“Personn pa’n zanmen deza koz parey sa Zonm”

“Tou dimoun ti felisit Zezi e zot ti dan ladmirasyon devan bann parol ekstraordiner ki ti sorti dan son labous.”​—LIK 4:22.

 1, 2. (a) Akoz bann zofisye ki ti ganny anvoye pour aret Zezi ti retourn lanmen vid? (b) Kwa ki montre ki pa zis sa bann zofisye ki ti enpresyonnen par lansennyman Zezi?

BANN zofisye pa ti arive akonpli zot misyon. Zot ti’n ganny anvoye pour aret Zezi Kri, me zot ti retourn lanmen vid. Bann pret an sef ek bann Farizyen ti demann en leksplikasyon pour sa: “Akoz zot pa’n anmenn li?” Anfet, akoz sa bann zofisye pa ti atrap en zonm ki pa ti pou reziste zot? Bann zofisye ti eksplike: “Personn pa’n zanmen deza koz parey sa zonm.” Zot ti sitan enpresyonnen par lansennyman Zezi ki zot pa ti kapab aret sa zonm kalm.a​—Zan 7:32, 45, 46.

² Pa zis sa bann zofisye ki ti enpresyonnen par lansennyman Zezi. Labib i dir nou ki dimoun ti vini an gran nonm zis pour ekout li kot pe koze. Bann dimoun dan lavil kot i ti grandi ti enpresyonnen par “bann parol ekstraordiner ki ti sorti dan son labous.” (Lik 4:22) Annannler i ti reste dan kannot e koz avek lafoul ki ti’n ralye lo lans Lanmer Galile. (Mark 3:9; 4:1; Lik 5:1-3) En fwa, “en gran lafoul” ti reste avek li pour detrwa zour san manze.—Mark 8:1, 2.

 3. Donn rezon prensipal akoz Zezi ti en ansennyan sitan remarkab.

³ Kwa ki ti fer Zezi en ansennyan remarkab? Rezon prensipal se lanmour. Zezi li menm ti kontan sa bann laverite ki i ti pe pas avek lezot, e i ti kontan bann dimoun ki i ti pe ansennyen. Me Zezi ti osi annan en abilite ekstraordiner pour ansenny dan bann fason efikas. Dan sa bann lartik ki aparet dan sa nimero Latour Veyer, nou pou diskit serten metod efikas ki i ti servi e vwar konman nou kapab imit zot.

Senp e kler

 4, 5. (a) Akoz Zezi ti koz dan en fason kler letan i ti ansennyen, e akoz sa i remarkab? (b) Konman ki sa Sermon lo montanny i en legzanp ki montre ki Zezi ti ansenny dan en fason senp?

⁴ Souvan bann dimoun byen edike i servi bann mo ki zot lodyans pa konpran. Me si nou koz dan en fason ki lezot pa konpran, ki mannyer zot kapab benefisye avek nou konnesans? Konman en ansennyan, Zezi pa ti zanmen koz dan en fason ki lezot pa ti konpran. Mazin sa kantite vokabiler ki i ti’n kapab servi. Pourtan, kantmenm i ti annan en sitan gran konnesans, i pa ti mazin zis li menm, me i ti mazin son lodyans. I ti konnen ki bokou zot ti “bann zonm senp san gran ledikasyon.” (Akt 4:13) Pour kapab tous zot, i ti servi en langaz ki sa bann dimoun ti pou kapab konpran. I ti servi bann mo senp me sa laverite ki zot ti transmet ti profon.

⁵ Pran par egzanp, sa Sermon lo montanny ki’n ganny rikorde dan Matye 5:3–7:27. I ti’n kapab pran Zezi zis 20 minit pour delivre sa sermon. Pourtan, son bann lansennyman i profon, i tret sours bann problenm parey adilter, divors, ek fason ki nou konsider bann keksoz materyel. (Matye 5:27-32; 6:19-34) Kantmenm sa, i napa okenn lekspresyon konplike oubyen enpresyonan. Anfet, apenn si i annan en mo ki menm en zanfan pa ti pou kapab konpran! I pa sirprenan alor ki ler i ti fini, lafoul​—ki petet ti enkli bokou fermye, berze, ek peser​—“ti byen etonnen par mannyer ki i ti ansennyen”!—Matye 7:28.

 6. Donn en legzanp pour montre konman Zezi ti servi bann proverb ki ti senp me ki ti fer bokou sans.

⁶ Souvan an servan bann fraz kler e kourt, Zezi ti dir bann proverb ki ti senp me ki ti fer bokou sans. Dan sa lepok kot liv pa ti ankor konmans ganny enprimen, i ti enprim son mesaz dan lespri ek leker bann dimoun ki ti ekout li dan en fason ki zot pa ti pou zanmen oubliye. La detrwa legzanp: “Personn pa kapab servi de met; . . . ou pa kapab servi Bondye ek larises an menm-tan.” “Pa zize e ou pa ava ganny zize.” “Alor zot a ganny rekonnet par zot fri.” “Dimoun ki an bonn sante pa bezwen dokter, me zis bann ki malad.” “Tou sa ki servi lepe pou mor par lepe.” “Rann Sezar sa ki pour Sezar, e Bondye sa ki pour Bondye.” “I annan plis lazwa pour donnen ki pour resevwar.”b (Matye 6:24; 7:1, 20; 9:12; 26:52; Mark 12:17; Akt 20:35) Ziska ozordi, preski 2,000 an apre ki Zezi ti pronons sa bann proverb pwisan, zot kapab fasilman vin dan lespri.

Servi Kestyon

 7. Akoz Zezi ti demann kestyon?

⁷ Fason ki Zezi ti servi kestyon i remarkab. Souvan i ti fer sa menm si i ti pou’n kout li bokou mwens letan zis pour dir son lodyans pwen ki i oule fer resorti. Alor, akoz i ti demann kestyon? Parler i ti servi kestyon profon pour ekspoz motivasyon son bann lennmi, e sa ti fer zot ferm zot labous. (Matye 12:24-30; 21:23-27; 22:41-46) Me laplipar-di-tan, Zezi ti pran letan pour demann kestyon pour kapab kominik laverite, pour fer bann ki pe ekout li eksprim zot, e pour ankouraz e ansenny son bann disip pour reflesir. Annou egzamin de legzanp, tou le de ka i enplik zapot Pyer.

 8, 9. Konman Zezi ti servi kestyon pour ed Pyer tir en bon konklizyon konsernan pey taks tanp?

⁸ Premyerman, mazin sa lokazyon letan bann kolekter taks ti demann Pyer si Zezi ti pey taks tanp.c Pyer, en dimoun ki parler azir vitman, ti reponn, “Wi i peye.” Me en pti pe letan plitar, Zezi ti rezonn avek li: “ ‘Ki ou mazinen Simon, bann lerwa later i fer lekel pey taks, bann [garson, NW ] oubyen bann etranze?’ Pyer ti reponn, “Bann etranze.” Zezi ti dir, ‘Byen alor bann garson i lib.’ ” (Matye 17:24-27) Pwen ki Zezi ti oule fer resorti ti devret evidan pour Pyer. Akoz sa?

⁹ Dan letan Zezi, fanmiy bann gran dirizan pa ti bezwen pey taks. Alor, vi ki Zezi ti sel Garson sa Lerwa seles ki zot ti adore dan tanp, zot pa ti devret ekspekte li pour pey taks. Remarke ki olye zis dir Pyer larepons, Zezi ti servi kestyon dan en fason efikas me zantiman, pour ed Pyer tir en bon konklizyon—e petet vwar nesesite pour byen reflesir avan i koze.

10, 11. Ki mannyer Zezi ti reazir kan Pyer ti koup zorey en zonm zour Lapak lannen 33 N.L., e konman sa i montre ki Zezi ti apresye valer servi kestyon?

¹⁰ Dezyenm legzanp i konsernan en lensidan ki ti arive son aswar zour Lapak lannen 33 N.L. kan en lafoul ti vin aret Zezi. Bann disip ti demann Zezi si zot ava lager pour defann li. (Lik 22:49) San esper larepons, Pyer ti koup zorey en zonm avek en lepe (menm si Pyer ti paret annan lentansyon pour fer plis dimal ki sa). Pyer ti azir dan en mannyer ki ti kontrer avek lavolonte son met, akoz Zezi ti’n byen prepar li pour donn son lekor. Konman Zezi ti reazir? Avek pasyans parey labitid, i ti demann Pyer trwa kestyon: “Eski ou mazinen mon pa pou bwar lakoup ki mon Papa in donn mwan?” “Zot pa konnen ki mon kapab demann mon Papa led, e deswit i a anvoy mwan plis ki douz larme lanz? Alor, ki mannyer lekritir ki dir ki sa i devre pas koumsa, pou ganny akonpli?”​—Zan 18:11; Matye 26:52-54.

¹¹ Reflesir en pe lo sa resi. Zezi ki ti antoure par en lafoul ankoler, ti konnen ki son lanmor ti pros pour arive e ki repitasyon son Papa ek delivrans lafanmiy imen ti repoz lo li. Pourtan, i ti pran letan sa moman menm pour fer Pyer konpran serten laverite an servan kestyon. Eski pa i kler ki Zezi ti konpran valer demann kestyon?

Met Lanfaz

12, 13. (a) Ki lot metod lansennyman Zezi ti souvan servi? (b) Konman Zezi ti servi sa metod lansennyman pour aksantye ki i bet pour kritik bann pti defo ki nou frer i kapab annan?

¹² Dan son minister, Zezi ti souvan servi en lot metod lansennyman ki efikas​—i ti egzazer keksoz. I ti fer sa par ekspre pour met lanfaz lo en keksoz. Par egzazere, Zezi ti kree bann portre dan lespri dimoun ki ti difisil pour zot oubliye. Annou egzamin ennde legzanp.

¹³ Letan Zezi ti pe met lanfaz lo nesesite pour ‘pa ziz’ lezot dan son Sermon lo montanny, i ti dir: “Ki mannyer ou war lapay ki dan lizye ou frer me ou pa remark poto ki dan sa ki pour ou?” (Matye 7:1-3) Eski ou kapab imazin sa senn? En dimoun ki annan tandans pour kritike i ofer pour tir en senp lapay dan “lizye” son frer. Dapre li, son frer pa kapab vwar keksoz byen afen ki i kapab fer en bon zizman. Me son prop abilite pour zize in ganny afekte par en “poto”​—en ronden oubyen pilye ki kapab ganny servi pour siport en twa. En fason vreman inoubliyab pour aksantye konman i bet pour kritik bann pti defo nou frer kan nou nou kapab annan bann pli gro defo!

14. Akoz sa ki Zezi ti dir konsernan pas bwar pour tir en bigay me anval en samo i en egzazerasyon ki pwisan?

¹⁴ En lot lokazyon, Zezi ti akiz bann Farizyen konman ‘bann gid aveg, ki pas zot bwar pour tir en bigay, me zot anval en samo.’ (Matye 23:24) Sa i en bon legzanp kot i ti met lanfaz par egzazer en sitiasyon. Akoz? Sa konparezon ant en pti bigay ek en samo, ki ti enn bann pli gro zannimo ki bann oditer Zezi ti konnen, ti enpresyonan. I’n ganny estimen ki i pou pran apepre 70 milyon bigay pour fer lapeze en samo groser normal! Deplis, Zezi ti konnen ki bann Farizyen ti servi en sifon pour pas zot diven ladan. Sa bann Farizyen ki ti ensiste lo tou pti detay lalwa, ti fer sa pour evite anval en bigay e alor vin enpir dapre lalwa. Pourtan, dan en sans senbolik, zot ti anval en samo, ki ti osi enpir. (Levitik 11:4, 21-24) Pwen Zezi ti kler. Bann Farizyen ti pran prekosyon pour swiv bann pli pti lareg dan Lalwa, me zot ti negliz bann keksoz pli enportan​—“lazistis, konpasyon, ek fidelite.” (Matye 23:23) Zezi ti klerman montre zot ki zot ete vreman!

15. Ki bann leson Zezi ti ansennyen par egzazer en keksoz.

¹⁵ Zezi ti souvan servi egzazerasyon dan son minister. Annou vwar ennde legzanp. “Lafwa groser en [pti] lagrenn moutard” i kapab sanz plas en montanny. Ki pli bon fason pour Zezi aksantye ki menm en pti gin lafwa i kapab akonpli bokou! (Matye 17:20) En gro samo pe sey antre dan trou en zegwiy. Pa sa i byen montre difikilte ki en dimoun ris i gannyen kan i pe sey servi Bondye e anmenmtan reste atase avek en stil lavi materyalis! (Matye 19:24) Eski ou pa etonnen pour vwar konman Zezi ti servi bann konparezon vivan e konman i ti annan en gran abilite pour fer maksimonm lefe avek en pti gin mo?

Rezonnman Lozik

16. Dan ki fason Zezi ti toultan servi son gran fakilte mantal?

¹⁶ Vi ki Zezi ti annan en lespri parfe, i ti vreman en eksper dan rezonn avek dimoun. Pourtan, i pa ti zanmen mal servi son abilite. Dan son lansennyman, i ti touzour servi son gran fakilte mantal pour promot laverite. Parfwa, i ti servi bann rezonnman lozik pwisan pour demanti bann fo lakizasyon ki son bann adverser relizye ti fer. Dan plizyer ka, i ti servi rezonnman lozik pour ansenny son bann disip bann leson enportan. Annou vwar abilite ekselan Zezi pour servi rezonnman lozik.

17, 18. Ki rezonnman lozik pwisan Zezi ti servi pour demanti en fo lakizasyon ki bann Farizyen ti fer?

¹⁷ Mazin sa lokazyon kot Zezi ti geri en zonm posede par demon, ki ti aveg e kozpa. Ler bann Farizyen ti antann sa, zot ti dir: “Sa zonm i sas demon avek pouvwar sef demon, Belzebil [Satan].” Remarke ki bann Farizyen ti admet ki pour sas bann demon Satan, i ti a neseser annan en pouvwar pli siperyer ki pour imen. Me pour anpes bann dimoun krwar dan Zezi, zot ti dir ki son pouvwar i sorti kot Satan. Pour montre ki zot pa ti’n reflesir byen lo zot largiman, Zezi ti reponn: “Tou rwayonm kot zabitan i fer lager antre zot i fini par ganny detri. Tou lavil oubyen tou fanmir kot zot fer lager kont kanmarad pa kapab egziste. Si Satan i divize kont limenm konman son rwayonm pou kapab tenir?” (Matye 12:22-26) Anfet, Zezi ti pe dir: ‘Si mon en lenstriman Satan parey zot in dir, e mon pe detrir sa ki Satan in fer, alor Satan ti ava pe travay kont son prop lentere e i ti a tonbe san tarde.’ Pa sa i en lozik pwisan?

¹⁸ Apre Zezi i kontinyen rezonn lo sa size. I ti konnen ki serten dan group bann Farizyen ti’n deza sas demon. Alor i ti demann en kestyon senp me ki ti trouble zot: “Zot dir ki mon sas bann demon avek pouvwar Belzebil. Alor par ki pouvwar zot prop zans [oubyen disip] i fer li?” (Matye 12:27) Dan en sans, Zezi ti pe argimante ki: ‘Si vreman mon sas bann demon par pouvwar Satan, alor i bezwen ki zot prop disip pe azir anba sa menm pouvwar.’ Ki bann Farizyen ti kapab dir? Zot pa ti pou zanmen aksepte ki zot disip i azir anba pouvwar Satan. Avek en rezonnman lozik, Zezi ti fer zot lakizasyon kont li paret napa okenn sans.

19, 20. (a) Dan ki fason pozitif Zezi ti servi rezonnman lozik? (b) Konman Zezi ti servi en rezonnman ‘i annan plis rezon’ kan i ti pe reponn son bann disip ki ti demann li pour ansenny zot konman pour priye?

¹⁹ Apard ki servi bann rezonnman lozik pour fer son bann lennmi ferm zot labous, Zezi ti osi servi bann largiman lozik e konvenkan pour ansenny bann laverite pozitif e rekonfortan lo Zeova. Zezi ti kontan fer dimoun rezonnen an dizan: “I annan plis rezon pour . . . .” I ti servi sa kalite rezonnman pour ede ranforsi konviksyon son lodyans an servan bann senp fe ki zot ti familye avek. Annou egzamin zis de legzanp.

²⁰ Letan i ti pe reponn son bann disip ki ti’n demann li pour ansenny zot konman pour priye, Zezi ti rakont zot ilistrasyon en zonm ki “pour larezon ki i persiste” ti finalman konvenk en zanmi ki pa ti anvi akord li son demann. Zezi ti osi dekrir sa dezir ki paran i annan pour “donn bon keksoz” zot zanfan. Apre i ti konklir: “Si, zot, move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” (Lik 11:1-13, nou ki’n met an italik.) Sa pwen ki Zezi ti fer resorti pa baze lo similarite me lo diferans. Si en zanmi ki pa ti anvi rann servis son vwazen avan i finalman ganny konvenki pour fer li, e si bann paran enparfe i pran swen bezwen zot zanfan, konbyen plis nou Papa lanmour dan lesyel pou donn son lespri sen son bann serviter fidel ki apros li avek limilite dan lapriyer!

21, 22. (a) Ki rezonnman Zezi ti servi letan i ti pe ofer konsey lo fason pour fer fas avek lenkyetid konsernan keksoz materyel? (b) Apre ki nou’n vwar ennde metod lansennyman Zezi, ki konklizyon nou retire?

²¹ Zezi ti servi en rezonnman parey kan i ti pe ofer konsey lo fason pour fer fas avek lenkyetid konsernan bann keksoz materyel. I ti dir: “Obzerv bann korbo; zot pa ni senmen, ni rekolte, zot napa ni stor ni grennyen, e pourtan Bondye i nouri zot. E zot! Pa zot annan plis valer ki bann zwazo! Pran bann lis, fason ki zot pouse; zot pa fer ni travay, ni tis latwal, . . . Alor, si Bondye i dekor bann zerb ki pe pouse deor ozordi e demen i ganny brile, nou annan plis rezon pour krwar ki Bondye i a donn zot lenz ek tou sa ki zot bezwen, zot ki mank lafwa!” (Lik 12:24, 27, 28, nou ki’n met an italik.) Wi, si Zeova i pran swen avek bann zwazo ek fler, pa i annan plis rezon pour li pran swen avek son bann serviter! En tel rezonnman pwisan me ki’n ganny dir avek douser ti san dout tous leker bann ki ti ekout Zezi.

²² Apre ki nou’n revwar ennde metod lansennyman Zezi, nou kapab fasilman konklir ki sa bann zofisye ki pa ti kapab atrap li pa ti pe egzazere letan zot ti dir: “Personn pa’n zanmen deza koz parey sa zonm.” Me petet Zezi i pli renonmen pour servi bann legzanp oubyen parabol dan son lansennyman. Akoz i ti servi sa metod? E kwa ki ti fer son bann legzanp sitan efikas? Sa bann kestyon pou ganny diskite dan lartik swivan.

[Not anba lo paz]

Eski ou rapel?

• Donn serten legzanp ki montre ki Zezi ti ansenny dan en fason senp e kler?

• Akoz Zezi ti servi kestyon dan son lansennyman?

• Akoz ler i ti ansennyen, parfwa Zezi ti egzazer en keksoz par ekspre?

• Konman ki Zezi ti servi rezonnman lozik pour ansenny son bann disip laverite rekonfortan konsernan Zeova?

[Portre lo paz 18]

Bann Farizyen ti ‘pas zot bwar pour tir en bigay, me zot ti anval en samo’