Zezi i reprimann bann Farizyen

Vi ki bann profeser lalwa ek bann Farizyen pa oule aksepte ki Zezi i servi pouvwar Bondye pour sas demon, i posib ki zot koz kont lespri sen. Alor ki kote zot pou pran, Bondye oubyen Satan? Zezi i dir: “Si ou annan en bon pye fri, ou pou ganny bann bon fri me si ou annan en pye fri ki pa bon, son fri osi pa pou bon parski ou rekonnet en pye par son fri.”​—Matye 12:33.

Sas demon i parey en bon fri, alor i bet pour sa bann dimoun dir ki Zezi pe fer sa bann mirak akoz i servi Satan. Parey Zezi ti fer resorti dan Sermon lo Montanny, si fri i bon, sa pye fri osi i bezwen bon, i pa kapab pa bon. Bann Farizyen pe fer fo lakizasyon kont Zezi, ki kalite fri sa i ete? Pa sa bann fri pa bon! Zezi i dir zot: “Bann piti serpan, zot ki move, ki mannyer zot kapab dir bann bon keksoz? Parski labous i koz sa ki deborde dan leker.”​—Matye 7:16, 17; 12:34.

I kler ki sa ki nou dir i montre sa ki nou annan dan nou leker e nou ganny zize dapre sa. Alor Zezi i dir: “Mon dir zot ki dimoun pou bezwen rann kont Zour Zizman pour tou parol initil ki zot dir, parski si zot dir bann bon keksoz zot pou ganny aprouve konman drwat, me si zot dir bann move keksoz zot pou ganny kondannen.”​—Matye 12:36, 37.

Malgre tou sa bann mirak ki Zezi pe fer, bann profeser lalwa ek bann Farizyen i anvi plis levidans, zot dir: “Ansenyan, nou anvi vwar en siny ki montre ki Bondye ki’n anvoy ou.” Menm si zot pa’n vwar Zezi pe fer sa bann mirak avek zot prop lizye, i annan en kantite dimoun ki’n vwar e ki pe koz lo la. I pour sa rezon ki Zezi i kapab dir sa bann sef Zwif: “En zenerasyon move e enfidel pe kontinyen rod en siny, me i pa pou vwar okenn siny eksepte siny profet Zonas.”​—Matye 12:38, 39.

Zezi i eksplike ki sa i vedir: “Zis parey Zonas ti dan vant sa gro pwason pour trwa zour ek trwa lannwit, Garson zonm pou dan vant later pour trwa zour ek trwa lannwit.” Zonas ti ganny anvale par en gro pwason e apre i ti sorti dan vant sa pwason konmsi i ti’n ganny resisite. Alor Zezi i predir ki i pou mor e resisite trwazyenm zour. Pli tar, ler sa i arive, bann sef Zwif pa pou aksepte “siny profet Zonas” akoz zot refize repantir e sanze. (Matye 27:63-66; 28:12-15) De lot kote, “bann dimoun Niniv” ti repantir ler Zonas ti pres avek zot. Alor zot pou kondann sa zenerasyon. Zezi i osi dir ki par son legzanp, larenn Seba pou kondann zot. I ti deside pour ekout lasazes Salomon e i ti enpresyonnen. Zezi i dir ki aprezan “i annan enn ki pli enportan ki Salomon.”​—Matye 12:40-42.

Zezi i konpar sityasyon sa move zenerasyon avek en zonm ki en demon in sorti dan li. (Matye 12:45) Vi ki sa zonm pa ranpli sa lespas vid avek bann bon keksoz, sa demon i retournen avek set lezot ki pli move ki li e zot antre dan sa zonm. Pareyman, nasyon Izrael ti’n ganny pirifye e retabli, en pe parey sa zonm ki sa demon ti’n sorti dan li. Me sa nasyon ti rezet bann profet Bondye, ziska finalman zot in menm rezet Zezi ki klerman annan lespri sen Bondye. Sa i montre ki kondisyon sa nasyon i pli pir ki o konmansman.

Anmezir ki Zezi pe koze, son manman ek son bann frer i arive e zot debout pre avek lafoul. Serten dimoun ki pe asiz pros avek Zezi i dir li: “Ou manman ek ou bann frer pe debout deor, zot anvi vwar ou.” Apre sa, Zezi i montre ki kantite i pros avek son bann disip ki parey bann vre frer, ser ek manman pour li. I montre ledwa lo son bann disip e dir: “Mon manman ek mon bann frer i sa bann ki ekout parol Bondye e met li an pratik.” (Lik 8:20, 21) Alor i montre ki menm si son relasyon avek son fanmir i enportan pour li, son relasyon avek son bann disip i annan plis valer. Nou osi nou apresye sa relasyon ki nou annan avek nou bann frer ek ser spirityel, sirtou ler lezot i kritik nou oubyen kritik nou travay e persekit nou. Pa sa i ankourazan!