Kontinyen fer dibyen

“[Kontinyen] . . . fer dibyen.”—LIK 6:35.

1, 2. Akoz i souvan difisil pour fer dibyen anver lezot?

I DIFISIL pour fer dibyen anver lezot. Petet bann dimoun anver ki nou demontre lanmour pa demontre lanmour anver nou an retour. Menm si nou fer nou mye pour ed dimoun par fer zefor pour partaz avek zot sa “Levanzil laglwar” konsernan sa Bondye ere ek son Garson, i kapab ki zot pa montre okenn lentere oubyen rekonesans. (1 Tim. 1:11) Lezot i montre ki zot vreman “lennmi [“poto martir,” NW] Kris.” (Fili. 3:18) Konman Kretyen, ki mannyer nou devret tret zot?

² Zezi ti dir avek son bann disip: “[Kontinyen] kontan ou bann lennmi e fer dibyen.” (Lik 6:35) Aprezan annou egzamin byen sa konsey. Nou osi nou pou benefisye atraver sa bann pwen ki Zezi ti fer resorti konsernan fer dibyen lezot.

“Kontan zot lennmi”

3. (a) Dan ou prop mo, fer en rezimen sa ki Zezi ti dir dan Matye 5:43-45. (b) Ki pwennvi bann sef relizye Zwif dan premye syek ti devlope konsernan bann Zwif ek bann ki pa ti Zwif?

³ Dan son Sermon lo Montanny ki byen renonmen, Zezi ti demann avek son lodyans pour kontan zot lennmi e priy pour bann ki persekit zot. (Lir Matye 5:43-45.) Bann dimoun ki ti prezan sa zour ti Zwif e ti konn byen sa lord Bondye: “Ou pa devret fer vanzans, ni gard rankin anver bann garson ou pep; e ou devret kontan ou prosen parey ou menm.” (Lev. 19:18) Bann sef relizye Zwif dan premye syek ti krwar ki “bann garson ou pep” ek “ou prosen” ti zis bann Zwif. Dapre Lalwa Moiz bann Izraelit ti bezwen reste separe avek lezot nasyon, me bann Zwif ti’n devlop sa pwennvi ki tou dimoun ki pa ti Zwif ti bann lennmi e zot ti devret ay sa bann dimoun.

4. Ki mannyer bann disip Zezi ti devret azir anver zot bann lennmi?

⁴ De lot kote Zezi ti dir: “[Kontinyen] kontan zot lennmi e priy pour bann ki persekit zot.” (Mat. 5:44) Son bann disip ti bezwen azir avek lanmour anver tou dimoun ki ti annan laenn pour zot. Dapre Levanzil Lik, Zezi ti dir: “Alor, mon dir zot tou ki pe ekout mwan, kontan zot bann lennmi, fer dibyen bann ki ay zot, beni bann ki modi zot, priy pour bann ki ensilte zot.” (Lik 6:27, 28) Parey bann dimoun dan premye syek ki ti pran aker parol Zezi, nou devret “fer dibyen bann ki ay” nou, par azir dan en bon fason menm si zot mal azir anver nou. Nou “beni bann ki modi” nou, par koz avek zot dan en fason zantiy. E nou “priy pour bann ki persekit” nou an servan vyolans fizik oubyen ki “ensilte” nou dan lezot fason ankor. Ler nou priy dan sa fason sa i montre ki nou kontan nou lennmi akoz nou pe demann Zeova ki sa bann ki pe persekit nou i sanz zot leker e fer bann aksyon ki pou fer zot ganny faver Zeova.

5, 6. Akoz nou devret kontan nou lennmi?

⁵ Akoz nou devret demontre lanmour anver nou lennmi? Zezi ti dir: “Koumsa, zot a vin garson zot Papa ki dan lesyel.” (Mat. 5:45) Si nou swiv sa konsey, nou pou vin “bann garson” Bondye akoz nou imit Zeova, ki “fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” Parey resi Lik i fer resorti, Bondye “i bon anver bann dimoun engra e move.”—Lik 6:35.

⁶ Pour montre akoz i ti enportan pour son bann disip ‘kontinyen kontan zot lennmi,’ Zezi ti dir: “Si zot kontan zis bann ki kontan zot, ki rekonpans zot pou gannyen? Eski bann kolekter taks pa i fer parey! E si zot koz zis avek zot bann frer, eski zot in fer keksoz ekstraordiner? Eski bann payen pa i fer parey!” (Mat. 5:46, 47) Si nou kontan zis bann ki kontan nou, sa pa merit okenn “rekonpans” oubyen faver Bondye. Menm bann kolekter taks ki ti souvan ganny meprize, ti demontre lanmour anver dimoun ki ti kontan zot.—Lik 5:30; 7:34.

7. Akoz i pa ti pou ekstraordiner si nou dir bonzour zis nou bann “frer”?

⁷ Bann Zwif ti abitye enkli sa mo “lape” ler zot ti dir bonzour kanmarad. (Ziz 19:20; Zan 20:19) Sa ti en fason endirek pour swet sa dimoun ki zot ti dir bonzour en bon lasante, byennet ek prosperite. I pa ti pou en “keksoz ekstraordiner” si nou ti dir bonzour zis bann ki nou konsider konman nou “frer.” Parey Zezi ti fer resorti, “bann payen” ti pe fer parey.

8. Ki Zezi ti pe ankouraz son lodyans pour fer ler i ti dir: “Vin parfe”?

⁸ Akoz pese ki zot in erite, i enposib pour bann disip Kris napa okenn defo e parfe. (Rom. 5:12) Pourtan, Zezi ti termin sa morso diskour an dizan: “Zot par konsekans, vin parfe parey zot Papa ki dan lesyel i parfe.” (Mat. 5:48) Alors i ti pe ankouraz son lodyans pour imit zot “Papa dan lesyel” pour annan en lanmour parfe setadir fer zot lanmour vin parfe oubyen konplet par kontan zot lennmi. Nou ganny demande pour fer parey.

Akoz nou devret pardonnen?

9. Ki sinifikasyon sa parol: “Pardonn nou nou [det]”?

⁹ Nou kontinyen fer dibyen ler nou pardonn avek mizerikord sa ki fer pese kont nou. Anfet, dan en morso sa lapriyer model nou trouv sa parol swivan: “Pardonn nou nou pese [oubyen “det,” NW], parey nou pardonn bann ki’n fer nou ditor.” (Mat. 6:12). Byensir, sa i pa bann det an rapor avek larzan. Levanzil Lik i montre ki sa “det” ki Zezi ti pe koz lo la ti bann pese, akoz i dir: “Pardonn nou nou pese, parski nou menm nou pardonn bann ki’n fer nou ditor.”—Lik 11:4.

10. An rapor avek pardonnen, ki mannyer nou kapab imit Bondye?

¹⁰ Nou bezwen imit Bondye, ki pare pour pardonn bann dimoun ki’n komet pese e ki’n repantir. Zapot Pol ti ekrir: “Vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.” (Efe. 4:32) Psalmis David ti sante: “Zeova i annan mizerikord ek konpasyon, pa ankoler vitman, e annan en kantite labonte leker. . . . I pa’n azir avek nou selon nou bann pese e i pa’n anmenn lo nou sa ki nou ti merite dapre nou bann fot. . . . Parey kot soley i leve i lwen avek kot soley i kouse, pareyman i’n met tou nou bann lofans lwen avek nou. Parey en papa i demontre mizerikord anver son bann garson, Zeova in demontre mizerikord anver bann ki annan lakrent pour li. Parski li i konn byen avek ki nou ganny formen, i mazinen ki nou lapousyer.”—Ps. 103:8-14.

11. Lekel ki Bondye i pare pour pardonnen?

¹¹ Bann dimoun i kapab ganny pardonnen avek Bondye si zot pardonn sa bann ki fer pese kont zot. (Mark 11:25) Pour met lanfaz lo sa pwen, Zezi ti dir: “Si zot pardonn bann ki’n fer zot ditor, zot Papa ki dan lesyel i a osi pardonn zot. Me si zot pa pardonn lezot ki’n fer zot ditor, zot Papa osi pa pou pardonn zot zot pese.” (Mat. 6:14, 15) Wi, Bondye i pardonn zis bann ki pare pour pardonn lezot. E en fason pour kontinyen fer sa i par swiv konsey Pol: “Parey Senyer ti pardonn zot, zot osi pardonn kanmarad.”—Kol. 3:13.

Aret zize

12. Ki konsey Zezi ti donnen konsernan ziz lezot?

¹² En lot fason pour fer dibyen ti ganny mansyonnen dan sa Sermon lo Montanny ler Zezi ti demann avek son lodyans pour aret zize e apre i ti servi en legzanp pwisan pour met lanfaz lo sa pwen. (Lir Matye 7:1-5.) Annou vwar ki Zezi ti pe dir ler i ti demann zot pour aret zize.

13. Ki mannyer lodyans Zezi ti pou kapab kontinyen “pardonnen”?

¹³ Levanzil Matye i sit parol Zezi an dizan: “[“Aret,” NW] zize e ou pa ava ganny zize.” (Mat. 7:1) Dapre Lik, Zezi ti dir: “[“Aret,” NW] zize e ou pa ava ganny zize. [“Aret,” NW] kondann lezot, e ou pa a ganny kondannen. Pardonnen e ou a ganny pardonnen.” (Lik 6:37) Bann Farizyen dan premye syek ti ziz lezot dan en fason dir, dapre bann tradisyon ki pa baze lo Labib. Okenn dimoun parmi lodyans Zezi ki ti pe fer sa ti bezwen ‘aret zize.’ O kontrer, zot ti bezwen kontinyen “pardonn” fot lezot. Zapot Pol ti donn sa menm konsey an rapor avek pardonnen.—Lir Efezyen 4:32.

14. Par pardonn lezot ki bann disip Zezi ti ankouraz lezot pour fer?

¹⁴ Ler bann disip Zezi ti pardonnen, zot ti ankouraz lezot dimoun pour pardonnen zot osi. “Parski Bondye pou ziz ou parey ou ziz lezot, e i pou servi menm mezir pour ou, parey ou’n servi pour lezot.” (Mat. 7:2) An rapor avek fason ki nou tret lezot, nou rekolte sa ki nou senmen.—Gal. 6:7.

15. Ki mannyer Zezi ti montre ki i mal pour tro kontan kritike?

¹⁵ Pa bliye ki dan sa lord pour montre ki i mal pour kontan kritike, Zezi ti demande: “Ki mannyer ou war lapay ki dan lizye ou frer me ou pa remark poto ki dan sa ki pour ou? Oubyen ki mannyer ou kapab dir ou frer: ‘Les mwan tir sa lapay dan ou lizye’ kan ou annan en poto dan sa ki pour ou?” (Mat. 7:3, 4) En dimoun ki annan sa tandans pour kritik lezot i remark bann pti defo dan “lizye” zot frer. Sa dimoun ki kontan kritike pe sizere ki son frer pa vwar keksoz dan sa bon fason e i napa bon zizman. Menm si i’n fer en pti fot zis parey groser en lapay, sa dimoun ki kontan kritike pour propoz avek son frer pour les li “tir sa lapay” dan son lizye. Dan en fason ipokrit i pare pour ofer son frer led pour vwar keksoz dan en fason pli kler.

16. Akoz nou kapab dir ki bann Farizyen ti annan en “poto” dan zot lizye?

¹⁶ Bann sef relizye Zwif ti vreman kontan kritik lezot. Annou pran en legzanp: Kan en zonm aveg ki ti’n ganny geri par Zezi ti dir ki Zezi ti bezwen sorti kot Bondye, bann Farizyen ti replike avek en lakoler: “Ou’n ne dan pese e aprezan ou oule esey ansenny nou.” (Zan 9:30-34) An sa ki konsern ziz keksoz dan sa bon fason dapre bann standar Bondye, bann Farizyen ti annan en “poto” dan zot prop lizye e ti konpletman aveg. Alors, Zezi ti dir: “Ipokrit, tir poto dan ou lizye avan, apre ou a war ase kler pour tir lapay ki dan lizye ou frer.” (Mat. 7:5; Lik 6:42) Si nou determinen pour fer sa ki byen e tret lezot byen, nou pa pou kritik zot dan en fason dir, ni toultan pe get lapay dan lizye nou frer dan en sans senbolik. O kontrer, nou pou rekonnet ki nou enparfe e devret evite alors pour tro kontan kritik nou bann frer ek ser.

Fason ki nou devret tret lezot

17. An rapor avek Matye 7:12, ki mannyer nou devret tret lezot?

¹⁷ Dan son Sermon lo Montanny, Zezi ti fer resorti ki Bondye i azir parey en papa anver Son bann serviter par reponn zot lapriyer. (Lir Matye 7:7-12.) I enteresan pour note ki Zezi ti etablir en lareg: “Alor fer pour lezot sa ki ou oule lezot i fer pour ou: sanmenm ki Lalwa ek bann profet i dir fer.” (Mat. 7:12) Zis ler nou tret lezot dimoun dan sa fason ki nou prouve ki nou bann vre disip Zezi Kri.

18. Ki mannyer “Lalwa” ti montre ki nou devret tret lezot parey nou oule lezot i tret nou?

¹⁸ Apre ki i ti’n dir ki nou devret tret lezot parey nou oule lezot i tret nou, Zezi ti azoute: “Sanmenm ki Lalwa ek bann profet i dir fer.” Ler nou tret lezot dan sa fason ki Zezi ti eksplike klerman, nou pe azir dapre “Lalwa” setadir bann lekritir ki form parti liv Zenez ziska Deterononm. Apard revel plan Zeova pour anvoy en desandans ki ti pou retir tou mesanste, sa bann liv i koz konsernan Lalwa ki Bondye ti donn avek nasyon Izrael atraver Moiz dan lannen 1513 A.N.L. (Zen. 3:15) Parmi lezot keksoz, sa Lalwa ti fer kler ki bann Izraelit ti bezwen zis, pa fer lapreferans e fer dibyen anver bann ki aflize ek bann rezidan etranze ki dan sa pei.—Lev. 19:9, 10, 15, 34.

19. Ki mannyer “bann profet” ti montre ki zot devret fer dibyen?

¹⁹ Par refer avek “bann profet” Zezi ti pe mazin konsernan bann liv profetik dan Lekritir Ebre. Ladan i annan bann profesi ki’n ganny akonplir lo Kris. Sa bann mesaz i osi montre ki Bondye i beni son pep ler zot fer sa ki drwat dan son lizye e tret lezot dan en bon fason. Par egzanp, profesi Izai ti donn bann Izraelit sa konsey: “La sa ki Zeova in dir: ‘Gard lazistis, e fer sa ki drwat. . . . Ere sa zonm ki fer sa, e sa imen ki tyonbo li for, ki gard saba pour pa mank respe pour li, . .  ki anpes son lanmen fer okenn keksoz mal.’” (Iza. 56:1, 2) Wi, Bondye i ekspekte son pep pour kontinyen fer dibyen.

Toultan fer dibyen anver lezot

20, 21. Ki mannyer sa lafoul ti reazir anver Sermon lo Montanny ki Zezi ti fer e akoz nou devret medit lo sa Sermon?

²⁰ Nou’n egzamin zis detrwa parmi sa kantite pwen enportan ki Zezi ti fer resorti dan son Sermon ekstraordiner lo Montanny. Me kantmenm sa, nou kapab fasilman konpran reaksyon sa bann ki ti tann sa ki i ti dir sa zour. Labib i dir: “Kan Zezi ti’n fini dir zot sa bann keksoz lafoul ti byen etonnen par mannyer ki i ti ansennyen. I pa ti ansenny parey zot bann profeser Lalwa; i ti ansenny avek lotorite.”—Mat. 7:28, 29.

²¹ I kler ki Zezi Kri ti sa “Konseye Merveye” ki ti’n ganny predir. (Iza. 9:6) Sa Sermon lo Montanny i sa legzanp pli enportan ki montre ki Zezi i konnen ki mannyer son Papa dan lesyel i get keksoz. Anplis ki sa pwen ki nou’n diskite, sa diskour i annan en kantite pour dir nou konsernan vre boner, ki mannyer pour evit limoralite, fason pour pratik ladrwatir, ki nou bezwen fer pour annan en lavenir asire e zwaye e bokou lezot keksoz ankor. I ti pou byen si ou lir ankor enn fwa Matye sapit 5 ziska 7 e ti a byen ki ou priy lo la. Medit lo sa bann konsey merveye Zezi ki’n ganny rikorde ladan. Aplik sa bann konsey ki Kris ti dir dan sa Sermon Lo Montanny dan ou lavi. Alors ou pou pli byen kapab fer plezir Zeova, tret lezot byen e kontinyen fer dibyen.

Ki ou pou reponn?

• Ki mannyer nou devret tret nou lennmi?

• Akoz nou devret pardonn lezot?

• Ki Zezi ti dir konsernan ziz lezot?

• Dapre Matye 7:12, ki mannyer nou devret tret lezot?

[Not adisyonnel]

Eski ou konnen akoz Zezi ti dir: ‘Aret zize’?

[Portre lo paz 12]

Akoz nou devret priy pour bann ki persekit nou?

[Portre lo paz 15]

Eski ou tret lezot parey ou ti pou kontan ganny trete?