Dir wi kan i wi

“Dir wi kan i wi, oubyen non kan i non.”​—MAT. 5:37.

KI OU KAPAB REPONN:

Ki Zezi ti dir konsernan pret serman?

Ki bon legzanp Zezi in kite konsernan gard promes?

Dan ki laspe nou lavi nou wi i devret wi?

 1. Ki Zezi ti dir konsernan pret serman kan pe fer en promes e akoz?

BANN vre Kretyen an zeneral pa oblize pret serman. Sa i akoz zot obeir sa parol ki Zezi ti dir: “Dir wi kan i wi.” Zezi ti pe dir ki en dimoun i devret gard son parol. Me avan i ti donn sa konmann, i ti dir: “Pa zanmen fer serman kan zot fer en promes.” I ti dir sa akoz bann dimoun dan son letan ti annan labitid pret serman pour nenport ki pti keksoz san annan lentansyon tenir zot parol. Kan en dimoun i dir wi oubyen non, tou sa ki i azoute “an plis,” i montre ki ou pa kapab met konfyans dan li e ki i anba lenfliyans “dyab.”​—Lir Matye 5:33-37.

 2. Eksplike akoz i pa toultan mal pour pret serman.

² Eski parol Zezi i vedir ki i mal pour pret serman? I pa ti pou fer sans akoz parey nou’n aprann dan lartik presedan, Zeova ek son serviter drwat, Abraam, ti pret serman dan bann lokazyon enportan. Dapre Lalwa Bondye osi, en dimoun ti devret pret serman kan i ti pe regle serten konfli. (Egz. 22:10, 11; Nom. 5:21, 22) Alor, sa i montre ki en Kretyen i kapab pret serman pour dir laverite ankour si i neseser. Dan serten lokazyon en Kretyen i kapab vwar li neseser pret serman pour fer konnen son lentansyon avek lezot oubyen regle en problenm. Zezi pa ti koz manti kan i ti reponn gran pret dan Sannedren ki ti demann li “o non Bondye” pour dir laverite. (Mat. 26:63, 64) Par kont, Zezi pa ti oblize fer serman avek okenn dimoun. Me kantmenm sa, pour met lanfaz ki son mesaz ti egzakt, souvandfwa i ti konmans koze an dizan: “An verite, an verite, mon dir zot.” (Zan 1:51; 13:16, 20, 21, 38) Annou vwar kwa ankor ki nou kapab aprann atraver legzanp Zezi, Pol, ek lezot ankor dan lafason ki zot ti dir wi kan i wi.

ZEZI I SA PLI BON LEGZANP

 3. Ki Zezi ti promet Bondye dan lapriyer e ki mannyer son Papa ti reazir?

³ “La mon la, mon vin fer ou volonte, mon Bondye.” (Ebr. 10:7) Ler Zezi ti dir sa parol, i ti pe promet Bondye ki i ti pou fer son lavolonte. Sa i vedir ki i ti pou akonplir tou profesi konsernan sa Desandans ki ti’n ganny promet, enkli sa moman kot Satan ti pou “kraz son talon.” (Zen. 3:15) Napa okenn imen ki’n deza volonter pour desarz en sitan gro responsabilite. Menm si Zeova pa ti demann Zezi pour pret serman ki i pou tenir son parol, Zeova ti dir ki i annan konfyans total dan son Garson.​—Lik 3:21, 22.

 4. Ziska ki degre Zezi ti les son wi, wi?

⁴ Zezi ti toultan fer sa ki i ti dir. Son wi ti toultan wi. I pa ti les nanryen distrer li dan sa travay ki son Papa ti’n donn li pour fer, setadir pres sa bon nouvel lo Rwayonm Bondye e fer bann dimoun ki Bondye ti atir ver li vin disip. (Zan 6:44) Labib i dekrir ki degre parol Zezi ti vre par dir sa bann parol byen koni: “Tou bann promes Bondye [i] trouv dan li zot ‘Wi.’” (2 Kor. 1:20) San okenn dout, Zezi i’n demontre sa pli bon legzanp konsernan tenir promes avek son Papa. Aprezan, annou vwar en dimoun ki ti fer son mye pour imit legzanp Zezi.

POL TI TENIR SON PAROL

 5. Ki legzanp zapot Pol in kite pour nou?

⁵ “Ki fodre mon fer Senyer?” (Akt 22:10) Par sa bann parol senser, Pol koni konman Sol ti aksepte gidans ki Zezi ti donn li atraver en vizyon pour anpes li persekit son bann disip. An rezilta sa levennman, Sol ti repantir, batize, e aksepte sa privilez spesyal pour rann temwannyaz lo Zezi avek tou nasyon. Depi sa letan, Pol ti kontinyen adres Zezi konman son “Senyer.” (Akt 22:6-16; 2 Kor. 4:5; 2 Tim. 4:8) Pol pa ti parey sa bann lo ki Zezi ti dir: “Akoz zot apel mwan Senyer, Senyer, e zot pa fer sa ki mon dir zot?” (Lik 6:46) Wi, Zezi ti ekspekte ki tou sa ki aksepte li konman zot Senyer i tenir zot parol, parey Pol.

6, 7. (a) Akoz Pol pa ti revizit Korent, e akoz bann Korentyen ti napa rezon pour kritik li? (b) Konman nou devret vwar bann ki’n ganny apwente pour dirize dan kongregasyon?

⁶ Avek devouman, Pol ti anons sa bon nouvel dan Lazi Miner ek Lerop. I ti osi form bann kongregasyon e apre revizit zot. Parler i ti vwar li neseser pou pret serman pour montre ki sa ki i ti’n ekrir ti vre. (Gal. 1:20) Kan serten dan lavil Korent ti akiz Pol konmkwa i pa ti diny konfyans, pour son defans i ti ekrir: “Bondye i fidel sa ki mon’n anons zot i pa ‘Wi’ ek ‘Non.’” (2 Kor. 1:18) Kan Pol ti ekrir sa let i ti’n fini kit Efez e i ti pe al Korent an pasan par Masedwann. O konmansman Pol ti pe mazin vizit Korent avan al Masedwann. (2 Kor. 1:15, 16) Ozordi osi, bann sirveyan i kapab sanz dat zot vizit pour bann kongregasyon. Sa sanzman pa ganny fer pour en nanryen ditou me pour en rezon enportan. Dan ka Pol, i ti tarde vizit Korent akoz i ti annan byennet kongregasyon aker. Ki mannyer sa?

⁷ Apre ki Pol ti’n fer plan pour vizit Korent i ti resevwar bann move nouvel konsernan divizyon ek limoralite ki ti pe ganny tolere dan sa kongregasyon. (1 Kor. 1:11; 5:1) Pour aranz sa sityasyon, i ti ekrir en konsey vreman serye dan son premye let pour bann Korentyen. Apre sa, dan plas al direk Korent, Pol ti deside pour donn son bann frer letan pour aplik sa bann konsey pour ki ler i ariv laba i ti pou kapab ankouraz zot pli byen. Pour asir zot ki i ti annan en rezon valab pour sanz son plan, Pol ti ekrir dan son dezyenm let: “Lo mon kote mon pran Bondye konman temwen lo mon lavi: Se pour eparny zot ki mon pa’n retourn Korent.” (2 Kor. 1:23) Annou pa zanmen azir parey bann ki ti kritik Pol, o kontrer montre en profon respe pour bann ki’n ganny apwente pour dirize e fer tou pour imit bon legzanp Pol, zis parey i ti imit Kris.​—1 Kor. 1:11; Ebr. 13:7.

LEZOT BON LEGZANP

 8. Ki legzanp Rebeka in kite pour nou?

⁸ “Mon pare pour ale.” (Zen. 24:58) Par sa detrwa parol senp, Rebeka ti reponn son manman ek son frer konsernan son desizyon pour kit lakour sa menm zour pour al avek en dimoun ki pa ti ni menm konnen e vwayaz plis ki 800 kilomet pour vin madanm Izaak. (Zen. 24:50-58) Sa wi ki Rebeka ti dir ti wi, akoz i ti reste fidel avek son msye e i ti annan lakrent pour Bondye. Pour larestan son lavi i ti reste dan latant konman en etranze dan Later Promiz. Deplis, i ti ganny rekonpanse pour son fidelite e i ti vin zanset sa desandans ki ti’n ganny promet, Zezi Kri.​—Ebr. 11:9, 13.

 9. Ki mannyer Rit ti tenir son parol?

⁹ “Non, nou pou retourn avek ou, kot ou pep.” (Rit 1:10) Sa de vev Moabit, Rit ek Orpa, ti kontinyen dir sa bann parol avek zot belmer Naomi. Naomi osi ti en vev e i ti pe retourn Betleenm sorti Moab. Naomi ti persyad tou le de vev pour retourn dan zot pei me finalman zis Orpa ki ti ale. Me Rit ti dir non e son non ti non. (Lir Rit 1:16, 17.a) I ti reste atase avek Naomi, abandonn son prop fanmir e kit sa fo relizyon ki i ti ladan. I ti reste fidel konman en adorater Zeova e i ti enn parmi sa senk madanm ki ti ganny rekonpanse par form parti laliny desandans Zezi ki’n ganny rikorde dan liv Matye.​—Mat. 1:1, 3, 5, 6, 16.

10. Akoz Izai i en bon legzanp pour nou?

¹⁰ “La mon la! Anvoy mwan.” (Iza. 6:8) Avan ki Izai ti dir sa parol, i ti vwar en vizyon ekstraordiner kot Zeova ti pe asiz lo Son tronn par lao tanp Izrael. Ler i ti pe vwar sa bann siny Izai ti tann Zeova dir: “Lekel ki mon pou anvoye, e lekel ki pou ale pour nou?” Sa ti en lenvitasyon pour vin portparol Zeova e anons mesaz Bondye avek Son pep ki ti’n rebele. Izai ti tenir son parol, son wi ti wi. Pour karannsi-z-an i ti fidelman servi konman en profet pour anons bann mesaz sever pour denons sa pep e osi pour rapel zot bann promes merveye konsernan restorasyon vre ladorasyon.

11. (a) Akoz i enportan pour tenir nou parol? (b) Ki legzanp lavertisman i annan dan Labib konsernan bann dimoun ki pa ti tenir zot parol?

¹¹ Akoz Zeova in met sa bann legzanp dan Labib pour nou ozordi? Ki kantite serye i ete pour les nou wi, wi? Labib i klerman averti nou ki dimoun ki “pa gard zot promes” son rezilta “se lanmor.” (Rom. 1:31, 32) Faraon sorti Lezip, Lerwa Zida Sidkya e Ananyas ek Safira i bann move legzanp ki’n ganny mansyonnen dan labib e zot wi pa ti wi. Zot tou zot ti mal pase e zot bann legzanp lavertisman pour nou.​—Egz. 9:27, 28, 34, 35; Ezek. 17:13-15, 19, 20; Akt 5:1-10.

12. Kwa ki pou ed nou tenir nou parol?

¹² Lefet ki nou viv dan bann dernyen zour, nou antoure avek dimoun ki “tret,” e ki “montre en laparans lapiete, me rezet son vre pisans.” (2 Tim. 3:1-5) O tan ki posib, nou devret evite frekant sa bann dimoun. O kontrer, nou devret regilyerman asosye avek bann ki toultan les zot wi, wi.​—Ebr. 10:24, 25.

OU WI PLI ENPORTAN

13. Ki sa wi pli enportan ki ganny dir par bann disip Zezi Kri?

¹³ En promes pli enportan ki en dimoun i kapab fer i son dedikasyon avek Bondye. Bann ki anvi montre ki zot disip Zezi i annan sa loportinite pour dir wi pour fer konnen zot lentansyon dan trwa lokasyon spesifik. (Mat. 16:24) Kan en dimoun i anvi vin en proklanmater non batize, de ansyen i demann li: “Eski ou vreman anvi vin en Temwen Zeova?” Plitar kan sa dimoun i fer bann progre spirityel e i anvi batize, bann ansyen pou demann li: “Eski ou’n fer en dedikasyon personnel avek Zeova dan lapriyer?” Finalman, zour batenm sak kandida i ganny demande: “Lo baz sakrifis Zezi Kri, eski ou’n repantir ou bann pese e dedye ou lekor avek Zeova pour fer son lavolonte?” Alor devan bann Temwen, sa bann kandida batenm i dir wi oubyen promet Zeova pour servi li pour touzour.

14. Ki egzaminasyon sak dimoun i devret fer?

¹⁴ Ki swa ou fek batize oubyen ou pe servi Bondye pour plizyer dizenn lannen, ou bezwen egzamin ou lekor detanzantan e demande: ‘Konman en imitater Zezi, eski mon pe kontinyen fer ki mon wi i wi? Eski mon pe kontinyen obeir Zezi par fer travay predikasyon e fer disip vin priyorite dan mon lavi?’​—Lir 2 Korentyen 13:5.

15. Dan ki laspe lavi i enportan pour les nou wi, wi?

¹⁵ Pour montre ki nou senser anver nou dedikasyon nou bezwen reste fidel dan lezot laspe enportan osi. Par egzanp: Eski ou’n marye? Alor kontinyen onor sa ve presye ki ou’n fer avek ou konzwen pour kontan e seri li. Eski ou’n siny en kontra biznes oubyen ranpli en form laplikasyon pour en privilez dan lorganizasyon? Ou devret gard ou parol. Eski en dimoun ki napa bokou mwayen in envit ou pour en repa? Alor pa bezwen kennsel akoz ou anvi al kot sa enn ki ou mazinen i annan plis. Eski ou’n promet en dimoun ki ou’n zwenn dan predikasyon ki ou pou retourn kot li pour ed li spirityelman? Fer tou posib pour les ou wi, wi e Zeova pou beni ou minister.​—Lir Lik 16:10.

BYENFE KI NOU GANNYEN AVEK NOU GRAN PRET EK LERWA

16. Si nou pa’n arive gard nou parol ki nou devret fer?

¹⁶ Labib i dir bann imen enparfe pou “komet lerer dan plizyer mannyer,” sirtou an sa ki konsern servi nou lalang. (Zak 3:2) Ki nou devret fer si nou realize nou pa’n arive gard nou parol? Dan Lalwa Bondye ki ti ganny donnen avek bann Izraelit, i ti annan en provizyon pour demontre mizerikord anver bann dimoun ki ti koupab pour “koze san reflesir.” (Lev. 5:4-7, 11) I osi annan en provizyon ranpli avek lanmour pour bann Kretyen ki komet sa kalite pese. Si nou konfes avek Zeova konsernan en promes ki nou’n fer me ki nou pa’n tenir sa promes, i pou pardonn nou atraver nou Gran Pret, Zezi Kri. (1 Zan 2:1, 2) Pour kontinyen ganny faver Bondye, nou bezwen demontre ki nou’n repantir par pa fer li en labitid pour pa tenir nou promes e kontinyen fer nou mye pour repar okenn ditor ki nou’n fer si nou’n koze san reflesir. (Prov. 6:2, 3) Byensir i pli bon reflesir avan ki nou fer en promes ki nou konnen nou pa pou kapab akonpli.​—Lir Eklezyast 5:2.b

17, 18. Ki lavenir merveye pe esper tou bann ki fer zefor ki zot wi i wi?

¹⁷ Pa en lavenir merveye pe esper tou bann adorater Zeova ki kontinyen fer zefor pour dir wi kan i wi! Pour sa 144,000 Kretyen swazir, i pou vedir lavi imortel dan lesyel kot zot “pou renny avek [Zezi] pandan 1000 an.” (Rev. 20:6) Sa plizyer milyon dimoun ki pou viv dan Paradi lo later pou benefisye atraver Rwayonm Bondye anba direksyon Kris e an rezilta sa zot pou vin parfe fizikman e mantalman.​—Rev. 21:3-5.

¹⁸ Si nou reste fidel anba sa dernyen tes a lafen Renny Mil An Zezi, nou pa pou zanmen annan rezon ankor pour annan doutans ler en dimoun i dir en keksoz. (Rev. 20:7-10) Tou wi pou wi e tou non pou non. Dan sa letan tou dimoun pou imit Zeova parfetman, nou Papa ki dan lesyel, “sa Bondye laverite.”​—Ps. 31:5.

[Not anba lo paz]

[Portre lo paz 29]

Depi son batenm ziska son lanmor, Zezi ti tenir son promes avek son Papa

[Portre lo paz 31]

Eski sa wi pli enportan ki ou’n dir i touzour wi?