Byento Zeova pou servi son Rwayonm pour tir tou nou problenm. Sa nouvel i tro bon pour gard zis pour nou. Zezi ti anvi ki son bann disip i anons sa mesaz avek tou dimoun! (Matye 28:19, 20) Ki mannyer Temwen Zeova in fer sa ki Zezi ti demann zot pour fer?

1. Ki mannyer Matye 24:14 pe ganny akonplir ozordi?

Zezi ti predir: “Sa bon nouvel lo Rwayonm pou ganny anonse partou lo later.” (Matye 24:14) Temwen Zeova i byen kontan pour partisip dan sa travay enportan. Nou pe anons sa bon nouvel partou dan lemonn dan plis ki 1,000 langaz! Sa gro travay i demann bokou zefor ek lorganizasyon. I pa ti pou kapab ganny fer san led Zeova.

2. Ki zefor nou fer pour pres avek dimoun?

Nou pres avek dimoun partou kot nou vwar zot. Parey bann Kretyen dan premye syek, nou pres “kazankaz.” (Akt 5:42) Sa fason fer i permet nou pour koz avek plizyer milyon dimoun sak lannen. Vi ki dimoun pa toultan kot zot, nou osi pres dan plizyer landrwa piblik. Nou toultan pe rod loportinite pour koz avek lezot lo Zeova ek son plan.

3. Lekel ki annan responsabilite pour anons sa bon nouvel?

Tou vre Kretyen i annan sa responsabilite pour anons sa bon nouvel avek lezot. Nou pran nou responsabilite o serye. Nou pres otan ki nou sityasyon personnel i permet nou, akoz nou realize ki lavi dimoun i an danze. (Lir 1 Timote 4:16.) Nou pa ganny peye pour fer sa travay akoz Labib i dir: “Zot in resevwar pour nanryen, donn pour nanryen.” (Matye 10:7, 8) Pa tou dimoun ki aksepte nou mesaz, me nou kontinyen prese akoz i form parti nou ladorasyon e i fer Zeova kontan.

AL PLI O PROFON

4. Nou fer bokou zefor pour arive koz avek tou dimoun

VIDEO: Predikasyon dan “bann landrwa pli elwannyen lo later” (7:33)

• Kwa ki enpresyonn ou konsernan zefor ki Temwen Zeova i fer pour prese?

Lir Matye 22:39 ek Romen 10:13-15 e apre reponn sa bann kestyon:

• Ki mannyer ler nou prese i montre ki nou kontan nou prosen?

• Ki mannyer Zeova i santi anver bann dimoun ki anons sa bon nouvel?​—Vwar verse 15.

5. Nou travay ansanm avek Bondye

Bokou leksperyans i montre ki Zeova pe diriz nou travay. Par egzanp, en frer Nouvel Zelann ki apel Paul ti zwenn en madanm ler i ti pe fer sa travay kazankaz en zour apremidi. Sa zour bomaten sa madanm ti’n priy Bondye an servan son non Zeova e demann li pour en dimoun vizit li. Paul i dir, “Trwa-z-er tan pli tar, mon ti ariv devan son laport.”

Lir 1 Korentyen 3:9 e apre reponn sa kestyon:

• Ki mannyer bann leksperyans parey sa enn Nouvel Zelann i montre ki Zeova pe diriz predikasyon?

Lir Akt 1:8 e apre reponn sa kestyon:

• Akoz nou bezwen led Zeova pour nou prese?

Eski ou ti konnen?

Tou le semenn, dan nou renyon lasemenn, nou ganny bann formasyon ki ed nou pour prese. Si ou’n deza asiste enn sa bann renyon, ki ou panse lo sa formasyon ki ganny donnen?

6. Nou obeir lord Bondye pour prese

Dan premye syek, i ti annan dimoun ki ti esey anpes bann disip Zezi prese. Bann premye Kretyen ti defann zot drwa pour prese par “etabli [zot] drwa legal pour anons sa bon nouvel.” (Filipyen 1:7) Temwen Zeova i fer sanmenm ozordi.a

VIDEO: Defann drwa legal pour anons sa bon nouvel (2:28)

Lir Akt 5:27-42 e apre reponn sa kestyon:

• Akoz nou pa pou aret prese?​—Vwar verse 29, 38 ek 39.

REZIMEN

Zezi ti demann son bann disip pour anons sa bon nouvel avek dimoun dan tou nasyon. Zeova pe ed son pep pour fer sa travay.

Revizyon

• Ki mannyer sa bon nouvel pe ganny anonse partou dan lemonn?

• Ki mannyer ler nou prese i montre ki nou kontan nou prosen?

• Eski ou krwar nou kapab zwaye ler nou prese? Akoz?

FER PLIS RESERS

Vwar ki mannyer Temwen Zeova i pres avek dimoun dan bann gran lavil.

Temwannyaz spesyal an piblik dan lavil Pari (5:11)

Ki Temwen Zeova in fer pour esey ed bann refizye?

Bann refizye ti aprann konn Bondye (5:59)

Ekout en dimoun eksplike ki mannyer ler i prese a plen tan sa i fer li zwaye.

Mon kontan monʼn swazir sa karyer (6:29)

Vwar serten laviktwar remarkab ki nou’n gannyen ankour ki’n ede fer avanse sa travay pour anons sa bon nouvel.

“Bann predikater Rwayonm i anmenn zot ka ankour” (Rwayonm Bondye pe dirize!, sapit 13)

Zezi ti dir ki bann Kretyen i bezwen batize. (Lir Matye 28:19, 20.) Me kisisa batenm? Ki en dimoun i bezwen fer pour arive akonpli sa lobzektif?

1. Kisisa batenm?

Sa mo “batize” i sorti dan en mo Grek ki vedir “plonz” anba delo. Ler Zezi ti batize, i ti ganny plonze dan Larivyer Zourden e apre i ti “sorti anba delo.” (Mark 1:9, 10) Bann vre Kretyen ozordi i batiz koumsa, zot ganny plonze konpletman anba delo.

2. Ler en dimoun i batize ki i pe montre?

Ler en dimoun i batize, i pe montre ki’n dedye son lavi avek Zeova son Bondye. Ki mannyer en dimoun i dedye son lavi avek Bondye? Avan i batize, i fer en lapriyer personnel avek Zeova e dir li ki i anvi servi li pour touzour. I promet pour ador zis Zeova e fer son lavolonte vin sa keksoz pli enportan dan son lavi. I swazir pour “aret viv zis pour li menm e . . . kontinyen swiv” lansennyman ek legzanp Zezi. (Matye 16:24) Son dedikasyon ek batenm i fer li posib pour annan en lanmitye tre pros avek Zeova e avek son bann frer ek ser Kretyen.

3. Ki mannyer en dimoun i kapab progrese ziska batenm?

Ou kapab prepare pour batenm par aprann lo Zeova e devlop lafwa dan li. (Lir Ebre 11:6.) Anmezir ou konnesans ek lafwa i agrandi, ou lanmour osi pour Zeova pou vin pli for. San dout ou pou anvi koz lo li avek lezot e viv dapre son bann standar. (2 Timote 4:2; 1 Zan 5:3) Enn fwa ki en dimoun pe viv dan en fason ki “onor Zeova e ki fer li vreman plezir,” i kapab deside pour dedye son lavi avek Bondye e batize.​—Kolosyen 1:9, 10.a

AL PLI O PROFON

4. Nou kapab aprann avek batenm Zezi

Lir Matye 3:13-17 pour vwar plis detay konsernan batenm Zezi. Apre reponn sa bann kestyon:

• Eski Zezi ti en pti baba ler i ti batize?

• Ki mannyer i ti ganny batize? Zot ti zis vid en pti gin delo lo son latet?

Zezi ti konmans fer sa travay spesyal ki Bondye ti’n donn li pour fer ler i ti batize. Lir Lik 3:21-23 ek Zan 6:38 e apre reponn sa kestyon:

• Apre ki Zezi ti batize, ki travay ki i ti met premye dan son lavi?

5. Ou kapab batize

O konmansman, sa lide pour dedye ou lavi avek Bondye e batize i kapab paret tro difisil pour fer. Me ou kapab progrese ziska ki ou santi ou annan ase konfyans pour fer sa desizyon enportan. Pour vwar serten dimoun ki ti fer sa, zwe sa VIDEO.

VIDEO: Vin pros avek Zeova (1:11)

Lir Zan 17:3 ek Zak 1:5 e apre reponn sa kestyon:

• Kwa ki kapab ed en dimoun pour prepar li pour batize?

1. Nou dedye nou lavi avek Zeova ler nou dir li ki nou anvi servi li pour touzour

2. Ler nou batize, nou montre bann ki pe gete ki nou’n dedye nou lavi avek Bondye

6. Ler en dimoun i batize i form parti fanmir Zeova

Ler nou batize nou form parti en fanmir ki ini partou dan lemonn antye. Nou partaz menm krwayans ek menm standar moral. Sa i leka menm si nou sorti dan diferan landrwa ouswa nou ti annan diferan kalite lavi avan sa. Lir Psonm 25:14 ek 1 Pyer 2:17 e apre reponn sa kestyon:

• Ki mannyer ler en dimoun i batize sa i annan en lefe lo son relasyon personnel avek Zeova e osi lo son relasyon avek lezot ki ador Zeova?

REZIMEN

Zezi ti dir ki bann Kretyen i bezwen batize. Pour arive fer sa, en dimoun i bezwen devlop en lafwa for dan Zeova, viv dapre son bann standar e dedye son lavi avek li.

Revizyon

• Kisisa batenm e akoz i enportan?

• Ki dedikasyon ek batenm i montre?

• Ki bann pa en dimoun i bezwen fer avan ki i dedye son lavi avek Zeova e batize?

FER PLIS RESERS

Aprann ki batenm i ete e ki batenm pa ete.

“What is Baptism?” (Lartik lo jw.org)

Revwar bann fason ki en dimoun i kapab progrese ziska batenm.

“Lanmour ek lapresyasyon pour Zeova pou ed ou batize” (Latour Veyer Mars 2020)

Lir ki mannyer desizyon en msye pour batize pa ti baze zis lo son santiman.

“Zot ti anvi mon aprann pour mwan menm ki Labib i vreman dir” (Latour Veyer Mars 2013)

Vwar akoz batenm i en lobzektif ki vreman vo lapenn e ki mannyer ou kapab prepare pour ou batize.

“Should I Get Baptized?” (Questions Young People Ask​—Answers That Work, Volim 2, sapit 37)