Bann ki donn Laglwar Bondye i ganny beni

“Zot pou prostern devan ou Zeova, e rann glwar ou non.” —Psonm 86:9.

 1. Akoz nou pli kapab donn Bondye laglwar ki bann kreasyon ki napa lavi?

ZEOVA i merite resevwar louanz sorti kot tou son kreasyon. Bann ki napa lavi i donn li laglwar an silans, tandis ki nou imen nou annan sa abilite pour rezonnen, konpran, apresye, e adore. Alors, se avek nou ki sa psalmis pe dir: “Kriye avek lazwa ver Bondye, tou dimoun lo later. Fer en melodi pour laglwar son non. Glorifye son louanz.”—Psonm 66:1, 2.

 2. Lekel ki’n reponn lapel pour donn laglwar non Bondye, e akoz?

² Laplipar dimoun pa oule rekonnet pozisyon Bondye oubyen donn li laglwar. Me dan 235 pei, plis ki sis milyon Temwen Zeova pe montre ki zot vwar “bann kalite envizib” Bondye atraver bann keksoz ki i’n fer e ki zot in tann sa temwannyaz silans ki kreasyon pe donnen. (Romen 1:20; Psonm 19:2, 3) Zot in osi arive konn Zeova e kontan li ler zot in etidye Labib. Psonm 86:9, 10 ti predir: “Tou nasyon ki ou’n fer pou vini, zot pou prostern devan ou Zeova, e rann glwar ou non. Akoz ou gran e ou pe fer bann keksoz merveye; zis ou tousel ki Bondye.”

 3. Ki mannyer sa “gran lafoul” i “ofer [Bondye] ladorasyon lizour konman aswar”?

³ Revelasyon 7:9, 15 i osi dekrir “en gran lafoul” adorater pe “ofer [Bondye] ladorasyon lizour konman aswar dan son tanp.” Sa pa vedir ki Bondye pe demann son bann serviter pour loue li lizour konman aswar. Me vi ki son bann serviter i ganny trouve partou lo later, kan i aswar dan serten pei, son bann serviter dan bann pei ki lizour i okipe dan predikasyon. Alors, nou kapab dir ki soley pa zanmen kous lo bann ki donn laglwar Zeova. Byento “tou sa ki respire” pou lev zot lavwa pour loue Zeova. (Psonm 150:6) Me antretan, ki nou personnelman nou kapab fer pour donn Bondye laglwar? Ki difikilte nou kapab rankontre? Ki benediksyon pe esper bann ki donn Bondye laglwar? Pour trouv larepons, annou egzamin en resi dan Labib konsernan en tribi Izrael, Gad.

En Problenm dan Letan lontan

 4. Ki problenm tribi Gad ti fer fas avek?

⁴ Avan antre dan Later Promiz, bann manm tribi Gad ti demande pour zot etabli zot dan en landrwa les avek larivyer Zourden. Sa ti en bon landrwa pour bef ganny manze. (Nonm 32:1-5) Me laba zot ti pou bezwen fer fas avek bann gro problenm. Bann tribi dan was larivyer Zourden ti pou ganny proteksyon avek Vale Zourden, ki ti en baryer natirel pour anpes bann atakan antre. (Zozye 3:13-17) Parkont, konsernan bann landrwa les avek Zourden, liv The Historical Geography of the Holy Land, par George Adam Smith, i dir: “[Zot] tou zot ti tale aplat lo gran plato Arabi, e ti napa okenn baryer pour anpes lezot antre. Se pour sa ki zot in toultan ekspoze avek latak bann nomad ki ti byen lafen. Serten ti anvair zot tou le zan pour ganny manze pour zot zannimo.”

 5. Konman Zakob ti ankouraz bann desandans Gad pour reazir kan zot ganny atake?

⁵ Ki mannyer tribi Gad ti fer fas avek sa presyon kontinyel? Plizyer syek avan, kan zot zanset Zakob ti pe al mor, i ti predir: “Gad li, en group voler pou atak li, me i pou atak sa bann deryer.” (Zenez 49:19) Premye kou, sa parol ti kapab paret dekourazan. Me an realite, i ti pe osi demann bann Gadit pour revanze. Zakob ti asir zot ki si zot fer sa, zot atakan ti pou ale byen onte e bann Gadit ti pou tay avek sa bann deryer.

Problenm ki nou rankontre dan nou Ladorasyon ozordi

 6, 7. Ki mannyer sitiasyon bann Kretyen denozour i parey sitiasyon tribi Gad?

⁶ Parey tribi Gad, bann Kretyen ozordi i ekspoze avek presyon ek fardo dan sa sistenm Satan. Zot bezwen lalit avek sa bann presyon akoz zot pa ganny proteze par kek mirak. (Zob 1:10-12) Pour bokou nou, i en presyon pour al lekol, ganny nou bouse manze, e elve nou zanfan. Nou osi annan bann problenm personnel oubyen bann problenm avek nou menm. Serten i bezwen siport “en pikan” dan zot laser, petet en maladi oubyen en dezabilite. (2 Korentyen 12:7-10, NW ) Lezot i soufer avek bann santiman ki zot pa vo nanryen. “Bann zour difisil” dan letan vyeyes i kapab anpes bann Kretyen aze servi Zeova avek sa lafors ki zot ti annan oparavan.—Eklezyast 12:1.

⁷ Zapot Pol i osi rapel nou ki nou “pe lit kont . . . bann pouvwar move lespri dan ler.” (Efezyen 6:12) Nou pe kontinyelman ganny ekspoze avek ‘lespri lemonn,’ setadir sa leta lespri rebel e imoral ki Satan ek son bann demon pe promote. (1 Korentyen 2:12; Efezyen 2:2, 3) Parey Lot ki ti annan lakrent pour Bondye, nou osi ozordi nou kapab byen sagrinen par bann keksoz imoral ki dimoun otour nou i dir e fer. (2 Pyer 2:7) Nou osi ekspoze avek latak direk Satan. Satan pe fer lager avek larestan Kretyen swazir, “ki obei konmannman Bondye e ki fidel avek temwanyaz Zezi.” (Revelasyon 12:17) ‘Lezot mouton’ Zezi i osi sibir latak Satan ki vin par restriksyon ek persekisyon.—Zan 10:16.

Pour abandonnen oubyen lite?

 8. Ki mannyer nou devret reazir anver latak Satan, e akoz?

⁸ Ki mannyer nou devret reazir anver latak Satan? Zis parey tribi Gad, nou bezwen montre nou for spirityelman e lite, parey Bondye in demann nou. I malere pour dir ki serten in konmans fatige avek sa presyon lavi e zot in negliz zot responsabilite spirityel. (Matye 13:20-22) En Temwen ti dir sa pour eksplike akoz lasistans renyon dan son kongregasyon ti ba: “Bann frer ek ser i vreman fatige. Zot in ganny ase avek sa presyon lavi.” I vre ki dimoun i annan bokou rezon pour zot fatige konmela. Alors, i fasil pour nou vwar ladorasyon Bondye konman en lot presyon, en lobligasyon ki vin en lour lo nou. Me eski sa i en bon fason vwar?

 9. Ki mannyer nou ganny repo kan nou aksepte zoug Zezi?

⁹ Get sa ki Zezi ti dir avek en lafoul dimoun dan son letan ki ti’n epwize akoz presyon lavi: “Vin kot mwan zot tou ki fatige e ki pe anmenn en fardo e mwan, mon a donn zot repo.” Eski Zezi ti dir nou pou ganny repo kan nou redwir nou servis ki nou donn Bondye? Okontrer, Zezi ti dir: “Pran mon zoug e aksepte mon legzanp akoz mon dou e mon annan limilite dan mon leker e zot a ganny repo.” En zoug i en bar dibwa oubyen metal ki ed en dimoun oubyen zannimo anmenn en pake lour. Alors, akoz en dimoun ti pou aksepte en tel zoug? Eski pa nou deza “pe anmenn en fardo”? Wi, me dan langaz Grek sa verse i kapab osi lir koumsa: “Vin avek mwan anba mon zoug.” Zis mazinen: Zezi pe ofer pour ed nou anmenn nou fardo! Nou pa bezwen fer li avek nou prop lafors.—Matye 9:36; 11:28, 29, not anba lo baz dan Traduction du monde nouveau; 2 Korentyen 4:7.

10. Ki i arive kan nou fer zefor pour donn Bondye laglwar?

¹⁰ Kan nou pran sa zoug ki Zezi i ofer son bann disip, nou pe lit kont Satan. Zak 4:7 i fer sa promes: “Reziste kont Dyab e i ava sov lwen avek zot.” Nou pa pe dir ki sa i en keksoz fasil pour fer. Servi Bondye i demann bokou zefor. (Lik 13:24) Me Labib i fer sa promes dan Psonm 126:5: “Sa ki senm avek larm pou kriye avek lazwa ler i rekolte.” Wi, nou pe ador en Bondye ki rekonesan. I “rekonpans tou bann ki rod li,” e i beni bann ki donn li laglwar.—Ebre 11:6.

Glorifye Bondye konman bann Predikater Rwayonm

11. Ki mannyer predikasyon i vin konman en defans kont latak Satan?

¹¹ Zezi ti donn sa lord: “Ale e fer tou pep vin mon bann disip.” Travay predikasyon i en mwayen prensipal pour nou ‘loue non Bondye par nou labous.’ (Matye 28:19; Ebre 13:15) “Met lentere pour anons levanzil konman en soulye dan zot lipye,” i form parti nou “lekipman batay,” nou defans kont latak Satan. (Efezyen 6:11-15) Loue Bondye dan predikasyon i en bon fason pour nouri nou lafwa. (2 Korentyen 4:13) I ede tir nou lespri lo bann panse negatif. (Filipyen 4:8) Partisip dan predikasyon i fer nou benefisye avek lasosyasyon nou bann frer ek ser, ki vreman ankourazan.

12, 13. Ki mannyer partisipasyon regilye dan predikasyon i benefisye lafanmiy? Donn en legzanp.

¹² Travay predikasyon i kapab osi vin en bon aktivite an fanmiy. Byensir, bann zenn i bezwen annan en letan pour detann. Me predikasyon an fanmiy pa neseserman bezwen vin en keksoz annwiyan pour zot. Paran i kapab fer li pli gou pour zanfan par form zot pour pli byen kapab koze dan predikasyon. Pa bann zanfan i kontan fer keksoz ki zot fer byen? Kan paran i ekilibre olye demann zanfan fer plis ki zot kapab fer, zot kapab ed zanfan trouv lazwa dan predikasyon.—Zenez 33:13, 14.

¹³ Deplis, en fanmiy ki loue Bondye ansanm i devlop en relasyon pros antre zot. Annou vwar legzanp en ser ki son mari enkrwayan ti abandonn li avek son senk zanfan. I ti bezwen antre dan lemonn travay e pran swen avek son zanfan lo plan materyel. Sa pa ti fasil pour li. Eski i ti sitan epwize ki i ti negliz bezwen spirityel son bann zanfan? I rapel: “Mon ti etidye Labib ek bann piblikasyon baze lo Labib seryezman e sey met an pratik sa ki mon lir. Mon ti anmenn mon zanfan renyon ek predikasyon regilyerman. Gras a mon bann zefor, ozordi tou le senk mon zanfan in batize.” Partisip plennman dan predikasyon i kapab ed ou osi dan ou zefor pour elve ou zanfan “dan en ledikasyon ek lenstriksyon Senyer.”—Efezyen 6:4.

14. (a) Ki mannyer bann zenn i kapab donn Bondye laglwar kot lekol? (b) Kwa ki kapab ed bann zenn pour pa “onte pour anons Levanzil”?

¹⁴ Zenn, si ou reste dan en pei kot lalwa i permet, eski ou donn Bondye laglwar par rann temwannyaz kot lekol, oubyen ou ezite akoz ou per reaksyon lezot? (Proverb 29:25) En Temwen aze 13 an ki reste Puerto Rico i ekrir: “Mon pa’n zanmen kanmi pour prese kot lekol akoz mon konnen ki sa i laverite. Toultan mon lev mon lanmen dan laklas e dir ki mon’n aprann dan Labib. Kan mon napa laklas, mon al dan bibliotek e lir mon liv Les jeunes s’interrogent.”a Eski Zeova in beni son zefor? I dir: “Parfwa bann manrmay dan mon laklas i demann mwan kestyon e menm demann mwan enn sa liv.” Si ou ezite pour koz avek lezot, petet ou bezwen prouve avek ou lekor ‘kwa ki bon e fer plezir Bondye’ par etidye Labib seryezman. (Romen 12:2) Ler ou konvenki ki sa ki ou’n aprann i laverite, ou pa pou zanmen “onte pour anons Levanzil.”—Romen 1:16.

“Laport in ouver” pour diferan Servis

15, 16. Ki “gran laport” serten Kretyen in antre pour fer plis aktivite, e ki benediksyon zot in gannyen?

¹⁵ Zapot Pol ti ekri ki ‘en gran laport in ouver pour li fer en gran travay.’ (1 Korentyen 16:9) Eski ou sitiasyon i permet ou antre dan en laport pour plis aktivite? Par egzanp, servis pionye ordiner oubyen asistan i demann 70 oubyen 50 er-d-tan dan predikasyon tou le mwan. Normalman, bann frer ek ser i kontan bann pionye akoz zot servis fidel. Me lefe ki zot pas plis letan dan predikasyon pa fer zot santi zot pli siperyer ki lezot frer ek ser. Okontrer zot devlop sa kalite latitid ki Zezi ti ankouraze: “Nou senpleman en bann serviter initil; nou’n zis fer nou devwar.”—Lik 17:10.

¹⁶ Pour fer pionye, nou bezwen annan disiplin lo nou lekor, byen organize, e pare pour fer sakrifis. Me benediksyon ki nou gannyen i fer li vo lapenn. En zenn pionye ki apel Tamika i dir: “Konn anons byen Parol Bondye i vreman en benediksyon.” “Kan ou en pionye, ou servi Labib en kantite. Aprezan, mon kapab mazin en teks Labib ki apropriye pour sak dimoun ki mon rankontre kot lakour.” (2 Timote 2:15) En pionye ki apel Mica i dir: “En lot benediksyon enkrwayab se pour vwar konman laverite i sanz lavi dimoun.” En zenn ki apel Matthew i osi koz lo lazwa ki i gannyen kan i “vwar en dimoun vin dan laverite. Napa okenn lazwa ki kapab ranplas sa.”

17. Ki mannyer en Kretyen ti sirmont bann santiman negatif lo servis pionye?

¹⁷ Eski ou kapab reflesir lo pran servis pionye? Petet ou ti a kontan fer li me ou pa santi ou kapab fer li. En zenn ser ki apel Kenyatte i dir: “Mon ti annan bann santiman negatif lo pionye. Mon pa ti santi ki mon kapab fer li. Mon pa ti konnen konman pour prepar mon lentrodiksyon oubyen rezonn avek dimoun an servan Labib.” Me bann ansyen ti fer en ser pionye matir travay avek li. Kenyatte i rapel: “Ti gou travay avek li. Sa ti fer mwan anvi fer pionye.” Petet ou osi ou pou anvi fer pionye apre en pti lankourazman ek formasyon.

18. Ki benediksyon bann ki antre dan servis misyonner i kapab gannyen?

¹⁸ Pionye i kapab ouver laport pour lezot loportinite pour servi Zeova. Par egzanp, serten koup marye i kapab kalifye pour ganny formen konman misyonner pour al pres dan en lot pei. Bann misyonner i bezwen adapte avek en nouvo pei, petet en nouvo langaz, en nouvo kiltir, ek en lot kalite manze. Me sa bann lenkonvenyans pa nanryen konpare avek benediksyon ki zot gannyen. Mildred, en misyonner an Meksiko ki annan bokou leksperyans, i dir: “Mon pa’n zanmen regret mon desizyon pour vin en misyonner. Sa ti mon dezir depi mon ti ankor en pti tantin.” Ki benediksyon i’n gannyen? “Dan mon pei ti difisil pour ganny en dimoun ki anvi etidye Labib. Isi, mon’n ganny akoud kat letid ki pe konmans prese anmenmtan!”

19, 20. Konman bann dan servis Betel, servis enternasyonal, ek Lekol Formasyon Ministeryel in ganny serten benediksyon?

¹⁹ Bann dan servis Betel kot biro brans Temwen Zeova i osi ganny bokou benediksyon. Sven, en zenn frer ki pe servi Lalmanny, i dir sa lo son travay Betel: “Mon santi mon pe fer en keksoz ki annan en gran valer. Mon ti’n kapab servi mon skil dan sa lemonn. Me i ti pou parey mon pe depoz larzan dan en labank ki pe al faid.” I vre i demann sakrifis pour servi konman en volonter ki pa ganny peye. Me Sven i dir: “Kan ou rantre kot ou, ou konnen ki tou sa ki ou’n fer ozordi ti pour Zeova. Sa i donn ou en santiman ‘enkrwayab.’ ”

²⁰ Serten frer in ganny beni dan servis enternasyonal, kot zot travay dan konstriksyon bann biro brans dan bann pei etranze. En koup ki’n servi dan wit diferan pei, ti ekrir: “Bann frer ek ser isi i vreman agreab. Nou leker pou fer mal kan nou pou ale. I a fer wityenm fwa ki nou leker i fer mal koumsa. Nou’n vreman ganny en leksperyans enkrwayab!” Apre i annan Lekol Formasyon Ministeryel. I donn en formasyon spirityel bann frer kalifye ki selibater. En frer ki’n ganny sa formasyon ti ekrir: “Pa fasil pour trouv mo pour remersye zot pour sa lekol manifik. Ki sa lot lorganizasyon ki ti pou fer sitan bokou zefor pour donn sa formasyon?”

21. Ki defi ki tou Kretyen i fer fas avek dan zot servis pour Bondye?

²¹ Wi, i annan bokou laport ki ouver pour diferan servis. I vre ki laplipar nou pa kapab servi dan Betel oubyen dan en lot pei. Zezi li menm ti rekonnet ki sak Kretyen ti pou prodwir diferan kantite “fri” akoz zot sitiasyon i diferan. (Matye 13:23) Alors, nou defi konman Kretyen se pour fer otan ki nou sitiasyon i permet dan servis Zeova. Kan nou fer sa, nou pe donn Bondye laglwar e nou kapab asire ki i byen kontan vwar sa. Pran legzanp Ethel, en ser aze ki reste dan en lenstitisyon pour bann dimoun aze. I temwanny regilyerman avek lezot rezidan laba e fer temwannyaz par telefonn. Malgre son leta fizik, i donn tou sa ki i annan dan son servis.—Matye 22:37.

22. (a) Ki lezot fason ki nou kapab donn Bondye laglwar? (b) Ki sa letan merveye ki pe esper nou?

²² Parkont, pa bliye ki prese i zis en fason ki nou donn laglwar Zeova. Letan nou donn en bon legzanp dan nou kondwit ek nou laparans fizik dan travay, kot lekol, oubyen dan lakour, nou fer Zeova kontan. (Proverb 27:11) Proverb 28:20 i promet: “En zonm fidel pou ganny bokou benediksyon.” Alors, nou devret “senm bokou” dan nou servis pour Bondye, akoz nou konnen ki nou pou rekolte bokou benediksyon. (2 Korentyen 9:6) Ler nou fer sa, nou pou ganny sa loportinite pour viv sa letan merveye kot “tou sa ki respire” pou donn Zeova sa laglwar ki i vreman merite!—Psonm 150:6.

[Not anba lo paz]

Eski ou rapel?

• Konman pep Bondye i servi li “lizour konman aswar”?

• Ki problenm tribi Gad ti fer fas avek, e ki sa i ansenny bann Kretyen denozour?

• Ki mannyer predikasyon i vin konman en proteksyon kont latak Satan?

• Par ki ‘laport ouver’ serten in antre, e ki benediksyon zot in gannyen?

[Portre lo paz 31]

Servis pionye i kapab ouver laport pour lezot privilez parey:

1. Servis enternasyonal

2. Servis Betel

3. Servis misyonner