Resers Bondye avek ou Leker Ek Lespri

Vre Kristyanism i ankouraz dimoun pour servi zot leker ek lespri pour batir lafwa ki fer plezir Bondye.

ANNEFE, fondater Kristyanism, Zezi Kri, ti ansennyen ki nou devret kontan Bondye avek tou nou “lespri,” oubyen lentelizans, apard ki avek tou nou “leker” ek tou nou “lam.” (Matye 22:37) Wi, nou fakilte mantal i devret zwe en rol enportan dan nou ladorasyon.

Kan i ti envit bann ki pe ekout li pour reflesir lo son lansennyman, Zezi ti souvan demande: “Ki ou mazinen?” (Matye 17:25; 18:12; 21:28; 22:42) Dan menm fason, zapot Pyer ti ekrir bann konpanyon Kretyen afen pour “stimil zot kapasite refleksyon kler.” (2 Pyer 3:1, NW ) Dan premye syek, zapot Pol ki ti sa misyonner ki ti vwayaz plis, ti ankouraz bann Kretyen pour servi zot “kapasite pour rezonnen” e pour “kapab konpran lavolonte Bondye: Sa ki bon, sa ki fer li plezir, sa ki parfe.” (Romen 12:1, NW, 2) Se selman atraver en egzaminasyon oprofon lo zot krwayans ki bann Kretyen i kapab batir lafwa ki fer plezir Bondye e ki permet zot reisi fer fas avek bann tes ki arive dan lavi.—Ebre 11:1, 6.

Pour ed lezot batir en tel lafwa, bann premye Kretyen ki ti prese ti “rezonn lo Lekritir avek bann dimoun.” (Akt 17:1-3, NW ) En tel lapros ki ti an armoni avek en rezonnman lozik ti prodwir en bon rezilta pour bann ki ti annan leker senser. Par egzanp, en kantite dimoun dan lavil Masedwann Bere “ti resevwar Parol Bondye avek bokou lentere. Toulezour zot ti etidye Lekritir pour war si sa ki Pol ti dir zot ti vre.” (Akt 17:11) I annan de keksoz ki vo lapenn note dan sa verse Labib. Premyerman, bann Bereen ti annan bokou lentere pour ekout Parol Bondye; dezyenmman, zot pa ti aksepte san reflesir si sa ki zot ti tande ti korek, me zot ti verifye sa ki zot ti tande par konsilte Lekritir. Avek limilite, Lik, sa misyonner Kretyen, ti felisit bann Bereen pour sa, an dizan ki zot ti annan “en pli bon latitid.” Eski ou annan en bon latitid dan ou lapros anver bann keksoz spirityel?

Leker ek Lespri i travay ansanm

Parey i’n ganny mansyonnen pli boner, vre ladorasyon i enplik lespri ek leker. (Mark 12:30) Reflesir lo sa ilistrasyon dan lartik presedan lo sa pennter ki pa ti servi sa kouler apropriye kan i ti pe penn en lakaz. Si i ti’n ekout atantivman lenstriksyon sa propriyeter, i ti pou’n kapab akonpli son travay avek tou son leker e i ti pou annan konfyans ki sa propriyeter ti pou kontan son travay. Menm prensip i aplik avek nou ladorasyon.

Zezi ti dir ki ‘vre ladorater pou ador Bondye an-espri e an verite.’ (Zan 4:23) Alor, zapot Pol ti ekrir: “Pour sa rezon, depi ki nou’n tann koz lo zot, nou’n touzour priy pour zot. Nou demann Bondye pour ranpli zot avek konnesans [egzakt, NW ] son lavolonte, avek lasazes ek konpreansyon ki son Lespri i donnen, pour ki zot ava kapab viv, en lavi ki Bondye i aprouve e ki fer li plezir dan tou sa ki zot fer.” (Kolosyen 1:9, 10) En tel “konnesans” egzakt i permet bann dimoun senser pour met zot leker ek zot nanm dan zot ladorasyon avek konfyans total akoz zot ‘ador sa ki zot konnen.’—Zan 4:22.

Pour sa rezon, Temwen Zeova pa batiz bann pti zanfan oubyen bann nouvo ki enterese me ki pa’n etidye byen Labib. Zezi ti ordonn son bann disip: “Fer tou pep vin mon bann disip. . . . Ansenny zot pour obei tou sa ki mon’n konmande.” (Matye 28:19, 20) Se selman apre ki zot in ganny en konnesans egzakt lo lavolonte Bondye ki bann etidyan senser i kapab fer en desizyon baze lo konnesans egzakt an sa ki konsern ladorasyon. Eski ou pe esey fer zefor pour ganny en tel konnesans egzakt?

Konpran Lapriyer Senyer

Pour vwar diferans ant annan en konnesans egzakt lo Labib e annan en konnesans limite lo sa ki i dir, annou konsider sa ki normalman ganny apele lapriyer Notre Père, oubyen Lapriyer Senyer ki ganny rikorde dan Matye 6:9-13.

Plizyer milyon dimoun i regilyerman resit sa lapriyer model dan legliz. Me ki kantite parmi zot ki’n ganny ansennyen ki i vedir, espesyalman premye parti sa lapriyer ki annan pour fer avek non ek Rwayonm Bondye? Sa bann size i sitan enportan ki Zezi ti plas zot premye dan sa lapriyer.

I konmans koumsa: “Nou Papa ki dan lesyel ki ou non sen i ganny glorifye,” ki vedir ganny sangtifye. Remarke ki Zezi ti dir priye pour ki non Bondye i ganny sangtifye. Pour laplipar dimoun, sa i soulev omwen de kestyon. Premyerman, lekel non Bondye? E dezyenmman, akoz i bezwen ganny sangtifye?

Larepons pour premye kestyon i kapab ganny trouve dan plis ki 7,000 landrwa dan Labib dan son langaz orizinal. Enn i dan Psonm 83:18: “Ki dimoun i kapab konnen ki ou, ki ou non i Zeova, se ou tousel ki Tre O lo tou later.” Konsernan sa non divin, Zeova, Egzod 3:15 i dir: “Sa i mon non pour letan endefini, e sa i mon memoryal pour zenerasyon apre zenerasyon.”a Me akoz non Bondye, ki sitan pir e sen, i bezwen ganny sangtifye? Parski son bon repitasyon in ganny sali e andomaze par mansonz depi konmansman listwar imen.

An Edenn, Bondye ti dir avek Adan ek Ev ki zot pou mor si zot manz fri ki I’n defann zot manze. (Zenez 2:17) Avek lodas Satan ti kontredir Bondye, an dizan avek Ev: “Sirman zot pa pou mor.” Alor, Satan ti akiz Bondye konmkwa ki i’n koz lalang. Toutfwa, i pa ti aret la. I ti kontinyen anmenn plis repros lo non Bondye, i ti dir Ev ki dan en fason enzis Bondye ti pe priv li konnesans ki annan valer. “Akoz Bondye i konnen, ki sa zour menm ki zot pou manz li, zot lizye pou sertennman ouver e sertennman zot pou vin parey Bondye, pour konn sa ki bon ek sa ki move.” Pa sa i en gran mansonz!—Zenez 3:4, 5.

Par manz fri sa pye dibwa ki Zeova ti’n defann zot, Adan ek Ev ti pran kote avek Satan. Depi sa, laplipar imen, ki swa zot konnen oubyen non, zot in siport sa repros ki Satan ti fer par rezet bann standar drwat Bondye. (1 Zan 5:19) Dimoun i kontinyen koz an mal lo Bondye par blanm li pour zot soufrans—menm si sa in arive akoz zot bann move latitid. Proverb 19:3 (The New English Bible) i dir: “Se sotiz en zonm ki’n gat son lavi, e alor i pran rankin kont Senyer.” Eski ou kapab remarke akoz Zezi, ki ti sitan kontan son Papa, ti priye ki Son non i ganny sangtifye?

“Ki ou Renny i ganny etabli”

Apre ki i ti’n priye ki non Bondye i ganny sangtifye, Zezi ti dir: “Ki ou Renny [“Rwayonm,” NW ] i ganny etabli. Ki ou lavolonte i ganny akonpli lo later parey dan lesyel.” (Matye 6:10) Konsernan sa pasaz, nou kapab demande: ‘Kisisa Rwayonm Bondye? E ki son larive i annan pour fer avek lavolonte Bondye ki pou ganny akonpli lo later?’

Dan Labib, sa mo ‘rwayonm’ i prensipalman vedir en “dominasyon par en lerwa.” Alor, lozikman, Rwayonm Bondye pe refer avek dominasyon oubyen gouvernman Bondye, avek en lerwa ki li in swazir. Sa Lerwa i pa lot ki Zezi Kri ki’n resisite—sa “Rwa-de-rwa, Senyer-de-senyer.” (Revelasyon 19:16; Danyel 7:13, 14) Konsernan Rwayonm Mesyanik Bondye dan lanmen Zezi Kri, profet Danyel ti ekrir: “Dan bann zour sa bann lerwa [bann gouvernman imen ki pe dominen konmela] Bondye lesyel pou etabli en rwayonm ki pa pou zanmen ganny detrir. E sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour letan endefini,” savedir, pour touzour.—Danyel 2:44.

Wi, Rwayonm Bondye pou pran kontrol later antye, i pou retir tou bann mesan e i pou dominen “pour letan endefini,” savedir, pour touzour. Dan sa fason, Rwayonm Bondye i sa mwayen par ki Zeova i sangtifye son non, retir tou repros mansonz Satan ek bann imen mesan.—Ezekyel 36:23.

Parey tou bann gouvernman, Rwayonm Bondye i annan son bann size. Lekel zot? Labib i reponn: “Me bann ki annan limilite pou posed later, e zot pou vreman rezwir dan labondans lape.” (Psonm 37:11) Pareyman, Zezi ti dir: “Byennere bann ki dou, akoz zot pou posed later.” Byensir, sa bann dimoun i annan konnesans egzakt lo Bondye, ki en kondisyon pour ganny lavi.—Matye 5:5; Zan 17:3.

Eski ou kapab mazin later antye ranpli avek bann dimoun dou ki vreman kontan Bondye e kontan kanmarad? (1 Zan 4:7, 8) Se sa ki Zezi ti priye kan i ti dir: “Ki ou Renny i ganny etabli. Ki ou lavolonte i ganny akonpli lo later parey dan lesyel.” Eski ou konpran akoz ki Zezi ti ansenny son bann disip pour priy sa fason? Pli enportan ankor, eski ou vwar konman ki lakonplisman sa lapriyer i kapab afekte ou personnelman?

Plizyer Milyon Dimoun pe aprezan rezonn lo Labib

Zezi ti predir en kanpanny mondyal ledikasyon spirityel ki pou anons larive Rwayonm Bondye. I ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen [sa monn prezan, oubyen sistenm] pou arive.”—Matye 24:14.

Partou dan lemonn, apepre sis milyon Temwen Zeova pe partaz sa bon nouvel avek zot prosen. Zot envit ou pour aprann plis lo Bondye ek son Rwayonm par ‘etidye Labib’ avek bokou latansyon, an servan ou kapasite pour rezonnen. An fezan sa, ou pou kontan letan ou mazin sa lespwar pour viv dan en paradi lo later, ki pou “ranpli avek konnesans Zeova parey delo i kouver lanmer.”—Izai 11:6-9.

[Not anba lo paz]

[Box/Picture on Page 8]

IMIT SA GRAN ANSENNYAN

Zezi ti souvan ansennyen par konsantre lo bann topik spesifik dan Labib. Par egzanp, apre son rezireksyon i ti eksplik son rol dan plan Bondye avek de disip ki ti pe trakas zot avek son lanmor. Lik 24:27 i dir: “Konmansan avek bann liv Moiz ek tou liv bann profet, Zezi ti eksplik zot sa ki Lekritir in dir lo son size.”

Remarke ki Zezi ti swazir en topik spesifik—‘limenm,’ Mesi—e ki i ti sit bann verse dan tou “Lekritir” dan son diskisyon. Annefe, Zezi ti met bann teks Labib ki itil ansanm parey bann bout en puzzle, ki ti permet son bann disip vwar klerman en model laverite spirityel. (2 Timote 1:13) Rezilta se ki zot pa ti zis ganny eklersi me zot ti ganny touse oprofon. Sa resi i dir nou: “Zot ti dir avek kanmarad, ‘Pa i vre ki ou ti a krwar ki ti annan en dife ki ti pe brile anndan nou ler i ti pe koz avek nou lo semen, kan i ti pe eksplik nou Lekritir?’ ”—Lik 24:32.

Temwen Zeova i esey imit metod Zezi dan zot minister. Pour ed zot dan sa travay, zot servi brosir Sa ki Bondye i ekspekte nou fer ek liv Konnesans Ki Anmenn ver Lavi Eternel. Sa de piblikasyon i adres plizyer topik Labib ki enteresan, tel konman “Ki sennla Bondye?,” “Akoz Bondye i permet Soufrans?,” “Koman nou kapab trouv vre Larelizyon?,” “Nou pe viv dan bann dernyen Zour!,” e “Batir en Fanmiy ki onor Bondye.” Sak leson i kontyen en kantite verse Labib.

Ou ganny envite pour kontakte Temwen Zeova dan ou kominote oubyen ekrir an servan sa ladres ki lo paz 2 dan sa magazin pour en letid Labib kot lakour, swa lo sa bann topik oubyen lo lezot topik.

[Portre]

Tous leker ou etidyan par konsantre lo bann topik Labib spesifik

[Portre lo paz 7]

Eski ou sezi sans lapriyer model Zezi?

“Nou Papa ki dan lesyel, ki ou non sen i ganny glorifye . . .”

“Ki ou Renny i ganny etabli . . .”

“Ki ou lavolonte i ganny akonpli lo later parey dan lesyel”