San-t-an depi ki sa Rwayonm pe rennyen!

 1. Ki kantite predikasyon ti enportan pour Zezi? Eksplike.

ZEZI ti kontan koz konsernan Rwayonm Bondye. Ler Zezi ti lo later, i ti koz konsernan sa Rwayonm plis ki okenn lezot size. I ti mansyonn sa Rwayonm plis ki 100 fwa pandan son minister. Sa Rwayonm ti vreman enportan pour Zezi.​—Lir Matye 12:34.

 2. Ki kantite dimoun ti la pour tann sa lord dan Matye 28:19, 20 e akoz nou dir sa?

² Pa bokou letan apre ki Zezi ti resisite, i ti zwenn en group plis ki 500 son bann disip. (1 Korentyen 15:6) Petet, i ti a sa moman ki Zezi ti donn sa lord pour pres avek “tou pep.” Sa travay pa ti pou fasil.a (Vwar not.) I ti dir zot ki sa travay predikasyon ti pou kontinyen pour ankor en kantite letan, “ziska lafen.” Ler ou pres sa bon nouvel ozordi, ou pe ede akonplir sa profesi.​—Matye 28:19, 20.

 3. Nonm trwa keksoz ki’n ed nou pres sa bon nouvel.

³ Apre ki Zezi ti donn sa lord pour prese, i ti dir: “Mon avek zot.” (Matye 28:20) Alor Zezi ti promet son bann disip ki i ti pou diriz sa travay predikasyon e ki i ti pou ed zot pres lo later antye. Zeova osi i avek nou. I’n donn nou “tou sa ki byen” pour nou kapab prese. (Ebre 13:20, 21) Dan sa lartik, nou pou vwar trwa sa bann keksoz ki byen: (1) bann zouti ki nou’n gannyen, (2) bann metod ki nou’n servi ek (3) sa formasyon ki nou’n gannyen. Premyerman, annou vwar serten zouti ki nou’n servi pandan sa dernyen 100 an.

 4. Ki mannyer diferan zouti in ed nou pour prese?

⁴ Zezi ti konpar sa mesaz Rwayonm avek lagrenn ki ganny plante dan diferan kalite later. (Matye 13:18, 19) Pour prepar sa later, en zardinyen i servi diferan zouti. Pareyman, nou Lerwa in donn nou bann zouti ki nou kapab servi pou ed dimoun aksepte nou mesaz. Serten zouti ti itil pour en pti pe letan, me lezot i ankor pe ganny servi ozordi. Me tou sa bann zouti in ed nou amelyor nou abilite pour prese.

 5. Kisisa en kart temwannyaz e ki mannyer i ti ganny servi?

⁵ An 1933, bann proklanmater ti konmans servi kart temwannyaz, en zouti ki ti ed bokou pour konmans prese. I ti en pti kart avek en pti mesaz senp lo Labib. Par ler en nouvo kart ti ganny pibliye avek en nouvo mesaz. Frer Erlenmeyer ti annan apepre di-z-an kan i ti servi en kart temwannyaz pour premye fwa. I ti eksplike: “Nou ti konmans par dir ‘Eski ou kapab lir sa kart silvouple?’ Apre ki sa met lakour ti lir sa kart, nou ti prezant sa piblikasyon e nou ti ale.”

 6. Ki mannyer kart temwannyaz ti ede?

⁶ Sa kart temwannyaz ti ed bann proklanmater dan diferan fason. Par egzanp, serten proklanmater ti kanmi e menm si zot ti vreman anvi prese, zot pa ti konnen ki pour dir. Lezot proklanmater ti vreman kouraze. Zot ti dir sa met lakour tou keksoz ki zot ti konnen dan zis detrwa minit, me zot pa ti servi bon zizman. Sa kart temwannyaz ti ed tou proklanmater pour donn en mesaz kler e senp.

 7. Ki serten difikilte ti annan pour servi kart temwannyaz?

⁷ I ti osi annan bann difikilte. Ser Grace Estep ti dir: “Par ler, nou ti ganny demande, ‘Be, ki i dir lo la? Ou pa kapab zis dir mwan lo kwa i baze?’” Serten met lakour pa ti kapab lir sa ki ti lo sa kart. Lezot ti zis pran sa kart e ferm laport. Serten dimoun pa ti kontan nou mesaz, alor zot ti desir nou kart par bout. Menm si i ti annan bann difikilte, sa kart temwannyaz ti ed bann proklanmater pres avek zot vwazen e pour ganny idantifye konman bann proklanmater Rwayonm.

 8. Ki mannyer granmofonn portab ti ganny servi? (Vwar portre lo paz 27.)

⁸ En lot zouti ki ti ganny servi apre lannen 1930 ti granmofonn portab. Serten Temwen ti apel li Aaron akoz sa masin ti koze dan zot plas. (Lir Egzod 4:14-16.b) (Vwar not.) Si sa met lakour ti dakor pour ekoute, sa proklanmater ti pou zwe en pti diskour baze lo Labib e apre ofer bann piblikasyon. Par ler, bann fanmir antye ti zwenn ansanm pour ekout en diskour! An 1934, Watch Tower Society ti konmans fer bann granmofonn portab pour predikasyon. Avek letan bann frer ti rikord 92 diferan diskour.

 9. Ki kantite, granmofonn portab ti efikas?

⁹ Kan Hillary Goslin ti tann enn sa bann diskour, i ti demann prete granmofonn pour en semenn pour partaz sa mesaz Labib avek son bann vwazen. An rezilta, detrwa dimoun ti enterese avek laverite e batize. Avek letan, tou le de fiy Frer Goslin ti asiste Lekol Gilead e vin misyonner. Parey kart temwannyaz, granmofonn portab ti ed bokou proklanmater pour konmans prese. Pli tar, atraver Lekol Minister Teokratik, sa Lerwa ti pou form son pep pour vin bann ansenyan efikas.

10, 11. Ki mannyer zournal ek radyo ti ganny servi pour pres sa bon nouvel e akoz sa bann metod ti efikas?

¹⁰ Anba direksyon nou Lerwa, pep Bondye in servi diferan metod pour zwenn kantite dimoun posib dan predikasyon. Sa bann metod ti enportan sirtou ler nou ti napa bokou travayer. (Lir Matye 9:37.) Par egzanp, pour plizyer lannen bann zournal ti ganny servi pour pres sa bon nouvel. Sak semenn Frer Russell ti anvoy en diskour baze lo Labib kot en lazans nouvel. Apre zot ti anvoy son diskour kot bann zournal Kanada, Lerop ek Leta-z-ini. Ler i ti ariv 1913, diskour Frer Russell ti’n ganny pibliye dan 2,000 zournal e apepre 15,000,000 dimoun ti’n lir li!

¹¹ Radyo osi ti ganny byen servi pour pres sa bon nouvel. Le 16 Avril 1922, Frer Rutherford ti donn enn parmi son bann premye diskour lo radyo e apepre 50,000 dimoun ti ekoute. Pli tar, nou ti konmans servi nou prop stasyon radyo ki ti apel WBBR e premye progranm ti zwe le 24 Fevriye 1924. Le 1 Desanm 1924, Latour Veyer an Angle ti dir: “Nou krwar ki ziska aprezan radyo i sa mwayen pli ekonomik e efikas pour propaz sa mesaz laverite.” Parey zournal, radyo ti ede pour zwenn en kantite dimoun dan bann landrwa kot i ti napa bokou proklanmater.

12. (a) Ki kalite temwannyaz an piblik ki ou pli kontan? (b) Kwa ki kapab ed nou sirmont okenn lafreyer konsernan temwannyaz an piblik?

¹² Temwannyaz an piblik i en metod efikas ki pe ganny servi ozordi pour zwenn dimoun. Bokou plis zefor pe ganny fer pour pres avek bann dimoun lo bestop, stasyon tren, kot zot park loto, landrwa piblik ek dan bann bazar. Eski ou per pour fer temwannyaz an piblik? Si wi, priye pour ganny led e pran aker sa ki Frer Manera, en sirveyan rezyonal, ti dir: “Nou ti get sak nouvo laspe servis konman en lot fason pour servi Zeova, konman en lot fason pour montre ki nou fidel avek li, konman en lot tes nou lentegrite e nou ti anvi montre ki nou pare pour servi li dan nenport ki fason i ti demande.” Ler nou sirmont nou bann lafreyer e servi bann nouvo metod prese, nou ranforsi nou konfyans dan Zeova e vin bann pli bon proklanmater.​—Lir 2 Korentyen 12:9, 10.

13. Akoz i efikas pour servi nou sit dan predikasyon e ki leksperyans ou’n gannyen ler ou’n servi li?

¹³ Bokou proklanmater i kontan dir lezot konsernan nou sit, jw.org, kot zot kapab lir e download bann piblikasyon baze lo Labib dan plis ki 700 langaz. Sak zour, plis ki 1.6 milyon dimoun i vizit nou sit. Dan lepase, radyo ti fer ki bann dimoun ki ti reste dan bann landrwa izole ti kapab tann sa bon nouvel. Ozordi, nou sit i fer sanmenm.

14. Ki formasyon bann proklanmater ti bezwen e ki lekol ki’n ed zot vin bann ansenyan efikas?

¹⁴ Bann zouti ek metod ki nou’n diskite in vreman efikas. Par kont, ler bann proklanmater ti fek konmans prese zot ti bezwen ganny formen. Par egzanp, par ler en met lakour pa ti dakor avek sa ki i ti tande lo granmofonn. Me i ti annan letan kot en met lakour ti enterese e anvi konn plis. Bann proklanmater ti bezwen aprann ki mannyer pour sirmont bann difikilte avek bon zizman e ki mannyer pour vin bann pli bon ansenyan. San dout avek led lespri sen, Frer Knorr ti vwar li enportan pour bann proklanmater aprann ki mannyer pour koze dan predikasyon. Alor an 1943, bann kongregasyon ti konmans organiz Lekol Minister Teokratik. Sa lekol ti ed tou bann proklanmater pour vin bann ansenyan efikas.

15. (a) Ki serten in eksperyanse ler zot in fer en size dan Lekol Minister Teokratik? (b) Ki mannyer promes Zeova dan Psonm 32:8 in vin vre dan ou ka?

¹⁵ Bokou frer pa ti abitye koz devan en lodyans. Frer Ramu i rapel son premye size ki i ti fer an 1944. Sa diskour ti baze lo en dimoun dan Labib ki ti apel Doeg. I ti dir: “Mon zenou ek mon lanmen ti pe tranble e mon ledan ti pe tap ansanm.” I ti azoute: “Sa ti mon premye leksperyans pour koz devan en lodyans lo platform, me mon pa ti abandonnen.” Menm si i pa ti fasil, bann zanfan osi ti fer prezantasyon dan lekol. Frer Manera i rapel sa ki ti arive kan en zenn garson ti fer son premye prezantasyon: “I ti sitan per ki ler i ti konmans son prezantasyon i ti konmans plere. Tou dilon son prezantasyon i ti zis plere, me i ti determinen pour fer li.” I kapab ki ou pa fer komanter dan renyon oubyen partisipe akoz ou kanmi oubyen ou santi ki ou pa kapab. Si wi, demann Zeova pour ed ou sirmont ou lafreyer. I pou ed ou parey i ti ed bann premye zelev Lekol Minister Teokratik.​—Lir Psonm 32:8.c (Vwar not.)

16. Ki ti lobzektif Lekol Gilead (a) dan lepase e (b) depi 2011?

¹⁶ Lorganizasyon Bondye in osi donn formasyon atraver Lekol Gilead. En lobzektif sa lekol se pour ed bann zelev pour ranforsi zot dezir pour pres sa bon nouvel. Lekol Gilead ti konmans an 1943 e depi sa letan 8,500 zelev in ganny formen e anvoye dan 170 pei. Depi 2011, bann ki ti ganny envite pour al sa lekol i bann pionye spesyal, sirveyan rezyonal, Betelit oubyen misyonner ki pa ti ankor asiste Lekol Gilead.

17. Akoz nou dir ki Lekol Gilead i efikas?

¹⁷ Eski Lekol Gilead in efikas? Wi. Annou vwar sa ki ti arive Zapon. An Out 1949, i ti annan mwens ki dis proklanmater dan sa pei. Me a lafen sa lannen, 13 misyonner ti pe pres ansanm avek bann proklanmater dan sa pei. Ozordi, i annan apepre 216,000 proklanmater Zapon e preski lanmwatye parmi zot i bann pionye.

18. Ki lezot lekol nou annan?

¹⁸ Nou annan bokou lezot lekol tel parey Lekol Minister Rwayonm, Lekol Servis Pionye, Lekol pour bann predikater Rwayonm, Lekol pour bann sirveyan rezyonal ek zot madanm, Lekol pour manm Komite Biro Brans avek zot madanm. Sa bann lekol in reisi form bann frer ek ser e ranforsi zot lafwa. I kler ki Zezi pe kontinyen form bokou dimoun.

19. Ki Frer Russell ti dir konsernan sa travay predikasyon e ki mannyer sa in vin vre?

¹⁹ Rwayonm Bondye pe rennyen pour plis ki 100 an. Pandan sa letan, nou Lerwa Zezi Kri in diriz sa travay predikasyon. An 1916, Frer Russell ti krwar ki sa bon nouvel ti pou ganny anonse lo later antye. I ti dir: “Sa travay pe ogmant vit e i pou kontinyen ogmante, parski i annan en travay ki bezwen ganny fer dan lemonn antye pour pres ‘levanzil rwayonm.’” (Faith on the March, par A. H. Macmillan lo paz 69) Sa travay pe ganny fer ozordi! Nou remersye Zeova, sa Bondye lape, pour lefet ki i donn nou tou keksoz ki nou bezwen pour fer son lavolonte!