Zeova i rekonpans bann ki pe vreman rod li

1, 2. (a) Ki mannyer lanmour i relye avek lafwa? (b) Ki sa de kestyon nou pou reponn?

ZEOVA, nou Papa, i promet pour beni tou son bann serviter fidel. Sa i en fason ki i demontre son lanmour pour nou e nou kontan li akoz “i’n kontan nou premye.” (1 Zan 4:19) Anmezir ki nou lanmour pour Zeova i vin pli for, nou lafwa dan li i vin pli solid e nou pli konvenki ki Zeova pou rekonpans bann ki i kontan.​—Lir Ebre 11:6.

² Zeova i sa enn ki rekonpanse! Sa i form parti son personnalite e sa ki i fer. Alor, nou lafwa dan Bondye pa pou solid si nou pa konvenki ki i pou rekonpans bann ki pe vreman rod li. Akoz sa i vre? Parski “lafwa i ler nou asire ki sa ki nou pe espere pou vin vre.” (Ebre 11:1) Lafwa i vedir annan sa konfyans total ki Bondye pou beni son bann serviter fidel. Me ki mannyer lespwar pour en rekonpans i benefisye nou? Ki mannyer Zeova in rekonpans son bann serviter dan lepase e dan nou letan? Annou vwar.

 3. Ki promes nou lir dan Malaki 3:10?

³ Zeova in promet pour rekonpans son bann serviter fidel. I ankouraz nou pour donn li nou meyer e pour annan konfyans ki i pou beni nou. Zeova i dir: “Teste mwan.” I kontinyen: “Zot ava war si mon pa pou ouver rezervwar lesyel e devers lo zot toudsort benediksyon annabondans.” (Malaki 3:10) Nou montre ki nou rekonesan pour sa ki Zeova i ofer ler nou aksepte pour teste li.

 4. Akoz nou kapab annan konfyans dan promes Zezi ki dan Matye 6:33?

⁴ Zezi ti promet son bann disip ki si zot met Rwayonm premye, Bondye pou donn zot son sipor. (Lir Matye 6:33.) Zezi ti kapab dir sa parski i ti konnen ki promes Bondye i toultan vin vre. (Izai 55:11) Alor, nou osi nou kapab asire ki si nou annan lafwa konplet dan Zeova, i pou definitivman gard sa promes: “Mon pa pou zanmen kit ou e mon pa pou zanmen abandonn ou.” (Ebre 13:5) Sa promes Zeova i ed nou pour annan konfyans dan parol Zezi ki dan Matye 6:33.

 5. Akoz larepons ki Zezi ti donn Pyer i ankourazan pour nou?

⁵ Zapot Pyer ti demann Zezi: “Nou’n kit tou sa ki nou ti annan e nou’n swiv ou, alor ki nou pou gannyen?” (Matye 19:27) Zezi pa ti koriz sa ki Pyer ti dir. O kontrer, Zezi ti dir son bann disip ki zot ti pou ganny rekonpanse pour zot bann sakrifis. Sa bann zapot ek lezot disip fidel pou dirize ansanm avek Zezi dan lesyel a lavenir. Me Zezi ti osi dir ki menm la konmela i annan bann rekonpans: “Tou sa ki’n kit zot lakaz, frer, ser, papa ek manman, zanfan oubyen later akoz mon non pou ganny san fwa plis e zot pou ganny lavi eternel.” (Matye 19:29) Ozordi, tou disip Zezi i kapab trouv bann papa, manman, frer, ser ek bann zanfan dan kongregasyon. Sa i annan plis valer ki tou sa bann keksoz ki nou’n kit deryer pour met Rwayonm Bondye premye.

 6. Akoz Zeova i promet pour rekonpans son bann serviter?

⁶ An plis ki bann benediksyon ki nou pe gannyen la konmela, nou pe esper pour ganny bann pli gran benediksyon a lavenir. (1 Timote 4:8) Zeova i promet pour rekonpans son bann serviter fidel e vi ki nou konn sa, sa pou ed nou kontinyen fer fas avek bann letan difisil. Si nou konpletman asire ki Zeova “i rekonpans sa bann ki pe vreman rod li,” nou pou kapab reste fidel.​—Ebre 11:6.

 7. Dan ki fason lespwar i parey en lank?

⁷ Dan Sermon lo Montanny, Zezi ti dir: “Zot devret kontan e dan lazwa, parski zot rekonpans i gran dan lesyel, akoz koumsanmenm ki zot ti persekit bann profet avan zot.” (Matye 5:12) Serten serviter Bondye pou ganny zot rekonpans dan lesyel. Lezot pou ganny sa rekonpans pour viv pour touzour dan paradi lo later. Sa i osi en rezon pour nou “kontan e dan lazwa.” (Psonm 37:11; Lik 18:30) Me pour nou tou, nou lespwar i “parey lank en bato dan nou lavi, enn ki sir e ferm.” (Ebre 6:17-20) Zis parey en lank ki anpes en bato drive pandan tanpet, nou lespwar ferm i kapab ed nou pour reste stab. I osi kapab donn nou lafors pour andire pandan bann letan difisil.

 8. Ki mannyer nou lespwar i fer nou pa sitan enkyet?

⁸ Nou lespwar i kapab ed nou pour pa sitan enkyet. Zis parey en latizann i soulaz douler, promes Bondye i kapab kalme nou leker enkyet. I rekonfortan ler nou konnen ki Zeova pou pran swen avek nou ler nou zet nou fardo lo li. (Psonm 55:22) Nou kapab annan konfyans total ki Bondye i kapab fer “bokou bokou plis ki tou sa ki nou demande.” (Efezyen 3:20) Zeova pou ed nou, pa zis bokou plis, me plis “ki bokou bokou plis”!

 9. Ki mannyer nou kapab asire ki nou pou ganny benediksyon Zeova?

⁹ Pour ganny sa rekonpans, nou bezwen annan en lafwa total dan Zeova e obei son bann direktiv. Moiz ti dir nasyon Izrael: ‘Zeova pou sirman beni ou dan sa pei ki Zeova, ou Bondye pou donn ou konman patrimwann, pour ou pran posesyon. Me fodre ki ou obei Zeova, ou Bondye e obzerv tou son bann komannman ki mon pe donn ou ozordi. Zeova, ou Bondye ava beni ou, parey in promet.’ (Deterononm 15:4-6) Eski ou vreman konvenki ki Zeova pou beni ou si ou kontinyen servi li fidelman? Ou annan rezon pour annan sa kalite konfidans.

10, 11. Ki mannyer Zeova ti rekonpans Zozef?

¹⁰ Labib ti ganny ekrir pour nou prop byenfe. Nou kapab trouv plizyer legzanp kot Zeova ti rekonpans son bann serviter fidel dan lepase. (Romen 15:4) En bon legzanp ti dan ka Zozef. Premyerman, son bann frer ti vann li dan lesklavaz. Apre, madanm Potifar ti fer fo lakizasyon kont li e i ti ganny met dan prizon Lezip. Eski Zeova ti oubliy Zozef ler i ti dan prizon? Ditou! Labib i dir: “Zeova ti kontinyen avek Zozef e i ti kontinyen demontre lanmour fidel anver li,” e “Zeova ti avek Zozef e Zeova ti fer reisi tou sa ki Zozef ti fer.” (Zenez 39:21-23, NWT) Menm pandan bann letan difisil, Zozef ti esper son Bondye avek pasyans.

¹¹ Plizyer lannen pli tar, Faraon ti larg Zozef dan prizon e sa lesklav ki ti annan limilite ti vin sa dezyenm dirizan pli pwisan Lezip. (Zenez 41:1, 37-43) Ler Zozef ek son madanm ti ganny de garson, “Zozef ti apel son premye garson Manase. I ti dir: Bondye in fer mwan oubliy tou mon soufrans ek separasyon avek mon fanmir. I ti apel son dezyenm garson Efraim. I ti dir: Bondye in fer mwan ganny zanfan dan pei mon soufrans.” (Zenez 41:51, 52) Zeova ti rekonpans fidelite Zozef e i ti sov bann Izraelit ek Ezipsyen kont lafanmin. Zozef ti konnen ki Zeova ki ti’n rekonpans e beni li.​—Zenez 45:5-9.

12. Ki mannyer Zezi ti reste fidel ler i ti ganny teste?

¹² Zezi Kri ti reste obeisan anver Bondye menm si i ti pas atraver bann tes e Zeova ti rekonpans li. Kwa ki ti ed Zezi pour reste fidel? Parol Bondye i eksplike: “Akoz sa lazwa ki i ti pou gannyen, i pa ti pran kont laont pour mor lo en poto martir.” (Ebre 12:2) Zezi ti sertennman trouv lazwa ler i ti pe sanktifye non Bondye. Zezi ti osi ganny laprouvasyon son Papa konman rekonpans ek lezot privilez merveye. Labib i dir ki “aprezan i pe asize lo kote drwat tronn Bondye.” Nou osi lir: “Bondye in donn li en pozisyon pli siperyer e i’n kontan pour donn li en non ki pli enportan ki tou lezot non.”​—Filipyen 2:9.

13, 14. Ki mannyer Zeova i santi konsernan sa ki nou fer pour li?

¹³ Nou kapab asire ki Zeova i apresye tou sa ki nou fer pour servi li. I konpran ler nou pa sir ki pou fer oubyen ler nou annan dout lo nou prop abilite. I vreman konsernen ler nou enkyet konsernan nou lanplwa oubyen pour pran swen avek nou fanmir. I konpran ler nou pa kapab fer otan dan son servis akoz konmela nou malad e dan depresyon. Wi, nou kapab annan konfyans ki Zeova i apresye nou fidelite menm si nou annan bann problenm.​—Lir Ebre 6:10, 11.

¹⁴ Rapel osi, ki Zeova i sa “Enn ki ekout lapriyer.” Nou kapab asire ki ler nou priy avek li, i pou ekout nou. (Psonm 65:2, NWT) Sa “Papa ki pran lapenn e ki donn rekonfor” pou donn nou tou sa ki nou bezwen pour ki nou kapab reste pros avek li. Par ler i kapab servi nou bann frer ek ser pour fer sa. (2 Korentyen 1:3) Zeova i kontan ler nou demontre konpasyon anver lezot. “Sa ki rann faver bann dernyen dimoun pe pret Zeova e I pou rekonpans li pour son aksyon.” (Proverb 19:17, NWT; Matye 6:3, 4) Alor, ler nou zenere e ed nou bann frer ek ser, Zeova i vwar sa ki nou fer konman en lòn ki nou’n fer avek li e i promet pour rekonpans nou.

15. Ki rekonpans ki ou pe espere avek enpasyans? (Vwar portre lo paz 21.)

¹⁵ Bann Kretyen swazir i annan lespwar pour ganny “en kouronn ladrwatir,” en rekonpans sorti kot Zezi. (2 Timote 4:7, 8) Par kont, ou annan valer dan lizye Bondye menm si ou annan en diferan lespwar. Plizyer milyon “lezot mouton” Zezi pe esper avek enpasyans pour ganny lavi eternel dan paradi lo later konman zot rekonpans. Dan paradi, “zot pou trouv bokou plezir dan labondans lape.”​—Zan 10:16; Psonm 37:11.

16. Ki rekonfor 1 Zan 3:19, 20 i donn nou?

¹⁶ Par ler, nou kapab santi ki nou pa pe fer bokou dan servis Zeova, oubyen nou pe demann nou lekor si Zeova i pran plezir dan sa ki nou pe fer. Nou menm kapab santi ki nou pa merit ganny okenn rekonpans. Me, nou pa devret zanmen oubliye ki “Bondye i pli gran ki nou leker e i konn tou keksoz.” (Lir 1 Zan 3:19, 20.) Ler nou servi Zeova akoz nou annan lafwa dan li e akoz nou kontan li, nou kapab asire ki i pou rekonpans nou, menm si nou santi ki sa ki nou fer i napa gran valer.​—Mark 12:41-44.

17. Ki serten rekonpans nou gannyen la konmela?

¹⁷ Menm dan sa bann dernyen zour sa move lemonn Satan, Zeova i beni son pep. I fer sir ki nou ganny konnesans ek lape annabondans akoz nou form parti en lasosyasyon frer ek ser enternasyonal. (Izai 54:13) Wi, parey Zezi ti promet, Zeova i rekonpans nou la konmela avek en fanmir frer ek ser enternasyonal ki annan lanmour pour kanmarad. (Mark 10:29, 30) An plis, tou sa ki pe vreman rod Zeova i ganny rekonpanse avek en lape lespri, satisfaksyon ek lazwa.​—Filipyen 4:4-7.

18, 19. Ki mannyer bann serviter Zeova i santi konsernan bann rekonpans ki zot gannyen?

¹⁸ Bann serviter Zeova dan lemonn antye in rezoui bann rekonpans merveye sorti kot nou Papa. Par egzanp, Bianca ki reste Lalmanny i dir: “Mon pa kapab remersye Zeova ase, pour ed mwan fer fas avek mon bann lenkyetid e pour dan mon kote sak zour. Sa lemonn i dan konfizyon e dan fernwanr, me anmezir ki mon reste atase avek Zeova, mon santi mon an sekirite dan son lebra. Sak fwa ki mon fer en sakrifis pour li, i donn mwan san fwa plis benediksyon.”

¹⁹ Aprezan, annou vwar kondisyon Paula, en ser 70 an ki reste Kanada, i soufer avek spina bifida, en maladi ki afekte kolonn vertebral. I dir ki menm si son abilite pour mouvmante i limite, sa pa vedir ki son predikasyon i limite. I azoute: “Mon sezi tou loportinite pour fer diferan form servis tel parey rann temwannyaz enformel e lo telefonn. Pour mon prop lankourazman, mon gard en notebook ki annan bann verse Labib e bann nide ki nou bann piblikasyon i donnen ki mon servi tanzantan. Mon apel li ‘My survival Notebook.’ Bann dekourazman i tanporer si nou konsantre lo bann promes Zeova. Zeova i toultan la pour ed nou dan nenport sirkonstans.” Ou sityasyon i kapab diferan avek sa ki pour Bianca ouswa Paula, me ou kapab mazin bann fason ki Zeova in rekonpans ou oubyen lezot otour ou. Pa i byen pour mazinen ki mannyer Zeova pe rekonpans ou la konmela e ki mannyer i pou rekonpans ou dan lavenir!

20. Ki nou enpasyan pour gannyen si nou kontinyen fer nou mye pour servi Zeova fidelman?

²⁰ Pa zanmen oubliye ki ler ou fer lapriyer senser ou “pou ganny en gran rekonpans.” Ou kapab asire ki ‘apre ki ou’n fer lavolonte Bondye,’ ou pou “ganny sa ki Bondye in promet.” (Ebre 10:35, 36) Alor, annou kontinyen batir nou lafwa e fer tou sa ki nou kapab pour servi Zeova. Nou annan konfyans ki Zeova pou rekonpans nou!​—Lir Kolosyen 3:23, 24.