Zezi i demontre konpasyon pour en lepre e geri li

Anmezir ki Zezi ek son kat disip i al prese “dan bann sinagog partou dan Galile,” nouvel konsernan bann keksoz ekstraordiner ki Zezi pe fer i fannen. (Mark 1:39) Nouvel konsernan sa ki Zezi pe fer i ariv ziska kot lavil en msye ki malad avek lalep. Dokter Lik i dir ki “son lekor ti kouver avek lalep.” (Lik 5:12) Ler sa maladi in ariv dan son staz avanse, ptitapti i diform bann diferan parti lekor en dimoun.

Alor sityasyon sa lepre i grav e i bezwen reste lwen avek lezot. An plis ki sa, ler dimoun i pros avek li, i bezwen kriye: “Enpir! Enpir!” pour anpes zot vin tro pros e riske ganny enfekte. (Levitik 13:45, 46) Be ki sa lepre i fer apre sa? I tonm azenou devan Zezi e sipliye: “Senyer, ou kapab fer mwan vin pir si ou oule.”​—Matye 8:2.

Pa sa zonm i annan en gran lafwa dan Zezi! Zis mazinen ki mannyer i fer lapenn akoz sa maladi! Ki Zezi pou fer? Ki ou ou ti pou’n fer si ou ti la? Zezi i annan konpasyon anver sa msye, alor i tous li e dir li: “Mon oule ki ou vin pir, vin pir!” (Matye 8:3) I vre ki i kapab difisil pour serten krwar, me deswit sa lalep i kit li.

Pa ou ti a kontan ganny en lerwa ki annan konpasyon ek pwisans parey Zezi? Lafason ki Zezi ti tret sa lepre i fer nou annan konfyans ki ler Zezi pou’n vin Lerwa lo later antye, sa profesi Labib pou ganny akonplir: “I ava pran pitye pour bann ki feb ek bann malere; i ava sov lavi bann pov.” (Psonm 72:13) Sa letan, Zezi pou vreman kontan pour ed tou bann ki pe soufer.

Rapel ki menm avan ki Zezi i geri sa zonm ki ti annan lalep, bann dimoun ti deza byen eksite akoz tou sa ki i ti’n fer dan son minister. Zis mazinen sa ki pou arive ler dimoun pou tann sa keksoz ekstraordiner ki Zezi in fer. Me Zezi pa oule ki bann dimoun i met lafwa dan li senpleman akoz sa ki zot in tande. I konn konsernan sa profesi ki dir ki “personn pa pou antann son lavwa dan semen,” andotmo i pa pou fer keksoz pour enpresyonn lezot. (Izai 42:1, 2) Sanmenm sa Zezi i donn lord sa zonm ki fek ganny geri: “Fer sir ou pa dir personn, me al kot pret pour li egzamin ou e ofer sa lofrann ki ganny demande dan Lalwa Moiz.”​—Matye 8:4.

Par kont, parey ou kapab mazinen, sa zonm i telman kontan ki i’n ganny geri ki i pa kapab gard sa pour li tousel. I ale e dir tou dimoun. Sa i fer bann dimoun pli anvi konn Zezi ankor. Finalman, Zezi i nepli kapab al dan okenn lavil telman dimoun pe vin vwar li. Alor pour en pe letan, i reste dan bann landrwa kot napa personn. Kantmenm sa, dimoun sorti partou kote i vin vwar li pour li ansenny zot e geri zot.