Devlop Tenm

BANN orater eksperyanse i konnen ki valer en tenm i annan. Ler zot pe prepar en diskour, sa tenm i ed zot pour fikse latansyon lo en laspe spesifik sa lenformasyon e pour reflesir pli oprofon lo la. Son rezilta se ki olye abord an bref bokou pwen, zot devlop zot lenformasyon dan en fason ki anmenn plis benefis pour zot lodyans. Ler sak pwen prensipal i direkteman ganny konnekte avek sa tenm e anmenmtan kontribye pour devlop sa tenm, sa osi i ed lodyans pour rapel sa bann pwen e pour byen konpran zot lenportans.

I vre ki ou tenm i kapab sa topik ki ou koz lo la, me si ou pran sa tenm konman en serten laspe partikilye sa topik ki ou pe devlope, ou pou vwar ki kalite ou diskour pou amelyore. Rwayonm, Labib, ek rezireksyon i bann topik zeneral. Plizyer diferan tenm i kapab ganny devlope lo sa bann topik. La detrwa legzanp: “Rwayonm, en vre Gouvernman,” “Rwayonm Bondye pou fer later en Paradi,” “Labib i enspire par Bondye,” “Labib i en Gid pratik pour nou Letan,” “Rezireksyon i ofer Lespwar pour bann ki dan latristes,” “Lespwar rezireksyon i ed nou pour reste ferm dan Persekisyon.” Tou sa bann tenm i bezwen ganny devlope dan fason ki totalman diferan.

An akor avek sa tenm dominan dan Labib, predikasyon ki Zezi Kri ti fer pandan son minister lo later ti fer resorti sa tenm: “Rwayonm Lesyel i pros!” (Mat. 4:17) Konman sa tenm ti ganny devlope? Plis ki 110 fwa dan sa kat Levanzil, referans i ganny fer avek sa Rwayonm. Me Zezi pa ti zis servi sa term “rwayonm” plizyer fwa. Par sa ki i ti ansennyen e par bann mirak ki i ti fer, Zezi ti demontre klerman ki li, sa enn ki ti prezan, ti Garson Bondye, sa Mesi, sa enn aki Zeova ti pou donn sa Rwayonm. Zezi ti osi montre ki atraver li semen ti pe ganny ouver pour lezot partisip dan sa Rwayonm. I ti idantifye bann kalite ki devret ganny demontre par sa bann ki ti pou resevwar sa privilez. Par son lansennyman ek bann mirak ki i ti fer, i ti fer kler ki sinifikasyon Rwayonm Bondye pou annan dan lavi bann dimoun e ti endike ki par son aksyon pour sas bann demon par mwayen lespri Bondye ti levidans ki “Rwayonm Bondye in arive parmi zot.” (Lik 11:20) Se sa menm Rwayonm ki Zezi ti ordonn son bann disip pour rann temwannyaz lo la.—Mat. 10:7; 24:14.

Servi en Tenm apropriye. Ou pa pe ganny demande pour devlop en tenm lo menm degre ki Labib in fer, me toudmenm en tenm apropriye i byen enportan.

Si ou ki swazir tenm, konsider premyerman lobzektif ou prezantasyon. Apre, ler ou swazir bann pwen prensipal ki pou konpoz ou plan, fer sir ki sa bann pwen i vreman siport sa tenm ki ou’n swazir.

Si ou’n ganny dezinyen en tenm, analiz li byen pour vwar ki mannyer ki ou lenformasyon i devret ganny devlope. Serten zefor i kapab neseser pour byen apresye valer ek potansyel en tel tenm. Si ou ki bezwen swazir lenformasyon pour devlop sa tenm ki ou’n gannyen, swazir byen ki ler ou devlop ou lenformasyon, sa tenm pou evidan. Lo lot kote, si lenformasyon i ganny fourni, la osi ou pou bezwen analize konman pour armoniz sa lenformasyon avek sa tenm. Ou bezwen osi konsider akoz sa lenformasyon i enportan pour ou lodyans e ki devret ou lobzektif ler pe prezant sa ekspoze. Sa pou ed ou determin kwa ki ou pou aksantye dan ou prezantasyon.

Konman pour aksantye sa Tenm. Pour ou arive aksantye byen sa tenm, ou devret etablir sa baz ler ou pe swazir e organiz ou lenformasyon. Si ou servi selman lenformasyon ki siport ou tenm e si ou swiv bann prensip ki enplike dan prepar en bon plan, i preski otomatik ki ou pou aksantye sa tenm.

Repetisyon i kapab ede pour ranforsi sa tenm. Dan lanmizik klasik, en tenm i en melodi ki ganny repete ase souvan pour karakteriz sa morso lanmizik antye. Sa melodi i pa toultan ganny repete dan menm form. Parler zis enn oubyen de fraz i aparet, souvan en varyasyon lo sa tenm i ganny servi, me dan en fason oubyen en lot, avek konpetans sa konpoziter i entrodwir plizyer fwa son melodi toudilon sa morso ziska ki i annan en lefe lo sa konpozisyon an antye. Se sa fason ki devret ete avek tenm en diskour. Repetisyon bann mo enportan dan sa tenm i parey sa melodi ki resorti plizyer fwa dan en konpozisyon mizikal. Bann sinonim sa bann mo oubyen dir sa tenm dan en fason diferan i ede pour varye sa tenm. Ler ou servi sa bann mwayen sa pou fer sa tenm vin panse prensipal ki ou lodyans pou rapel.

Sa bann prensip pa zis aplik avek bann ekspoze lo lestrad me osi dan diskisyon dan predikasyon. En konversasyon ase bref i vin pli memorab si en tenm i evidan. Lenstriksyon dan en letid Labib pou pli fasilman ganny rapel si en tenm in ganny aksantye. Sa zefor ki ou mete pour swazir e devlop bann tenm konvenab pou kontribye bokou pour ogmant ou lefikasite konman en orater ek en ansennyan Parol Bondye.