Zezi i resisit garson en vev

Pa bokou letan apre ki Zezi in geri serviter sa zofisye larme, i kit Kapernaoum e al Nain, en lavil ki apepre 32 kilomet sid was avek Kapernaoum. I pa tousel. Son bann disip ek en gran lafoul i vwayaz avek li. I tre probab ki i lo tar apremidi ler zot ariv an deor lavil Nain. Zot zwenn en bon pe Zwif ki pe anmenn en lekor mor. Sa i lekor en zenn garson ki zot pe al antere an deor lavil.

Manman sa zenn onm i pli tris dan tou. I deza en vev e la aprezan son sel zanfan in mor. Ler son msye ti mor omwen i ti ankor annan son garson ki i kontan en kantite avek li. I ti’n bezwen vreman pros avek son garson ki ti son sel lespwar ek sekirite pour lavenir. La aprezan, li osi in mor. Napa personn ankor pour siport li e reste avek li.

Zezi i pran lapenn ler i vwar ki kantite sa madanm i tris e i mazin son sityasyon difisil. Avek tandres ek lasirans, Zezi i dir li: “Aret plere.” Apre i fer en lot keksoz. I al pli pre e tous sa lanmak kot lekor sa garson i ete. (Lik 7:13, 14) Ler zot vwar sa, bann dimoun ki pe al lanterman i sirprann e zot aret marse. I bezwen ki zot pe mazinen, ‘Ki sa zonm pe esey dir? Ki i pou fer?’

Bann ki pe vwayaz avek Zezi in deza vwar li fer bann mirak e geri en kantite malad, ki zot zot pe mazinen? Aparaman zot pa’n deza vwar Zezi resisit okenn dimoun mor. Menm si dimoun ti deza ganny resisite dan lepase, eski Zezi i kapab fer sa li osi? (1 Lerwa 17:17-23; 2 Lerwa 4:32-37) Zezi i donn sa lord: “Zenn onm, mon dir ou, leve!” (Lik 7:14) Sanmenm sa ki arive! Sa zenn onm i asize e konmans koze. Zezi i anmenn li kot son manman ki pa oule krwar sa ki’n arive me ki vreman kontan. La i nepli tousel.

Ler bann dimoun i vwar ki sa zenn onm i vreman vivan, zot loue Zeova, sa Enn ki donn lavi. Zot dir: “En gran profet in vin parmi nou.” Lezot dimoun i konpran sinifikasyon sa ki Zezi in fer e zot dir: “Bondye in mazin son pep.” (Lik 7:16) Nouvel konsernan sa mirak ekstraordiner i fann partou dan bann rezyon dan zalantour e petet menm ziska Nazaret, sa lavil kot Zezi in grandi ki apepre en zistans dis kilomet avek lavil Nain. Sa nouvel i menm ariv ziska dan rezyon Zide dan sid.

Zan ki batize i ankor dan prizon e i vreman anvi konn plis lo sa ki Zezi pe fer. Son bann disip i rakont li sa bann mirak. Ki mannyer i reazir?