganny prouve fo atraver bon kondwit ki bann Temwen Zeova i annan. (1 Pyer 2:12) Kan bann vre Kretyen i prouve ki zot bann dimoun ki obeir lalwa pei e ki zot demontre konsern pour byennet lezot, sa i reponn sa bann fo lakizasyon ki ganny fer kont zot. Nou bon kondwit i koz pour li menm. Kan lezot i obzerv nou perseverans pour fer sa ki byen, zot ganny pouse pour glorifye nou Papa ki dan lesyel e rekonnet bann bon fason viv son bann serviter.—Izai 60:14; Matye 5:14-16.

 8. (a) Kwa ki neseser parler pour nou defann nou lafwa? (b) Kan nou imit Zezi, dan ki fason nou kondann bann fo lakizasyon kont nou?

⁸ Anplis ki nou kondwit konman Kretyen, i neseser parler pour defann nou lafwa avek lardyes. En fason se par fer rapel avek gouvernman ek bann lakour pour proteksyon. (Ester 8:3; Akt 22:25-29; 25:10-12) Parler, kan Zezi ti lo later i ti reponn sa bann kritik piblikman. I ti prouve ki zot bann fo lakizasyon pa ti vre. (Matye 12:34-37; 15:1-11) Vi ki nou pe imit Zezi, nou sezi tou loportinite pour donn en leksplikasyon kler lo nou konviksyon ferm. (1 Pyer 3:15) Annou pa les bann sikannri kot lekol, dan travay ouswa nou manm fanmir ki pa Temwen anpes nou partaz sa laverite lo Parol Bondye avek lezot.—2 Pyer 3:3, 4.

Zerizalenm, “en ros vreman lour”

 9. Ki Zerizalenm ki pe ganny reprezante konman sa “ros vreman lour” ki ganny mansyonnen dan Zekarya 12:3, e lekel ki reprezant li lo later?

⁹ Profesi Zekarya i donn en leklersisman lo rezon akoz bann nasyon i opoz bann vre Kretyen. Remarke ki Zekarya 12:3 i dir: “E i devret arive pandan sa bann zour ki mon pou fer Zerizalenm vin en ros vreman lour pour tou dimoun.” Avek ki Zerizalenm sa profesi ti pe refer avek? Profesi Zekarya konsernan Zerizalenm ti pe refer avek “Zerizalenm ki dan lesyel,” setadir sa Rwayonm seles kot bann Kretyen swazir in ganny apele pour ale. (Ebre 12:22) En pti porsyon bann zeritye sa Rwayonm kot Kris i dirize konman lerwa i ankor lo later. Ansanm avek zot bann konpanyon ki form parti “lezot mouton” zot ankouraz bann dimoun pour rod Rwayonm Bondye la ki i ankor annan letan. (Zan 10:16, NW; Revelasyon 11:15) Ki mannyer bann nasyon in reakte anver sa lenvitasyon? E ki kalite sipor Zeova i donn bann vre adorater ozordi? Annou vwar larepons pandan ki nou egzamin sinifikasyon Zekarya sapit 12. Kan nou fer sa nou kapab annan lasirans ki ‘napa okenn zarm ki pou reisi’ kont pep swazir Bondye ek zot bann asosye ki’n dedye zot lavi avek li.

10. (a) Akoz pep Bondye pe ganny atake? (b) Ki arive avek sa bann ki esey tir sa “ros vreman lour” dan zot semen?

¹⁰ Zekarya 12:3 i endike ki bann nasyon pou ganny “blese severman.” Ki mannyer sa pou arive? Bondye in donn lord ki sa bon nouvel i devret ganny anonse. Bann Temwen Zeova i pran sa travay predikasyon vreman oserye akoz zot oblize fer li. Parkont, mesaz ki ganny anonse lo Rwayonm konman sa sel lespwar pour limanite in vin “en ros vreman lour” pour bann nasyon. Zot esey retir sa ros par enterfer avek sa bann ki pres lo Rwayonm. An fezan sa, bann nasyon ki pe enterfer avek sa travay predikasyon lo Rwayonm in ganny “blese severman” dan bokou landrwa. Menm zot repitasyon in ganny sali e zot in onte akoz zot latak pa’n reisi. Zot pa kapab anpes bann vre adorater ki apresye zot privilez pour anons “levanzil eternel” konsernan sa Rwayonm kot Kris i dirize konman lerwa, aret fer zot travay avan lafen sa sistenm. (Revelasyon 14:6) Kan i ti temwanny vyolans ki zot ti pe fer avek bann serviter Zeova, en gard prizon dan en pei Lafrik ti dir: ‘Zot pe perdi letan dan zot zefor pour persekit sa bann dimoun. Zot pa pou zanmen fer konpromi. O kontrer zot zis ogmante.’

11. Ki mannyer Bondye in gard son promes ki ganny rikorde dan Zekarya 12:4?

¹¹ Lir Zekarya 12:4. La Zeova i promet ki i pou avegle e “konfiz” tou bann ki lager kont son bann predikater kouraze. I’n gard son parol. Par egzanp, dan en pei kot vre ladorasyon ti anba restriksyon, bann ki ti opoz pep Bondye pa ti kapab anpes zot ganny zot nouritir spirityel. En zournal ti menm dir ki bann Temwen Zeova ti pe servi balon pour fer bann piblikasyon baze lo Labib antre dan pei! Sa promes ki Bondye ti’n fer avek son bann serviter fidel ti vin vre. I ti dir: “Mon pou ouver mon lizye e tou seval bann dimoun mon pou fer pa vwar kler.” Avegle avek lakoler, bann lennmi sa Rwayonm pa konnen ki direksyon zot pou ale. Me nou nou konvenki ki Zeova pou prezerv son pep ansanm e demontre konsern pour zot byennet.—2 Lerwa 6:15-19.

12. (a) Dan ki sans Zezi ti konmans en dife kan i ti lo later? (b) Ki mannyer bann restan Kretyen swazir in met bann keksoz an flanm dan en sans spirityel e avek ki rezilta?

¹² Lir Zekarya 12:5, 6. “Bann sef Zida” pe refer avek bann sirveyan parmi pep Bondye. Zeova i fer zot annan en tre gran devouman pour tou bann keksoz ki annan pour fer avek son Rwayonm. Dan en lokazyon, Zezi ti dir son bann disip: “Mon’n vin anmenn en dife lo later.” (Lik 12:49) Vreman, i ti konmans sa dife senbolik. Sa mesaz lo Rwayonm Bondye ti sa size pli enportan ki Zezi ti prese avek devouman. E sa ti lev bann deba so parmi sa nasyon Zwif. (Matye 4:17, 25; 10:5-7, 17-20) Pareyman, “parey en fourno parmi bann pye dibwa e en flanbo dan en ranze dible ki fek ganny koupe” bann ki imit legzanp Zezi dan nou letan zot osi zot met bann keksoz an flanm dan en sans spirityel. Sa liv ki annan pour tit The Finished Mysterya ki ti sorti an 1917 ti ekspoz bann aksyon ipokrit ki bann swadizan Kretyen ti fer. Sa ti provok lakoler parmi bann sef relizye. Pa tro lontan pase, Nouvel Rwayonm No. 37, avek tit “Lafen fo larelizyon i pros!” in fer bokou dimoun reflesir e pran pozisyon anver oubyen kont Rwayonm Bondye.

“Bann latant Zida” i ganny sove

13. Ki sa lekspresyon “bann latant Zida” i endike e akoz Zeova i sov sa bann ki ganny afekte?

¹³ Lir Zekarya 12:7, 8. Dan ansyen Izrael bann latant ti en keksoz popiler ki parfwa ti ganny servi par bann berze ek travayer plantasyon. Sa bann tel kalite dimoun ti pou parmi bann premye ki ti pou ganny afekte si zot lennmi ti vin atak Zerizalenm. Sa lekspresyon “bann latant Zida” i endike ki larestan Kretyen swazir dan nou letan zot dan en laplenn oplenner, dan en sans zot san proteksyon. Dan sa landrwa zot defann lentere sa Rwayonm kot Kris i dirize konman lerwa san annan okenn lafreyer. Zeova bann larme pou sov “bann latant Zida premye” akoz zot en target ki Satan i atak direkteman.

14. Ki mannyer Zeova i defann bann ki dan “bann latant Zida” e anpes zot tonbe?

¹⁴ Vreman, listwar i montre ki Zeova pe defann son bann Kretyen swazir ki bann anbasader sa Rwayonm dan zot “latant” dan laplenn oplenner.b I anpes zot “tonbe” par donn zot lafors ek kouraz parey i ti donn lerwa David sa gerye brav.

15. Akoz Zeova i “anvi ekstermin tou bann nasyon” e dan ki moman i pou fer sa?

¹⁵ Lir Zekarya 12:9. Akoz Zeova i “anvi ekstermin tou bann nasyon”? Sa i akoz zot kontinyelman opoz sa Rwayonm kot Kris pe dirize konman lerwa. Zot pe osi menas e persekit pep Bondye e pour sa zot pou ganny zize. Byento bann ki travay avek Satan isi lo later pou fer en latak final lo bann vre adorater Bondye e sa pou anmenn lemonn ver en destriksyon ki ganny dekrir dan Labib konman Armagedon. (Revelasyon 16:13-16) Zeova konman sa Ziz Siprenm pou reazir anver sa menas, i pou defann son bann serviter e osi sangtifye son non parmi tou bann nasyon.—Ezekyel 38:14-18, 22, 23.

16, 17. (a) Lekel ‘leritaz bann serviter Zeova’? (b) Ki nou landirans kont bann latak Satan i prouve?

¹⁶ Napa okenn zarm ki Satan i servi ki kapab afeblir lafwa oubyen redwir devouman ki pep Bondye i annan dan lemonn antye. Nou anpe spirityelman kan nou konnen ki Zeova i siport nou avek son pouvwar ki i annan pour sov nou e sa i ‘en leritaz ki bann serviter Zeova’ i rezwir. (Izai 54:17) Napa personn ki kapab priv nou sa lape ek prosperite spirityel ki nou posede. (Psonm 118:6) Satan pou kontinyen evant sa laflanm par son bann lopozisyon e i pou esey provok bann tribilasyon. Me sa landirans ki nou annan kantmenm nou pas atraver bann leprev i prouve ki nou annan lespri Bondye. (1 Pyer 4:14) Sa bon nouvel lo Rwayonm Bondye ki’n ganny etablir pe ganny anonse dan lemonn antye. Parey bann dekourazman ki sezi en dimoun, bokou ‘ros’ senbolik in ganny anvoye kont pep Bondye. Kantmenm sa, atraver lafors ki Zeova i donn zot son bann serviter in kapab sirmont lefe ki sa bann ros i annan. (Zekarya 9:15) Personn pa kapab aret travay ki larestan manm Kretyen swazir ek son bann konpanyon fidel pe fer!

¹⁷ Avek enpasyans nou pe espere kan nou pou ganny delivre konpletman avek bann latak Dyab. Pa i rekonfortan ki nou annan sa garanti ki ‘nenport ki zarm ki pou ganny formen kont nou pa pou reisi, e ki nenport ki lalang ki pou lev kont nou dan zizman pou ganny kondannen’!

[Not anba lo paz]

Ki ou pou reponn?

• Kwa ki montre ki bann zarm Satan pa’n reisi?

• Ki mannyer Zerizalenm ki dan lesyel i “en ros vreman lour”?

• Ki mannyer Zeova i sov “bann latant Zida”?

• Anmezir ki nou apros Armagedon, kwa ki ou asir lo la?

[Portre lo paz 23]

Pep Zeova Lalbani in reste fidel malgre bann latak Satan

[Portre lo paz 25]

Zezi ti prouve ki zot lakizasyon ti fo

[Portre lo paz 26]

Napa okenn zarm ki’n ganny formen kont bann predikater sa bon nouvel ki pou reisi