Eski ou rekonnet Siny ki endik Prezans Zezi? — Watchtower BIBLIOTEK LO ENTERNET

Eski ou rekonnet Siny ki endik Prezans Zezi?

PERSONN pa anvi gravman malad oubyen pri dan en dezas. Pour ki sa bann maler pa ariv lo li, en dimoun ki byen servi son lespri pa pou inyor bann siny ki endik en danze pe al arive e i pou azir dapre sa bann siny. Zezi Kri ti dekrir en serten siny ki nou bezwen rekonnet. Sa siny ki i ti mansyonnen, ti pou annan lenpak lo lemonn antye e i ti pou afekte tou dimoun. Sa i enkli ou ek ou fanmiy.

Zezi ti koz konsernan Rwayonm Bondye, ki pou retir mesanste e fer later vin en paradi. Son bann disip ti anvi konn plis lenformasyon lo sa size e zot ti anvi konnen kan sa Rwayonm ti pou vini. Zot ti demande: “Dir nou kan tousala pou arive, e ki siny ki pou endik ou larive [oubyen prezans] ek lafen [sa sistenm]?”—Matye 24:3.

Zezi ti konnen ki apre son egzekisyon ek rezireksyon, ti pou pas plizyer lannen avan ki Bondye i fer li vin Lerwa dan son Rwayonm pour diriz limanite. Vi ki personn pa ti pou kapab vwar ler i vin lerwa dan lesyel, Zezi ti donn en siny ki ti pou permet son bann disip rekonnet son ‘prezans’ e osi ‘lafen sa sistenm.’ Sa siny i konpoze avek plizyer laspe, e zot tou ansanm zot idantifye oubyen mark prezans Zezi.

Matye, Mark, ek Lik, trwa ekriven Levanzil ti prezerv byen larepons ki Zezi ti donnen. (Matye, sapit 24 ek 25; Mark, sapit 13; Lik, sapit 21) Lezot ekriven Labib ti azout bann detay avek sa siny. (2 Timote 3:1-5; 2 Pyer 3:3, 4; Revelasyon 6:1-8; 11:18) Napa ase lespas dan sa lartik pour nou egzamin tou detay, me nou pou egzamin senk laspe prensipal ki form parti sa siny mansyonnen par Zezi. Ou pou trouve ki i fer sans e enportan pour ou personnelman egzamin sa siny.—Vwar bwat lo paz 6.

En Sanzman ki’n anmenn en nouvo Lepok

“Nasyon pou lager kont nasyon, rwayonm kont rwayonm.” (Matye 24:7) En zournal Alman, Der Spiegel, i raporte ki avan 1914, dimoun “ti krwar dan en lavenir briyan avek plis liberte, progre ek prosperite.” Me apre tou keksoz ti sanze. Magazin GEO i dir: “Sa lager ki ti konmanse an Out 1914 e fini an Novanm 1918 ti en levennman efreyan. I’n fer en sanzman istorik, separ sa ki vye avek sa ki nouvo.” Plis ki 60 milyon solda sorti lo senk kontinan ti partisip dan sa konfli mertriye. Sak zour apepre 6,000 solda ti ganny touye. Depi sa, bann istoryen dan sak zenerasyon ek bann politisyen in konsider “lannen 1914 ziska 1918 konman en sanzman ki’n anmenn en nouvo lepok.”

Premye Lager Mondyal in enpoz bann sanzman lo sosyete imen ki enposib sanze e i’n anmenn limanite dan bann dernyen zour sa sistenm. Larestan 20 tyenm syek in ganny marke par plis lager, konfli arme ek terorism. Sitiasyon pa’n amelyore pandan bann premye lannen dan sa 21 tyenm syek. Apard lager, i annan osi lezot laspe sa siny ki evidan.

Lafamin, Maladi, ek Tranbleman-d-ter

“Pou annan lafamin.” (Matye 24:7) Pandan premye lager mondyal, dimoun Lerop ti mor lafen e depi sa letan lafamin in afekte limanite. Istoryen Alan Bullock ti ekrir ki dan Larisi ek Likrenn an 1933, “gran lafoul dimoun lafen ti parwaze partou dan lakanpanny . . . Bann lekor ti ganny met enn lo lot obor semen.” An 1943, zournalis T. H. White ti vwar lafamin dan provens Henan, Lasin. I ti ekrir: “Ler i annan en lafamin, preski tou keksoz i kapab bon pour manze e kapab ganny kraze, konsonmen e transformen pour vin lenerzi par lekor imen. Me fodre en dimoun pe mor lafen pour li anvi manz keksoz ki normalman dimoun pa manze.” I malere pour dir ki pandan sa bann dernyen lannen, lafamin Lafrik in vin en keksoz komen. Menm si later i prodwir ase manze pour tou dimoun, Lorganizasyon Nasyon Ini pour Manze ek Lagrikiltir i estimen ki 840 milyon dimoun dan lemonn antye napa ase manze.

‘Dan plizyer landrwa pou annan lepidemi.’ (Lik 21:11) Zournal Süddeutsche Zeitung i “estimen ki Lafyev Espanyol in touy ant 20 milyon a 50 milyon dimoun an 1918, plis ki sa lenfeksyon apele lapes oubyen plis ki premye lager mondyal.” Depi sa, bann maladi parey malarya, lavaryol, tiberkiloz, polyo, ek kolera in touy en gran kantite dimoun. Lemonn i soke pour vwar ki Sida pe propaze san en kontrol. Ozordi i annan en sitiasyon efreyan kot bann maladi i persiste menm si i annan bann gran progre dan lasante. Sa sitiasyon enkrwayab ki limanite zanmen in deza konnen, i ede montre klerman ki nou pe viv dan en letan spesyal.

‘Tranbleman-d-ter.’ (Matye 24:7) Pandan sa dernyen 100 tan, tranbleman-d-ter in touy plizyer milye dimoun. Dapre en rapor, depi 1914, sak lannen in annan apepre 18 tranbleman-d-ter ki annan lafors pour detri bann batiman e fann later. Bann tranbleman-d-ter pli danzere, ki ase for pour met bann batiman net ater, in ariv apepre enn tou le zan. Malgre devlopman dan teknolozi, en kantite dimoun i kontinyen mor akoz bokou lavil ki annan gran popilasyon i sitye lo bann landrwa kot later i bouze.

Bon Nouvel!

Laplipar laspe sa siny bann dernyen zour i tris. Me Zezi ti osi koz lo en bon nouvel.

“Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Sa travay pour anons sa bon nouvel Rwayonm, ki Zezi li menm ti konmanse ti pou ariv lo son pik pandan bann dernyen zour. Sa in vin vre. Bann Temwen Zeova pe anons mesaz Labib e pe ansenny bann dimoun senser pour aplik sa ki zot aprann dan zot lavi toulezour. Konmela, plis ki sis milyon Temwen pe pres dan 235 pei e dan plis ki 400 langaz.

Remarke ki Zezi pa ti dir ki tou bann aktivite ti pou arete akoz sa bann kondisyon difisil ki pou egziste dan sa lemonn. I pa ti dir ki later antye ti pou ganny anvair par zis en laspe sa siny. Me i ti predir plizyer levennman ki ansanm ti pou form parti en siny ki dan nenport ki landrwa lo later dimoun ti pou rekonnet.

Olye konsantre lo bann levennman separeman, eski ou vwar sa bann levennman ansanm konman en siny ki annan lenportans dan lemonn antye? Sa ki pe arive lo later i afekte ou ek ou fanmiy. Petet nou pe demann nou lekor, me akoz zis en pti gin dimoun ki port latansyon?

Lentere personnel i premye

“Defann naze!,” “Atansyon kouran!,” “Ralanti.” Sa i serten siny ek lavertisman ki nou vwar me ki souvan dimoun i inyore. Akoz? Nou fasilman ganny enfliyanse par sa ki nou panse i bon pour nou. Par egzanp, parfwa nou santi sa nesesite pour dray pli vit ki lalwa i permet, oubyen petet nou telman anvi naz kot i defann. Me i pa en bon keksoz pour inyor bann siny.

Par egzanp, bann deboulir lanez dan bann montanny Lotris, Lafrans, Itali, ek Laswis i parler touy plizyer touris ki inyor lavertisman ki ankouraz zot pour pa fer ski dan landrwa danzere. Dapre zournal Süddeutsche Zeitung, bokou touris ki inyor sa bann lavertisman i viv par sa prensip, “Si napa risk, i pa gou.” Malerezman, inyor lavertisman i kapab anmenn move rezilta.

Ki rezon dimoun i annan pour pa antren sa siny ki Zezi in mansyonnen? Petet dezir pour vin ris i avegle zot oubyen lendiferans i fer zot pa enterese. Deplis, pa kapab fer en desizyon i fer zot pa fer nanryen, lavi toulezour i anvair zot, oubyen lafreyer perdi zot prestiz i domin zot. Eski enn sa bann keksoz pe fer ou inyor siny prezans Zezi? Pa i pli bon pour rekonnet sa siny e azir?

Lavi dan Paradi lo Later

I annan en group dimoun ki pe port latansyon lo siny prezans Zezi. Kristian, en zonm marye sorti Lalmanny i ekrir: “Sa i bann letan sonm. Nou pe vreman viv dan ‘bann dernyen zour.’” Li ek son madanm i pas bokou letan pour koz avek lezot lo Rwayonm Bondye. Frank i viv dan sa menm pei. Li ek son madanm i ankouraz lezot avek sa bon nouvel sorti dan Labib. Frank i dir: “Akoz sitiasyon lemonn, bokou dimoun ozordi i trakas konsernan lavenir. Nou esey ankouraz zot avek bann profesi Labib konsernan en paradi lo later.” Kristian ek Frank i alor ede akonpli en laspe siny Zezi, sa i sa travay pour anons sa bon nouvel Rwayonm.—Matye 24:14.

Ler bann dernyen zour i ariv lo son pik, Zezi pou retir sa sistenm mesan ek bann dimoun ki siport li. Apre son Rwayonm pou diriz bann aktivite lo later, ki pou vin en Paradi parey i’n predir. Limanite pou ganny libere avek maladi ek lanmor, e bann mor pou resisite pour viv lo later. Sa i bann lespwar merveye ki pe esper sa bann ki rekonnet siny sa letan. Pa i en bon keksoz pour aprann plis lo sa siny e ki en dimoun i devret fer pour sirviv lafen sa sistenm? Sirman, sa i devret vin en keksoz irzan pour tou dimoun fer.—Zan 17:3.

[Ekstre lo paz 4]

Zezi ti predir plizyer levennman ki ansanm pou form parti en siny ki dimoun partou lo later pou rekonnet

[Ekstre lo paz 6]

Eski ou vwar bann levennman ki form parti sa siny tre enportan?

[Bwat/Portre lo paz 6]

MARK KI IDANTIFYE BANN DERNYEN ZOUR

Lager.—Matye 24:7; Revelasyon 6:4

Lafamin.—Matye 24:7; Revelasyon 6:5, 6, 8

Maladi.—Lik 21:11; Revelasyon 6:8

Lemal pou ogmante.—Matye 24:12

Tranbleman-d-ter.—Matye 24:7

Letan difisil pour siporte.—2 Timote 3:1