Zot ti trouv Mesi

“Nou’n trouv Mesi.”​—ZAN 1:41.

 1. Akoz bann disip Zezi ti dir: “Nou’n trouv Mesi”?

ZAN BATIS ti avek de son bann disip ler Zezi ti apros li. Zan ti dir: “La Lanyo Bondye.” Andre ek sa lot disip ti deswit swiv Zezi e pas lazournen avek li. Pli tar, Andre ti zwenn son frer Simon Pyer e anmenn li kot Zezi an dizan: “Nou’n trouv Mesi.”​—Zan 1:35-41.

 2. Ki byenfe nou pou gannyen si nou kontinyen etidye bann profesi lo Mesi?

² Avek letan, Andre, Pyer ek lezot ti annan ase loportinite pour etidye pli byen Lekritir e zot ti asire ki Zezi sorti Nazaret ti vreman sa Mesi ki ti’n ganny promet. Nou pou annan plis lafwa dan Parol Bondye ek sa Enn ki Bondye in swazir si nou kontinyen egzamin bann profesi lo Mesi.

“La ou Lerwa pe vin kot ou”

 3. Ki profesi Zezi ti realize ler i ti antre Zerizalenm konman en Lerwa?

³ Mesi ti pou antre Zerizalenm konman en Lerwa. Zekarya ti profetize: “O fiy Siyon, ou devret dan lazwa! Kriye avek lazwa, O fiy Zerizalenm. Gete! Ou lerwa pe vin kot ou. I drwat, wi i’n ganny sove, i annan limilite e i monte lo en bourik, wi lo en mal bourik, piti en femel bourik.” (Zeka. 9:9) En psalmis ti ekrir: “Beni sa enn ki vin o non Zeova.” (Ps. 118:26) Zezi pa ti’n kapab fors bann lafoul pour realiz sa bann profesi. O kontrer, sa lafoul ti volonterman kriye avek lazwa. Anmezir ou lir sa resi, esey mazin sa levennman ek lafason ki sa bann dimoun ti kriye avek lazwa.​—Lir Matye 21:4-9.

 4. Eksplike ki mannyer Psonm 118:22, 23 ti ganny realize.

⁴ Menm si bokou pa ti aksepte Zezi konman Mesi, i ti presye dan lizye Bondye. Parey i ti ganny profetize, Zezi ‘ti ganny meprize e konsidere konman en nanryen ditou’ par bann dimoun ki pa ti oule krwar bann levidans. (Iza. 53:3; Mark 9:12) Toudmenm, en psalmis ti ganny enspire par Bondye pour dir: “Sa ros ki bann konstrikter in rezete, i’n vin sa ros kwen prensipal. I sorti kot Zeova li menm.” (Ps. 118:22, 23) Zezi ti sit sa bann verse avek bann sef relizye ki ti opoz li e Pyer ti montre ki sa ti ganny realize lo Zezi. (Mark 12:10, 11; Akt 4:8-11) Zezi ti vin sa “ros kwen” kongregasyon Kretyen. Menm si i ti ganny rezete par bann dimoun ki napa lafwa, i ti sa enn “ki Bondye in swazir e i presye pour li.”​—1 Pyer 2:4-6.

I ti ganny trai e abandonnen!

5, 6. Kwa ki ti ganny profetize e akonplir konsernan lefet ki Mesi ti pou ganny trai?

⁵ Mesi ti pou ganny trai par en dimoun ki ti pros avek li. David ti profetize: “Sa zonm ki ti anpe avek mwan, dan ki mon ti annan konfyans, ki ti manz mon dipen, in tourn son talon kont mwan.” (Ps. 41:9) En dimoun ki ti manz dipen avek en lot ti ganny konsidere konman son zanmi. (Zen. 31:54) Ler Zida Iskaryot ti trai Zezi, sa ti en traizon pli pir ki ti’n kapab arive. Zezi ti montre son bann zapot ki sa ti pe realiz parol David ki ti dir lo Zida ki ti pe al trai li: “Mon pa pe koz lo zot tou. Mon konnen lekel ki mon’n swazi, me fodre ki sa parol Lekritir i realize: ‘Sa ki’n manz mon dipen in tourn son talon kont mwan.’”​—Zan 13:18.

⁶ Mesi ti pou ganny trai pour trant pyes larzan, pri en lesklav. Dapre Zekarya 11:12, 13, Matye ti montre ki Zezi ti pou ganny trai pour en ptigin larzan. Me akoz Matye ti dir ki ‘profet Zeremi ki ti’n dir’ sa parol profetik. Dan letan Matye, liv Zeremi ti petet ganny mete premye dan lalis bann liv Labib ki ti osi enkli Zekarya. (Konpar Lik 24:44) Zida pa ti zanmen depans sa larzan ki i ti’n gannyen akoz i ti zet li dan tanp e al touy son lekor.​—Mat. 26:14-16; 27:3-10.

 7. Ki mannyer Zekarya 13:7 ti ganny realize?

⁷ Menm bann disip Mesi ti pou abandonn li. Zekarya ti ekrir: “Tap berze e bann ki dan troupo pou disperse.” (Zeka. 13:7) Le 14 Nizan, lannen 33 N.L., Zezi ti dir son bann disip: “Zot tou zot pou abandonn mwan, parski Lekritir in dir, ‘Mon pou bat berze e mouton pou disperse.’” Sanmenm ki ti arive akoz Matye ti dir ki “tou bann disip ti abandonn [Zezi] e sove.”​—Mat. 26:31, 56.

I ti ganny akize e bate

 8. Ki mannyer Izai 53:8 ti ganny realize?

⁸ Mesi ti pou ganny zize e kondannen. (Lir Izai 53:8.a) Granmaten, le 14 Nizan, Sannedren an antye ti zwenn ansanm, fer Zezi ganny anmare e anvoy li kot Pons Pilat Gouverner Romen. Pilat ti kestyonn Zezi e i ti vwar ki i ti inosan. Toudmenm, ler Pilat ti oule liber li, lafoul ti kriye ki i ti devret ganny touye e zot ti oule liber en kriminel ki ti apel Barabas. Pour satisfer sa lafoul, Pilat ti liber Barabas, fer Zezi ganny fwete e livre li pour li ganny touye.​—Mark 15:1-15.

 9. Parey Psonm 35:11 ti predir, ki ti arive dan letan Zezi?

⁹ Dimoun ti pou donn fo temwannyaz lo Mesi. Dan en psonm, David ti dir: “Bann temwen vyolan in vini, zot pe demann mwan sa ki mon pa konnen.” (Ps. 35:11) Parey sa profesi ti dir: “Bann sef pret ek konsey an antye ti esey rod en fo levidans kont Zezi pour kondann li a-mor.” (Mat. 26:59) Anfet, “en kantite temwen ti’n donn fo levidans kont li, e zot levidans pa ti dakor.” (Mark 14:56) Bann lennmi Zezi pa ti pe fatig zot si sa bann temwen ti pe koz lalang parski zot ti zis anvi i mor.

10. Eksplike ki mannyer Izai 53:7 ti ganny realize.

¹⁰ Mesi pa ti pou reponn bann ki ti akiz li. Izai ti profetize: “Zot ti fer li pas martir, i pa ti pou ouver son labous menm ler zot ti maltret li. I ti ganny anmennen parey en mouton ki pe al ganny touye; e parey en femel mouton ki reste trankil devan bann ki koup son lalenn, li osi i pa ti pou ouver son labous.” (Iza. 53:7) Ler Zezi “ti ganny akize par bann sef pret ek bann ansyen i pa ti reponn.” Pilat ti demann li: “Ou pa tann tou sa lakizasyon ki zot pe fer kont ou?” Me, Zezi “pa ti reponn en sel mo lo okenn sarz. Sa ti sirprann Gouverner en kantite.” (Mat. 27:12-14) Zezi pa ti maltret sa bann ki ti akiz li.​—Rom. 12:17-21; 1 Pyer 2:23.

11. Ki mannyer Izai 50:6 ek Mika 5:1 ti ganny realize?

¹¹ Izai ti profetize ki Mesi ti pou ganny bate. En profet ti ekrir: “Mon ti donn mon ledo avek bann ki bat mwan, mon lazou avek bann ki aras labarb. Mon figir mon pa’n kasyet avek bann keksoz imilyan ek lakras.” (Iza. 50:6) Mika ti predir: “Zot pou tap ziz Izrael avek en baton lo son lazou.” (Mik. 5:1) Pour konfirmen ki sa profesi ti ganny realize, Mark ti dir: “En bann parmi zot ti konmans kras lo [Zezi], zot ti kouver son lizye, zot ti tap li e dir, ‘Profetize! Devinen lekel ki’n tap ou.’ Bann gard ti atrap li e ti tap li.” Mark i osi dir ki bann solda “ti tap Zezi lo son latet avek en baton, zot ti kras lo li e azenou e fer sanblan ador li.” (Mark 14:65; 15:19) Byensir, Zezi pa ti merit okenn sa bann labi.

I ti fidel ziska lanmor

12. Ki mannyer Psonm 22:16 ek Izai 53:12 i aplik lo Zezi?

¹² Lafason ki Mesi ti pou mor ti ganny profetize. Dan en psonm, David ti dir: “Lasanble bann ki fer sa ki mal in antour mwan. Parey en lyon, zot ti atak mon lanmen ek mon lipye.” (Ps. 22:16) Parey bokou dimoun ki lir Labib i konnen, Mark ti dir ki i ti “never bonmaten kan zot ti [“klout li lo poto,” NW].” (Mark 15:25) I ti osi ganny profetize ki Mesi ti pou mor avek bann peser. Izai ti ekrir: “I’n donn son lavi ziska lanmor e i’n ganny konte parmi bann ki komet lofans.” (Iza. 53:12) Sanmenm ki ti arive, “zot ti [“klout lo poto,” NW] de bandi avek li, enn adrwat e lot agos.”​—Mat. 27:38.

13. Ki mannyer Psonm 22:7, 8 ti ganny akonplir lo Zezi?

¹³ David ti profetize ki Mesi ti pou ganny ensilte. (Lir Psonm 22:7, 8.b) Ler i ti lo poto martir pe soufer, bann dimoun ti ensilte Zezi, parski Matye ti rakonte: “Dimoun ki ti pase ti balans zot latet e ensilte li. ‘Ou ki ti pou detri Tanp e rekonstri li dan trwa zour! Sov ou lekor, si ou Garson Bondye, desann sorti lo sa [“poto,” NW].’” Pareyman, bann sef pret, profeser lalwa ek bann ansyen ti monk li e dir: “I ti sov lezot me i pa kapab sov son lekor! Li Lerwa Izrael, les li desann sorti lo sa [“poto,” NW] e nou ava krwar li! I’n met son konfyans dan Bondye, ki Bondye i sov li aprezan si i kontan li; i ti dir li garson Bondye!” (Mat. 27:39-43) Pourtan, Zezi ti andir sa bann difikilte avek dinyite. Pa i en bon legzanp pour nou!

14, 15. Nonm serten profesi ki ti ganny realize konsernan lenz Mesi e lefet ki zot ti pou ofer li vineg.

¹⁴ Zot ti pou tir osor pour lenz Mesi. En psalmis ti ekrir: “Zot ti partaz mon lenz antre zot e zot ti tir osor pour mon lenz.” (Ps. 22:18) Sanmenm ki ti arive, akoz “kan [bann solda Romen] ti’n [fini klout li lo poto] zot ti partaz son lenz an tiran osor.”​—Mat. 27:35; lir Zan 19:23, 24.

¹⁵ Zot ti pou donn Mesi vineg ek fyel. En psalmis ti dir: “Pour manze, zot ti donn mwan en plant anpwazonnen, e zot ti esey fer mwan bwar vineg parski mon ti swaf.” (Ps. 69:21) Matye i dir nou: “Zot ti ofer Zezi diven ki ti’n melanze avek fyel, me ler Zezi ti goute i pa ti oule bwar.” Pli tar, “enn parmi zot ti taye, i ti tranp en leponz dan vineg, met li lo bout en baton e ofer Zezi pour bwar.”​—Mat. 27:34, 48.

16. Ki mannyer profesi dan Psonm 22:1 ti ganny realize?

¹⁶ I ti pou paret ki Bondye ti’n abandonn Mesi. (Lir Psonm 22:1.c) Dapre sa profesi, ver “trwazer, [apremidi] Zezi ti kriye avek en lavwa for, ‘Eloi, Eloi, lama sabaktani?’ savedir, ‘Mon Dye, mon Dye, akoz ou’n abandonn mwan?’” (Mark 15:34) Sa pa vedir ki Zezi ti nepli annan lafwa dan son Papa ki dan lesyel. Bondye ti abandonn Zezi dan lanmen son lennmi ler i ti retir son proteksyon lo li pour ki lentegrite Kris i ganny teste konpletman. Ler i ti kriy sa parol, Zezi ti realiz Psonm 22:1.

17. Ki mannyer Zekarya 12:10 ek Psonm 34:20 ti ganny realize?

¹⁷ Mesi ti ganny perse, me son lezo pa ti pou ganny kase. Bann zabitan Zerizalenm ti pou “get sa Enn ki zot ti’n perse.” (Zeka. 12:10) Psonm 34:20 i osi dir: “[Bondye in] gard tou son lezo; napa enn ki’n ganny kase.” Zapot Zan ti konfirm sa, ler i ti ekrir lo Zezi: “Me enn bann solda ti pers son kote avek son lans e osito ti sorti en delo disan. Sa dimoun [Zan] ki pe rakont sa bann fe ti war limenm e sa ki i rakonte i vre. . . .  Sa in arive pour ki sa pasaz Lekritir i akonpli: ‘Okenn son lezo pa pou kase.’ Ankor en lot pasaz i dir: ‘Zot pou get sa enn ki zot in perse.’”​—Zan 19:33-37.

18. Ki mannyer Zezi ti ganny mete dan latonm bann dimoun ris?

¹⁸ Mesi ti pou ganny met dan latonm avek bann dimoun ris. (Lir Izai 53:5, 8, 9.d) Tar apremidi le 14 Nizan, “en zonm ris sorti Arimate ti arive. I ti apel Zozef.” I ti demann Pilat lekor Zezi e Pilat ti aksepte. Resi Matye i osi azoute: “Zozef ti pran lekor e anvlop li dan en dra byen prop. I ti depoz li dan son kavo nef ki i ti’n fek fer dekoupe dan ros. Apre i ti roul en gro ros devan larantre tonbo e i ti ale.”​—Mat. 27:57-60.

Salye Mesi sa Lerwa!

19. Ki mannyer Psonm 16:10 in ganny realize?

¹⁹ Mesi ti pou ganny resisite. David ti ekrir: “[Zeova] pa pou abandonn mwan dan Seol.” (Ps. 16:10) Zis mazinen ki mannyer bann madanm ti’n kapab sirprann ler zot ti ariv kot latonm kot lekor Zezi ti’n ganny mete. Laba zot ti zwenn en lanz ki ti dir zot: “Pa bezwen per, mon konnen ki zot pe rod Zezi de Nazaret, ki ti ganny [“kloute lo poto,” NW]. I pa isi, i’n resisite. Gete, la landrwa kot zot ti met li.” (Mark 16:6) Zapot Pyer ti dir avek en lafoul ki ti la zour Lapannkot lannen 33 N.L., Zerizalenm: “David ti war davans sa ki ti pou arive, e i ti pe koz lo rezireksyon Mesi ler i ti dir: ‘I pa’n ganny abandonnen dan lemonn lanmor, e son lekor pa’n vin lapouritir.’” (Akt 2:29-31) Bondye pa ti les lekor fizik son Garson byenneme pouri. Deplis, Zezi ti ganny resisite konman en lespri!​—1 Pyer 3:18.

20. Ki mannyer profesi lo Rwayonm Mesi ti ganny akonplir?

²⁰ Parey i ti’n ganny predir, Bondye ti dir ki Zezi ti son Garson. (Lir Psonm 2:7e; Matye 3:17.) Bann lafoul ti osi salye Zezi e aksepte son Rwayonm. Avek lazwa, nou koz lo Zezi ek benediksyon sa Rwayonm. (Mark 11:7-10) Zezi pou byento detrir son bann lennmi ‘pour defann laverite, limilite ek ladrwatir.’ (Ps. 2:8, 9; 45:1-6) Konman en Lerwa i pou anmenn lape ek prosperite lo later antye. (Ps. 72:1, 3, 12, 16; Iza. 9:6, 7) Konman Temwen Zeova, eski pa i en zoli privilez pour nou koz lo sa bann laverite e Garson byenneme Bondye ki pe rennyen dan lesyel konman Son Lerwa swazir!

[Not anba lo paz]

Ki ou pou reponn?

• Ki mannyer Zezi ti ganny trai e abandonnen?

• Ki serten laspe lanmor Zezi ki ti ganny profetize?

• Akoz ou konvenki ki Zezi i sa Mesi ki ti ganny promet?

[Portre lo paz 15]

Ki profesi ki ti ganny akonplir ler Zezi ti antre Zerizalenm konman Lerwa?

[Portre lo paz 17]

Zezi ti mor pour nou pese, me la konmela i Lerwa dan Rwayonm Bondye