Kontinyen pa pran kote dan sa lemonn divize

 1. Ki mannyer nou kapab obei Bondye ek bann gouvernman imen an menm tan?

LABIB i ansenny nou pour obei bann gouvernman imen, me i osi dir ki nou devret toultan obei Bondye. (Akt 5:29; Tit 3:1) Ki mannyer sa i posib? Zezi ti eksplik en prensip ki ed nou konnen lekel ki nou devret obeir. I ti dir ki nou devret rann “Sezar sa ki pour Sezar e rann Bondye sa ki pour Bondye.”^[1](Vwar lezot not.) (Matye 22:21) Nou rann “Sezar sa ki pour Sezar” ler nou obei lalwa gouvernman, tret bann zofisye gouvernman avek respe e pey taks. (Romen 13:7) Me si gouvernman i demann nou pour fer en keksoz ki Bondye pa anvi nou fer, nou refize fer li, me toultan avek respe.

 2. Ki mannyer nou montre ki nou pa pran kote dan bann zafer politik sa lemonn?

² En fason ki nou rann “Bondye sa ki pour Bondye,” i letan nou pa pran kote dan bann zafer politik sa lemonn. (Izai 2:4) Vi ki Zeova i permet bann gouvernman imen pour dirize, nou pa opoz zot. Nou osi pa pran par dan okenn aktivite patriyotik oubyen nasyonalis. (Romen 13:1, 2) Nou pa esey sanz bann gouvernman ouswa esey enfliyans bann politisyen e nou pa vote dan bann eleksyon ouswa vin bann politisyen.

 3. Akoz nou pa devret pran kote?

³ I annan plizyer rezon akoz Bondye i dir nou pa pran kote. En rezon se ki nou imit Zezi, ki ‘pa ti fer parti lemonn.’ I pa ti zanmen pran kote dan politik ouswa dan bann lager. (Zan 6:15; 17:16) En lot rezon, i akoz nou siport Rwayonm Bondye. Vi ki nou pa siport bann gouvernman imen, nou annan en konsyans kler ler nou pres avek dimoun ki i zis Rwayonm Bondye ki pou retir tou problenm limanite. Bann fo larelizyon i pran par dan politik e sa i fer divizyon parmi bann dimoun. Me vi ki nou pa pran kote, nou ini avek nou bann frer ek ser dan lemonn antye.​—1 Pyer 2:17.

 4. (a) Ki mannyer nou konnen ki i pou vin pli difisil pour kontinyen pa pran kote? (b) Akoz nou devret prepar nou depi konmela menm pour kontinyen pa pran kote?

⁴ I kapab ki nou pe reste dan en landrwa kot dimoun pa ekspekte nou pran kote dan bann zafer politik. Me pli nou apros avek lafen sa lemonn Satan, i pou pli difisil pour nou kontinyen pa pran kote. Deza dimoun “pa pare pour tonm dakor,” zot annan “karakter vif” e zot pou pli divize ankor. (2 Timote 3:3, 4) Serten nou bann frer ek ser in deza ganny afekte avek bann sanzman lo kote politik ki’n arive en sel kou dan zot pei. Sa i rezon akoz depi konmela menm nou bezwen prepar nou pour kontinyen pa pran kote, menm dan en sityasyon difisil. Annou vwar kat keksoz ki nou kapab fer pour prepar nou.

 5. Ki mannyer Zeova i vwar gouvernman imen?

⁵ En fason ki nou kapab prepar nou konmela menm pour kontinyen pa pran kote i ler nou vwar bann gouvernman imen parey Zeova. Zeova pa ti donn imen sa drwa pour diriz lo kanmarad ler i ti kree zot. (Zeremi 10:23) I vwar tou imen konman en sel fanmir. Me bann gouvernman imen in diviz dimoun akoz zot dir ki zot nasyon i pli meyer. Menm ler bann gouvernman i paret bon, zot pa kapab rezourd tou problenm. Zot in osi vin lennmi Rwayonm Bondye ki’n konmans dirize an 1914. Tre byento sa Rwayonm pou retir tou gouvernman imen.​—Lir Psonm 2:2, 7-9.

 6. Ki mannyer nou devret tret sa bann ki annan lotorite dan gouvernman?

⁶ Bondye i permet bann gouvernman imen pour egziste akoz zot kapab mentenir en serten degre lape ek lord. Sa i ed nou pour pres sa bon nouvel lo Rwayonm Bondye. (Romen 13:3, 4) Bondye i menm dir nou priy pour bann ki annan lotorite pour ki nou kapab ador Bondye anpe. (1 Timote 2:1, 2) Ler nou pa ganny trete dan en fason ki zis, nou kapab demann sa bann ki annan lotorite pour ed nou. Sanmenm ki Pol ti fer. (Akt 25:11) Kantmenm Labib i dir ki Satan ki kontrol bann gouvernman imen, i pa dir ki i kontrol tou bann endividi ki annan lotorite dan gouvernman. (Lik 4:5, 6) Alor, nou pa devret zanmen donn personn sa nide ki en zofisye gouvernman i ganny kontrole par Dyab. Labib i eksplike ki nou pa devret ensilte lezot.​—Tit 3:1, 2.

 7. Ki kalite fason panse nou devret evite?

⁷ Nou obei Bondye ler nou pa siport okenn politisyen oubyen parti politik, menm ler zot bann nide oubyen lopinyon i kapab benefisye nou. Parfwa, sa i kapab difisil pour nou. Zis mazin par egzanp ki dimoun pe rebel kont en gouvernman ki’n fer bokou dimoun soufer, menm Temwen Zeova. Byensir, ou pa pou zwenn avek sa bann ki pe rebele, me eski ou pou krwar ki sa bann rebel i annan rezon e swete ki zot reisi? (Efezyen 2:2) Si nou anvi kontinyen pa pran kote, nou pa devret santi ki en parti i annan rezon ouswa pli bon ki en lot. Sa pou ganny demontre par sa ki nou dir e sa ki nou fer.

 8. Ler i difisil pour kontinyen pa pran kote, ki mannyer nou kapab “pridan” me “inosan”?

⁸ En dezyenm fason pour kontinyen pa pran kote, i ler nou vin “pridan parey serpan me inosan parey pizon.” (Lir Matye 10:16, 17, NW)^[2](Vwar lezot not.) Nou “pridan” ler nou mazin bann difikilte ki kapab arive. Nou reste “inosan” ler nou kontinyen pa pran kote dan sa bann sityasyon difisil. Annou vwar serten sa bann sityasyon e kwa ki nou kapab fer pour kontinyen pa pran kote.

 9. Ki nou devret fer atansyon ler nou pe koz avek lezot?

⁹ Konversasyon. Nou devret fer byen atansyon ler dimoun i konmans koz lo bann zafer politik. Par egzanp, ler nou pe koz avek en dimoun lo Rwayonm Bondye, nou pa pou dir ki nou dakor ouswa pa dakor avek bann pwennvi ouswa lopinyon en parti politik oubyen en dirizan an partikilye. Olye koz lo sa ki bann imen i anvi fer pour rezourd bann problenm limanite, montre dan Labib ki mannyer Rwayonm Bondye pou rezourd sa bann problenm pour touzour. Si dimoun i anvi fer deba lo en topik tel parey maryaz omoseksyel ouswa lavortman, dir zot sa ki Parol Bondye i dir e ki mannyer ou esey swiv sa dan ou lavi. Si en dimoun i dir ki serten lalwa i devret ganny retire ouswa sanze, nou pa pran kote e nou pa ensiste ki sa dimoun i sanz son pwennvi.

10. Ki mannyer nou kapab fer sir ki nou kontinyen pa pran kote ler nou get oubyen lir okenn keksoz dan medya?

¹⁰ Medya. Parfwa en nouvel i ganny dir dan en fason ki siport en kote. Sa i sirtou leka dan bann pei kot nouvel i ganny kontrole par gouvernman. Si medya ouswa bann zournalis i pran kote, nou devret fer atansyon ki nou pa konmans mazin parey zot. Par egzanp, demann ou lekor, ‘Eski i annan en zournalis ki mon kontan ekoute akoz mon dakor avek sa ki i dir konsernan politik?’ Pour ed ou kontinyen pa pran kote, evite get ouswa lir tro bokou raportaz ki pran kote dan bann zafer politik. O kontrer, esey rod bann raportaz ki pa pran okenn kote. Touzour konpar sa ki ou tande avek ‘model parol laverite’ ki trouve dan Labib.​—2 Timote 1:13.

11. Ki mannyer i kapab difisil pour nou kontinyen pa pran kote ler bann keksoz ki nou annan i vreman enportan pour nou?

¹¹ Materyalizm. Ler larzan ek bann keksoz ki nou annan i vreman enportan pour nou, nou kapab vwar li difisil pour kontinyen pa pran kote. Apre lannen 1970, bokou Temwen an Malawi ti bezwen donn tou sa ki zot ti annan akoz zot ti refize zwenn en parti politik. Malerezman, serten pa ti oule abandonn zot lavi konfortab. En ser ki apel Ruth i rapel, “Serten ti al an egzil ansanm avek nou, me pli tar zot ti zwenn sa parti politik e retourn kot zot akoz zot pa ti anvi viv sa lavi enkonfortab dan kan refizye.” Me laplipar serviter Bondye pa koumsa. Zot kontinyen pa pran kote, menm si pour fini kont zot ganny mwens larzan oubyen perdi tou sa ki zot annan.​—Ebre 10:34.

12, 13. (a) Ki Zeova i panse lo imen? (b) Ki mannyer nou kapab konnen si nou pe vin tro fyer pour nou pei?

¹² Lorgey. Souvan dimoun i fyer e annan sa labitid pour fer vantar konsernan zot ras, tribi, kiltir, lavil ouswa pei. Me Zeova pa krwar ki en dimoun oubyen group dimoun i pli meyer ki en lot. Pour li, nou tou nou egal. Byensir, Zeova in fer nou tou diferan avek kanmarad e nou kapab apresye e admir sa varyete. I pa anvi ki nou abandonn nou kiltir, me i osi pa anvi ki nou krwar ki nou pli meyer ki lezot.​—Romen 10:12.

¹³ Nou pa devret zanmen tro fyer pour nou pei ouswa nasyon ki nou krwar i pli meyer ki nenport lezot. Si nou santi koumsa, petet i pou difisil pour nou kontinyen pa pran kote. Sa ti arive dan premye syek. Serten frer ki koz Ebre ti negliz bann vev ki koz Grek. (Akt 6:1) Ki mannyer nou kapab konnen si nou pe konmans devlop lorgey? Si en frer ouswa en ser ki sorti dan en lot pei i donn ou en sizesyon, eski deswit ou mazinen, ‘Nou fer keksoz pli byen isi’ e apre rezet li? Si wi, mazin sa konsey enportan: “Avek limilite konsider lezot pli enportan ki ou.”​—Filipyen 2:3.

14. Ki mannyer lapriyer i kapab ed nou e ki legzanp dan Labib ki montre sa?

¹⁴ En trwazyenm fason pour kontinyen pa pran kote i ler nou depan lo Zeova. Priye pour ganny lespri sen ki kapab donn ou pasyans e kontrol lo ou lekor. Sa bann kalite pou ed ou si gouvernman i fer en keksoz ki pa onnet ouswa pa zis. Demann Zeova lasazes pour rekonnet en sityasyon ki kapab fer li difisil pour kontinyen pa pran kote. Demann li pour osi ed ou fer sa ki byen dan sa sityasyon. (Zak 1:5) Ou kapab ganny met dan prizon ouswa ganny pini dan lezot fason akoz ou fidelite avek Zeova. Si sa i arive, priye pour ganny kouraz pour ki ou kapab eksplik avek lezot dan en fason kler akoz ou pa pran kote. Ou kapab asire ki Zeova pou ed ou andire.​—Lir Akt 4:27-31.

15. Ki mannyer Labib i kapab ed nou pour kontinyen pa pran kote? (Vwar osi sa bwat “Parol Bondye ti ranforsi zot konviksyon.”)

¹⁵ Zeova in donn nou Labib pour donn nou plis lafors. Medit lo bann verse ki pou ed ou pour kontinyen pa pran kote. Esey aprann sa bann verse e rapel zot, parski zot pou itil si en zour ou napa ou Labib avek ou. Labib i osi kapab ranforsi ou lespwar dan sa ki Bondye in dir pour lavenir. Nou bezwen sa lespwar pour andir persekisyon. (Romen 8:25) Swazir bann verse ki dekrir bann keksoz ki ou ti pou vreman kontan dan nouvo lemonn e imazin ou laba.

16, 17. Ki nou kapab aprann avek legzanp bann serviter fidel Bondye ki ti kontinyen pa pran kote? (Vwar portre lo paz 21.)

¹⁶ En katriyenm keksoz ki kapab ed nou pour kontinyen pa pran kote i ler nou reflesir lo legzanp bann serviter fidel Zeova. Dan letan Labib, plizyer parmi zot ti annan kouraz e zot ti fer bann desizyon saz ki ti ed zot pour kontinyen pa pran kote. Mazin lo Sadrak, Mesak ek Abednego, ki ti refize ador en stati ki ti reprezant gouvernman Babilonn. (Lir Danyel 3:16-18.) Sa resi Labib i donn kouraz plizyer Temwen ozordi e ed zot pour refize ador paviyon sa pei kot zot reste. Zezi pa ti mel dan politik oubyen lezot zafer ki fer divizyon. I ti konnen ki son bon legzanp ti pou ed son bann disip. I ti dir: “Pran kouraz, mon’n ranport laviktwar lo lemonn.”​—Zan 16:33.

¹⁷ Plizyer Temwen dan nou letan i’n kontinyen pa pran kote. Serten parmi zot in ganny tortire, met dan prizon e menm ganny touye akoz zot in reste fidel avek Zeova. Zot legzanp i kapab ed nou pour annan kouraz. En frer sorti Latirki ti dir: “Franz Reiter ti en zenn frer ki ti ganny touye akoz i ti refize pour zwenn larme Hitler. Sa let ki i ti ekri son manman sa zour swar avan son lanmor, ti montre son gran lafwa ek konfyans dan Zeova e mon ti anvi swiv son legzanp si mon ti fer fas avek en tel leprev.”^[3]​—Vwar lezot not.

18, 19. (a) Ki mannyer bann manm ou kongregasyon i kapab ed ou pour kontinyen pa pran kote? (b) Ki ou determinen pour fer?

¹⁸ Bann frer ek ser dan ou kongregasyon i kapab ed ou pour kontinyen pa pran kote. Les bann ansyen konnen si ou dan en sityasyon difisil. Zot kapab donn ou bann bon konsey sorti dan Labib. Osi, si lezot manm kongregasyon i konn ou sityasyon, zot kapab ankouraz ou. Demann zot pour priy pour ou. Me nou osi nou bezwen siport nou bann frer ek ser e priy pour zot. (Matye 7:12) Pour vwar en lalis bann frer ek ser ki dan prizon, al lo jw.org e get anba NEWSROOM > LEGAL DEVELOPMENTS e ou pou vwar sa lartik ki apel “Jehovah’s Witnesses Imprisoned for Their Faith​—By Location.” Swazir detrwa non e demann Zeova pour ed sa bann frer ek ser pour reste kouraze e fidel avek li.​—Efezyen 6:19, 20.

¹⁹ Pli nou apros avek lafen, nou ekspekte ki bann gouvernman i met deplizanpli plis presyon lo nou pour pran kote. Sa i rezon ki i enportan pour nou prepar nou konmela menm pour kontinyen pa pran kote dan sa lemonn divize!