‘Ale e fer Disip’

“Mon’n ganny tou pouvwar dan lesyel ek lo later. Ale e fer tou pep vin mon bann disip.”—MATYE 28:18, 19.

 1, 2. (a) Ki travay Zezi ti donn son bann disip pour fer? (b) Ki kestyon konsernan lord Zezi ki nou pou egzaminen?

I TI en zour prentan an Izrael lannen 33 N.L., e bann disip Zezi ti’n rasanble lo en montanny an Galile. A sa moman zot Senyer Zezi, ki ti’n ganny resisite, ti pres pour mont dan lesyel. Me avan i ale i ti annan en keksoz enportan pour dir zot. Zezi ti annan en travay pour zot fer. Ki sa travay? Ki mannyer son bann disip ti reazir anver sa travay ki i ti donn zot? Ki mannyer nou osi nou enplike dan sa travay ozordi?

² Sa ki Zezi ti dir i trouve dan Matye 28:18-20: “Mon’n ganny tou pouvwar dan lesyel ek lo later. Ale e fer tou pep vin mon bann disip. Batiz zot o non di-Per, di-Fis, e di-Sent-Espri. Ansenny zot pour obei tou sa ki mon’n konmande. E konnen ki mwan mon avek zot toulezour, ziska lafen dimoun.” Zezi ti koz konsernan “tou pouvwar,” “tou pep,” ‘tou sa ki i’n komande’ e “toulezour.” Sa kat lekspresyon dan son lord i fer nou demann detrwa kestyon enportan. Akoz nou devret prese? kote?, ki nou devret ansennyen? e ziska kan? Annou egzamin sa bann kestyon enn par enn.a

“Mon’n ganny tou Pouvwar”

 3. Akoz nou devret obeir sa lord pour fer disip?

³ Premyerman, akoz nou devret obeir lord Zezi pour fer disip? Zezi ti dir: “Mon’n ganny tou pouvwar dan lesyel ek lo later. [Alor, NW ] ale e fer tou pep vin mon bann disip.” Sa mo “alor” i montre en rezon enportan akoz nou devret obeir sa lord. Sa i akoz Zezi, sa enn ki donn sa lord, i annan  “tou pouvwar.” Lo lekel ki Zezi i annan pouvwar?

 4. (a) Lo lekel ki Zezi i annan pouvwar? (b) Ki lefe nou konprenezon lo lotorite Zezi i devret annan lo nou pwennvi konsernan sa lord pour fer disip?

⁴ Zezi i annan pouvwar oubyen lotorite lo son kongregasyon Kretyen. Depi ki Rwayonm Bondye in ganny etabli dan lesyel, Zezi in ganny pouvwar dan sa Rwayonm. (Kolosyen 1:13; Revelasyon 11:15) I sef bann lanz e sa i vedir ki i diriz en larme konpoze avek plizyer santenn milyon lanz. (1 Tesalonisyen 4:16; 1 Pyer 3:22; Revelasyon 19:14-16) Son Papa in donn li pouvwar pour detri “tou lotorite, pouvwar” ki opoz bann prensip drwat. (1 Korentyen 15:24-26; Efezyen 1:20-23) Zezi napa lotorite zis lo bann dimoun vivan. I osi “ziz bann vivan ek bann mor” e Bondye in donn li pouvwar pour resisit dimoun mor. (Akt 10:42; Zan 5:26-28) Sirman nou devret konsider en lord sorti kot en dimoun avek en sitan gran lotorite konman tre tre enportan. Alor, avek bokou respe nou volonterman obeir lord Kris pour ‘ale e fer disip.’

 5. (a) Ki mannyer Pyer ti obeir parol Zezi? (b) Ki benediksyon Pyer ti gannyen akoz i ti obeir lenstriksyon Zezi?

⁵ Boner dan son minister lo later, Zezi ti ansenny son bann disip dan en fason remarkab ki zot pou ganny beni si zot rekonnet son lotorite e obeir son lord. En zour Zezi ti dir avek Pyer, ki ti en peser: “Avans kannot dan kre e zet ou lasenn pour atrap pwason.” Vi ki Pyer ti asire ki napa pwason, i ti dir Zezi: “Met, nou’n travay tou lannwit me nou pa’n atrap nanryen!” Me avek limilite, Pyer ti azoute: “Me parski ou’n dir mwan, mon a fer li.” Apre ki Pyer ti’n obeir lord Kris, i ti atrap en “kantite pwason.” Byen etonnen par sa ki ti arive, Pyer “ti tonm azenou devan Zezi, e i ti dir, ‘Senyer, elwanny ou avek mwan, parski mon en peser!’ ” Me Zezi ti reponn: “Pa per, dezorme ou pou lapes zonm!” (Lik 5:1-10; Matye 4:18) Ki nou aprann atraver sa resi?

 6. (a) Ki sa resi konsernan atrap pwason i montre konsernan kalite lobeisans ki Zezi i ekspekte? (b) Ki mannyer nou kapab fer parey Zezi?

⁶ Zezi ti donn Pyer, Andre, ek lezot zapot sa travay pour “lapes dimoun,” pa avan me apre ki zot ti’n atrap sa tou sa kantite pwason. (Mark 1:16, 17) I kler ki Zezi pa ti ekspekte ki zot obeir li zis koumsa dan vid. I ti donn sa de zonm en rezon konvenkan akoz zot ti devret obeir li. Zis parey obeir lord Zezi pour zet zot lasenn dan delo ti anmenn rezilta enpresyonan, pareyman obeir lord Zezi pour “lapes zonm” ti pou anmenn bann gran benediksyon. Avek lafwa total, bann zapot ti fer sa ki Zezi ti’n dir zot. Sa resi i konklir: ‘Zot ti anmenn zot kannot ater, zot ti kit tou e zot ti swiv li.’ (Lik 5:11) Ozordi, nou osi nou fer parey Zezi ler nou ankouraz lezot pour partisip dan travay fer disip. Nou pa ekspekte ki dimoun i zis fer sa ki nou dir zot, me nou donn zot bann rezon konvenkan pour obeir lord Kris.

Rezon konvenkan ek Motivasyon apropriye

 7, 8. (a) Nonm detrwa rezon baze lo Labib pour pres lo Rwayonm e fer disip. (b) Ki verse Labib ki sirtou motiv ou pour kontinyen prese? (Vwar osi not anba lo paz.)

⁷ Vi ki nou rekonnet lotorite Kris, nou partisip dan travay predikasyon Rwayonm e fer disip. Ki lezot rezon biblik nou annan pour fer sa travay, ki nou kapab partaz avek bann dimoun ki nou anvi motive pour fer bann bon travay? Annou get detrwa remark ki serten Temwen fidel sorti dan diferan pei in fer. Port latansyon lo bann verse ki’n ganny mansyonnen pour siport zot komanter.

⁸ Roy, batize an 1951: “Ler mon ti dedye mon lavi avek Zeova, mon ti promet pour servi li pour touzour. Mon anvi gard mon parol.” (Psonm 50:14; Matye 5:37) Heather, batize an 1962: “Ler mon mazin tou sa ki Zeova in fer pour mwan, mon anvi montre li mon rekonesans par servi li fidelman.” (Psonm 9:1, 9-11; Kolosyen 3:15) Hannelore, batize an 1954: “Sak fwa ki nou dan predikasyon, bann lanz pe siport nou. Sa i en gran privilez!” (Akt 10:30-33; Revelasyon 14:6, 7) Honor, batize an 1969: “Ler zour zizman Zeova i arive, mon pa anvi personn dan mon vwazinaz akiz Zeova ek son bann Temwen konman neglizan e dir, ‘mon pa ti zanmen ganny en lavertisman!’ ” (Ezekyel 2:5; 3:17-19; Romen 10:16, 18) Claudio, batize an 1974: “Ler nou pe prese, nou anba regar Bondye e dan konpanni Kris. Zis mazin sa! Ler nou dan predikasyon, nou rezwir konpanni nou bann pli bon Zanmi.”—2 Korentyen 2:17.b

 9. (a) Ki sa resi konsernan lapes pwason i revele lo motivasyon apropriye pour obeir Kris? (b) Ki sa bon motivasyon pour obeir Bondye ek Kris ozordi, e akoz?

⁹ Sa resi konsernan atrap sa sitan kantite pwason i osi montre lenportans pour annan sa motivasyon apropriye pour obeir Kris. Sa i lanmour. Ler Pyer ti dir “elwanny ou avek mwan, parski mon en peser,” Zezi pa ti ale, i pa ti ni kondann Pyer pour okenn pese. (Lik 5:8) Zezi pa ti ni menm kritik Pyer pour demann li pour ale. Okontrer, Zezi ti zantiman reponn li: “Pa per.” Obeir Kris zis akoz lafreyer pa ti pou en bon motivasyon. Okontrer, Zezi ti dir Pyer ki li ek son bann konpanyon ti pou vin itil konman bann ki lapes dimoun. Pareyman, ozordi nou osi nou pa servi lafreyer oubyen lezot santiman negatif, parey fer dimoun santi zot koupab oubyen onte, pour fors zot obeir Kris. Se selman en lobeisans total baze lo lanmour pour Bondye ek Kris ki fer leker Zeova kontan.—Matye 22:37.

“Fer tou Pep vin mon bann Disip”

10. (a) Ki detay konsernan lord Zezi pour fer disip ki ti prezant en gro defi pour son bann disip? (b) Ki mannyer bann disip ti azir anver lord Zezi?

¹⁰ Sa dezyenm kestyon souleve an rapor avek lord Kris i, Kote sa travay fer disip i devret ganny fer? Zezi ti dir son bann disip: “Fer tou pep vin mon bann disip.” Avan minister Zezi, dimoun dan lezot nasyon ti ganny aksepte si zot ti al Izrael pour servi Zeova. (1 Lerwa 8:41-43) Zezi li menm ti pres plis avek bann Zwif. Me apre i ti dir son bann disip al anver dimoun dan tou nasyon. An realite, landrwa lapes, oubyen teritwar pour prese pour son bann disip ti zis en pti “basen delo”—bann Zwif—me byento i ti pou enkli “lanmer” limanite antye. Menm si sa sanzman ti prezant en defi pour bann disip, zot ti volonterman obeir lenstriksyon Zezi. Dan mwens ki 30 an apre lanmor Zezi, zapot Pol ti kapab ekrir ki sa bon nouvel ti’n ganny prese pa zis avek bann Zwif me avek “tou dimoun dan lemonn antye.”—Kolosyen 1:23.

11. Ki lagrandisman ki’n arive dan nou ‘teritwar lapes’ depi boner dan 20 tyenm syek?

¹¹ Pli resaman, nou’n osi vwar lagrandisman dan teritwar predikasyon. Okonmansman 20 tyenm syek, nou landrwa lapes ti trouve selman dan detrwa pei. Me bann disip Kris sa letan ti imit legzanp bann Kretyen dan premye syek e avek lantouzyasm zot ti agrandir zot teritwar predikasyon. (Romen 15:20) Boner dan bann lannen 1930, zot ti pe fer disip dan apepre san pei. Ozordi, nou lapes dan 235 pei.—Mark 13:10.

“Dan tou Langaz”

12. Ki sa defi trouve dan profesi Zekarya 8:23 i fer resorti?

¹² Fer disip dan tou nasyon i en defi pa zis akoz groser teritwar me osi akoz sa kantite langaz ki dimoun i koze. Atraver profet Zekarya, Zeova ti predir: “I pou dan sa bann zour ki dis zonm sorti dan tou langaz bann nasyon pou tyonbo, wi zot pou vreman tyonbo zip en zonm ki en Zwif, an dizan: ‘Nou pou al avek zot, akoz nou’n antann ki Bondye i avek zot.’ ” (Zekarya 8:23) Dan pli gran lakonplisman sa profesi, sa “zonm ki en Zwif” i reprezant larestan Kretyen swazir, tandis ki sa “dis zonm” i reprezant “gran lafoul.”c (Revelasyon 7:9, 10; Galat 6:16) Sa gran lafoul disip Kris ti pou sorti dan bokou nasyon, e parey Zekarya ti fer resorti, zot ti pou koz plizyer langaz. Eski bann nouvo disip i sorti dan bokou nasyon e eski zot koz diferan langaz? Larepons i ‘Wi.’

13. (a) Ki devlopman konsernan langaz in arive parmi pep Bondye ozordi? (b) Ki mannyer lesklav fidel e pridan in azir anver sa bezwen pour nouritir spirityel dan diferan langaz? (Enkli bwat “Piblikasyon pour bann Aveg.”)

¹³ An 1950, 3 dan tou le 5 Temwen dan lemonn antye ti koz Angle, konman zot langaz maternel. Apre an 1980, sa ti sanze pour vin apepre 2 dan tou le 5, e ozordi selman 1 dan tou le 5 Temwen ki zot langaz maternel i Angle. Ki mannyer lesklav fidel e pridan in azir anver sa sanzman? Zot in fourni nouritir spirityel dan bokou plis langaz. (Matye 24:45) Par egzanp, an 1950 nou ti pibliy nou piblikasyon dan 90 langaz, me ozordi sa sif in ariv apepre 400. Eski sa gran latansyon anver bann dimoun ki koz diferan langaz in anmenn rezilta? Wi! An mwayenn, apepre 5,000 dimoun ‘sorti dan tou langaz’ pe vin disip Kris sak semenn diran lannen! (Revelasyon 7:9) Sa ogmantasyon pe kontinyen. Dan serten pei “lasenn” pe atrap en ta pwason!—Lik 5:6; Zan 21:6.

En Minister satisfezan—Eski ou kapab partisip ladan?

14. Ki mannyer nou kapab ed bann dimoun dan nou teritwar ki koz en langaz etranze? (Enkli bwat “Servi Langaz Siny pour fer Disip.”)

¹⁴ Serten frer ek ser pe fer bann dimoun sorti dan “tou langaz” vin disip dan zot pei menm, sa i akoz bokou dimoun pe imigre dan lezot pei. (Revelasyon 14:6) Ki mannyer nou kapab ed bann dimoun dan nou teritwar ki koz en diferan langaz avek nou? (1 Timote 2:4) Nou kapab servi zouti lapes ki apropriye. Ofer sa bann dimoun piblikasyon dan zot prop langaz. Si i posib, fer laranzman pour en Temwen ki koz zot langaz vizit zot. (Akt 22:2) Konmela i pli fasil pour fer sa laranzman, vi ki bokou Temwen in aprann koz en lot langaz pour kapab ed bann etranze vin disip Kris. Bann rapor i montre ki ed sa bann dimoun i en leksperyans ki anmenn bokou satisfaksyon.

15, 16. (a) Ki legzanp ki montre satisfaksyon pour ed sa bann ki koz en lot langaz? (b) Ki kestyon konsernan servi dan en teritwar ki koz en langaz etranze nou kapab reflesir lo la?

¹⁵ Konsider de legzanp sorti Peiba, kot travay predikasyon i ganny organize dan 34 langaz. En koup Temwen ti volonter pour ale e fer disip parmi bann imigran sorti Lapolonny. Zot ti telman ganny bon rezilta pour zot zefor, ki sa frer ti ganny motive pour travay mwens, pour li ganny en zour anplis par semenn pour etidye Labib avek bann ki ti montre lentere. En pe letan apre, sa koup ti pe kondwir plis ki 20 letid Labib. Zot ti dir: “Nou minister i vreman rann nou ere.” Bann ki fer disip i sirtou zwaye letan sa bann ki antann laverite Labib dan zot prop langaz i eksprim zot lapresyasyon. Par egzanp, pandan en renyon dan langaz Vietnamese, en zonm aze ti debout e demann permisyon pour koze. Avek larm dan son lizye, i ti dir bann Temwen: “Mersi pour zot zefor ki zot pe fer pour aprann mon langaz difisil. Mon vreman rekonesan pour aprann bokou keksoz merveye dan Labib dan mon vye zour.”

¹⁶ Alor, i pa sirprenan, ki sa bann ki pe servi dan bann kongregasyon ki koz bann langaz etranze i vreman satisfe. En koup sorti Langleter ti dir: “Travay dan teritwar kot dimoun i koz langaz etranze i en laspe nou minister pli enteresan ki nou’n eksperyanse pandan nou 40 lannen dan servis Rwayonm.” Eski ou kapab aranz ou sitiasyon pour kapab partisip dan sa minister enteresan? Si ou ankor pe al lekol, eski ou kapab etidye en lot langaz pour prepar ou pour sa kalite minister? Sa i kapab anmenn en lavi satisfezan e ranpli avek benediksyon pour ou. (Proverb 10:22) Akoz ou pa diskit sa avek ou paran?

Varye nou Metod

17. Ki mannyer nou kapab rankontre plis dimoun dan teritwar nou kongregasyon?

¹⁷ Pour laplipar nou, nou sitiasyon pa permet nou zet nou “lasenn” dan bann teritwar ki koz bann langaz etranze. Me petet nou kapab rankontre plis dimoun dan teritwar nou prop kongregasyon. Ki mannyer? Par varye nou metod olye nou mesaz. Dan bokou landrwa, pli ale dimoun pe reste dan bann batiman ki annan bann sistenm sekirite, ki fer nou pa ganny akse avek zot. Bokou lezot i pa kot zot ler nou pas devan zot laport. Alor nou bezwen zet nou “lasenn” dan diferan landrwa e diferan ler. Kan nou fer sa, nou pe fer parey Zezi. I ti trouv fason pour koz avek dimoun dan diferan sirkonstans.—Matye 9:9; Lik 19:1-10; Zan 4:6-15.

18. Ki mannyer levidans i montre ki pres dan diferan landrwa i efikas? (Enkli bwat “Fer Disip dan Teritwar Biznes.”)

¹⁸ Dan serten parti lemonn, pres nenport landrwa kot i annan dimoun i en metod enportan pour fer disip. Bann proklanmater eksperyanse pe konsantre plis lo pres dan diferan landrwa. Apard ki pres port-an-port, bann proklanmater pe aprezan pres kot bann erport, dan bann lofis, laboutik, dan parking, lo bèstòp, lo semen, dan zarden piblik, lo lans, e lezot landrwa. En bon pe Temwen ki’n batize resaman ti ganny temwannyaz dan sa bann landrwa. Varye nou metod i ed nou akonpli oprofon sa latas ki Zezi in donn nou pour fer disip.—1 Korentyen 9:22, 23.

19. Ki laspe dan lord Zezi ki nou pou diskite dan lartik swivan?

¹⁹ Me travay Zezi pour fer disip i enkli detay pa zis konsernan akoz e kote nou devret fer sa travay, me osi konsernan kwa nou devret prese e ziska kan nou devret kontinyen fer li. Sa de laspe dan lord Zezi pou ganny egzaminen dan lartik swivan.

[Not anba lo paz]

Eski ou rapel?

• Pour ki rezon e avek ki motivasyon nou partisip dan travay predikasyon e fer disip?

• Ziska ki degre bann serviter Zeova ozordi in obeir lord Zezi pour fer disip dan tou nasyon?

• Ki mannyer nou kapab varye nou ‘metod lapes,’ e akoz nou devret fer sa?

[Bwat/Portre lo paz 21]

Piblikasyonn pour bann Aveg

Albert i en ansyen e en serviter aplentan ki reste Letazini. I pa vwar kler. Servi bann piblikasyon an Bray ki baze lo Labib, i ed li en kantite dan son minister, enkli son bann responsabilite konman sirveyan servis. Ki mannyer i pe fer son travay dan kongregasyon?

James, sirveyan prezidan i dir: “Zanmen nou’n deza ganny en sirveyan servis pli efikas dan nou kongregasyon ki Albert.” Albert i enn parmi apepre 5,000 dimoun aveg an Letazini ki ganny piblikasyon baze lo Labib an Bray dan langaz Angle ek Espanyol toudilon lannen. Annefe, depi 1912, lesklav fidel in fourni plis ki en santenn diferan piblikasyon an Bray. Par servi bann metod teknolozi avanse, bann lenprimri Temwen Zeova i prodwir plizyer milyon paz sak lannen dan plis ki dis langaz e distribye dan plis ki 70 pei. Eski ou konn en dimoun ki kapab benefisye avek bann piblikasyon baze lo Labib prepare pour dimoun aveg?

[Bwat/Portre lo paz 22]

Servi Langaz Siny pour fer Disip

Dan lemonn antye, plizyer milye Temwen, enkli bann zenn devoue, in aprann langaz siny pour ed bann dimoun sourd vin disip Kris. Ki son rezilta? Zis an Brezil, dan zis en lannen, 63 dimoun sourd ti batize resaman e ozordi 35 Temwen sourd i servi aplentan dan predikasyon. Dan lemonn antye, i annan plis ki 1,200 kongregasyon ek group pour bann dimoun sourd. Lo kote zeografi, sa sel rezyon pour langaz siny an Larisi i pli gran rezyon dan lemonn, sa i akoz sa bann kongregasyon ki sirveyan rezyonal i bezwen vizite i konpoz Larisi antye!

[Bwat lo paz 23]

Fer Disip dan Teritwar Biznes

Ler i ti pe vizit bann dimoun dan bann lofis kot zot travay, en Temwen an Awai ti rankontre en direkter en lakonpanni transportasyon. Menm si i ti byen okipe, sa zonm ti dakor pour etidye Labib pour 30 minit tou le semenn dan son lofis. Tou le Merkredi bomaten, i ti dir avek son bann staf pa deranz li avek bann kou-d-telefonn e apre i ti donn tou latansyon son letid. En lot Temwen an Awai i etidye Labib en fwa par semenn avek en kordonnyen dan son latelye. Sa letid i ganny fer lanmenm lo kontwar. Ler en kliyan i arive, sa Temwen i avans akote. Ler i ale, zot repran letid.

Sa direkter ek sa kordonnyen ti ganny kontakte akoz bann Temwen ti pran linisyativ pour zet zot “lasenn” dan diferan landrwa. Eski ou kapab mazin bann landrwa dan teritwar ou kongregasyon kot ou kapab zwenn dimoun ki souvan pa kot zot?

[Portre lo paz 23]

Eski ou kapab servi dan en teritwar ki koz en langaz etranze?