Eski Ou Siport Souvrennte Zeova?

“Proklanmen parmi bann nasyon: ‘Zeova li menm in vin lerwa.’”—PSONM 96:10.

1, 2. (a) Ki levennman enportan ti arive apepre Oktob lannen 29 N.L.? (b) Ki sa levennman ti sinifye pour Zezi?

E N LEVENNMAN vreman enportan ki pa ti’n zanmen arive oparavan ti arive apepre Oktob lannen 29 N.L. Matye, en ekriven Levanzil i dir: “Zis konman Zezi ti’n fini batize, i ti sorti dan delo. Lesyel ti ouver, [Zan Batis] ti war Lespri Bondye desann lo [Zezi] dan laform en kolonm. En lavwa sorti dan lesyel ti dir, ‘Sa mon Garson byenneme, ki donn mwan bokou lazwa.’” Sa ti enn parmi detrwa levennman ki tou le kat ekriven Levanzil ti rikorde.—Matye 3:16, 17; Mark 1:9-11; Lik 3:21, 22; Zan 1:32-34.

² Kan lespri sen ti desann lo Zezi, sa ti idantifye li konman sa enn ki ti’n ganny swazir, ki vedir Mesi ouswa Kris. (Zan 1:33) A lafen de fen, sa “desandans” ki ti’n ganny promet ti’n arive! I ti pe debout devan Zan Batis. Zezi ti sanmenm sa enn ki ti pou ganny kraze lo son talon par Satan. E li menm plitar ti pou kraz latet Satan sa pli gran lennmi Zeova ek Son souvrennte. (Zenez 3:15) Depi sa moman Zezi ti okouran ki i ti pou bezwen fer bokou zefor pour akonplir plan Zeova ki annan pour fer avek Son souvrennte ek Son Rwayonm.

 3. Ki mannyer Zezi ti prepar son lekor pour sa rol ki i ti annan pour zwe pour siport souvrennte Zeova?

³ Pour li byen prepare pour sa travay ki i ti pe al fer “Zezi, ranpli avek Lespri Sen, ti kit larivyer Zourden e Lespri Sen ti anmenn li dan dezer.” (Lik 4:1; Mark 1:12) Laba pour 40 zour Zezi ti annan letan pour li medit o profon konsernan sa kestyon ki Satan ti souleve lo drwa Zeova pour dirize e osi lo sa travay ki I ti pou bezwen fer pour siport souvrennte Zeova. Sa kestyon i osi enplik tou lanz dan lesyel ek imen lo later. Alors i byen pour nou egzamin sa lavi fidel ki Zezi ti anmennen isi lo later e vwar ki nou devret fer pour montre ki nou osi nou anvi siport souvrennte Zeova.—Zob 1:6-12; 2:2-6.

Satan i kestyonn drwa Zeova pour dirize

 4. Ki aksyon Satan ti pran ki ti montre ki i ti pe kestyonn drwa Zeova pour dirize?

⁴ Byensir, ni enn sa bann levennman ki’n ganny mansyonnen pli boner pa ti sap latansyon Satan. San perdi letan i ti lans son latak lo “desandans” prensipal “madanm” Bondye. (Zenez 3:15) Satan ti tant Zezi trwa fwa avek bi pour fer Zezi fer sa ki ti paret pli dan son lavantaz olye fer sa ki son Papa ti anvi i fer. Sa trwazyenm tantasyon ti sirtou met lanfaz lo drwa Zeova pour dirize. Kan Satan ti pe montre li “tou bann rwayonm partou lo later,” san lezitasyon i ti dir Zezi: “Mon a donn ou tousala, si ou azenou e ou ador mwan.” Vi ki i ti konnen ki Satan ti annan kontrol lo “tou bann rwayonm partou lo later,” Zezi ti fer Satan konn Son pozisyon lo sa size souvrennte kan i ti reponn an dizan: “Sorti la ale Satan! I’n ekri: ‘Se Senyer ou Bondye ki ou devre adore e li tousel ki ou devre servi!’”—Matye 4:8-10.

 5. Ki misyon difisil Zezi ti bezwen akonplir?

⁵ Fason ki Zezi ti viv son lavi ti montre klerman ki siport souvrennte Zeova ti son priyorite. Zezi ti konnen ki i ti pou bezwen reste fidel ziska son lanmor dan lanmen Satan. Parey ti’n ganny predir “desandans” sa madanm ti pou ganny kraze lo talon pour prouv drwa Zeova konman souvren. (Matye 16:21; 17:12) I ti osi bezwen rann temwannyaz lo lefet ki Rwayonm Bondye ti pou sa zouti ki ti pou ganny servi par Zeova pour met en lafen avek Satan e pour reetablir lape ek lord parmi tou kreasyon. (Matye 6:9, 10) Ki Zezi ti fer pour akonplir sa misyon difisil?

“Rwayonm Bondye i pros”

 6. Ki mannyer Zezi ti fer konnen ki Rwayonm i sa mwayen ki Bondye pou servi pour “detrir bann travay Dyab”?

⁶ Pour konmanse, “Zezi ti vin Galile, e i ti pres Levanzil an dizan: ‘Ler in arive, Rwayonm Bondye i pros.’” (Mark 1:14, 15) Anfet Zezi ti dir: “Mon bezwen anons Bonn Nouvel konsernan Rwayonm Bondye, . . . parski se pour sa, ki Bondye in anvoy mwan.” (Lik 4:18-21, 43) Zezi ti vwayaz preski partou dan sa pei pour “pres Bonn Nouvel Rwayonm Bondye.” (Lik 8:1) I ti osi fer bokou mirak parey donn manze lafoul, kalmi tanpet, geri bann malad e osi resisit bann mor. Par mwayen sa bann mirak Zezi ti pe montre ki Bondye i kapab retir tou bann domaz ek soufrans ki sa rebelyon dan zarden Edenn in anmennen e alors “detri bann travay dyab.”—1 Zan 3:8.

 7. Ki lord Zezi ti donn son bann disip e avek ki rezilta?

⁷ Pour ki sa bon nouvel lo Rwayonm ti ganny prese otan posib, Zezi ti ralye en group son bann disip fidel e i ti form zot pour fer sa travay. Premyerman, i ti donn lord son 12 zapot e “i ti anvoy zot pres Rwayonm Bondye.” (Lik 9:1, 2) Apre sa i ti anvoy 70 lezot pour averti bann dimoun ki: “Rwayonm Bondye in ariv pre avek zot.” (Lik 10:1, 8, 9) Kan sa bann disip ti retournen e raport avek Zezi sikse ki zot ti’n gannyen dan sa travay predikasyon, i ti reponn zot: “Mon ti war Satan sap dan lesyel, tonbe parey zekler.”—Lik 10:17, 18.

 8. Ki lavi Zezi isi lo later ti demontre klerman?

⁸ Zezi ti fer tou sa ki i ti kapab e i ti sezi tou lokazyon ek loportinite pour li rann temwannyaz lo Rwayonm Bondye. I ti travay san arete, lizour konman aswar, menm priv son lekor bann konfor dan lavi tou le zour. I ti dir: “Renar i annan zot trou, zwazo lesyel i annan zot nik, me Fis-de-Lonm napa en landrwa kot i kapab repoz son latet.” (Lik 9:58; Mark 6:31; Zan 4:31-34) En pti pe letan avan son lanmor, avek lardyes Zezi ti dir Pons Pilat: “Mon’n vin dan lemonn pour servi temwen pour laverite.” (Zan 18:37) Tou dilon son lavi Zezi ti demontre ki i ti vini, pa senpleman pour vin en gran ansennyan oubyen pour fer mirak oubyen menm zis pour ofer son lavi konman en sakrifis. Me plito i ti vin lo later pour siport e fer lavolonte Zeova, e osi pour rann temwannyaz lo abilite ki Bondye i annan pour akonplir son lavolonte atraver son Rwayonm.—Zan 14:6.

“Tou in ganny akonpli!”

 9. Ki mannyer Satan ti finalman reisi kraz talon “desandans” madanm Bondye?

⁹ Tou sa ki Zezi ti fer an rapor avek Rwayonm, pa ti dan faver son Adverser, Satan Dyab. Par mwayen en parti son “desandans” isi lo later, setadir par politik ek larelizyon, Satan ti pe toultan esey detrir “desandans” madanm Bondye. Zezi ti en target pour Satan ek son bann asosye depi ler i ti ne konman en imen ziska lafen son lavi lo later. Finalman, pandan prentan lannen 33 N.L., ler ti’n arive pour Fis-de-Lonm ganny livre dan lanmen son Adverser pour li ganny kraze lo talon. (Matye 20:18, 19; Lik 18:31-33) Levanzil i fer resorti klerman ki mannyer bann dimoun depi Zida Iskaryot ziska bann sef pret, profeser lalwa, Farizyen ek bann Romen ti ganny manipile par Satan pour zot kondann Zezi e fer li soufer en lanmor martir lo en poto.—Akt 2:22, 23.

10. Ki sa keksoz prensipal ki Zezi ti akonplir atraver son lanmor lo sa poto martir?

¹⁰ Kwa ki vin dan ou lespri ler ou mazin Zezi lo sa poto martir pe soufer en lanmor kriyel? Petet ou kapab mazin sa pri ki Zezi ti peye san mazin son prop lekor, me byennet bann imen enparfe. (Matye 20:28; Zan 15:13) Ou kapab osi etonnen ler ou mazin lo sa gran lanmour ki Zeova ti demontre anver nou par fourni sa sakrifis. (Zan 3:16) Petet ou santi parey larme Romen ki ti ganny pouse pour dir: “Vreman sa ti Garson Bondye.” (Matye 27:54) Vreman tousala i bann bon reaksyon. Me lo lot kote, mazin sa dernyen parol ki Zezi ti dir kan i ti lo sa poto: “Tou in akonpli!” (Zan 19:30) Kwa ki ti’n ganny akonplir? Menm si Zezi ti akonplir bokou keksoz par son lavi ek lanmor, eski pa son rezon prensipal ki i ti vin lo later ti annan pour fer avek reponn sa kestyon ki Satan ti souleve konsernan drwa Zeova pour dirize? Deplis pa i ti’n ganny predir ki konman sa “desandans” i ti pou bezwen fer fas avek bann gran leprev dan lanmen Satan pour ki i retir tou repros lo non Zeova? (Izai 53:3-7) Sa ti bann gro responsabilite, me kantmenm sa Zezi ti akonplir zot dan tou laspe. Sa wi ti en lakonplisman!

11. Ki Zezi pou fer pour akonplir sa profesi ki ti ganny predir dan zarden Edenn konpletman?

¹¹ Lefet ki i ti’n reste fidel Zezi ti ganny resisite, pa konman en imen me konman “en lespri ki donn lavi.” (1 Korentyen 15:45; 1 Pyer 3:18) Zeova ti fer sa promes avek son Garson ki ti’n ganny glorifye: “Asiz lo mon kote drwat ziska ki mon fer ou bann lennmi vin en marspye pour ou lipye.” (Psonm 110:1) Sa “bann lennmi” ti enkli sef antouk Satan e tou bann ki form parti son “desandans.” Konman Lerwa dan Rwayonm Bondye, Zezi Kri pou ansarz e i pou met en lafen avek sa bann rebel dan lesyel e osi lo later. (Revelasyon 12:7-9; 19:11-16; 20:1-3, 10) E apre sa, lakonplisman final sa profesi dan Zenez 3:15 ek sa lapriyer model ki Zezi ti ansenny son bann disip ki dir: “Ki ou Renny i ganny etabli; Ki ou lavolonte i ganny akonpli lo later parey dan lesyel.” Tousala pou ganny realize.—Matye 6:10; Filipyen 2:8-11.

En model pour nou swiv

12, 13. (a) Ki reaksyon remarkab i annan anver sa bon nouvel lo Rwayonm ozordi? (b) Ki nou bezwen demann nou lekor si nou anvi swiv legzanp Kris?

¹² Ozordi, sa bon nouvel lo Rwayonm pe ganny anonse dan bokou pei parey Zezi ti predir. (Matye 24:14) Rezilta ki sa i anmennen se ki plizyer milyon dimoun in dedye zot lavi avek Bondye. Zot vreman eksite konsernan bann benediksyon ki sa Rwayonm pou anmennen. Zot pe esper avek enpasyans sa letan ler zot pou viv dan lape ek sekirite pour touzour dan paradi isi lo later, e avek lazwa zot partaz zot lespwar avek lezot. (Psonm 37:11; 2 Pyer 3:13) Eski ou enn parmi sa bann predikater? Si wi, nou felisit ou. Me i annan osi en lot keksoz ki sakenn antre nou i devret egzaminen.

¹³ Zapot Pyer ti ekrir: “Kris li menm in soufer pour zot, an lesan pour zot en legzanp pour zot swiv.” (1 Pyer 2:21) Remarke ki dan sa ka Pyer pa ti koz lo devouman Zezi dan predikasyon oubyen son abilite pour ansennyen, plito i ti koz lo son soufrans. Pyer konman en temwen ti byen okouran ziska ki degre Zezi ti pare pour soufer pour kapab arive soumet avek souvrennte Zeova e prouve ki Satan i vreman en manter. Dan ki fason alors nou osi nou kapab swiv legzanp Zezi? Nou bezwen demann nou lekor: ‘Ziska ki degre mon pare pour soufer pour siport e onor souvrennte Zeova? Eski lafason ki mon viv mon lavi e akonplir mon minister i montre ki mon vreman siport souvrennte Zeova avan tou lezot keksoz?’—Kolosyen 3:17.

14, 15. (a) Ki mannyer Zezi ti reazir anver bann move sizesyon ek bann keksoz ki i ti ganny ofer e akoz? (b) Ki nou devret toultan gard antet? (Enkli komanter dan bwat “Debout lo kote Zeova.”)

¹⁴ Tou le zour nou fer fas avek bann leprev ek desizyon ki swa gro ouswa pti. Ki mannyer nou pou konn lafason ki nou pou reazir? Par egzanp, kan nou nen a nen avek en tantasyon pour fer en keksoz ki pou kontredir nou pozisyon konman Kretyen, ki mannyer nou reazir? Kan Pyer ti repros Zezi, ki mannyer Zezi ti reakte? I ti dir li: “Ale! Sorti la Satan! Ou en ros dan mon semen, ou pa mazin parey Bondye me konman zonm.” (Matye 16:21-23) Oubyen menm, kan nou ganny ofer bann loportinite pour ganny plis larzan ek promosyon ki pou afekte nou spirityalite, eski nou reazir parey Zezi? Kan Zezi ti realize ki bann ki ti vwar son bann mirak ti “pe vin pran li pardfors pour fer li lerwa,” i ti deswit ale e sov lwen avek zot.—Zan 6:15.

¹⁵ Akoz Zezi ti reazir dan en fason ferm dan sa ka e dan lezot lokazyon osi? Sa ti akoz i ti realize ki son byennet personnel e sa ki i ti panse lo li menm pa ti pli enportan ki fer lavolonte son Papa e siport Son souvrennte a tou pri. (Matye 26:50-54) Alors, si sa kestyon konsernan drwa Zeova pour dirize pa dan nou lespri a tou moman parey Zezi, i touzour annan sa danze ki nou kapab fer konpromi ouswa pa reisi fer en keksoz dapre pwennvi Zeova. Akoz? Akoz nou kapab fasilman ganny anbete par bann taktik Satan. I en eksper pour fer bann keksoz mal paret atiran zis parey i ti fer avek Ev.—2 Korentyen 11:14; 1 Timote 2:14.

16. Kwa ki devret nou bi prensipal kan nou ed lezot?

¹⁶ Nou fer en kantite zefor dan nou minister, pour koz avek dimoun konsernan zot traka e pour montre zot larepons dan Labib. Sa i en bon fason pour stimil zot lentere pour anvi etidye Labib. Toudmenm nou bi prensipal se pa zis ed bann dimoun pour konn sa ki Labib i dir oubyen koz lo bann benediksyon ki Rwayonm Bondye pou anmennen. Nou lobzektif se pour ed zot pour konpran sa size konsernan souvrennte Zeova. Eski zot pare pour vin bann vre Kretyen e pran zot “poto martir” e soufer akoz sa Rwayonm? (Mark 8:34, NW) Eski zot pare pour zwenn ansanm avek sa bann ki siport souvrennte Zeova e prouve ki Satan i en manter e enn ki’n sali repitasyon Bondye? (Proverb 27:11) I en privilez pour nou ed nou menm ek lezot pour pran kote avek souvrennte Zeova.—1 Timote 4:16.

Kan Bondye i vin “tou pour tou dimoun”

17, 18. Ki letan merveye nou kapab espere avek enpasyans si nou demontre ki nou pe siport souvrennte Zeova?

¹⁷ Anmezir nou fer tou sa ki nou kapab depi la konmela pour montre par nou kondwit e dan nou minister ki nou siport souvrennte Zeova, nou kapab esper avek enpasyans sa letan kan Zezi Kri i “remet Rwayonm dan lanmen Bondye, son Papa.” Kan ki sa pou arive? Zapot Pol ti eksplike: “Apre ki i’n detri tou lotorite, pouvwar spirityel ek tou pisans. Parski fodre ki Kris i rennyen ziska ki i’n met tou son lennmi anba son lipye. . . . Alor Garson li menm, i a soumet son lekor avek sa enn ki’n soumet tou keksoz avek li, e alor Bondye i ava tou pour tou dimoun.”—1 Korentyen 15:24, 25, 28.

¹⁸ Pa sa pou vreman en moman zwaye kan Bondye pou vin “tou pour tou dimoun”! Sa Rwayonm pou’n akonplir son lobzektif. Tou bann ki opoz souvrennte Zeova pou’n ganny eliminen lo later. Lape ek lord pou’n ganny restore dan liniver antye. Zis parey en psalmis ti dir, tou kreasyon pou sante: “Donn Zeova sa laglwar ki pour son non . . . Proklanmen parmi bann nasyon: ‘Zeova li menm in vin lerwa.’”—Psonm 96:8, 10.

Eski ou kapab reponn?

• Ki mannyer Zezi ti gard souvrennte Bondye konman en priyorite?

• Ki premye keksoz ki Zezi ti akonplir atraver son minister ek son lanmor?

• Dan ki fason nou kapab swiv legzanp Zezi pour montre ki nou siport souvrennte Zeova?

[Bwat lo paz 11]

DEBOUT LO KOTE ZEOVA

Parey bokou nou bann frer ek ser Kore ek lezot landrwa i konnen, kan bann Kretyen i nen a nen avek bann leprev difisil, i byen pour konnen akoz zot pe pas atraver sa bann difikilte.

Enn parmi sa bann frer ki ti ganny met dan prizon pandan letan dominasyon bann Sovyetik ti dir: “Sa ki ti ed nou pour andire se sa konprenezon kler lo sa kestyon ki ti ganny souleve dan zarden Edenn konsernan drwa Zeova pour dirize. . . . Nou ti konnen ki nou ti annan en loportinite pour pran pozisyon pour dominasyon Zeova. . . . Sa ti donn nou kouraz e ti ed nou pour gard nou lentegrite.”

En lot Temwen ti eksplike kwa ki ti ed li ek lezot Temwen dan en kan kot zot ti ganny forse pour travay. I ti dir: “Zeova ti soutenir nou, malgre bann sitiasyon difisil, nou ti eveye spirityelman. Nou ti toultan ankouraz kanmarad avek sa panse pozitif ki nou ti’n pran pozisyon lo kote Zeova konsernan son drwa pour dirize konman souvren iniversel.”

[Portre lo paz 8]

Ki mannyer Zezi ti siport souvrennte Zeova kan i ti ganny tante avek Satan?

[Portre lo paz 10]

Ki lanmor Zezi ti akonplir?