Vin pli pros avek fanmir Zeova

 1. Ki mannyer nou kapab konsider Zeova?

BANN adorater Zeova i en fanmir ki enkli Zezi, ki “premye ne tou kreasyon” ek en kantite lanz. (Kol. 1:15; Ps. 103:20) Ler Zezi ti lo later i ti ed dimoun pour konpran ki zot kapab konsider Zeova konman zot Papa. Ler Zezi ti pe koz avek son bann disip i ti refer avek Zeova konman ‘son Papa e zot Papa.’ (Zan 20:17) Ler nou dedye nou lavi avek Zeova e batize, nou form parti en fanmir frer ek ser ki kontan kanmarad.​—Mark 10:29, 30.

 2. Ki nou pou diskite dan sa lartik?

² Serten i vwar li difisil pour konsider Zeova konman en Papa ki kontan nou. I kapab ki lezot pa konnen ki mannyer pour demontre lanmour anver zot bann frer ek ser. Dan sa lartik, nou pou vwar ki mannyer Zezi i ed nou pour konsider Zeova konman nou Papa ki kontan nou, ki nou kapab vin pli pros avek. Nou pou osi vwar bann fason ki nou kapab swiv legzanp Zeova dan lafason ki nou tret nou bann frer ek ser.

 3. Ki mannyer lapriyer model i fer nou vin pli pros avek Zeova?

³ Zeova i en Papa ki kontan nou. Zezi i anvi ki nou konsider Zeova parey li, setadir konman en bon paran ki kontan nou e ki nou kapab koz avek li nenport ler. Me pa konman en move dimoun ki zis dir nou ki pour fer. Nou konn sa atraver sa ki Zezi ti ansenny son bann disip pour dir ler zot ti priye. I ti konmans lapriyer model par dir: “Nou Papa.” (Mat. 6:9) Zezi ti’n kapab dir nou apel Zeova “sa Enn Tou Pwisan,” “Kreater” ouswa “Lerwa leternite.” Sa pa ti pou mal parski Labib i servi sa bann mo pour dekri Zeova. (Zen. 49:25; Iza. 40:28; 1 Tim. 1:17) Me Zezi ti dir nou apel Zeova, “Papa.”

 4. Ki mannyer nou konnen ki Zeova i anvi nou vin pros avek li?

⁴ Eski ou vwar li difisil pour konsider Zeova konman en Papa ki kontan ou? Serten parmi nou i santi koumsa. Si nou papa pa ti tret nou dan en bon fason, i kapab difisil pour vwar Zeova konman en Papa ki kontan nou. I vreman rekonfortan pour konnen ki Zeova i konpran nou santiman. I anvi vin pros avek nou. I pour sa rezon ki son Parol i ankouraz nou: “Vin pros avek Bondye e i pou vin pros avek zot.” (Zak 4:8) Zeova i kontan nou e i dir ki i pou vin sa pli bon Papa ki nou kapab annan.

 5. Dapre Lik 10:22, ki mannyer Zezi i kapab ed nou pour vin pli pros avek Zeova?

⁵ Zezi i kapab ed nou pou vin pli pros avek Zeova. Zezi i konn Zeova tre byen e i imit son bann kalite parfetman. I pour sa rezon ki i ti dir: “Sa ki’n vwar mwan in vwar mon Papa osi.” (Zan 14:9) Parey en gran frer, Zezi i ansenny nou ki mannyer pour demontre respe e obei nou Papa, ki mannyer pour evite fer keksoz ki pa fer li plezir e ki mannyer pour ganny son laprouvasyon. (Lir Lik 10:22.) Zezi i osi ed nou pour konpran ki Zeova i vreman bon e i kontan nou. Annou vwar serten legzanp.

 6. Donn bann legzanp ki montre ki Zeova ti ekout lapriyer Zezi.

⁶ Zeova i ekout lapriyer son bann zanfan. Annou vwar lafason ki Zeova ti ekout lapriyer son Garson. Zeova ti tann lapriyer ki son Garson ti fer ler i ti lo later. (Lik 5:16) I ti tann Zezi priy konsernan bann desizyon enportan parey ler i ti swazir son 12 zapot. (Lik 6:12, 13) Zeova ti osi tann lapriyer ki Zezi ti fer ler i ti enkyet. Zis avan Zida ti trai Zezi, Zezi ti priy son Papa konsernan bann keksoz ki ti pe al ariv li. Zeova pa ti zis tann lapriyer Zezi me i ti osi anvoy en lanz pour fortifye son Garson ki i kontan.​—Lik 22:41-44.

 7. Ki mannyer nou santi ler nou konnen ki Zeova i ekout lapriyer son pep?

⁷ Ozordi Zeova i osi ekout nou lapriyer e i reponn zot dan sa pli bon moman e dan sa pli bon fason posib. (Ps. 116:1, 2) En ser ki reste Lenn ti vwar ki mannyer Zeova ti reponn son bann lapriyer. I ti pe soufer akoz i ti enkyet en kantite e i ti priy Zeova konsernan son problenm. I dir: “Sa progranm Televizyon JW Me 2019, konsernan sa ki nou kapab fer ler nou enkyet, ti zis bon pour mwan. I ti larepons mon bann lapriyer.”

 8. Dan ki fason Zeova ti demontre son lanmour pour Zezi?

⁸ Zeova i kontan nou e i demontre son lanmour pour nou dan menm fason ki i ti demontre son lanmour pour Zezi ler i ti lo later. (Zan 5:20) I ti ed Zezi pour gard son lafwa for. I ti ankouraz li ler i ti enkyet e i ti fer sir ki Zezi i annan tou sa ki i ti bezwen pour viv. Zeova ti dir son Garson ki i kontan li e ki i ti annan son laprouvasyon. (Mat. 3:16, 17) Zezi ti konnen ki son Papa ti kontan li e ki I ti pou toultan avek li e ed li. Alor i pa ti zanmen santi li tousel.​—Zan 8:16.

 9. Ki mannyer nou konnen ki Zeova i kontan nou?

⁹ Parey Zezi, nou tou nou’n santi lanmour Zeova dan en kantite fason. Zis mazinen: Zeova in permet nou pour vin son zanmi e in donn nou en kantite frer ek ser ki kontan nou e ki fer nou zwaye e ki ankouraz nou ler nou enkyet. (Zan 6:44) Zeova in osi donn nou tou sa ki bezwen pour gard nou lafwa for. I osi ed nou pour ganny sa ki bezwen pour viv. (Mat. 6:31, 32) Ler nou reflesir lo sa lanmour ki Zeova i annan pour nou, nou lanmour pour li i vin pli for.

10. Ki nou kapab aprann avek lafason ki Zeova i tret nou bann frer ek ser?

¹⁰ Zeova i kontan nou bann frer ek ser. Me i pa toultan fasil pour nou kontan nou bann frer ek ser e demontre lanmour pour zot. Parfwa i difisil parski nou sorti dan diferan kiltir oubyen lafason ki nou’n grandi i diferan. Nou tou nou fer fot ki kapab ofans lezot e dezapwent zot. Me nou tou nou kapab fer zefor pour ranforsi sa lanmour ki i annan parmi nou. Ki mannyer? Par demontre lanmour pour nou bann frer ek ser parey Zeova. (Efe. 5:1, 2; 1 Zan 4:19) Annou vwar sa ki nou kapab aprann avek legzanp Zeova.

11. Ki mannyer Zezi ti demontre “tandres ek konpasyon”?

¹¹ Zeova i demontre “tandres ek konpasyon.” (Lik 1:78) En dimoun ki annan konpasyon pa kontan ler i vwar lezot pe soufer. I rod fason pour ed e rekonfort sa dimoun. Lafason ki Zezi ti tret dimoun i montre ki i ti annan konpasyon pour zot parey Zeova. (Zan 5:19) En fwa, ler Zezi ti vwar en lafoul “i ti pran pitye pour zot, parski zot ti pe ganny maltrete e rezete parey mouton ki napa berze.” (Mat. 9:36) Zezi pa ti zis kontan zot me i ti fer keksoz pour ed zot. I ti geri bann malad e ed bann “ki pe rente e fatige.”​—Mat. 11:28-30; 14:14.

12. Ki mannyer nou kapab demontre konpasyon anver nou bann frer ek ser?

¹² Si nou reflesir lo problenm ki nou bann frer ek ser i annan, nou pou pli kapab demontre konpasyon anver zot. Par egzanp, i kapab ki en ser i annan en problenm lasante grav. I pa zanmen koz lo son problenm me i tre probab ki i ti pou vreman kontan si en dimoun i ed li. Eski i kapab donn son fanmir sa ki zot bezwen? Eski nou kapab ed li par prepar en manze pour li oubyen ed li netway son lakaz? Ouswa i kapab ki en frer in perdi son travay. Nou kapab donn li en larzan pour ed li ziska ki i trouv en lot travay. Me petet nou pa dir li ki sa larzan i sorti kot nou.

13-14. Ki mannyer nou kapab demontre zenerozite parey Zeova?

¹³ Zeova i zenere. (Mat. 5:45) Nou pa devret esper nou bann frer ek ser demann nou led avan ki nou demontre konpasyon anver zot. Parey Zeova, nou kapab fer en keksoz pour zot avan ki zot demann nou. Zeova i fer soley leve lo nou tou toulezour, san ki nou menm bezwen demann li. Tou dimoun i ganny bann byenfe avek lasaler ki soley i donnen, pa zis bann ki rekonesan. Ler Zeova i donn nou bann keksoz ki nou bezwen, i montre ki i kontan nou. Nou kontan Zeova en kantite akoz i bon e zenere!

¹⁴ Nou bann frer ek ser i swiv legzanp Zeova e zot demontre zenerozite anver lezot. Par egzanp, an 2013 siklonn Haiyan ti fer bokou dega Filipin. En kantite frer ek ser ti perdi zot lakaz ek tou sa ki zot ti annan. Me deswit zot bann frer ek ser partou dan lemonn ti ed zot. En kantite frer ek ser ti fer kontribisyon oubyen ede repar ouswa konstrir apepre 750 lakaz dan mwens ki enn an. Pandan pandemi COVID-19, bann Temwen Zeova ti travay dir pour ed zot bann frer ek ser. Ler nou pa tarde pour ed nou bann frer ek ser, nou montre zot ki nou kontan zot.

15-16. Dapre Lik 6:36, ki nou devret fer pour swiv legzanp nou Papa ki dan lesyel?

¹⁵ Zeova i pran pitye pour nou e i pardonn nou. (Lir Lik 6:36.) Toulezour nou Papa ki dan lesyel i pardonn sakenn parmi nou. (Ps. 103:10-14) Bann disip Zezi ti enparfe kantmenm sa Zezi ti pran pitye pour zot e i ti pardonn zot. I ti menm pare pour sakrifye son lavi pour ki nou pese i ganny pardonnen. (1 Zan 2:1, 2) Zeova ek Zezi i pran pitye pour nou e zot pardonn nou e sa i fer nou vin pli pros avek zot.

¹⁶ Sa lanmour ki nou annan pour nou bann frer ek ser i vin pli for ler nou “pardonn kanmarad volonterman.” (Efe. 4:32) Parfwa i kapab difisil pour pardonn lezot alor nou bezwen fer bokou zefor. Sa lartik ki annan pour tit “Pardonn kanmarad volonterman” ki dan en Latour Veyer, ti ed en ser pour pardonn lezot volonterman.b Sa ser i dir: “Sa lartik ti ed mwan pour konpran akoz i bon pour pardonn lezot. I dir ki ler ou pardonn lezot sa pa vedir ki ou krwar ki sa ki zot in fer i byen ouswa ki i pa’n bles ou. Me ler ou pardonn zot, ou nepli gard rankin avek zot e ou kapab annan ou lape lespri.” Ler nou pardonn nou bann frer ek ser volonterman, nou montre ki nou kontan zot e ki nou pe swiv legzanp nou Papa Zeova.

17. Dapre Matye 5:16, ki mannyer nou kapab onor nou Papa ki dan lesyel?

¹⁷ Nou vreman rekonesan ki nou annan en fanmir frer ek ser sorti partou dan lemonn ki kontan kanmarad. Nou anvi ki plis dimoun posib i zwenn avek nou pour ador nou Bondye. Alor nou pa devret zanmen fer en keksoz ki kapab fer dimoun mazin an mal lo Zeova ek son pep. Nou toultan esey konport nou byen pour ki dimoun i anvi aprann konsernan Zeova e servi li.​—Lir Matye 5:16.

18. Kwa ki kapab ed nou pour pa per pour koz lo nou krwayans?

¹⁸ Parfwa serten i kapab kritik nou oubyen menm persekit nou akoz nou obei nou Papa ki dan lesyel. Ki nou kapab fer si nou per pour koz avek lezot lo nou krwayans? Nou kapab asire ki Zeova ek son Garson pou ed nou. Zezi ti dir son ban disip ki zot pa bezwen trakase konsernan ki mannyer zot pou koze oubyen ki pour dir. Akoz non? Zezi ti dir: “Sa letan zot pou konnen ki pour dir akoz pa zis zot ki pou koze, me se avek led lespri sen zot Papa ki zot pou koze.”​—Mat. 10:19, 20.

19. Donn legzanp en dimoun ki ti rann temwannyaz avek kouraz.

¹⁹ Annou vwar legzanp Robert. En pe letan pase, ler Robert ti’n fek konmans etidye Labib e i pa ti konn bokou keksoz lo Labib, i ti bezwen al ankour pour eksplik en ziz akoz i pa pou antre dan larme Sidafrik. Robert ti demontre kouraz e i ti eksplik lakour ki i pa ti pou antre dan larme parski i kontan son bann frer ek ser Kretyen. I ti apresye son plas dan lafanmir Zeova. San ki i ti ekspekte sa ziz ti demann li: “Lekel ou bann frer?” Robert pa ti ekspekte sa kestyon me deswit i ti mazin verse pour sa lazournen ki ti Matye 12:50, ki dir: “Nenport dimoun ki fer lavolonte mon Papa ki dan lesyel, se li ki mon frer, mon ser ek mon manman.” Menm si Robert ti fek konmans etidye Labib, lespri sen Zeova ti ed li pour reponn sa kestyon ek lezot kestyon ankor. Nou kapab asire ki Robert ti fer Zeova fyer. Nou fer Zeova fyer ler nou depan lo li pour rann temwannyaz dan bann sityasyon difisil.

20. Ki nou devret determinen pour fer? (Zan 17:11, 15)

²⁰ Nou vreman rekonesan pour form parti fanmir Zeova ki kontan kanmarad. Nou annan sa pli bon Papa ek en kantite frer ek ser ki kontan nou. Nou devret toultan rekonesan pour sa. Satan ek bann ki swiv li, i esey fer nou doute ki nou Papa ki dan lesyel i kontan nou e zot pe esey kas sa linite ki i annan parmi nou. Me Zezi ti priy pour nou e demann nou Papa pour vey lo nou pour ki nou fanmir i reste ini. (Lir Zan 17:11, 15.) Zeova pe reponn sa lapriyer. Parey Zezi, annou pa zanmen doute ki nou Papa ki dan lesyel i kontan nou e i pou ed nou. Annou determinen pour kontinyen vin pli pros avek fanmir Zeova.