Zezi i geri en pti fiy ek en zonm sourd

Apre ki Zezi in kondann bann Farizyen akoz zot swiv bann tradisyon ki dan zot lavantaz, li ek son bann disip i kit sa landrwa. I al Tir ek Sidon, dan rezyon Fenisi ki plizyer kilomet dan nor was.

Zezi i trouv en lakaz pour zot reste me i pa oule ki personn i konnen ki i laba. Pourtan, menm dan sa landrwa i enposib pour dimoun pa vwar li. En madanm Grek, ki’n ne dan sa landrwa, i al kot Zezi e i konmans sipliy li: “Pran pitye pour mwan, Senyer, Garson David. Mon fiy pe soufer en kantite akoz i posede par en demon.”​—Matye 15:22; Mark 7:26.

Apre en serten letan, bann disip Zezi i dir li: “Fer li ale, parski i kontinyen kriye la deryer nou.” Zezi i eksplike akoz i pe inyor sa madanm: “Mon pa’n ganny anvoye kot personn eksepte kot bann mouton perdi pep Izrael.” Me sa madanm pa arete. I tonm azenou devan Zezi e i sipliy li: “Senyer, ed mwan!”​—Matye 15:23-25.

Aparaman pour teste son lafwa, Zezi i koz parey bann Zwif ki annan en move pwennvi lo dimoun sorti dan lezot nasyon. I dir: “I pa byen pour pran dipen bann zanfan e zet avek bann pti lisyen.” (Matye 15:26) Zezi i servi sa lekspresyon “pti lisyen” pour montre ki i annan konpasyon pour bann dimoun ki pa Zwif. Son ton lavwa ek son figir i bezwen montre ki Zezi i annan konpasyon.

Olye ofanse, avek limilite sa madanm i servi sa ki Zezi fek dir konsernan prezidis ki bann Zwif i annan pour reponn: “Wi, Senyer, me selman bann pti lisyen i manz bann pti bout dipen ki tonm anba latab zot met.” Zezi i vwar ki i annan en bon leker e i dir: “Ou annan en gran lafwa madanm! Ki sa ki ou’n demande i arive.” (Matye 15:27, 28) Sanmenm sa ki arive, menm si sa fiy pa la! Ler sa madanm i retourn kot li, i vwar son fiy pe alonze lo lili. I’n ganny konpletman geri, ‘sa demon in fini sorti dan li’!​—Mark 7:30.

Zezi ek son bann disip i kit rezyon Fenisi, zot travers pei e al dan rezyon Larivyer Zourden, dan nor. I paret ki zot travers Zourden kekpar dan nor Lanmer Galile e zot al dan rezyon Dekapol. Ler zot ariv laba, zot al lo en montanny me lafoul dimoun i vwar zot. Zot anmenn bann dimoun ki pe bwete, bann envalid, aveg ek kozpa kot Zezi e i geri zot. Bann dimoun i etonnen ler zot vwar sa e zot konmans glorifye Bondye Izrael.

Zezi i donn en latansyon spesyal en zonm sourd ki pa kapab koz byen. Zis mazinen ki mannyer sa zonm i kapab santi dan en gran lafoul. Petet Zezi i realize ki sa zonm i per, alor i anmenn li a lekar lwen avek lafoul. Ler zot tousel, Zezi i fer bann siny pour li konnen ki i pe al fer. I met son ledwa dan zorey sa zonm e apre ki i’n krase i tous lalang sa zonm. Apre, i get dan lesyel e i dir “‘Efata,’ setadir ‘Ouver.’” Sa i fer ki sa zonm i kapab tande e i kapab koz byen. Zezi pa oule ki sa i ganny anonse an piblik, i prefere ki bann dimoun i met lafwa dan li dapre sa ki zot in vwar e tande.​—Mark 7:32-36.

Ler bann dimoun i vwar pwisans Zezi pour fer sa bann gerizon, sa i annan en gro lefe lo zot, ‘zot vreman etonnen.’ Zot dir: “I’n fer tou keksoz byen e i menm fer bann sourd tande e bann kozpa koze.”​—Mark 7:37.