Imit Pasyans Zeova

‘Zeova pa tarde pour akonpli son promes, . . . me i pran pasyans.’—2 PYER 3:9.

 1. Ki sa kado ki zis Zeova in kapab ofer limanite?

ZEOVA pe ofer nou en keksoz ki napa personn ankor ki kapab ofer. I en keksoz ki sitan atiran e presye, me anmenmtan nou pa ni kapab aste oubyen merit sa keksoz. Sa kado ki Zeova pe ofer i lavi eternel, e pour laplipar nou sa i lavi pour touzour dan paradi lo later. (Zan 3:16) Pa lavi sa letan pou gou! Fini bann keksoz ki anmenn bokou lapenn, parey konfli, vyolans, lapovrete, krim, maladi e menm lanmor. Sa letan partou lo later dimoun pou viv dan lape ek linite anba dominasyon Rwayonm Bondye. Wi, nou vreman anvi ki sa Paradi i vini!—Izai 9:6, 7; Revelasyon 21:4, 5.

 2. Akoz Zeova pa ankor retir sa lemonn Satan?

² Zeova osi i esper avek konfyans sa letan ler i pou etablir Paradi lo later. Apre tou, Zeova i en Bondye ki kontan ladrwatir ek lazistis. (Psonm 33:5) Zeova pa kontan ditou ler i get en lemonn ki pa enterese oubyen opoz son bann prensip drwat, en lemonn ki rezet son lotorite e persekit son pep. Me i annan bon rezon akoz i pa ankor azir pour retir sa lemonn dominen par Satan. Sa i akoz son drwa pour dirize in ganny atake. Zeova i demontre en kalite atiran dan lafason i rezourd sa bann problenm. Sa i pasyans e ozordi i en kalite ki rar.

 3. (a) Ki i vedir sa mo Grek ek Ebre ki ganny tradwir “pasyans” dan Labib? (b) Ki kestyon nou pou egzaminen aprezan?

³ I annan en mo Grek dan Labib ki’n ganny tradwir konman “pasyans.” Sa mo i literalman vedir “longer lespri.” Sa mo Ebre ek Grek pour “pasyans” i annan sa lide siporte oubyen pa ankoler vitman. Ki mannyer nou benefisye avek pasyans Zeova? Ki leson nou kapab aprann atraver pasyans ek perseverans Zeova ek son bann serviter fidel? Ki mannyer nou konnen ki pasyans Zeova i annan en limit? Annou egzamin sa bann pwen.

Konsider Pasyans Zeova

 4. Ki zapot Pyer ti ekrir konsernan pasyans Zeova?

⁴ Konsernan pasyans Zeova, zapot Pyer ti ekrir: “Pa oubliye sa pwen, mon bann byenneme. Se ki devan Senyer en zour i konman 1000 an, e 1000 an i konman en zour. Nou Senyer pa tarde pour akonpli son promes parey serten i mazinen, me i pran pasyans avek zot, i pa oule ki personn i ganny detri, me ki tou dimoun i arive repanti.” (2 Pyer 3:8, 9) Annou konsider de pwen dan sa verse ki kapab ed nou konpran pasyans Zeova.

 5. Ki mannyer fason Zeova i konsider letan i annan lefe lo sa ki i fer?

⁵ Premye pwen i ki Zeova pa konsider letan parey nou. Pour Zeova ki viv pour touzour, mil an i parey zis en zour pour li. I pa anba presyon oubyen pa kapab fer en keksoz akoz i napa ase letan. Me Zeova pa tarde osi pour rezourd en problenm. Lefe ki son lasazes napa limit, Zeova i konn egzakteman sa pli bon moman pour azir pour benefisye tou dimoun ki enplike, e i esper avek pasyans pour sa letan arive. Me nou pa devret konklir ki Zeova pa enterese avek soufrans ki son bann serviter i kapab eksperyanse antretan. I en Bondye ranpli avek “konpasyon” e li menm i lanmour. (Lik 1:78; 1 Zan 4:8) I kapab koriz konpletman e pour touzour nenport maler ki’n kapab arive pandan i’n permet soufrans pour en pe letan.—Psonm 37:10.

 6. Ki konklizyon nou pa devret tire lo Bondye, e akoz?

⁶ Byensir, i pa fasil pour en dimoun esper en keksoz ki i anvi i arive. (Proverb 13:12) Alor, si en dimoun i pran letan pour fer sa ki i’n promet, lezot i kapab krwar ki i napa lentansyon pour akonpli li. I pou vreman pa saz pour nou mazinen ki Bondye i koumsa! Si nou pa konpran pasyans Zeova e nou krwar i pe tarde, avek letan nou kapab fasilman doute e dekouraze, e tonm dormi spirityelman. Pli pir ankor, parey Pyer ti averti nou, nou kapab les nou ganny anbete par bann dimoun ki sikannen e ki napa lafwa. Sa bann dimoun i dir dan zar pour boufonnen: “Oli sa promes, ki i pe vini? Depi ki nou bann zanset in mor, tou i reste parey depi kreasyon lemonn.”—2 Pyer 3:4.

 7. Dan ki fason pasyans Zeova i asosye avek son dezir ki dimoun i repantir?

⁷ En dezyenm pwen ki nou kapab aprann atraver parol Pyer i ki Zeova i pasyan akoz i oule ki tou dimoun i repantir. Zeova pou detrir bann dimoun ki persiste e refize kit zot move semen. Me Bondye pa pran plezir pour vwar bann move dimoun mor. Okontrer, i kontan ler i vwar zot repantir, kit zot move semen, e kontinyen viv. (Ezekyel 33:11) Pour sa rezon i pran pasyans e i pe fer sa bon nouvel ganny anonse partou lo later pour ki dimoun i ganny loportinite pour ganny lavi.

 8. Ki nou aprann lo pasyans Zeova ler nou egzamin fason ki i ti azir avek nasyon Izrael?

⁸ Nou kapab osi aprann lo pasyans Bondye ler nou konsider ki mannyer i ti azir avek ansyen nasyon Izrael. I ti siport zot dezobeisans pour plizyer syek. Atraver son bann profet, plizyer fwa Zeova ti ankouraz zot: “Rezet zot move semen e swiv mon bann komannman, lalwa, dapre tou sa bann lalwa ki mon ti donn zot zanset e ki mon ti anvoy kot zot par mwayen mon bann serviter bann profet.” Ki ti rezilta? Malerezman, sa pep “pa ti ekoute.”—2 Lerwa 17:13, 14.

 9. Ki mannyer pasyans Zezi ti reflekte pasyans son Papa?

⁹ Finalman, Zeova ti anvoy son Garson, ki ti fer tou pour konvenk bann Zwif pour rekonsilye avek Bondye. Pasyans Zezi i reflekte parfetman pasyans son Papa. Menm si i ti konn tre byen i pros pour mor, Zezi ti sipliy zot: “Zerizalenm, Zerizalenm, ou ki touy bann profet e saboul a kou-d-ros bann ki Bondye in anvoy kot ou! Konbyen fwa mon’n oule rasanble ou zanfan ansanm parey en mer-poul i rasanble son bann piti anba son lezel, me ou pa’n oule.” (Matye 23:37) Sa i pa parol en ziz sever ki anvi pini en dimoun me i parol en bon zanmi ki pran pasyans avek lezot. Parey son Papa dan lesyel, Zezi ti anvi sa bann dimoun repantir pour zot pa ganny detri. Serten ti obeir lavertisman Zezi e zot ti sap lanmor kan Zerizalenm ti ganny detri an 70 nou lepok.—Lik 21:20-22.

10. Dan ki fason nou’n benefisye avek pasyans Bondye?

¹⁰ Pa pasyans Bondye i en keksoz vreman merveye? Malgre imen in dezobei li sitan en kantite, Zeova in permet nou ek plizyer milyon dimoun sa loportinite pour konn li e pour aksepte sa lespwar pour nou ganny sove. Zapot Pyer ti ekrir lezot Kretyen: “Konsider pasyans nou Senyer konman en mwayen pour sov nou.” (2 Pyer 3:15) Pa nou rekonesan ki pasyans Zeova in ouver semen pour nou ganny sove? Eski pa nou priye ki Zeova i kontinyen pran pasyans avek nou anmezir ki nou servi li sak zour?—Matye 6:12.

11. Ki nou pou fer ler nou byen konpran pasyans Zeova?

¹¹ Ler nou konpran akoz Zeova i pran pasyans, sa i ed nou esper avek pasyans nou delivrans, e nou pa zanmen tir konklizyon ki i tarde pour akonpli son bann promes. (Lamantasyon 3:26) Anmezir ki nou kontinyen priye pour Rwayonm Bondye vini, nou annan konfyans ki Bondye i konn sa pli bon moman pour reponn sa lapriyer. Deplis, i motiv nou pour imit Zeova par pran pasyans parey li avek nou frer ek ser ek dimoun ki nou pres avek. Nou osi nou pa oule personn ganny detrir. Me nou anvi vwar zot repantir e osi annan sa menm lespwar avek nou pour viv eternelman.—1 Timote 2:3, 4.

Konsider Pasyans bann Profet

12, 13. An rapor avek Zak 5:10, ki mannyer profet Izai ti reisi montre pasyans?

¹² Ler nou egzamin pasyans Zeova, sa i ed nou pour apresye sa kalite e pour devlop li. I pa fasil pour imen enparfe devlop pasyans, me i posib. Nou aprann avek bann serviter Bondye dan letan pase. Disip Zak ti ekrir: “Mon bann frer, pran konman legzanp lasoufrans ek pasyans bann profet ki’n anons mesaz Senyer.” (Zak 5:10) I rekonfortan e ankourazan pour konnen ki lezot in reisi sirmont preski menm problenm avek nou.

¹³ Par egzanp, profet Izai ti byen bezwen annan pasyans dan sa travay ki Bondye ti demann li pour fer. Zeova ti montre ki sa ti leka kan i ti dir li: “Ale, e ou devret dir sa pep, ‘Ekoute ankor e ankor, me pa konpran [nanryen]; e gete ankor e ankor, me pa aprann nanryen.’ Fer leker sa pep dir, fer zot dir tande, kol zot lizye, pour ki zot pa vwar avek zot lizye, ki zot pa tande avek zot zorey, e ki zot leker pa konpran pour ki zot vreman pa retournen e ganny geri.” (Izai 6:9, 10) Menm si sa pep ti annan leker dir, avek pasyans Izai ti anons lavertisman Zeova pour omwen 46 an! Pareyman, pasyans pou ed nou persevere dan nou travay predikasyon, menm si bokou dimoun pa aksepte sa bon nouvel.

14, 15. Kwa ki ti ed Zeremi fer fas avek difikilte ek dekourazman?

¹⁴ Byensir, bann profet pa ti zis fer fas avek bann dimoun ki pa ti enterese avek zot travay, me zot ti osi sibir persekisyon. Par egzanp, zot ti anmar lipye ek lanmen Zeremi avek en morso dibwa, met li dan “kaso,” e zet li dan en trou labou. (Zeremi 20:2; 37:15; 38:6) Se sa bann dimoun ki i ti anvi ede ki ti persekit li koumsa. Kantmenm sa, Zeremi pa ti ankoler e esey revanze. Avek pasyans i ti persevere pour plizyer lannen.

¹⁵ Persekisyon ek sikannri pa ti fer Zeremi reste labous fermen, e nou osi nou pa pou reste trankil. Byensir, parler nou kapab santi nou dekouraze. Zeremi ti eksperyans dekourazman. I ti ekrir: “Mon’n ganny kritike e sikannen toudilon lazournen akoz parol Zeova. E mon ti dir: ‘Mon pa pou mansyonn li, e mon pa pou koz ankor onon [Zeova].’” Ki ti arive apre? Eski Zeremi ti aret prese? Apre i ti dir: “Dan mon leker, [parol Bondye] ti parey en dife ki pe brile anndan dan mon lezo, e mon ti fatige gard anndan. Mon ti nepli kapab siporte.” (Zeremi 20:8, 9) Remarke ki ler i ti konsantre lo parol sa bann dimoun, sa ti fer li perdi son lazwa. Me Zeremi ti reganny son lazwa, ler i ti reflesir lo valer ek lenportans sa mesaz li menm. Deplis, Zeova ti avek Zeremi “parey en zonm for ki fer per,” e ti donn Zeremi lafors pour anons Parol Bondye avek devouman ek lardyes.—Zeremi 20:11.

16. Ki mannyer nou kapab reste zwaye dan nou travay predikasyon?

¹⁶ Eski profet Zeremi ti trouv lazwa dan son travay? Definitivman! I ti dir Zeova: “Mon ti trouv ou parol, e mon ti konmans manz zot. Ou parol i vin en lafyerte ek en lazwa dan mon leker; parski mon’n port ou non, O Zeova.” (Zeremi 15:16) Zeremi ti kontan son privilez pour reprezant sa vre Bondye e pour anons son parol. Nou osi nou kapab trouv lazwa. Deplis, parey bann lanz dan lesyel, nou kontan ki dan lemonn antye en kantite dimoun i aksepte mesaz Rwayonm, repantir e swiv sa semen lavi eternel.—Lik 15:10.

“Pasyans Zob”

17, 18. Dan ki fason Zob ti persevere, e ki ti arive alafen?

¹⁷ Apre ki disip Zak ti’n koz lo bann profet dan letan pase, i ti ekrir: ‘Zot in tann koz lo pasyans [oubyen perseverans] Zob, e zot in war sa ki Zeova in fer pour li alafen, e zot in war ki Zeova i ranpli avek labonte ek konpasyon.’ (Zak 5:11) Dan verse 10 ek 11, sa de mo Grek ki ganny tradwir la konman “pasyans” an Kreol, i annan preski menm sans. En profeser ti fer resorti diferans ki egziste ant sa de mo, i ti ekrir: ‘Sa mo Grek [dan verse 10] i vedir montre pasyans ler lezot i persekit nou e sa enn [dan verse 11] i vedir persevere ler nou fer fas avek bann sitiasyon ki trouble nou.’

¹⁸ Zob ti pas dan bokou maler. I ti soufer akoz i ti perdi tou son reveni, perdi son bann zanfan dan lanmor e sibir en maladi terib. Zot ti akiz li ki Zeova pe pini li. Zob pa ti soufer an silans; i ti eksprim son latristes e i ti menm oule dir ki i ti pli drwat ki Bondye. (Zob 35:2) Me i pa ti zanmen perdi lafwa, i pa ti ni kas son fidelite. I pa ti modi Bondye parey Satan ti dir i ti pou fer. (Zob 1:11, 21) Ki ti arive finalman? Zeova ti beni Zob plis ki okonmansman. (Zob 42:12) Zeova ti redonn Zob son lasante, double son larises, e i ti donn li en lavi ere e satisfezan avek son fanmiy. Zob ti osi kapab pli byen konn personnalite Zeova lefe i ti persevere fidelman.

19. Ki nou aprann lo perseverans Zob?

¹⁹ Ki nou aprann lo perseverans Zob? Parey Zob, nou kapab soufer avek en maladi oubyen pas atraver lezot difikilte. Petet nou kapab pa byen konpran akoz Zeova i les nou sibir en serten leprev. Kantmenm sa, i annan en keksoz ki nou kapab asire: Si nou reste fidel, nou pou ganny beni. Zeova i sirman rekonpans sa bann ki rod li avek devouman. (Ebre 11:6) Zezi ti dir: “Sa ki reste fidel ziska lafen pou ganny sove.”—Matye 10:22; 24:13.

“Zour Zeova pou arive”

20. Akoz nou asire ki zour Zeova pou arive?

²⁰ Menm si Zeova i pran pasyans, i osi drwat e i pa pou toler lemal pour touzour. Son pasyans i annan limit. Pyer ti ekrir: ‘Bondye pa’n eparny lemonn ansyen.’ Menm si Zeova ti prezerv lavi Noe ek son fanmiy, i ti anmenn en deliz lo bann move dimoun dan sa letan. Zeova ti osi ziz bann dimoun Sodonm ek Gomor e fer zot vin lasann. Sa bann zizman i donn “en leson bann move dimoun dan lavenir” konsernan keksoz ki pou arive. Wi, nou napa okenn dout: ‘Zour Zeova pou arive.’—2 Pyer 2:5, 6; 3:10.

21. Ki mannyer nou kapab montre pasyans ek perseverans, e ki size nou pou egzaminen dan nou lot lartik?

²¹ Alor, annou imit pasyans Zeova par ed lezot repantir pour ki zot kapab ganny sove. Annou osi imit bann profet par anons avek pasyans sa bon nouvel menm si serten dimoun ki nou pres avek pa montre lentere. Deplis, si parey Zob nou persevere dan bann leprev, nou kapab sir ki Zeova pou beni nou en kantite si nou reste fidel. Wi, nou annan tou rezon pour trouv lazwa dan nou minister. Sirtou ler nou realize ki mannyer Zeova pe beni en kantite zefor son pep pour pres sa bon nouvel partou kote dan lemonn. Dan nou lot lartik nou pou vwar sa.

Eski ou rapel?

• Akoz Zeova i pran pasyans?

• Ki nou aprann atraver pasyans ki bann profet in demontre?

• Ki mannyer Zob ti montre perseverans, e ki ti son rezilta?

• Ki mannyer nou konnen ki pasyans Zeova i annan limit?

[Portre lo paz 15]

Pasyans Zezi ti reflekte parfetman pasyans son Papa

[Portre lo paz 16]

Ki mannyer Zeova ti rekonpans pasyans Zeremi?

[Portre lo paz 17]

Ki mannyer Zeova ti rekonpans perseverans Zob?