Rwayonm Bondye i elimin son bann lennmi

1, 2. (a) Ki laprev i annan ki nou Lerwa in konmans dirize depi 1914? (b) Ki nou pou egzaminen dan sa sapit?

I VREMAN ranforsi nou lafwa pour revwar sa ki Rwayonm Bondye in fer parmi son bann lennmi. (Ps. 110:2) Nou Lerwa in met an plas en larme predikater volonter. I’n pirifye e rafin son bann disip spirityelman e moralman. Menm si bann lennmi sa Rwayonm i esey diviz nou, nou kontinyen reste ini dan lemonn antye. Sa bann lakonplisman ek plizyer lezot ankor ki nou’n egzaminen i donn en levidans konvenkan ki depi 1914, nou Lerwa in dirize o milye bann lennmi sa Rwayonm.

² Sa Rwayonm pou fer ankor plis keksoz merveye tre byento. I pou “vini” pour “kraz e met en lafen” avek tou son bann lennmi. (Mat. 6:10; Dan. 2:44) Me avan sa letan, lezot levennman enportan pou arive. Ki sa bann levennman? Plizyer profesi Labib i reponn sa kestyon. Annou egzamin serten sa bann profesi pour vwar ki levennman ki devan nou.

 3. Ki premye devlopman nou pe esper arive?

³ Proklanmasyon lape. Dan son let pour bann Tesalonisyen, zapot Pol ti dekrir premye levennman ki nou pe espere. (Lir 1 Tesalonisyen 5:2, 3.) Dan sa let Pol ti mansyonn ‘zour Zeova,’ ki pou konmans avek en latak lo “Gran Babilonn.” (Rev. 17:5) Me, zis avan zour Zeova i konmanse, bann nasyon pou dir, “Lape ek sekirite.” Sa lekspresyon i kapab pe refer avek en sel proklanmasyon ouswa en seri lanons. Eski bann sef relizye pou enplike? Vi ki zot form parti sa lemonn, zot pou sirman zwenn avek bann nasyon pour dir: “I annan lape!” (Zer. 6:14; 23:16, 17; Rev. 17:1, 2) Ler zot pou dir lape ek sekirite, sa pou en siny ki zour Zeova pe al konmanse. Bann lennmi Rwayonm Bondye “pa pou sape.”

 4. Ki byenfe nou gannyen kan nou konpran sinifikasyon profesi Pol konsernan proklanmasyon lape ek sekirite?

⁴ Ki byenfe nou gannyen ler nou konpran sinifikasyon sa profesi? Pol ti dir: “Zot pa dan fernwanr, e sa zour pa pou sirprann zot parey en voler.” (1 Tesa. 5:3, 4) Kontrerman avek bann dimoun an zeneral, nou nou konpran sinifikasyon bann levennman ki pe arive. Me, dan ki fason sa profesi konsernan lape ek sekirite pou ganny akonplir? Nou bezwen espere pour vwar ki mannyer sa pou devlope. Alor, annou “reste vizilan e azen” spirityelman.​—1 Tesa. 5:6; Tsef. 3:8.

 5. Avek kwa “gran ladetres” pou konmanse?

⁵ Latak lo larelizyon. Pa oubliye ki Pol ti ekrir: “Kan dimoun i ava pe dir: ‘Tou i an-pe e an sekirite,’ alor en sel kou destriksyon pou tonm lo zot.” (Nou ki’n met an italik.) Zis parey i annan en gro tapaz loraz apre ki zekler i frape, kan bann dimoun pou dir “Lape ek sekirite,” en ‘sel kou apre destriksyon’ pou tonm lo zot. Kwa ki pou ganny detrir? Premyerman, “Gran Babilonn,” setadir sa sistenm antye tou bann fo larelizyon e ki osi koni konman “sa fanm prostitye.” (Rev. 17:5, 6, 15) Destriksyon lo bann larelizyon Kretyen ek tou lezot fo larelizyon pou konmansman gran ladetres. (Mat. 24:21; 2 Tesa. 2:8) Pour bokou zot, sa levennman pou sirprann zot. Akoz? Parski sa letan la, sa prostitye pou konsider son lekor konman en “larenn” ki “pa pou zanmen konn dey.” Me en sel kou, i pou dekouver ki i ti’n mal kalkile. Deswit, i pou ganny retire konmsi “dan en sel zour.”​—Rev. 18:7, 8.

 6. Kwa oubyen lekel ki pou fer sa latak lo “Gran Babilonn”?

⁶ Lekel oubyen kwa ki pou atak “Gran Babilonn”? En ‘bebet sovaz’ ki annan “dis korn.” Liv Revelasyon i endike ki sa bebet sovaz i refer avek Nasyon-z-ini. Sa dis korn i reprezant tou bann pouvwar politik ozordi ki siport sa ‘bebet feros rouz.’ (Rev. 17:3, 5, 11, 12) Ki lanpler sa latak? Bann nasyon ki afilye avek Nasyon-z-ini pou pran larises sa prostitye, devor li e konpletman “bril li avek dife.”​—Lir Revelasyon 17:16.a

 7. Ki mannyer parol Zezi dan Matye 24:21, 22 ti ganny akonplir dan premye syek N.L., e ki mannyer i pou ganny akonplir a lavenir?

⁷ Sa bann zour pou ganny akoursi. Nou Lerwa ti revel sa ki ti pou arive sa letan pandan gran ladetres. Zezi ti dir: “Me sa bann zour in ganny diminyen akoz son pep ki in swazir.” (Lir Matye 24:21, 22.) Parol Zezi ti ganny akonplir lo en pli pti lanpler lannen 66 N.L., ler Zeova ti “diminyen” ouswa aret latak larme Romen lo Zerizalenm. (Mark 13:20) Sa aksyon ti permet bann Kretyen Zerizalenm ek Zide ganny sove. Me ki pou arive apre lo en pli gran lanpler pandan gran ladetres? Atraver nou Lerwa, Zeova pou “diminyen” oubyen aret sa latak ki Nasyon-z-ini pou fer lo larelizyon pour ki i pa detri sa vre larelizyon ansanm avek sa ki fo. Dan sa fason, tou bann fo larelizyon pou ganny detrir, zis sa enn vre ki pou reste. (Ps. 96:5) Annou vwar ki levennman pou arive apre ki sa parti gran ladetres pou’n fini.

8, 9. Zezi ti pe refer avek ki fenomenn e ki mannyer bann dimoun pou reakte ler zot pou vwar sa?

⁸ Profesi Zezi konsernan bann dernyen zour i endike ki plizyer levennman enportan pou arive pandan sa letan zis avan Armagedon. Sa de premye levennman ki nou pou egzaminen i ganny mansyonnen dan Levanzil Matye, Mark ek Lik.​—Lir Matye 24:29-31; Mark 13:23-27; Lik 21:25-28.

⁹ Bann fenomenn dan lesyel. Zezi ti predir: “Soley pou aret klere, lalin pou nepli donn son lalimyer, bann zetwal pou tonbe e bann pisans dan lesyel pou tranble.” Sirman dimoun pa pou al rod lalimyer kot bann sef relizye akoz zot pou nepli ganny konsidere dan sa fason. Eski Zezi ti pe osi koz lo bann fenomenn ekstraordiner dan lesyel? Petet. (Iza. 13:9-11; Yoel 2:1, 30, 31) Ki mannyer bann dimoun pou reazir ler zot vwar tousala? Zot pou dan “lafreyer” akoz zot “pa pou konnen ki zot pou fer.” (Lik 21:25; Tsef. 1:17) Wi, bann lennmi Rwayonm Bondye, depi ‘lerwa ziska lesklav’ “pou tonm feb avek lafreyer dan lenkyetid konsernan sa ki pou arive lo later” e zot pou taye pour al rod refiz. Me pourtan, zot pa pou trouv okenn landrwa kasyet ki ase sen e sof pour protez zot avek lakoler nou Lerwa.​—Lik 21:26; 23:30; Rev. 6:15-17.

10. Ki zizman Zezi pou fer e ki mannyer bann ki siport Rwayonm Bondye ek bann ki opoz li pou reakte?

¹⁰ Zizman in arive. Tou bann lennmi Rwayonm Bondye pou apre sa ganny forse pour temwanny en levennman ki pou fer zot pli per ankor. Zezi ti dir: “Zot a war Fis-de-Lonm vini dan bann nyaz avek gran pisans ek laglwar.” (Mark 13:26) Sa fason ekstraordiner ki Zezi pou demontre son pouvwar pou en laprev ki i’n vini pour pas zizman. Dan en lot bout sa profesi konsernan bann dernyen zour, Zezi i donn plis detay lo sa zizman ki pou ganny pase sa moman. Nou trouv sa lenformasyon dan son parabol konsernan bann mouton ek kabri. (Lir Matye 25:31-33, 46.) Bann siporter fidel Rwayonm Bondye pou ganny zize konman “mouton” e zot pou “lev zot latet anler” akoz zot pou realize ki zot ‘delivrans i pros.’ (Lik 21:28) Me, sa bann ki opoz Rwayonm Bondye pou ganny zize konman “kabri” e zot pou “lamante” akoz zot pou realize ki zot pou ganny “pinisyon eternel,” andotmo, ganny detrir konpletman.​—Mat. 24:30; Rev. 1:7.

11. Ki nou devret gard antet anmezir nou egzamin sa bann levennman ki pe vini?

¹¹ Apre ki Zezi i pronons zizman lo “tou nasyon,” i annan plizyer levennman enportan ki pou arive avan Armagedon i konmanse. (Mat. 25:32) Nou pou egzamin de sa bann levennman: Latak Gog ek rasanbleman bann Kretyen swazir. Anmezir nou egzamin sa bann levennman, nou devret gard antet ki Parol Bondye pa dir egzakteman kan ki sa bann levennman pou arive. Anfet, i paret ki en serten moman tou le de levennman pou pe ariv an menm tan.

12. Ki gran latak Satan pou fer kont Rwayonm Bondye?

¹² En gran latak. Gog sorti Magog pou atak bann Kretyen swazir ki pou ankor lo later ensi ki lezot mouton. (Lir Ezekyel 38:2, 11.) Sa latak kont dominasyon sa Rwayonm ki’n ganny etablir, pou dernyen batay Satan dan sa lager ki i’n fer kont bann Kretyen swazir depi ki i’n ganny pouse dan lesyel. (Rev. 12:7-9, 17) Sirtou, depi sa letan ki bann Kretyen swazir in konmans ganny rasanble dan kongregasyon Kretyen ki’n ganny restore, Satan in esey detri zot prosperite spirityel, me i pa’n reisi. (Mat. 13:30) Me, sa letan la, ler tou bann fo larelizyon pou nepli e pep Bondye pou paret “san proteksyon bann miray, bar ouswa baro,” Satan pou vwar en bon loportinite. I pou enfliyans son bann siporter pour lans en gran latak final lo sa bann ki siport Rwayonm Bondye.

13. Ki mannyer Zeova pou entervenir pour son pep?

¹³ Ezekyel i dekri sa ki pou arive. Konsernan Gog, sa profesi i dir: “Ou pou sorti kot ou, sa landrwa pli lwen dan nor, ou avek bokou dimoun, zot tou lo seval, en gran lafoul e en gran larme. Parey nyaz pe kouver later, ou pou vin atak mon pep.” (Ezek. 38:15, 16) Ki pou reaksyon Zeova anver sa latak ki paret difisil pour anpes arive? Zeova i dir: “Mon lakoler pou vreman monte. Mon pou demann en lepe.” (Ezek. 38:18, 21; lir Zekarya 2:8.) Zeova pou entervenir pour son bann serviter lo later. Sa lentervansyon se sanmenm sa lager Armagedon.

14, 15. Ki lezot levennman pou arive en serten moman apre ki Satan i konmans son gran latak?

¹⁴ Avan nou al pli devan pour egzaminen ki mannyer Zeova pou defann son pep pandan Armagedon, annou fer en poz e egzamin en lot levennman enportan. Sa enn pou ariv en letan ant konmansman gran latak Satan ek ler Zeova i konmans entervenir zour Armagedon. Parey i’n ganny mansyonnen dan paragraf 11, sa dezyenm levennman se rasanbleman larestan Kretyen swazir.

¹⁵ Rasanbleman bann Kretyen swazir. Matye ek Mark ti mansyonnen ki sa ki Zezi ti dir konsernan rasanbleman “bann ki’n ganny swazir,” andotmo, bann Kretyen swazir, ti pou parmi en seri levennman ki ti pou arive avan Armagedon i konmanse. (Vwar paragraf 7.) Ler i ti pe koz lo son lekor konman Lerwa, Zezi ti profetize: “Alor i pou anvoy son bann lanz dan kat kote later, pour rasanble tou bann ki’n ganny swazir, en bout later a lot.” (Mark 13:27; Mat. 24:31) Avek ki rasanbleman Zezi ti pe refer? I pa ti pe koz lo ler dernyen Kretyen swazir lo later i ganny sele avan gran ladetres i konmanse. (Rev. 7:1-3) Plito, Zezi ti pe refer avek en levennman ki pou arive pandan sa gran ladetres ki pe vini. Savedir, aparaman, en serten letan apre konmansman gran latak Satan lo pep Bondye, bann Kretyen swazir ki pou ankor lo later pou ganny rasanble dan lesyel.

16. Ki rol bann Kretyen swazir resisite pou annan zour Armagedon?

¹⁶ Ki mannyer sa rasanbleman bann Kretyen swazir i relye avek Armagedon, sa levennman ki pou arive zis apre? Sa rasanbleman pou arive pour ki tou bann Kretyen swazir i dan lesyel avan ki Armagedon, lager Bondye i konmanse. Dan lesyel, sa 144,000 ki pou diriz avek Kris pou ganny lotorite pour partisip avek Zezi pour servi “en baton feray” pour detri tou bann lennmi Rwayonm Bondye. (Rev. 2:26, 27) Apre sa, ansanm avek bann lanz pwisan, bann Kretyen swazir ki pou’n resisite pou swiv Kris, sa Lerwa Gerye, anmezir i ale pour al lager avek son bann lennmi sa “gran larme” ki pou’n anserkle pep Zeova. (Ezek. 38:15) Ler sa gro konfrontasyon vyolan pou pran plas, Armagedon pou’n konmanse.​—Rev. 16:16.

17. Ki pou arive avek “bann kabri” pandan Armagedon?

¹⁷ Zizman i ganny egzekite. Armagedon pou dernyen parti sa gran ladetres. A sa moman, Zezi pou akonpli en lot latas ki i’n gannyen. Apard vin Ziz pour “tou nasyon,” i pou osi sa Enn ki pou egzekit zizman lo bann nasyon, setadir, bann dimoun ki pli boner i ti’n ziz konman “bann kabri.” (Mat. 25:32, 33) Avek “en lepe byen koupe,” nou Lerwa pou “frap bann nasyon.” Tou bann ki ganny klasifye konman kabri depi “bann lerwa” ziska “lesklav” “pou al dan pinisyon eternel,” andotmo, zot pou ganny detrir konpletman.​—Rev. 19:15, 18; Mat. 25:46.

18. (a) Ki mannyer sityasyon pou sanze pour “bann mouton”? (b) Ki mannyer Zezi pou konplet son laviktwar?

¹⁸ Pa sityasyon pou’n konpletman sanze pour bann ki Zezi pou’n ziz konman “bann mouton”! Olye ganny pyetinen konpletman avek gran larme “kabri” Satan, “en gran lafoul” mouton, ki pou paret san defans pou sirviv latak sa lennmi e zot pou ‘pas sa gran ladetres.’ (Rev. 7:9, 14) Apre sa, apre ki Zezi pou’n detrir e retir tou bann lennmi imen Rwayonm Bondye, i pou zet Satan ek son bann demon dan labim. Laba, zot pou dan en kondisyon konmsi zot pou’n mor, savedir, zot pou inaktif pour mil an.​—Lir Revelasyon 6:2; 20:1-3.

19, 20. Ki mannyer nou kapab aplik sa leson ki dan Izai 26:20 ek 30:21?

¹⁹ Ki mannyer nou kapab prepar nou lekor pour sa bann levennman efreyan ki pou arive? En serten letan pase, Latour Veyer ti dir: “Sirvivans pou depan lo lobeisans.” Akoz sa? Larepons i ganny trouve dan sa lavertisman ki Zeova ti donn bann Zwif ki ti’n egzile Babilonn. Zeova ti predir ki Babilonn ti pou ganny konkerir, me i ti osi dir ki pep Bondye ti devret fer pour prepar zot pour sa levennman? Zeova ti dir: “Ale, mon pep, antre dan ou bann lasanm enteryer e ferm ou bann laport deryer ou. Kasyet ou pour selman en moman ziska ki mon lakoler i pase.” (Iza. 26:20) Get sa bann verb ki i servi, “ale,” “antre,” “ferm” e “kasyet,” tousala i bann lord. Bann Zwif ki ti obei sa lord ti pou’n reste dan zot lakaz, lwen avek bann solda dan semen ki ti pe vin konkerir sa lavil. Alor, zot ti pou sirviv si zot ti obei lenstriksyon Zeova.b

²⁰ Ki leson pour nou? Parey dan ka sa bann serviter Bondye dan lepase, nou pou reste vivan zour sa bann levennman i arive si nou obei lenstriksyon Zeova. (Iza. 30:21) Nou ganny sa bann lenstriksyon atraver kongregasyon. Alor, nou oule devlop lobeisans avek tou nou leker anver gidans ki nou gannyen. (1 Zan 5:3) Si nou deza pe fer li ozordi, nou pou pli pare pour volonterman obei a lavenir e dan sa fason nou pou ganny proteksyon nou Papa Zeova ek nou Lerwa Zezi. (Tsef. 2:3) Sa proteksyon ki nou pou gannyen pou permet nou vwar pour nou menm lafason ki Rwayonm Bondye pou konpletman detri tou son bann lennmi. Sirman sa pou en levennman inoubliyab!