Bann zapot i rod pozisyon ankor enn fwa

Zezi ek son bann disip in preski fini zot vwayaz dan direksyon sid, Pere, pour al Zerizalenm. Zot travers Larivyer Zourden o bor Zeriko. I annan lezot ki pe vwayaz avek zot pour Lapak lannen 33.

Zezi pe mars par devan son bann disip akoz i determinen pour ariv Zerizalenm pour Lapak. Me bann disip i per. Pa bokou letan pase, ler Lazar ti mor e Zezi ti pe kit Zide pour al Pere, Toma ti’n dir lezot disip: “Annou ale nou osi pour ki nou a mor ansanm avek li.” (Zan 11:16, 47-53) I danzere pour zot al Zerizalenm, sanmenm bann disip i per.

Zezi i pran son bann zapot akote pour prepar zot pour sa ki pe al arive. I dir zot: “Nou pe mont Zerizalenm e laba Garson zonm pou ganny livre avek bann sef pret ek profeser lalwa. Zot pou kondann li amor, zot pou livre li avek dimoun lezot nasyon, boufonn li, fwet li e klout li lo poto e trwazyenm zour i pou resisite.”​—Matye 20:18, 19.

Sa i fer trwazyenm fwa ki Zezi i koz avek son bann disip lo son lanmor ek rezireksyon. (Matye 16:21; 17:22, 23) Par kont, safwasi i dir ki i pou ganny touye lo poto. Son bann disip i ekout li me zot pa konpran ki i pe dir. Petet zot pe ekspekte ki rwayonm Izrael pour ganny retablir lo later e zot anvi ganny laglwar ek loner avek Kris dan en rwayonm lo later.

Salome, ki aparaman manman zapot Zak ek Zan osi pe vwayaz avek zot. Zezi in donn sa de zapot en non ki vedir “Bann Garson Loraz,” san dout akoz zot ti annan tandans pran lakoler. (Mark 3:17; Lik 9:54) I fer en pe letan depi ki sa de i anvi ganny en bon plas dan Rwayonm Kris. Zot manman i konn sa. La aprezan, i apros Zezi lo zot par, i tonm azenou devan li e demann li en faver. Zezi i reponn: “Ki ou anvi mon fer pour ou?” I dir: “Fer ki mon de garson i asiz, enn lo ou kote drwat e lot lo ou kote gos dan ou Rwayonm.”​—Matye 20:20, 21.

Anfet, sa demann i sorti kot Zak ek Zan. Lefet ki Zezi fek koz lo sa laont ek imilyasyon ki i pou gannyen, i dir zot: “Zot pa konnen ki zot pe demande. Zot kapab bwar sa lakoup ki mon pe al bwar?” Zot reponn: “Wi nou kapab.” (Matye 20:22) Kantmenm sa, i tre probab ki zot pa vreman konpran ki sa i vedir pour zot.

Me pourtan Zezi i dir zot: “Wi, zot pou bwar mon lakoup, me pour asiz lo mon kote drwat e lo mon kote gos, sa pa mwan ki deside me i pour sa bann ki mon Papa in swazir.”​—Matye 20:23.

Ler sa dis lezot zapot i tande ki Zak ek Zan in fer sa demann, zot byen mekontan. Eski i posib ki Zak ek Zan ti’n byen ardyese dan sa largiman ki bann zapot ti’n annan pli boner? (Lik 9:46-48) An tou ka, sa demann i montre ki sa 12 zapot pa’n aplik sa konsey ki Zezi in donnen konsernan devlop limilite. Zot ankor anvi ganny pozisyon.

Zezi i deside pour rezourd sa sityasyon akoz sa i kree bann problenm parmi son bann zapot. I kriy sa 12 zapot e avek lanmour i konsey zot. I dir zot: “Zot konnen ki bann ki ganny konsidere konman dirizan bann nasyon i annan lotorite lo lepep e bann dimoun enportan i domin zot. I pa devret koumsa parmi zot, me sa ki anvi vin enportan parmi zot i devret vin zot serviter e sa ki anvi vin premye parmi zot i devret lesklav tou lezot.”​—Mark 10:42-44.

Aprezan Zezi i koz lo sa legzanp ki zot devret swiv, setadir son legzanp. I dir: “Garson zonm ti vini, pa pour ganny servi, me pour servi e donn son lavi konman en ranson pour liber bokou dimoun.” (Matye 20:28) I fer apepre trwa-z-an depi ki Zezi pe servi lezot. I pou kontinyen fer sa e i pou menm pare mor pour limanite! Bann disip i bezwen parey Kris e anvi servi lezot olye ki lezot i servi zot. Zot devret vin en dimoun ki mwen enportan olye rod pozisyon.