Zeova I Deteste Traizon

‘Pa trai enn a lot.’—MALAKI 2:10.

 1. Si nou anvi ganny lavi eternel, ki Bondye i ekspekte nou fer?

ESKI ou anvi viv pour touzour? Si ou krwar dan sa lesperans ki Labib in promet, petet ou pou dir, ‘Byensir.’ Me si ou anvi ki Bondye i donn ou lavi eternel dan son nouvo lemonn, ou bezwen fer sa ki i’n demann ou pour fer. (Eklezyast 12:13; Zan 17:3) Eski i pa rezonnab pour ekspekte bann imen enparfe pour fer sa? Non, parski sa ki Zeova i dir la i vreman ankourazan: “Parski mon’n pran plezir dan labonte leker, non pa dan sakrifis; e dan konnesans Bondye olye dan sakrifis brile.” (Osea 6:6) Alor menm bann imen ki annan tandans pour fer fot i kapab fer sa ki Bondye i demann zot.

 2. Konman ki bokou Izraelit ti trai Zeova?

² Me pa tou dimoun ki anvi fer lavolonte Zeova. Osea i montre ki menm bokou Izraelit pa ti anvi fer sa. Konman en nasyon, zot ti’n dakor pour fer en lalyans, en lagreman, pour obeir lalwa Bondye. (Egzod 24:1-8) Pourtan, pa mank bokou letan apre, zot ‘ti pe vyol lalyans’ par kas son bann lalwa. Alors, Zeova ti dir ki sa bann Izraelit ti “trai” li. (Osea 6:7) E depi sa letan bokou dimoun in fer parey. Me Zeova i deteste traizon ki swa i ganny fer kont li ouswa kont bann ki kontan li e servi li.

 3. Ki nou pou analize dan sa letid?

³ Pa zis Osea ki ti fer vwar pwenn-vi Bondye lo traizon, en pwenn-vi ki nou bezwen adopte si nou anvi rezwir en lavi ere. Dan lartik presedan, nou’n konmans analiz mesaz profetik Malaki par konmans avek premye sapit sa liv. Aprezan, annou vir lo dezyenm sapit sa liv, e nou ava vwar konman ki pwenn-vi Bondye konsernan traizon i resevwar plis latansyon. Menm si Malaki ti pe tret en sitiasyon ki ti egziste parmi pep Bondye plizyer dizenn lannen apre zot retour an Babilonn, dezyenm sapit sa liv i annan en lenplikasyon pour nou ozordi.

Bann Pret ti ganny blanmen

 4. Ki lavertisman ki Zeova ti donn bann pret?

⁴ Dezyenm sapit i konmans avek Zeova ki pe kondann bann pret Zwif pour kit son semen drwat. Si zot pa ti pran aker son konsey e redres zot fason viv, sirman zot ti pou sibir bann konsekans grav. Remark sa de premye verse: “ ‘Sa komannman i pour zot, bann pret. Si zot pa ekoute, e si zot pa pran li aker pour anmenn laglwar lo mon non,’ Zeova bann larme in dir, ‘Mon pou sirman anvoy malediksyon lo zot e mon pou modi zot benediksyon.’ ” Si sa bann pret ti’n ansenny lepep lalwa Bondye e gard zot, zot ti pou’n ganny beni. Me akoz zot ti pe inyor lavolonte Bondye, aprezan zot ti pou ganny en malediksyon, zot ti pou ganny modi. Menm bann benediksyon ki bann pret i prononse ti pou vin en malediksyon.

5, 6. (a) Akoz bann pret ki ti sirtou ganny blanmen? (b) Konman ki Zeova ti eksprim son mepri pour bann pret?

⁵ Akoz bann pret ki ti sirtou ganny blanmen? Verse 7 i endik nou klerman: “Se lalev en pret ki devret gard konnesans, e se lalwa ki dimoun i serse sorti dan son labous; akoz i mesaze Zeova bann larme.” Plis ki en milener avan sa, lalwa ki Bondye ti donn nasyon Izrael atraver Moiz ti dir ki bann pret ti responsab ‘pour ansenny bann garson Izrael tou regilasyon ki Zeova ti’n dir.’ (Levitik 10:11) Malerezman, plitar, sa ki ti ekrir 2 Kronik 15:3 ti raporte ki: “Pour bokou zour Izrael ti san en vre Bondye e san lansennyman en pret e san Lalwa.”

⁶ Dan letan Malaki, dan senkyenm syek A.N.L., sitiasyon bann pret ti menm parey. Zot pa ti pe ansenny Lalwa Bondye avek lepep. Alors sa bann pret ti bezwen rann kont. Remarke konman ki Zeova ti repros zot dan en fason byen fran. Malaki 2:3 i deklare: “Mon pou fann malpropte lo zot figir, malpropte zot lafet.” Pa sa ti en disiplin! Malpropte bann zannimo ki ti’n ganny sakrifye ti ganny anmennen an deor kan pour brile. (Levitik 16:27) Me kan Zeova i dir zot ki malpropte ti pou plito ganny zete dan zot figir, sa i montre klerman ki i ti mepriz e rezet zot sakrifis e sa bann ki ti pe ofer zot.

 7. Akoz Zeova ti ankoler avek bann ansennyan Lalwa?

⁷ Plizyer syek avan letan Malaki, Zeova ti donn bann Levit sa latas pour okip tabernak e plitar tanp ek son servis sakre. Zot ti bann ansennyan dan nasyon Izrael. Si zot ti akonpli byen zot latas, i ti pou vedir lavi ek lape pour zot e pour sa nasyon osi. (Nonm 3:5-8) Me bann Levit ti nepli annan sa lakrent ki zot ti annan okonmansman pour Bondye. Alors, Zeova ti dir zot: “Zot in kit sa semen. Zot in fer bokou tonbe dan lalwa. Zot in kas lalyans Levi . . . Zot pa’n gard mon semen.” (Malaki 2:8, 9) Vi ki zot pa ti ansenny laverite e zot ti donn en move legzanp, bann pret ti tronp bokou Izraelit. Alor Zeova ti annan tou rezon pour ankoler avek zot.

Gard Standar Bondye

 8. Eski i tro bokou pour ekspekte imen pour gard bann standar Bondye? Eksplike.

⁸ Pa krwar ki sa bann pret dan letan Malaki ti merit senpati e ganny pardonnen akoz zot ti senpleman bann imen enparfe, ki pa ti kapab gard standar ek prensip Bondye. An realite imen i kapab gard komannman Bondye, parski Zeova pa ekspekte zot pour fer sa ki zot pa kapab fer. I tre probab ki ti annan serten pret ki ti gard standar Bondye dan sa letan, me konsernan sa “Gran-Pret”—Zezi—napa okenn dout ki i pa ti fer li. (Ebre 3:1) Nou kapab vreman dir sa lo li: “Lalwa laverite ti dan son labous, e okenn mesanste pa ti ganny trouve lo son lalev. Dan lape e dan ladrwatir i ti mars avek mwan, i’n detourn bokou kont lerer.”—Malaki 2:6.

 9. Lekel ki’n fidelman propaz laverite dan nou letan?

⁹ Pareyman, pour plis ki en syek, bann frer swazir Zezi, bann ki annan lesperans seles, in servi konman “bann pret sen, pour ofer sakrifis spirityel, akseptab devan Bondye.” (1 Pyer 2:5) Zot in pran linisyativ pour propaz laverite biblik avek lezot. Letan ou ti aprann laverite biblik ki zot ansennyen, eski ou pa ti vwar pour ou menm ki lalwa laverite ti dan zot labous? Zot in ed bokou dimoun pour tourn kont zot fo krwayans relizye, ki fer ki i annan plizyer milyon partou dan lemonn ki’n aprann laverite biblik e ki annan sa lespwar pour ganny lavi eternel. Sa bann dimoun, an retour, i annan sa privilez pour ansenny lalwa laverite avek plizyer milyon lezot dimoun.—Zan 10:16; Revelasyon 7:9.

Akoz nou bezwen fer atansyon

10. Akoz nou annan tou rezon pour fer byen atansyon?

¹⁰ Toutfwa, nou annan tou rezon pour fer atansyon. Nou ti a kapab pa byen sezi sa leson dan Malaki 2:1-9. Eski nou personnelman veye ki okenn mesanste pa ganny trouve lo nou lalev? Par egzanp, eski manm nou fanmiy i kapab vreman annan konfyans dan sa ki nou dir? Nou bann frer ek ser dan kongregasyon, eski zot osi zot kapab met konfyans dan nou? I ti a telman fasil pour nou devlop en labitid pour formil nou parol dan en fason ki fer li egzakt me ki kapab tronp lezot. Oubyen dan domenn biznes, en dimoun i kapab egzazere oubyen kasyet serten detay. Eski Zeova pa vwar sa? E si nou pe pratik sa bann keksoz koumsa, eski i ti pou aksepte sakrifis louanz sorti dan nou labous?

11. Lekel ki bezwen sirtou fer atansyon?

¹¹ Malaki 2:7 i devret servi konman en lavertisman pour bann frer ki annan responsabilite pour ansennyen dan kongregasyon. I dir ki zot lalev i “devret gard konnesans, e se lalwa ki dimoun i devret serse” dan zot labous. En gro responsabilite i repoz lo zepol sa bann ansennyan, parski Zak 3:1 i endike ki zot “pou ganny zize pli severman ki lezot.” Anmenmtan ki zot ansenny avek lardyes ek lantouzyasm, zot lansennyman i bezwen solidman baze lo Parol Bondye e lo lenstriksyon ki lorganizasyon Zeova i fourni. Dan sa fason zot pou “kapab zot osi ansenny lezot.” Alor zot ganny konseye pour: “Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.”—2 Timote 2:2, 15.

12. Ki bann ansennyan i bezwen konsyan?

¹² Si nou pa fer atansyon, parfwa nou kapab santi nou tante pour azout nou preferans oubyen pwenn-vi personnel dan nou lansennyman. Sa i kapab danzere sirtou si en dimoun i annan tandans pour met konfyans dan son prop konklizyon menm si i pa an akor avek sa ki lorganizasyon Zeova i ansennyen. Me Malaki sapit 2 i montre ki nou devret ekspekte bann ansennyan dan kongregasyon pour reste fidel avek sa konnesans ki sorti kot Bondye, pa avek zot pwenn-vi personnel ki kapab fer tonbe bann mouton. Zezi ti dir: “Sa ki fer enn sa bann pti zanfan ki krwar dan mwan tonm dan pese, i ti ava pli bon pour li si zot ti anmar en gro ros otour son likou e zet li dan fon lanmer.”—Matye 18:6.

Marye avek en non Krwayan

13, 14. Nonm en keksoz ki ganny konsidere konman traizon ki Malaki ti atir latansyon lo la.

¹³ Apartir verse 10 an montan, Malaki sapit 2 i met lanfaz lo traizon dan en fason pli direk. Malaki i konsantre lo de kondwit ki relye avek kanmarad, e i servi sa mo “trai” plizyer fwa pour refer avek zot. Premyerman, remarke ki Malaki i konmans son konsey par sa bann kestyon: “Eski pa nou tou nou annan en sel papa? Eski pa en sel Bondye ki’n kree nou? Akoz ki nou trai enn a lot, par sali lalyans nou zanset?” Apre dan verse 11, i azoute ki traizon nasyon Izrael i konmsi zot in sali “sentete Zeova.” Ki zot ti pe fer ki ti sitan serye? Sa verse i idantifye enn sa move pratik: Zot ti’n “pran fiy en bondye etranze konman en madanm.”

¹⁴ Andotmo, serten Izraelit, ki ti form par en nasyon ki ti’n ganny dedye avek Zeova, ti marye avek bann dimoun ki pa ador Zeova. Konteks i ed nou pour vwar akoz sa ti en keksoz sitan serye. Verse 10 i dir ki zot ti annan en sel papa. Sa pa ti pe refer avek Zakob (ki ti ganny apele Izrael), ni avek Abraam, ni menm avek Adan. Malaki 1:6 i montre ki Zeova ti sa “sel papa.” Nasyon Izrael ti annan en relasyon avek li, zot ti enplike dan sa lalyans ki ti ganny fer avek zot zanset. En lalwa ki ti ganny trouve dan sa lalyans ti: “Ou pa devret form en lalyans maryaz avek zot. Ou fiy, ou pa devret donn son garson, e son fiy, ou pa devret pran pour ou garson.”—Deterononm 7:3.

15. (a) Konman ki serten i kapab sey zistifye zot lekor pour marye avek en non krwayan? (b) Konman ki Zeova i eksprim li osize maryaz?

¹⁵ Petet serten ozordi i rezonn koumsa: ‘A, sa dimoun ki mon kontan pa parey lezot. I tre probab ki i pou aksepte vre ladorasyon.’ En tel rezonnman i senpleman konfirm sa lavertisman enspire: “Leker i pli tret ki okenn keksoz e i tre move.” (Zeremi 17:9) Pwenn-vi Bondye konsernan marye avek en non krwayan i ganny eksprimen dan Malaki 2:12: “Zeova pou elimin tou sa ki fer sa.” Alors, bann Kretyen i ganny demande pour marye “selon Senyer.” (1 Korentyen 7:39) Dan laranzman Kretyen, en krwayan pa ‘ganny eliminen’ si i marye avek en non krwayan. Kantmenm sa, si sa non krwayan pa fer okenn sanzman, ki pou arive avek li kan Bondye pou anmenn en lafen avek sa sistenm tre byento?—Psonm 37:37, 38.

Maltret nou Konzwen

16, 17. Ki move kondwit serten ti annan ki ti ganny konsidere konman traizon?

¹⁶ Malaki i al lo dezyenm move kondwit ki i apel traizon: maltret nou konzwen sirtou par divors li san en rezon zistifyab. Verse 14 sapit 2 i dir: “Zeova li menm in vin temwen ant ou ek fanm ou zenes, ki ou’n trai, kantmenm i ou partner ek fanm ou lalyans.” Par trai zot madanm, bann mari Zwif ti’n fer lotel Zeova “kouver avek larm.” (Malaki 2:13) Sa bann zonm ti pe rod divors pour bann rezon ki pa ti zistifyab. Zot ti pe mal fer par kit zot madanm ki zot ti annan depi zot zenes, petet pour marye avek bann ki pli zenn oubyen bann fanm payen. E sa bann pret koronpi ti pe permet sa! Pourtan, Malaki 2:16 i deklare: “ ‘I’n ay divors,’ Zeova Bondye Izrael in dir.” Plitar, Zezi ti montre ki imoralite i sel rezon pour ganny en divors ki permet sa konzwen inosan pour remarye.—Matye 19:9.

¹⁷ Reflesir lo sa ki Malaki ti dir, e vwar si i pa tous ou leker ek ou santiman pour sa ki byen. I pe refer avek “ou partner ek fanm ou lalyans.” Sa bann zonm ki ti enplike ti’n marye avek en konpanny ki ti dan menm ladorasyon avek zot, en fanm Izraelit. Zot ti’n swazir li konman en konpanny ki zot ti vreman kontan, en partner pour lavi. Menm si petet zot ti marye letan zot ti ankor zenn, sa lalyans ki zot ti’n konklir, setadir sa kontra maryaz, pa ti vin envalid avek letan oubyen kan laz i konmans antre.

18. Konman ki konsey Malaki konsernan traizon i aplikab denozour?

¹⁸ Konsey konsernan sa size i osi aplikab dan nou letan. I regretab pour vwar ki serten pa ekout lenstriksyon Bondye pour marye selman dan Senyer. E i osi regretab ki serten pa kontinyen fer zefor pour gard zot maryaz solid. Plito, zot sey rod lekskiz e fer sa ki Bondye i deteste par rod en divors ki napa okenn rezon biblik afen ki zot kapab marye avek en lot dimoun. Kan zot fer sa, zot “fatig Bondye.” Dan letan Malaki, bann ki ti inyor konsey divin ti menm annan lodas pour krwar ki pwenn-vi Zeova pa zistifye. Anfet, zot ti dir: “Oli Bondye lazistis?” Pa zot pa ti rezonnab! Annou pa tonm dan sa pyez.—Malaki 2:17.

19. Konman ki bann mari ek fanm i kapab resevwar lespri sen Bondye?

¹⁹ Lo lot kote, Malaki i montre ki ti annan serten mari dan son letan ki pa ti trai zot madanm. Zot ‘ti annan lespri sen Bondye ki ti reste.’ (Verse 15) Erezman, i annan bokou zonm koumsa dan lorganizasyon Bondye ki ‘tret zot madanm avek respe.’ (1 Pyer 3:7) Zot pa abiz zot madanm fizikman oubyen verbalman, zot pa ensiste pour pratik sèks degradan, e zot pa dezonnor zot madanm par rod latansyon avek lezot madanm oubyen par get pornografi. Lorganizasyon Zeova i osi ganny beni par sa kantite madanm Kretyen fidel ki reste fidel avek Bondye e avek son lalwa. Sa bann zonm ek fanm i konnen kwa ki Bondye i deteste, e zot pans parey li e azir an armoni avek sa. Annou kontinyen fer parey zot, ‘obeir Bondye konman sef ’ e nou a ganny beni avek son lespri sen.—Akt 5:29.

20. Ki letan ki pe aprose pour tou imen?

²⁰ Byento, Zeova pou anmenn son zizman lo sa monn antye. Tou dimoun pou bezwen rann kont pour son krwayans ek aksyon. “Sakenn antre nou pou bezwen rann kont devan Bondye pour son prop lekor.” (Romen 14:12) Alors en kestyon enteresan ki nou kapab demande se: Lekel ki pou sirviv zour Zeova? Sa trwazyenm e dernyen lartik dan sa seri pou diskit sa tenm.

Eski ou kapab eksplike?

• Akoz Zeova ti prensipalman blanm bann pret an Izrael?

• Akoz i pa enposib pour bann imen gard standar Bondye?

• Akoz nou devret fer byen atansyon kan nou ansennyen denozour?

• Ki sa de pratik ki Zeova ti sirtou kondannen?

[Portre lo paz 25]

Dan letan Malaki, bann pret ti ganny blanmen akoz zot ti kit semen Zeova

[Portre lo paz 26]

Zeova ti kondann bann Izraelit ki ti divorse avek zot madanm pour bann rezon ki pa ti valab e marye avek bann payen

[Portre lo paz 26]

Bann Kretyen denozour i onor zot lalyans maryaz