Zeova i glorifye son non

1, 2. Ki mannyer New World Translation i glorifye non Bondye?

EN ZOUR Mardi bomaten byen fre me ansoleye, le 2 Desanm 1947, en pti group Kretyen swazir dan Betel Brooklyn, New York ti met pare pour akonplir en gro travay. Sa travay ti demann bokou, me pour sa prosen 12 an, zot ti kontinyen fer li. Alafendefen, Dimans le 13 Mars 1960, zot ti konplet teks final pour en nouvo tradiksyon Labib. Trwa mwan pli tar, le 18 Zen 1960, Frer Nathan Knorr ti lans volim final New World Translation of the Holy Scriptures an antye avek en lodyans byen kontan Manchester, Langleter. Sa orater ti eksprim byen santiman tou sa bann ki ti asiste kan i ti dir: ‘Ozordi i en zour pour tou Temwen Zeova dan lemonn antye rezouir!’ En laspe remarkab sa tradiksyon ki ti en gran sours lazwa se ki i ti servi non Bondye tou dilon sa tradiksyon.

² Bokou tradiksyon Labib pa servi non Bondye. Me, bann frer swazir ti tenir ferm kont taktik Satan pour elimin non Bondye konpletman. Lentrodiksyon dan sa New World Translation ki ti ganny lanse sa lannen ti dir: “Laspe pli enportan sa tradiksyon, se lefet ki non Bondye in ganny remet dan son plas apropriye dan teks an Angle.” I vreman leka, New World Translation i servi non personnel Bondye, setadir Zeova, plis ki 7,000 fwa. Pa sa tradiksyon in vreman glorifye non Zeova, nou Papa ki dan lesyel!

 3. (a) Ki nou bann frer ti konpran konsernan sinifikasyon non Bondye? (b) Ki mannyer nou devret konpran Egzod 3:13, 14? (Vwar bwat “Sinifikasyon non Bondye.”)

³ Avan sa, bann Etidyan Labib ti konpran ki non Bondye i vedir “Mon ete sa ki mon ete.” (Egz. 3:14, King James Version) Alor, The Watch Tower le 1 Zanvye 1926 ti dir: “Sa non Zeova i vedir ki i pa bezwen personn pour li egziste, . . . sa Enn ki ti napa ni konmansman e ni lafen.” Par kont, letan ki bann tradikter New World Translation ti konmans tradwir, Zeova ti ed son pep konpran ki son non pa zis vedir ki i pa bezwen personn pour li egziste, me prensipalman ki i en Bondye ki annan en plan e ki azir. Zot ti aprann ki non Zeova i literalman vedir “I fer arive.” Wi, i ti fer liniver ek bann lanz ensi ki imen vin an egzistans e i pe kontinyen fer son lavolonte ek son plan vin en realite. Me, akoz i sitan enportan ki non Bondye i ganny glorifye e ki mannyer nou kapab ede pour glorifye son non?

4, 5. (a) Ki nou pe demande ler nou priye: ‘Ki ou non i ganny sanktifye’? (b) Ki mannyer e kan ki Bondye pou sanktifye son non?

⁴ Zeova i anvi ki son non i ganny glorifye. Anfet, sanktifye son non i son bi prensipal, parey i evidan dan premye demann dan lapriyer model Zezi: ‘Ki ou non i ganny sanktifye.’ (Mat. 6:9) Kan nou fer sa demann, ki nou pe vreman demande?

⁵ Parey nou ti aprann dan Sapit 1 sa liv, sa demann ‘Ki ou non i ganny sanktifye’ i enn parmi trwa demann dan lapriyer model Zezi ki relye avek plan Zeova. Lezot de se ‘Ki ou Rwayonm i vini’ e ‘Ki ou lavolonte i ganny akonplir.’ (Mat. 6:10) Alor, zis parey nou demann Zeova pour pran aksyon pour ki son Rwayonm i vini e ki son lavolonte i ganny fer, nou pe demann Zeova pour osi pran aksyon pour sanktifye son non. Andotmo, nou pe demann Zeova ki i azir pour elimin tou bann repros ki’n ganny anmennen lo son non depi rebelyon dan zarden Edenn. Ki mannyer Zeova pou reponn sa lapriyer? I dir: “Mon pou sirman sanktifye mon gran non ki ti’n ganny sali parmi bann nasyon.” (Ezek. 36:23; 38:23) Zour Armagedon, kan i retir tou lemal, Zeova pou sanktifye son non devan lizye tou son kreasyon.

 6. Ki mannyer nou kapab ede pour sanktifye non Bondye?

⁶ Tou dilon listwar, Zeova in les son bann serviter ede sanktifye son non. Byensir, nou pa kapab fer non Bondye pli sakre. I deza sakre oubyen sen, dan son sans total. Alor, ki mannyer nou kapab sanktifye li? Izai ti dir: “Zeova bann larme, li ki sa Enn ki ou devret konsider konman sen.” Deplis, Zeova li menm ti dir sa konsernan son pep: “Zot pou sanktifye mon non, . . . e zot pou annan lakrent pour Bondye Izrael.” (Iza. 8:13; 29:23) Alor, nou sanktifye non Bondye kan nou konsider li konman pli gran e diferan avek okenn lezot non, kan nou respekte sa ki i reprezante e kan nou ed lezot pour konsider li sen. Nou demontre sirtou ki nou annan lakrent ek respe pour non Bondye kan nou rekonnet ki Zeova i nou Dirizan e nou obei li avek tou nou leker.​—Prov. 3:1; Rev. 4:11.

7, 8. (a) Akoz i ti pran letan avan ki pep Bondye i kapab port son non? (b) Ki nou pou egzaminen aprezan?

⁷ Bann serviter Bondye dan nou letan in servi non Bondye dan zot bann piblikasyon depi bann lannen 1870. Par egzanp, dan Zion’s Watch Tower Out 1879 ek Songs of the Bride, en liv kantik ki ti ganny pibliye sa menm lannen, i ti annan non Zeova. Kantmenm sa, i paret ki avan ki Zeova ti permet son pep adopte sa non pour zot, i ti fer sir ki zot ti kalifye pour sa privilez. Ki mannyer Zeova ti prepar sa bann premye Etidyan Labib pour port son non?

⁸ Si nou retourn tar dan bann lannen 1800 e o konmansman lannen 1900, nou vwar ki Zeova ti donn son pep en pli bon konprenezon lo serten laverite ki relye avek son non. Annou egzamin trwa sa laverite.

9, 10. (a) Akoz bann premye lartik Watch Tower ti koz plis lo Zezi? (b) Ki sanzman ki ti arive depi 1919 an montan e avek ki rezilta? (Vwar osi bwat “Lafason ki The Watchtower in glorifye non Bondye.”)

⁹ Premyerman, bann serviter Zeova ti arive annan sa bon pwennvi lo lenportans non Bondye. Bann premye Etidyan Labib fidel ti konsider sa laranzman pour ranson konman en lansennyman enportan dan Labib. Sanmenm rezon ki Watch Tower ti souvan koz lo Zezi. Par egzanp, premye lannen ki sa magazin ti pe ganny enprimen, i ti koz dis fwa plis lo Zezi ki lo Zeova. Konsernan konmansman listwar bann Etidyan Labib, Watch Tower le 15 Mars 1976 ti dir ki zot ti’n donn non Zezi “en lenportans plis ki fodre.” Me, avek letan, Zeova ti ed zot konpran valer ki Labib i donn non personnel Bondye. Ki lefe sa ti annan lo bann Etidyan Labib? Sa menm lartik Watch Tower, ti dir ki sirtou depi 1919 an montan, “zot ti konmans demontre plis lapresyasyon pour Zeova, Papa Mesi.” Anfet, pandan sa deseni apre 1919, The Watch Tower ti servi non Bondye plis ki 6,500 fwa!

¹⁰ Lefet ki nou bann frer ti donn sa non sa loner ki i merite, zot ti pe demontre zot lanmour pour non Bondye. Parey Moiz, zot “proklanm non Zeova.” (Det. 32:3; Ps. 34:3) An retour, parey Labib i promet, Zeova ti remark zot lanmour pour son non e i ti donn zot son laprouvasyon.​—Ps. 119:132; Ebr. 6:10.

11, 12. (a) Dan ki fason nou bann piblikasyon ti sanze deswit apre 1919? (b) Lo kwa Zeova ti pe atir latansyon son bann serviter e akoz?

¹¹ Dezyenmman, bann vre Kretyen ti pli byen konpran sa travay ki Bondye ti’n donn zot pour fer. En pti pe letan apre 1919, bann frer swazir ki ti pe diriz lorganizasyon ti ganny motive pour egzamin profesi Izai o profon. Apre sa, sa ki ti ganny met lanfaz lo la dan nou bann piblikasyon ti sanze. Akoz sa azisteman ti parey nouritir “kan i ler”?​—Mat. 24:45.

¹² Avan 1919, The Watch Tower pa ti’n zanmen donn okenn detay lo sa ki ganny dir dan Izai: “Zeova ti dir: ‘Zot mon bann Temwen, wi mon serviter ki mon’n swazir.’” (Lir Izai 43:10-12.) Me, deswit apre 1919, nou bann piblikasyon ti konmans konsantre lo sa pasaz dan Labib e i ti ankouraz tou bann Kretyen swazir pour partisip dan sa travay ki Zeova ti’n donn zot pour fer, setadir pour rann temwannyaz lo li. Anfet, zis depi 1925 ziska 1931 tousel, Izai sapit 43 ti ganny egzaminen dan 57 diferan nimero The Watch Tower e sak nimero ti pe montre ki parol Izai ti aplik pour bann vre Kretyen. I kler ki pandan sa bann lannen, Zeova ti pe atir latansyon son bann serviter lo sa travay ki zot ti devret pe fer. Akoz? Dan en sans, pour ki i “premyerman teste zot, e [vwar] si napa okenn repros kont zot.” (1 Tim. 3:10) Avan ki zot ti kapab port non Bondye, bann Etidyan Labib ti pou bezwen prouve avek Zeova atraver zot aksyon ki zot ti vreman bann Temwen.​—Lik 24:47, 48.

13. Ki mannyer Parol Bondye i revel sa kestyon pli enportan ki merit ganny reponn?

¹³ Trwazyenmman, pep Zeova ti aprann apresye lenportans pour sanktifye non Bondye. Diran bann lannen 1920, zot ti konpran ki sa kestyon pli enportan ki merit ganny reponn i annan pour fer avek sanktifye non Bondye. Ki mannyer Parol Bondye i revel sa laverite enportan? Get sa de legzanp. Pour ki rezon Bondye ti delivre Izrael Lezip? Zeova ti dir: “Pour ki mon non i ganny proklanmen lo later antye.” (Egz. 9:16) Akoz Zeova ti demontre mizerikord anver Izrael kan zot ti rebel kont li? Ankor enn fwa, Zeova ti dir: “Mon’n azir akoz mon non, pour ki i pa ganny sali devan bann nasyon.” (Ezek. 20:8-10) Ki bann Etidyan Labib ti aprann dan sa resi ek lezot resi Labib?

14. (a) Tar dan bann lannen 1920, ki pep Bondye ti konpran? (b) Ki lefe en konprenezon pli profon ki bann Etidyan Labib ti gannyen ti annan lo sa travay predikasyon? (Vwar bwat “En bon rezon pour prese.”)

¹⁴ Tar dan bann lannen 1920, pep Bondye ti konpran sinifikasyon sa ki Izai ti dir apepre 2,700 an pli boner. Konsernan Zeova, i ti dir: “Se koumsa ki ou’n gid ou pep, pour fer en non merveye pour ou.” (Iza. 63:14) Bann Etidyan Labib ti konpran ki sa ki ti devret pli enportan se pa delivrans en endividi, me plito sanktifikasyon non Bondye. (Iza. 37:20; Ezek. 38:23) An 1929, liv Prophecy ti fer en rezimen lo sa laverite, an dizan: “Non Zeova i sa keksoz pli enportan devan tou kreasyon.” Sa nouvo konprenezon ti motiv bann serviter Bondye plis ankor pour rann temwannyaz lo Zeova e sanktifye son non.

15. (a) Dan bann lannen 1930, ki nou bann frer ti’n arive konpran? (b) Ler ti’n arive pour fer kwa?

¹⁵ O konmansman bann lannen 1930, nou bann frer ti’n ganny en pli bon konprenezon lo lenportans non Bondye, lo sa travay ki Bondye ti’n donn zot pour fer e en pli gran konnesans lo sa kestyon ki ti merit ganny reponn. Aprezan, i ti’n ariv ler pour Zeova donn son bann serviter sa loner pour port son non an piblik. Pour vwar ki mannyer sa ti arive, annou egzamin serten levennman ki ti arive dan lepase.

16. (a) Dan ki fason ekstraordiner Zeova i glorifye son non? (b) Dan lepase, lekel ki ti en pep pour non Bondye o konmansman?

¹⁶ En fason vreman remarkab ki Zeova i glorifye son non se atraver en pep lo later ki port son non. Depi 1513 A.N.L., nasyon Izrael ti reprezant Zeova konman son pep. (Iza. 43:12) Me, zot pa ti reisi gard zot lalyans avek Bondye e lannen 33 N.L., zot ti perdi zot relasyon spesyal avek li. En pti pe letan apre, Zeova ti konmans swazir parmi bann dimoun dan lezot nasyon “en pep pour son non.” (Akt 15:14) Sa nouvo pep swazir ti ganny apele “Izrael Bondye” e se zot bann Kretyen swazir ki sorti dan tou nasyon.​—Gal. 6:16, NW.

17. Ki taktik Satan ki ti byen marse?

¹⁷ Ver 44 N.L., anba gidans Bondye, bann disip Kris ti ‘ganny apele Kretyen.’ (Akt 11:26) O konmansman, sa non ti disteng zot akoz i ti aplik zis avek bann vre Kretyen. (1 Pyer 4:16) Me, parey Zezi ti endike dan son parabol konsernan dible ek move zerb, Satan ti reisi dan son konplo pour fer sir ki sa non i aplik pour tou sort larelizyon swadizan Kretyen. Alor, pour plizyer syek, i pa ti kler lekel ki ti vre Kretyen parmi tou bann swadizan Kretyen ki ti annan. Me, ler “rekolt” ti konmanse an 1914, tou ti sanze. Akoz? Parski bann lanz ti konmans separ bann swadizan Kretyen ek bann vre Kretyen.​—Mat. 13:30, 39-41.

18. Kwa ki ti ed nou bann frer pour vwar ki en nouvo non ti neseser?

¹⁸ Apre ki sa lesklav fidel ti ganny apwente an 1919, Zeova ti ed son pep pour konpran sa travay ki i ti anvi zot fer. Deswit zot ti konmans pres kaz an kaz e sa ti fer zot diferan avek bann swadizan Kretyen. Enn fwa ki zot ti konpran sa, i pa ti pran zot bokou letan pour realize ki sa non “Etidyan Labib” pa ti ase pour disteng zot avek lezot larelizyon. Zot pa ti zis anvi etidye Labib, me zot ti osi anvi rann temwannyaz lo Bondye, onor li e glorifye son non dan zot lavi. Alor, ki non ki ti pou al byen avek sa travay ki zot ti pe fer? Sa kestyon ti ganny reponn an 1931.

19, 20. (a) Ki rezolisyon eksitan ki ti ganny aksepte pandan en lasanble distrik an 1931? (b) Ki mannyer nou bann frer ek ser ti reakte anver sa nouvo non ki nou ti adopte?

¹⁹ Zilyet 1931, apepre 15,000 Etidyan Labib ti ariv Columbus, Ohio, Leta-z-ini pour en lasanble distrik. Lo zot progranm lasanble distrik, zot ti enpresyonnen pour vwar sa de let, J ek W byen gro devan lo la. Zot ti mazinen, ‘Ki sa de let i vedir?’ Serten ti mazinen i vedir ‘Just Watch’ (Zis gete), lezot, ‘Just Wait’ (Zis espere). Me, Dimans le 26 Zilyet, Frer Joseph Rutherford ti fer sa lanons pwisan: “Nou swete ganny rekonnet e ganny apele par sa non, Temwen Zeova.” Sa letan, tou dimoun dan lasistans ti konpran sinifikasyon sa de let, zot ti reprezant Jehovah’s Witnesses, en non sorti dan Izai 43:10.

²⁰ Lodyans ti aksepte sa rezolisyon dan lazwa e avek laplodisman. Atraver radyo, bokou dimoun dan lemonn ti kapab tann sa laklamasyon! Ernest ek Naomi Barber Ostrali i rapel: “Kan i ti annan sa gran laplodisman Lanmerik, bann frer Melbourne ti debout e konmans bat lanmen. Nou pa pou zanmen oubliy sa zour.”a

21. Ki mannyer sa nouvo non ti en motivasyon pour prese?

²¹ Lefet ki zot ti annan en non sorti dan Labib, bann serviter Bondye ti pli devoue ankor pour partisip dan predikasyon. Edward ek Jessie Grimes, en koup pionye Leta-z-ini ki ti asiste sa lasanble distrik Columbus an 1931 ti dir: “Nou ti kit se nou konman Etidyan Labib e retourn se nou konman Temwen Zeova. Nou ti vreman kontan ki aprezan nou ti annan en non ki ti pou ed nou glorifye non nou Bondye.” Apre sa lasanble, serten Temwen ti servi en nouvo metod pour fer sa. Zot ti entrodwir zot lekor avek en met lakour par donn li en kart ki ti dir: “Mon en Temwen ZEOVA ki pe pres lo Rwayonm ZEOVA nou Bondye.” Wi, pep Bondye ti fyer pour port non Zeova e zot ti pare pour proklanm son sinifikasyon lo later antye.​—Iza. 12:4.

22. Kwa ki prouve ki pep Zeova i annan en lidantite ki disteng zot avek lezot?

²² En kantite letan in pase depi ki Zeova in motiv bann frer swazir pour adopte sa non ki disteng zot avek lezot. Depi 1931, eski Satan in vreman kapab kasyet lidantite pep Bondye? Eski i’n reisi fer li enposib pour lezot disteng nou avek lezot larelizyon? Definitivman non! Plito, nou lidantite konman Temwen Zeova i fer nou pli diferan ankor avek lezot. (Lir Mika 4:5; Malaki 3:18.) Anfet, nou’n sitan ganny asosye avek non Bondye ki nenport ki ki volonterman servi sa non ozordi i fasilman ganny apele Temwen Zeova. Plito ki ganny kasyet par sa ta larelizyon ki annan konmela, vre ladorasyon Zeova in “ganny byen etabli par lao latet bann montanny.” (Iza. 2:2) Ozordi, ladorasyon Zeova ek son non sakre in sirman ganny glorifye.

23. Dapre Psonm 121:5, ki laverite enportan konsernan Zeova ki vreman ankouraz nou?

²³ Pa i vreman ankourazan pour konnen ki Zeova pou protez nou avek bann latak Satan la konmela e dan lavenir! (Ps. 121:5) Nou annan bon rezon pour eksprim sa menm santiman ki sa psalmis ti ekrir: “Ere sa nasyon ki Zeova i zot Bondye, sa pep ki i’n swazir pour vin pour li.”​—Ps. 33:12.