Sapit Douz

Sinifikasyon ou Batenm

 1. Akoz nou tou endividyelman nou devret enterese avek batenm?

DAN lannen 29 N.L., Zezi ti ganny batize par Zan Batis, ki ti plonz li dan Larivyer Zourden. Zeova li menm ti pe regarde e i ti eksprim son laprouvasyon. (Matye 3:16, 17) Zezi ti alor kit en model pour tou son bann disip swiv. Trwa an edmi plitar, Zezi ti donn son bann disip sa lenstriksyon: “Mon’n ganny tou pouvwar dan lesyel ek lo later. Ale e fer tou pep vin mon bann disip. Batiz zot o non di-Per, di-Fis e di-Sent-Espri.” (Matye 28:18, 19) Eski ou’n batize an armoni avek sa komannman ki Zezi ti donnen? Si non, eski ou pe prepare pour fer li?

 2. An konneksyon avek batenm, ki bann kestyon ki merit ganny reponn?

² Antouka, en bon konprenezon lo batenm i enportan pour tou sa ki anvi servi Zeova e viv dan son nouvo monn drwat. Bann kestyon ki merit ganny reponn i enkli sa bann: Eski batenm Kretyen denozour i annan menm sinifikasyon avek batenm Zezi? Ki savedir batiz “o non di-Per, di-Fis e di-Sent-Espri”? Kwa ki enplike dan viv an akor avek batenm Kretyen?

Batenm ki Zan ti fer

 3. Batenm ki Zan ti fer ti ganny rezerve pour ki group dimoun?

³ Apepre sis mwan avan ki Zezi ti batize, Zan Batis ti al prese dan dezer an Zide, an dizan: “Sanz zot lavi akoz Rwayonm Bondye i pros.” (Matye 3:1, 2) Bann dimoun ti tann sa ki Zan ti dir e zot ti pran sa aker. Zot ti konfes zot bann pese ouvertman, repantir, e apre al kot Zan pour li batiz zot dan Larivyer Zourden. Sa batenm ti pour bann Zwif.—Lik 1:13-16; Akt 13:23, 24.

 4. Akoz bann Zwif dan premye syek ti byen bezwen repantir?

⁴ Sa bann Zwif ti byen bezwen repantir. An 1513 A.N.L., kot Montanny Sinai, zot bann zanset ti’n antre dan en lalyans nasyonal—en lagreman formel e sakre—avek Zeova Bondye. Me akoz zot ti fer bokou pese, zot pa ti viv an akor avek zot responsabilite anba sa lalyans, alor zot ti ganny kondannen par sa lalyans. E letan Zezi ti vin lo later, zot sitiasyon ti’n vin kritik. “Gran zour efreyan Zeova” ki Malaki ti’n predir ti pros. Lannen 70 N.L., sa “zour” ti arive kan bann larme Romen ti detri Zerizalenm, son tanp, e plis ki en milyon Zwif. Zan Batis, ki ti annan zel pour vre ladorasyon, ti ganny anvoye avan sa destriksyon, “pour prepar en pep pour Senyer [“Zeova,” NW].” Zot ti bezwen repantir pour zot bann pese ki zot ti’n komet kont lalyans Lalwa Mozaik e pare pour aksepte Garson Bondye, Zezi, ki Bondye ti pe anvoy ver zot.—Malaki 4:4-6; Lik 1:17; Akt 19:4.

 5. (a) Akoz Zan ti ezite pour batiz Zezi? (b) Ki batenm Zezi ti reprezante?

⁵ Parmi bann ki ti vin kot Zan pour ganny batize ti Zezi li menm. Me akoz? Vi ki i ti konnen ki Zezi ti napa okenn pese pour konfese, Zan ti dir: “Mwan ki devre ganny batize par ou e se ou, ki vin kot mwan?” Me batenm Zezi ti pou senboliz en keksoz diferan. Alor Zezi ti reponn: “Aksepte li konman i ete pour konmela, koumsa ki nou pou fer tou sa ki zis.” (Matye 3:13-15) Parski Zezi ti napa pese, son batenm pa ti senboliz repantans pour pese; i pa ti ni bezwen dedye son lekor avek Bondye, vi ki i ti deza manm en nasyon ki ti’n deza ganny dedye avek Zeova. Plito, son batenm alaz 30 an ti inik pour li, e i ti konmsi i ti pe ofer son lekor avek son Papa seles pour fer Son lavolonte.

 6. Ki kantite serye fer lavolonte Bondye ti ete pour Zezi?

⁶ Lavolonte Bondye pour Kris Zezi ti enplik sa aktivite an konneksyon avek Rwayonm. (Lik 8:1) I ti osi enplik sakrifye son lavi imen parfe konman en ranson e konman baz pour en nouvo lalyans. (Matye 20:28; 26:26-28; Ebre 10:5-10) Zezi ti pran sinifikasyon son batenm oserye. I pa ti les son latansyon ganny distrer par bann lezot lentere. Ziska lafen son lavi lo later, i ti fidelman akonpli lavolonte Bondye, i ti fer predikasyon Rwayonm Bondye vin son travay prensipal.—Zan 4:34.

Batenm Delo pour bann Disip Kretyen

 7. Depi Lapannkot 33 N.L., ki bann Kretyen ti ganny demande pour fer an konneksyon avek batenm?

⁷ Bann premye disip Zezi ti ganny batize dan delo par Zan e apre ganny dirize ver Zezi konman bann manm sa fitir Rwayonm dan lesyel. (Zan 3:25-30) Anba gidans Zezi, sa bann disip ti osi fer serten batenm, ki annan menm sinifikasyon avek batenm ki Zan ti fer. (Zan 4:1, 2) Toutfwa, zis apre Lapannkot 33 N.L., zot ti konmans akonpli sa travay pour batiz “o non di-Per, di-Fis e di-Sent-Espri.” (Matye 28:19) Ou pou retir bokou benefis par egzaminen ki sa i vedir.

 8. Ki savedir ganny batize “o non di-Per”?

⁸ Ki savedir ganny batize “o non di-Per”? I vedir aksepte son non, pozisyon, lotorite, plan, ek lalwa. Annou vwar ki sa i enplike. (1) Konsernan son non, Psonm 83:18 i dir: “Ki dimoun i kapab konnen ki ou, ki ou non i Zeova, se ou tousel ki Tre O lo tou later.” (2) Konsernan son pozisyon, 2 Lerwa 19:15 i fer resorti: “O Zeova . . . , ou tousel ou sa vre Bondye.” (3) Lo son lotorite, Revelasyon 4:11 i dir nou: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” (4) Nou bezwen osi rekonnet ki Zeova i sa Enn ki donn lavi, e ki son plan se pour sov nou dan pese ek lanmor: “Delivrans i pour Zeova.” (Psonm 3:8; 36:9) Nou bezwen aksepte ki Zeova i sa Enn ki donn lalwa: “Zeova i nou Ziz, Zeova i fer lalwa, Zeova i nou Lerwa.” (Izai 33:22) Vi ki i okip tou sa bann pozisyon, nou ganny ankouraze pour: ‘Kontan nou Bondye avek tou nou leker, avek tou nou lam, e avek tou nou lespri.’—Matye 22:37.

 9. Ki savedir ganny batize “o non . . . di-Fis”?

⁹ Ki savedir batiz “o non . . . di-Fis”? I vedir rekonnet non, pozisyon, ek lotorite Zezi Kri. Son non, Zezi, i vedir “Zeova i Delivrans.” I’n ganny sa pozisyon lefe ki i sel Garson Bondye, premye kreasyon Bondye. (Matye 16:16; Kolosyen 1:15, 16) Konsernan Zezi, Zan 3:16 i dir nou: “Parski Bondye in telman kontan lemonn [bann imen ki kapab ganny sove] ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” Parski Zezi ti mor fidel, Bondye ti resisit li e donn li nouvo lotorite. Dapre zapot Pol, Bondye “in elev [Zezi] pli o ki tou” dan liniver, dezyenm apre Zeova. Se pour sa rezon ki onon “Zezi tou sa ki dan lesyel, lo later e dan lemonn pli ba ki later i tonm azenou, . . . [e] ki tou lalang i proklanmen, ki Zezi-Kri i Senyer pour laglwar Bondye, Papa.” (Filipyen 2:9-11) Sa i vedir obeir bann komannman Zezi, ki sorti kot Zeova li menm.—Zan 15:10.

10. Ki savedir ganny batize “o non . . . di-Sent-Espri”?

¹⁰ Ki savedir ganny batize “o non . . . di-Sent-Espri”? I vedir aksepte rol ek aktivite lespri sen. E kisisa lespri sen? Se lafors aktif Zeova, ki i servi pour akonpli son bann plan. Zezi ti dir son bann disip: ‘Mon pou demann mon Papa, e i pou donn zot en [asistan, NW] ki pou reste avek zot pour touzour. Sa i Lespri laverite.” (Zan 14:16, 17) Ki sa ti pou ed zot pour fer? Apre, Zezi ti dir zot: “Zot pou ranpli avek en pouvwar ler Sent-Espri pou desann lo zot. Alor zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Par mwayen lespri sen, Zeova ti osi enspir bann zonm ki ti ekri Labib: “Profesi pa’n ganny prezante par lavolonte imen, me se Sent-Espri ki’n pous zonm pour anons mesaz Bondye.” (2 Pyer 1:21) Alor nou aksepte rol lespri sen kan nou etidye Labib. En lot fason ki nou rekonnet lespri sen se par demann Zeova led pour prodwir “fri Lespri,” sa se “lanmour, lazwa, lape, pasyans, labonte, [lafwa, NW], ladouser, kontrol lo son prop lekor.”—Galat 5:22, 23.

11. (a) Ki vre sinifikasyon batenm denozour? (b) Konman ki batenm i kapab ganny konpare avek mor e apre releve?

¹¹ Bann premye dimoun ki ti ganny batize an armoni avek bann lenstriksyon Zezi ti bann Zwif ek bann non Zwif ki ti krwar dan sa sel vre Bondye, e sa ti konmans lannen 33 N.L. En pe letan plitar, sa loportinite pour vin disip Kretyen ti ganny ofer avek bann Samariten. Apre, lannen 36 N.L., sa lapel ti ganny elarzi pour enkli bann non Zwif ki pa ti sirkonsi. Avan ganny batize, bann Samariten ek bann non Zwif ti bezwen fer en dedikasyon personnel avek Zeova pour servi li konman disip son Garson. Sa in reste sinifikasyon batenm Kretyen ziska ozordi. Plonz konpletman dan delo i en senbol apropriye pour dedikasyon personnel, vi ki batenm i vedir antere dan en sans senbolik. Kan ou ganny plonze anba delo sa i konmsi ou pe mor avek ou fason viv lepase. Ler ou resorti anba delo, i konmsi ou’n retourn vivan pour fer lavolonte Bondye. Sa “sel batenm” i aplik pour tou sa ki vin vre Kretyen. Zour zot batenm zot vin Kretyen Temwen Zeova, bann minis ordonnen Bondye.—Efezyen 4:5; 2 Korentyen 6:3, 4.

12. Avek kwa zapot Pyer i konpar batenm Kretyen, e akoz?

¹² Dan lizye Bondye, en tel batenm i esansyel pour delivrans. Par egzanp, apre ki i ti’n mansyonnen ki Noe ti konstri lars, dan ki li ek son fanmiy ti ganny prezerve dan Deliz, zapot Pyer ti ekri: “Sa i reprezant batenm, ki sov zot aprezan, non pa an debarasan zot avek lenpirte lo zot lekor, me an demandan Bondye pour zot en konsyans kler, par rezireksyon Zezi-Kri.” (1 Pyer 3:21) Lars ti levidans konkret ki Noe ti fidelman fer travay ki Bondye ti’n donn li. Apre ki travay lo lars ti’n fini, “lemonn ansyen ti ganny detri par delo, sa gran deliz.” (2 Pyer 3:6) Me Noe ek son fanmiy, “ywit an tou, ti ganny sove atraver delo.”—1 Pyer 3:20.

13. Par batenm, en Kretyen i ganny delivre dan kwa?

¹³ Denozour, sa bann ki dedye zot lavi avek Zeova lo baz lafwa dan Kris ki’n ganny resisite, i ganny batize an senbol zot dedikasyon. Zot kontinyen fer lavolonte Bondye pour nou letan e zot ganny delivre dan sa monn mesan ki nou pe viv ladan. (Galat 1:3, 4) Zot nepli mars ver destriksyon avek sa sistenm mesan aktyel. Zot in ganny delivre dan sa destriksyon e Bondye in akord zot en bon konsyans. Zapot Zan i asir bann serviter Bondye: “Lemonn pou disparet ek tou son bann dezir; me sa ki fer lavolonte Bondye i reste eternelman.”—1 Zan 2:17.

Viv an akor avek nou Responsabilite

14. Akoz batenm dan li menm pa en garanti pour delivrans?

¹⁴ I mal pour konklir ki batenm dan li menm i en garanti pour delivrans. I annan valer selman si en dimoun in vreman dedye son lavi avek Zeova atraver Zezi Kri e apre akonpli lavolonte Bondye, e reste fidel ziska lafen. “Sa ki reste fidel ziska lafen pou ganny sove.”—Matye 24:13.

15. (a) Ki lavolonte Bondye pour bann Kretyen batize denozour? (b) Ki kantite enportan vin en disip Kretyen i devret ete dan nou lavi?

¹⁵ Lavolonte Bondye pour Zezi ti enplik lafason ki i ti servi son lavi konman en imen. Zezi ti bezwen donn son lavi dan lanmor konman en sakrifis. Dan nou ka, nou lekor i devret ganny prezante avek Bondye, e nou devret anmenn en lavi sakrifis par fer lavolonte Bondye. (Romen 12:1, 2) Sirman, nou pa pe fer lavolonte Bondye si detanzaot nou volonterman konport nou parey sa monn otour nou oubyen si nou konsantre nou lavi lo bann aktivite egois, e donn Bondye en servis ki pa sorti ofon nou leker. (1 Pyer 4:1-3; 1 Zan 2:15, 16) Kan en serten Zwif ti demande ki i merit fer pour ganny lavi eternel, Zezi ti rekonnet lenportans pour viv en lavi ki moralman prop. Me apre i ti fer resorti en keksoz pli enportan: nesesite pour vin en disip Kretyen, en disip Zezi. Sa i merit vin premye keksoz dan nou lavi. I pa kapab vin dezyenm apre bann aktivite materyel.—Matye 19:16-21.

16. (a) Ki responsabilite tou Kretyen i annan an konneksyon avek sa Rwayonm? (b) Parey i’n ganny demontre lo paz 116 ek 117, ki bann fason efikas nou kapab fer sa travay Rwayonm? (c) Ki levidans nou partisipasyon senser dan sa travay temwannyaz i donnen?

¹⁶ I enportan fer resorti ankor ki lavolonte Bondye pour Zezi ti enkli aktivite esansyel an konneksyon avek Rwayonm Bondye. Zezi li menm ti’n ganny swazir pour vin Lerwa. Me pandan ki i ti lo later, i ti osi donn en temwannyaz zele konsernan sa Rwayonm. Nou annan menm travay temwannyaz pour fer, e nou annan tou rezon pour partisip ladan avek tou nou leker. An fezan sa, nou demontre nou lapresyasyon pour souvrennte Zeova ensi ki nou lanmour pour lezot imen. (Matye 22:36-40) Nou osi montre ki nou ini avek lezot adorater dan lemonn antye, e zot tou zot bann proklanmater Rwayonm. Ansanm, dan en linite global, nou avanse ver sa bi pour ganny lavi eternel dan demer teres sa Rwayonm.

Revizyon

• Kwa ki parey e kwa ki diferan ant batenm Zezi ek batenm delo ozordi?

• Ki savedir ganny batize “o non di-Per, di-Fis e di-Sent-Espri”?

• Ki i enplike dan viv an akor avek responsabilite batenm Kretyen?

[Portre lo paz 116, 117]

SERTEN FASON POUR PROKLANM SA RWAYONM

Port-an-port

Avek fanmiy

Avek koleg travay

Avek kanmarad lekol

Lo semen

Par retournen pour vizit bann ki enterese

Letid Labib kot lakour