Fanmir Kretyen, reste “touzour pare”!

“Touzour pare parski Fis-de-Lonm pou vin . . . en ler ki zot pa pe espere.”​—LIK 12:40.

1, 2. Akoz nou devret pran aker konsey Zezi pour reste “touzour pare”?

“KAN Fis-de-Lonm pou vini dan son laglwar” e pou separ tou dimoun “an de group,” ki pou arive avek ou ek ou fanmir? (Mat. 25:31, 32) Vi ki sa pou ariv en ler kot nou pa pe ekspekte, pa i vreman enportan ki nou pran aker sa konsey Zezi pour reste “touzour pare”!​—Lik 12:40.

² Lartik avan ti montre nou ki mannyer sak manm fanmir i kapab ede pour ki fanmir antye i reste vizilan spirityelman par pran zot responsabilite o serye. Aprezan, annou egzamin lezot fason ki nou kapab kontribye anver byennet spirityel nou fanmir.

Annan en “bon” lizye

3, 4. (a) Ki bann fanmir Kretyen i bezwen veye? (b) Ki savedir annan en “bon” lizye?

³ Pour ki zot pare ler Kris i vini, bann fanmir i devret veye ki zot pa les lezot keksoz anpes zot konsantre lo vre ladorasyon. Zot bezwen vizilan pour ki nanryen pa pran plas bann keksoz spirityel. Vi ki materyalizm i en latrap ki’n fer bokou fanmir tonbe spirityelman, remark sa ki Zezi ti dir konsernan kontinyen annan en “bon” lizye. (Lir Matye 6:22, 23.) Zis parey en lalanp i kapab ekler nou semen pour nou pa tonbe, sa ki nou les nou lizye senbolik gete i kapab vin en lalimyer dan nou lavi ki anpes nou tonbe e ed nou annan en bon kondwit.​—Efe. 1:18.

⁴ Pour nou vwar byen, nou bezwen annan en bon lizye ki trouv byen kler sa ki nou pe gete. I parey pour nou lizye senbolik. Ler nou annan en bon lizye spirityel, nou pou konsantre lo en sel bi. Olye tay deryer bann keksoz materyel e mazin zis bezwen fizik nou fanmir, nou merit fikse nou regar lo bann keksoz spirityel. (Mat. 6:33) Sa i vedir ki nou satisfe avek bann keksoz materyel ki nou annan e nou met servis Bondye premye dan nou lavi.​—Ebr. 13:5.

 5. Ki mannyer en fiy adolesan ti montre ki son “lizye” ti konsantre lo servis Bondye?

⁵ Ki pou arive si zanfan i ganny formen pour annan en bon lizye ki reste konsantre lo bann keksoz spirityel? La legzanp en fiy adolesan sorti Etyopi. I ti fer telman byen lekol ki kan i ti fini segonder i ti ganny ofer en labours pour fer bann letid avanse. Par kont, vi ki i ti konsantre lo servis Zeova, i pa ti aksepte sa labours. Zis apre, i ti ganny ofer en louvraz kot i ti pou ganny 3,000 ero par mwan, en kantite larzan konpare avek lapey ki bann dimoun i gannyen dan sa pei. Me “lizye” sa fiy ti konsantre lo servis pionye. I pa ti bezwen demann son paran ki i pou fer avek sa louvraz. Ki mannyer son paran ti santi kan zot ti konnen ki zot fiy pa ti’n aksepte sa louvraz? Zot ti fyer e zot ti dir li ki zot vreman kontan pour annan en fiy parey li.

6, 7. Nou bezwen “fer atansyon” avek ki danze?

⁶ En lot pwen nou kapab konpran avek parol Zezi dan Matye 6:22, 23 i en lavertisman lo vorasite. Ler Zezi ti pe koz lo lekontrer avek en “bon” lizye, i ti servi sa lekspresyon en lizye “malad.” Dan langaz Grek, en lizye “malad” i kapab osi vedir en lizye mesan, voras e groker. (Mat. 6:23) Ki pwennvi Zeova lo vorasite ek groker? Labib i dir: “Veye ki tou form aktivite seksyel imoral, lavi dezordonnen, ek [vorasite oubyen] lanvi pour keksoz ki lezot dimoun i posede, pa menm ganny mansyonnen parmi zot.”​—Efe. 5:3.

⁷ I kapab fasil pour vwar si en lot dimoun i voras, me i pa fasil pour remarke si nou nou koumsa. Pour sa rezon nou pou saz si nou swiv konsey Zezi: “Fer atansyon, lavaris [oubyen groker].” (Lik 12:15) Pour swiv sa konsey, nou bezwen egzamin sa ki nou leker pe konsantre lo la. Bann fanmir Kretyen i devret seryezman reflesir lo lakantite letan ek larzan ki zot depanse dan lanmizman, detant ek keksoz materyel.

 8. Ki nou bezwen pran an konsiderasyon kan nou pe aste keksoz?

⁸ Ler nou aste en keksoz, nou pa zis demande si nou annan ase larzan pour aste li. I annan lezot fakter nou devret pran an konsiderasyon: ‘Eski mon pou annan ase letan pour okip e servi sa keksoz? Konbyen letan i pou pran mwan pour aprann servi li korekteman?’ Zenn, pa krwar tou sa ki bann piblisite i dir, akoz sa pou fer ou ekspekte ganny bann lenz ek lezot keksoz ki annan en mark ser. Kontrol ou lanvi. Deplis, reflesir lo lefe ki i pou annan si ou aste sa keksoz. Eski sa pou anpes ou fanmir pare ler Fis-de-Lonm i vini? Annan konfyans dan promes Zeova: “Mon pa pou zanmen negliz ou, mon pa pou zanmen abandonn ou.”​—Ebr. 13:5.

Pourswiv bann lobzektif spirityel

 9. Ki lefe pourswiv bann lobzektif spirityel i kapab annan lo ou fanmir?

⁹ En lot fason ki tou dimoun dan fanmir i kapab fortifye son lafwa e kontribye anver byennet spirityel lafanmir i ler zot etablir bann lobzektif spirityel e esey atenn zot. Sa i en bon fason pour vwar ki kantite lafanmir pe progrese pour fer plezir Zeova e i kapab ed zot konnen si en serten aktivite i vreman enportan.​—Lir Filipyen 1:10, NW.a

10, 11. Konman en fanmir, ki lobzektif spirityel zot pe pourswiv e ki lezot lobzektif zot ti ava kontan etablir a lavenir?

¹⁰ Menm bann senp lobzektif ki adapte avek sirkonstans preski tou manm fanmir i kapab anmenn bokou byenfe. Pran par egzanp sa lobzektif pour egzamin teks pour lazournen sak zour. Komanter tou dimoun pou ed sa sef lakour konpran ki mannyer lasante spirityel sak manm fanmir i ete. Lobzektif pour lir Labib regilyerman an fanmir pou ed bann zanfan pour amelyor zot abilite pour lir e ed zot pour pli byen konpran mesaz Labib. (Ps. 1:1, 2) Pa nou devret fer li nou lobzektif pour amelyor kalite nou lapriyer? Devlop pli byen diferan laspe fri lespri i osi en bon lobzektif. (Gal. 5:22, 23) Eski nou kapab gete konman pour amelyor lafason nou demontre lentere senser dan bann dimoun ki nou zwenn dan predikasyon? Si nou fanmir i esey fer sa, sa pou ed nou zanfan aprann pour annan konpasyon e i pou annan plis sans ki zot devlop sa lanvi pour vin pionye ordiner ouswa misyonner.

¹¹ Akoz ou pa egzamin serten lobzektif ki ou ek ou fanmir i kapab pourswiv? Eski ou fanmir i kapab etablir en lobzektif pour pas plis letan dan minister? Eski ou pe travay dir pour sirmont ou lafreyer pour rann temwannyaz par telefonn, dan semen ouswa dan teritwar biznes? Eski ou kapab servi dan landrwa kot i annan plis bezwen? Eski en manm ou fanmir i kapab aprann en nouvo langaz pour anons sa bon nouvel avek bann dimoun lezot nasyonalite?

12. Ki bann sef lakour i kapab fer pour ed zot fanmir progrese spirityelman?

¹² Konman en sef lafanmir, idantifye bann domenn kot ou fanmir i kapab fer progre spirityel. Apre sa, mazin serten lobzektif spesifik ki ti kapab ed zot progrese dan sa bann domenn. Sa bann lobzektif i devret rezonnab dapre sirkonstans ek abilite ou fanmir. (Prov. 13:12) Byensir, i pran letan pour kapab atenn bann lobzektif valab. Koup kantite letan ou pase devan televizyon pour ou kapab fer bann keksoz spirityel. (Efe. 5:15, 16) Travay dir pour atenn bann lobzektif ki ou’n etablir pour ou fanmir. (Gal. 6:9) Tou dimoun pou “war ou progre” si ou fanmir i kontinyen pourswiv bann lobzektif spirityel.​—1 Tim. 4:15.

En progranm Ladorasyon an fanmir regilye

13. Ki sanzman ti arive dan nou progranm renyon lasemenn, e ki kestyon nou kapab reflesir lo la?

¹³ En bon led pour ed bann fanmir pour reste “touzour pare” ler Fis-de-Lonm i vini i sa sanzman enportan ki ti arive dan nou renyon lasemenn depi konmansman le 1 Zanvye 2009. Nou ti nepli bezwen zwenn trwa fwa dan lasemenn akoz Letid Liv Kongregasyon in konmans ganny fer menm zour avek Lekol Minister Teokratik ek Renyon Servis. Sa sanzman ti ganny fer pour ki bann fanmir Kretyen i annan sa loportinite pour batir zot spirityelman atraver en progranm pour ador Bondye an fanmir tou le semenn. La ki en pti pe letan in pase depi sa sanzman, nou kapab demann nou lekor: ‘Eski mon pe servi sa letan ki mon’n gannyen pour swiv mon progranm Ladorasyon an fanmir ouswa letid personnel? Eski mon’n reisi atenn lobzektif sa nouvo laranzman?’

14. (a) Ki bi prensipal en progranm regilye Ladorasyon an fanmir oubyen letid personnel? (b) Akoz i esansyel pour met en zour apar pour etidye?

¹⁴ Bi prensipal Ladorasyon an fanmir ouswa letid personnel se pour vin pli pros avek Bondye. (Zak 4:8) Kan nou pran letan pour etidye Labib dan en fason regilye pour konn pli byen nou Kreater, nou pou fortifye nou relasyon avek li. Pli nou vin pli pros avek Bondye, pli nou motivasyon pour kontan li ‘avek tou nou leker, tou nou lam, tou nou lespri e avek tou nou lafors’ pou vin pli for. (Mark 12:30) Sirman, nou vreman anvi obeir Bondye e imit li. (Efe. 5:1) En progranm Ladorasyon an fanmir regilye i en laspe esansyel pour ed tou dimoun dan fanmir pour reste “touzour pare” spirityelman anmezir nou pe esper “gran ladetres.” (Mat. 24:21, NW) Sanmenm sa ki pou ed nou sirviv.

15. Ki lefe progranm Ladorasyon an fanmir i kapab annan lo lafason ki manm lafanmir i santi anver kanmarad?

¹⁵ Progranm Ladorasyon an fanmir i annan en lot lobzektif ankor. I ed bann manm fanmir pour vin pli pros avek kanmarad. Ler bann manm fanmir i pas letan ansanm pour koz lo bann keksoz spirityel, sa i annan en gran lefe lo lafason ki zot santi anver kanmarad. Pa en koup pou santi zot pli ini kan zot kontan diskit lo bann pwen enteresan ki zot in fer resers lo la ansanm! (Lir Eklezyast 4:12.b) Paran ek zanfan ki ador Bondye kot a kot pou tre probab ini dan lanmour ki “soud tou keksoz parfetman ansanm dan larmoni.”​—Kol. 3:14.

16. Rakonte ki mannyer trwa ser spirityel in benefisye avek sa zour pour etidye Labib.

¹⁶ Get ki mannyer trwa ser in benefisye avek sa laranzman pour met letan dekote pour etidye Labib. Menm si zot pa sorti dan menm fanmir, sa trwa vev aze in bann bon zanmi pour bokou lannen e zot reste dan menm lavil. Zot ti anvi pas plis letan ansanm, e osi benefisye avek sa letan pour batir kanmarad spirityelman olye zis koz koze, alor zot ti met letan dekote en zour swar tou le semenn pour zwenn e etidye Labib. Zot ti konmans fer sa an servan sa Liv “Bearing Thorough Witness” About God’s Kingdom. Enn parmi zot ti dir: “Nou ti telman kontan ki nou letid ti al plis ki enn erdtan. Nou ti esey met nou dan sityasyon sa bann frer dan premye syek pour gete ki nou ti pou’n fer si nou ti dan menm sirkonstans ki zot. Apre sa nou ti esey met an pratik bann pwen ki nou ti diskite dan nou minister. Sa in fer ki travay predikasyon e fer disip in vin pli gou e nou’n ganny bann pli bon rezilta ki oparavan.” An plis ki batir sa trwa ser spirityelman, sa laranzman in fer zot vin bann pli bon zanmi ki oparavan. Zot azoute: “Nou vreman kontan sa laranzman.”

17. Kwa ki kapab fer nou Ladorasyon an fanmir reisi?

¹⁷ Be ou? Ki mannyer ou pe benefisye avek sa laranzman pour ladorasyon an fanmir oubyen letid personnel? Si ou zis fer li tanzantan, sa laranzman pa pou atenn son bi. Sak manm fanmir i devret pare pour etidye sa ler ki’n ganny fikse. Nou pa merit les bann keksoz ki pa vreman enportan enterfer avek nou progranm. Deplis, lenformasyon ki ganny swazir i devret pratik pour ou fanmir. Kwa ki kapab fer sa letid pli gou? Servi bann metod lansennyman efikas e gard en lanbyans agreab e anpe.​—Zak 3:18.c

“Reste vizilan” e “touzour pare”

18, 19. Lefet ki ou konnen Fis-de-Lonm pros pour vini, ki lefe sa i devret annan lo ou ek ou fanmir?

¹⁸ Move kondisyon sa lemonn ozordi i san okenn dout montre ki move lemonn Satan i dan son bann dernyen zour depi 1914. Armagedon pa kapab lwen. Byento ler pou arive pour Fis-de-Lonm egzekit zizman Zeova lo bann move dimoun. (Ps. 37:10; Prov. 2:21, 22) Lefet ki nou konn sa, pa sa i devret annan lefe lo ou ek ou fanmir?

¹⁹ Eski ou pe swiv konsey Zezi pour annan en “bon” lizye? Menm si bann dimoun dan sa lemonn pe tay deryer larises, rod laglwar ouswa pouvwar, eski ou fanmir pe pourswiv bann lobzektif spirityel? Eski progranm Ladorasyon an fanmir ouswa letid personnel i marse kot ou? Eski sa sanzman dan ou progranm in atenn son lobzektif? Parey nou ti vwar dan lartik avan, eski ou pe desarz ou responsabilite devan Bondye konman msye, madanm ek zanfan, pour ed tou ou fanmir pour “reste vizilan”? (1 Tesa. 5:6) Si i le ka, ou pou pare ler Fis-de-Lonm i vini.

[Not anba lo paz]

Ki ou’n aprann?

• Eksplike ki mannyer bann fanmir Kretyen i kapab reste “touzour pare” ler . . .

zot annan en “bon” lizye.

zot etablir e pourswiv bann lobzektif spirityel.

zot annan en progranm Ladorasyon an fanmir regilye.