“Ansenny zot pour obei tou sa ki mon’n konmande”

“Ale e fer tou pep vin mon bann disip. . . . Ansenny zot pour obei tou sa ki mon’n konmande.”—MATYE 28:19, 20.

 1. Ki konversasyon ti deroule ant Filip ek en zonm sorti Etyopi?

SA ZONM sorti Etyopi ti vwayaz tou sa zistans ziska Zerizalenm. Laba, i ti ador sa Bondye ki i ti kontan, Zeova. I paret evidan ki i ti osi kontan Parol Bondye. Ler i ti pe retourn kot li dan son kales, i ti pe lir en kopi liv profet Izai, kan Filip en disip Kris, ti rankontre li. Filip ti demann sa Etyopyen: “Eski ou konpran sa ki ou pe lir?” Sa zonm ti reponn: “Ki mannyer mon kapab konpran si personn pa eksplik mwan.” Alor Filip ti ed sa etidyan Labib senser pour vin en disip Kris.—Akt 8:26-39.

 2. (a) Kwa ki enteresan avek larepons sa Etyopyen? (b) Ki kestyon ki relye avek lord Kris pour fer disip nou pou egzaminen?

² Larepons sa Etyopyen i enteresan. I ti dir: ‘Ki mannyer mon kapab konpran si personn pa eksplik mwan.’ Wi, sa zonm ti bezwen en dimoun pour eksplik li oubyen gid li pour li konpran sa ki i ti pe lir. Sa larepons i fer resorti lenportans en lenstriksyon spesifik ki Zezi ti enkli dan son lord pour fer disip. Ki sa lenstriksyon? Pour trouv larepons, annou kontiny nou diskisyon lo parol Zezi dan Matye sapit 28. Dan lartik presedan nou ti konsantre lo sa kestyon akoz nou devret fer sa travay? e kote? Aprezan, nou pou egzamin sa de lezot kestyon ki relye avek lord Kris pour fer disip. Ki nou devret ansennyen? e ziska kan?

“Ansenny zot pour obei tou sa ki mon’n konmande”

 3. (a) Ki mannyer en dimoun i vin en disip Zezi Kri? (b) Ki nou bezwen ansennyen ler pe fer disip?

³ Ki nou devret ansennyen pour ed lezot vin disip Kris? Zezi ti dir son bann disip: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye 28:19, 20) Alors, nou devret ansenny bann keksoz ki Kris in komande.a Me ki nou kapab fer, pour fer sir ki en dimoun ki aprann bann komannman Zezi pa pou zis vin en disip me osi reste en disip? En pwen enportan i trouve dan parol ki Zezi ti dir. Remark byen, i pa ti zis dir: ‘Ansenny zot tou sa ki mon’n komande.’ Okontrer, i ti dir: “Ansenny zot pour obei tou sa ki mon’n komande.” (Nou ki’n met an italik; Matye 19:17) Ki sa i enplike?

 4. (a) Ki savedir obeir en lord? (b) Eksplike ki mannyer nou ansenny en dimoun pour obeir lord Kris.

⁴ Obeir en lord i vedir “fer bann aksyon ki an armoni” avek sa lord, oubyen obzerv sa lord. Me ki mannyer nou ansenny en dimoun pour obeir oubyen obzerv bann keksoz ki Kris in komande? Mazin lafason en dimoun ki montre dray i ansenny son bann etidyan pour obzerv bann lalwa trafik. Sa lenstrikter i kapab ansenny son bann etidyan bann lareg trafik ler zot dan laklas. Me pour ansenny zot ki mannyer pour obeir sa bann lalwa, i bezwen gid sa bann etidyan ler zot dray lo semen pour fer zefor pour aplik sa ki zot in aprann. Pareyman, ler nou etidye Labib avek dimoun, nou ansenny zot bann komannman Kris. Me nou osi bezwen gid sa bann etidyan anmezir zot esey aplik lenstriksyon Kris dan zot lavi e dan minister. (Zan 14:15; 1 Zan 2:3) Alor, fodre nou vin bann ansennyan e osi bann gid, pour nou obeir antyerman lord Kris pour fer disip. Dan sa fason, nou imit legzanp ki Zezi ek Zeova in kite.—Psonm 48:14; Revelasyon 7:17.

 5. Akoz en dimoun ki nou etidye Labib avek i kapab ezite pour obeir lord Kris pour fer disip?

⁵ Ansenny lezot pour obeir lord Zezi i enkli ed zot pour obeir sa lord pour fer disip. Petet pour serten dimoun ki nou etidye avek, sa i kapab en keksoz difisil pour fer. Menm si avan sa zot ti bann manm aktif dan zot larelizyon Kretyente, i tre probab ki zot bann ansennyan relizye pa’n zanmen ansenny zot pour ale e fer disip. Serten dirizan legliz i fransman admet ki bann legliz Kretyente in fel konpletman dan sa laspe pour ansenny zot troupo pour pres sa bon nouvel. Profeser Labib, John R. W. Stott i dir konsernan lord Zezi pour al dan lemonn e ed tou sort kalite dimoun vin disip: “Pa arive fer sa ki sa lord pe demande i pli gro defo bann Kretyen dan domenn pres levanzil ozordi.” I ti azoute: “Nou tant pour proklanm nou mesaz de lwen. Parler nou parey bann dimoun ki debout lo lans e kriy avek en dimoun ki pe noye ki pou fer. Nou pa anvi sot dan delo pour sov zot. Nou per ganny mouye.”

 6. (a) Ler nou pe ed en etidyan Labib, ki mannyer nou kapab imit legzanp Filip? (b) Ki mannyer nou kapab montre nou lentere ler en etidyan Labib i konmans partisip dan travay predikasyon?

⁶ Si en dimoun ki nou etidye avek ti form parti en larelizyon ki son bann manm i “per ganny mouye,” petet i pa pou fasil pour li sirmont son lafreyer delo, e obeir lord Kris pour fer disip. I pou bezwen led. Alors, nou bezwen annan pasyans ler nou pe donn li sa lenstriksyon ek gidans ki ogmant son konprenezon e pous li pour azir, zis parey lansennyman Filip ti eklersi sa Etyopyen e pous li pour batize. (Zan 16:13; Akt 8:35-38) Deplis, nou dezir pour ansenny bann etidyan Labib pour obeir lord Zezi pour fer disip, i pous nou pour travay avek zot. Dan sa fason nou pou kapab gid zot ler zot fer zot premye pa dan travay predikasyon Rwayonm.—Eklezyast 4:9, 10; Lik 6:40.

“Tou sa ki mon’n konmande”

 7. Ansenny lezot pour ‘obeir tou keksoz’ i enkli ansenny zot ki komannman?

⁷ Nou pa zis ansenny bann nouvo disip pour fer disip. Zezi ti enstri nou pour ansenny lezot pour ‘obei tou sa ki i’n konmande.’ Sa i sirman enkli sa de pli gran komannman—pour kontan Bondye e pour kontan nou prosen. (Matye 22:37-39) Ki mannyer nou kapab ansenny en nouvo disip pour obeir sa de komannman?

 8. Eksplike ki mannyer en nouvo disip i kapab aprann sa komannman pour montre lanmour.

⁸ Annou reflesir ankor lo legzanp sa dimoun ki pe aprann dray. Anmezir ki i kondwir sa loto lo semen avek sa lenstrikter akote li, sa etidyan pe aprann pa zis par ekout son lenstrikter me osi par obzerv lezot drayver. Par egzanp, son lenstrikter i kapab atir son latansyon lo en drayver ki zantiman les en lot loto pas devan li dan trafik; oubyen en drayver ki dim son lalimyer pour pa kas lizye lezot drayver; oubyen en drayver ki pare pour ed en zanmi ki son loto in kase. Sa bann legzanp i ansenny sa etidyan bann bon leson ki i kapab aplike ler i pe dray. Pareyman, en nouvo disip ki pe mars lo semen lavi i pa aprann zis avek son ansennyan me osi atraver bann bon legzanp ki i vwar dan kongregasyon.—Matye 7:13, 14.

 9. Ki mannyer en nouvo disip i aprann ki savedir obzerv sa komannman pour montre lanmour?

⁹ Par egzanp, en etidyan Labib i kapab obzerv en paran tousel ki fer bokou zefor pour vin Lasal Rwayonm avek son zanfan akote li. Petet i kapab vwar en dimoun ki anba presyon pe fidelman asiste renyon malgre i pe lite avek depresyon, en vev aze ki anmenn lezot aze sak renyon, oubyen en adolesan ki ede netway Lasal Rwayonm. Sa etidyan Labib i kapab remark en ansyen ki fidelman diriz predikasyon menm si i annan bokou responsabilite dan kongregasyon. I kapab rankontre en Temwen ki endikape e pa kapab sorti kot li me ki en sours lankourazman spirityel pour tou dimoun ki vizit li. Sa etidyan i kapab obzerv en koup ki pe fer bann gran sanzman dan zot lavi pour kapab pran swen avek zot paran aze. Par obzerv bann Kretyen ki zantiy, pare pour ede e fidel, sa nouvo disip i aprann par legzanp lezot ki savedir obeir komannman Kris pour kontan Bondye ek nou prosen, sirtou bann konpanyon Kretyen. (Proverb 24:32; Zan 13:35; Galat 6:10; 1 Timote 5:4, 8; 1 Pyer 5:2, 3) Dan sa fason, sak manm kongregasyon Kretyen i kapab—e devret—vin en ansennyan ek en gid.—Matye 5:16.

‘Ziska konklizyon sa sistenm’

10. (a) Pour konbyen letan nou pou kontinyen fer disip? (b) Ki legzanp Zezi ti kite konsernan akonpli sa ki i ti gannyen pour fer?

¹⁰ Ziska kan ki nou devret kontinyen fer disip? Toudilon konklizyon sa sistenm. (Matye 28:20) Eski nou pou kapab akonpli sa laspe lord Zezi? Konman en kongregasyon mondyal, nou determinen pour fer li. Diran bann lannen ki’n pase, nou’n kontan pour depans nou letan, lenerzi, ek resours pour trouv sa bann ki annan sa bon kondisyon leker pour lavi eternel. (Akt 13:48) Aktyelman, bann Temwen Zeova i depans an mwayenn plis ki trwa milyon er-d-tan sak zour dan travay predikasyon Rwayonm e fer disip dan lemonn antye. Nou fer li akoz nou swiv legzanp Zezi. I ti dir: “Mon nouritir se pour obei lavolonte sa enn ki’n anvoy mwan, e fini travay ki i’n donn mwan.” (Zan 4:34) Sa i osi nou dezir senser. (Zan 20:21) Nou anvi fer plis ki zis konmans sa travay ki nou’n gannyen; nou anvi fini li.—Matye 24:13; Zan 17:4.

11. Ki’n arive avek serten nou bann frer ek ser Kretyen, e ki nou devret demann nou lekor?

¹¹ Me i fer nou tris pour vwar ki serten nou bann konpanyon in vin feb spirityelman e sa in fer zot ralanti oubyen aret obeir lord Kris pour fer disip. Eski i annan okenn fason nou kapab ed zot pour asosye ankor avek kongregasyon e rekonmans partisip dan travay fer disip? (Romen 15:1; Ebre 12:12) Fason ki Zezi ti ed son bann zapot ler zot ti tanporerman dan en kondisyon feb i montre ki nou kapab fer ozordi.

Montre Lentere

12. (a) Zis avan lanmor Zezi, ki son bann zapot ti fer? (b) Ki mannyer Zezi ti azir avek son bann zapot malgre zot ti demontre serten defo grav?

¹² Alafen son minister lo later, ler son lanmor ti pe aprose, bann zapot ti “abandonn li e zot ti sove.” Parey Zezi ti predir, zot ti “pou fannen, sakenn pou al se li.” (Mark 14:50; Zan 16:32) Ki mannyer Zezi ti azir avek son bann konpanyon ki ti’n feb spirityelman? En pe letan apre son rezireksyon, Zezi ti dir serten son bann disip: “Pa bezwen per. Ale, dir mon bann frer al Galile e la zot a war mwan.” (Matye 28:10) Menm si bann zapot ti’n demontre serten defo grav, Zezi ti kontinyen apel zot “mon bann frer.” (Matye 12:49) I pa ti’n perdi konfyans dan zot. Dan sa fason, Zezi ti pran pitye pour zot e pare pour pardonn zot, zis parey Zeova i pran pitye e pardonnen. (2 Lerwa 13:23) Ki mannyer nou kapab imit Zezi?

13. Ki mannyer nou devret konsider sa bann ki’n vin feb spirityelman?

¹³ Nou devret annan profon santiman pour sa bann ki’n ralanti oubyen aret partisip dan predikasyon. Nou ankor rapel travay ki sa bann konpanyon ti fer avek lanmour dan lepase—serten petet pour plizyer lannen. (Ebre 6:10) Nou vreman mank zot. (Lik 15:4-7; 1 Tesalonisyen 2:17) Me ki mannyer nou kapab demontre nou lentere pour zot?

14. Par imit Zezi, konman nou kapab ed en dimoun ki feb?

¹⁴ Zezi ti dir avek bann zapot dekouraze ki zot devret al Galile e ki zot pou vwar li laba. An realite, Zezi ti envit zot pour asiste en renyon spesyal. (Matye 28:10) Pareyman ozordi, nou ankouraz bann ki feb spirityelman pour asiste bann renyon kongregasyon, e petet nou bezwen ankouraz zot plizyer fwa. Dan ka bann zapot, sa lenvitasyon ti anmenn bon rezilta, akoz “sa onz disip ti al Galile, lo montanny kot Zezi ti’n dir zot ale.” (Matye 28:16) Nou vreman zwaye ler bann ki feb i fer parey anver nou lenvitasyon e rekonmans asiste bann renyon!—Lik 15:6.

15. Ki mannyer nou kapab swiv legzanp Zezi pour akey bann ki feb e ki vin kot Lasal Rwayonm?

¹⁵ Ki nou pou fer ler en Kretyen ki feb i vin kot Lasal Rwayonm? Ki Zezi ti fer ler i ti vwar son bann zapot, ki zot lafwa ti’n afeblir pour en pe letan, dan sa landrwa ki i ti’n dir zot ale? “Zezi ti al kot zot” e koz avek zot. (Matye 28:18) I pa ti debout lwen avek zot e get zot, me i ti al kot zot. Mazinen ki mannyer bann zapot ti’n bezwen santi zot soulaze ler Zezi ti pran sa linisyativ! Annou osi pran linisyativ e akey bann ki feb spirityelman e ki fer zefor pour retourn dan kongregasyon.

16. (a) Ki nou kapab aprann par lafason ki Zezi ti azir avek son bann disip? (b) Ki mannyer nou kapab annan menm pwennvi avek Zezi lo bann ki feb? (Vwar not anba paz.)

¹⁶ Ki lezot keksoz Zezi ti fer? Premyerman, i ti fer en lanons: “Mon’n ganny tou pouvwar dan lesyel ek lo later.” Dezyenmman, i ti donn zot en travay pour fer: “Ale e fer tou pep vin mon bann disip.” Trwazyenmman, i ti fer en promes: “Mon avek zot toulezour.” Me eski ou’n remarke ki Zezi pa ti fer? I pa ti reprimann bann disip pour zot febles ek dout. (Matye 28:17) Eski son lapros ti efikas? Wi. Pa bokou letan apre, bann zapot ti ankor enn fwa pe ‘pres e anons’ sa bon nouvel. (Akt 5:42) Par swiv legzanp Zezi konsernan ki mannyer pour konsider e tret bann ki feb, nou kapab vwar bann rezilta ankourazan dan nou prop kongregasyon.b—Akt 20:35.

“Mon avek zot toulezour”

17, 18. Ki bann panse ankourazan ki trouve dan parol Zezi, “mon avek zot toulezour”?

¹⁷ Dan sa dernyen parol dan lord Zezi, “mon avek zot toulezour,” i annan en panse ankourazan pour bann ki pe travay dir pour obeir lord Kris pour fer disip. Nenport ki lopozisyon bann lennmi i kapab mete kont nou travay predikasyon Rwayonm e nenport mansonz zot kapab lanse kont nou, nou napa rezon pour per. Akoz? Zezi, nou lider, li ki’n ganny “tou pouvwar dan lesyel ek lo later,” i avek nou pour siport nou!

¹⁸ Promes Zezi “mon avek zot toulezour” i osi rekonfort nou en kantite. Anmezir ki nou fer nou mye pour obeir lord Kris pour fer disip, nou pa zis eksperyans bann moman lazwa me osi moman latristes. (2 Kronik 6:29) Serten parmi nou i pas atraver bann moman sagrinasyon apre lanmor en dimoun pros. (Zenez 23:2; Zan 11:33-36) Lezot pe fer fas avek lavyeyes, moman kot lasante ek lafors pe diminyen. (Eklezyast 12:1-6) I annan ankor lezot ki eksperyans bann moman depresyon. (1 Tesalonisyen 5:14) Deplizanpli, bokou nou pe lite avek bann problenm ekonomik difisil. Me kantmenm sa bann difikilte, nou reisi dan nou minister akoz Zezi i avek nou “toulezour,” menm dan bann moman pli sonm dan nou lavi.—Matye 11:28-30.

19. (a) Ki lord Zezi pour fer disip i enplike? (b) Kwa ki permet nou akonpli sa travay ki Kris in donn nou?

¹⁹ Parey nou’n vwar dan sa de lartik, lord Kris pour fer disip i enplik plizyer laspe. Zezi ti dir nou akoz e kote nou devret akonpli son lord. I ti osi dir nou ki nou devret ansennyen e ziska kan nou devret fer li. I vre, akonpli sa gran travay i pa fasil. Me avek pouvwar Kris deryer nou e son prezans devan nou, nou kapab akonpli li! Pa i vre?

[Not anba lo paz]

Ki ou pou reponn?

• Konman nou ansenny lezot pour obeir lord Zezi?

• Ki leson en nouvo disip i kapab aprann avek lezot dan kongregasyon?

• Ki nou kapab fer pour ed sa bann ki’n vin feb spirityelman?

• Ki lankourazman ek rekonfor nou gannyen dan promes Zezi “mon avek zot toulezour”?

[Portre lo paz 26]

Nou bezwen vin bann ansennyan e osi bann gid

[Portre lo paz 28]

En nouvo disip i aprann bann bon leson atraver legzanp ki lezot i kite