Rol Mari dan plan Bondye

PANDAN minister Zezi, en madanm dan lafoul ti kriye e dir: “Ere sa madanm ki’n donn ou nesans e ki’n donn ou tete.” Si Zezi ti anvi ki son manman i ganny adore, pa i ti pou’n sezi sa bon loportinite pour demann zot pour fer sa. O kontrer, i ti reponn: “Ere plito dimoun ki ekoute e obei[r] parol Bondye.”—Lik 11:27, 28.

Zezi pa ti onor son manman dan en fason spesyal e i pa ti zanmen demann son bann disip pour fer sa. Ki mannyer sa i posib vi ki bokou dimoun pe senserman ador Mari? Annou egzamin sa ki Labib i dir konsernan sa bann lansennyman ki renonmen lo manman Zezi?

“Pleine de grâce,” “bénie entre toutes les femmes”

Lanz Gabriyel ti dir Mari ki rol i ti pou annan dan plan Bondye. Sa menm zour, i ti adres Mari dan sa fason: “Mari, rezoui[r], ou ki’n ganny faver Bondye, Senyer i avek ou.” (Lik 1:28) Dan en lot tradiksyon Labib sa menm verse i ganny tradwir koumsa: “Je te salue, pleine de grâce, le Seigneur est avec toi.” En pe letan apre, Elizabet ti adres Mari par sa bann parol swivan: “Bondye in beni ou parmi tou bann madanm, e ki sa zanfan ki ou pou gannyen i osi ganny beni.” (Lik 1:42) Eski lafason ki Mari ti ganny adrese dan sa bann verse i montre ki i devret ganny adore?

An realite, non. Menm si sa bann parol i ganny enkli dan en lapriyer ki bann Katolik i adres avek Mari, Labib pa dir ki nou devret priy avek li. Lanz Gabriyel ek Elizabet ti rekonnet ki Mari, ti sa enn ki ti’n ganny sa privilez ekstraordiner pour donn nesans Mesi, me napa okenn par dan Lekritir kot i dir nou ki nou devret priy avek li. Olye ankouraz bann dimoun pour priy avek Mari, kan son bann disip ti demann li pour ansenny zot konman pour priye, Zezi ti dir zot ki zot devret adres zot lapriyer avek son Papa. Annefe, sa model lapriyer byen renonmen ki Zezi ti ansennyen i konmans avek sa bann parol swivan: “Nou Papa ki dan lesyel.”—Matye 6:9, nou ki’n met an italik.

Enn parmi bann dirizan

En lot lansennyman byen renonmen lo Mari i ki i’n aprezan vin “Larenn lesyel.” Me Labib pa’n zanmen donn li en tit koumsa. Parkont, Labib i montre ki Mari i annan en privilez spesyal dan laranzman ki Bondye in fer dan lesyel. Ki sa privilez?

Zezi ti dir ki serten son bann disip fidel ti pou rennyen avek li dan son Rwayonm. (Lik 22:28-30) Zezi pou donn sa bann ki i’n swazir lotorite pour vin “pret pour servi non Bondye, e zot pou rennyen lo later.” (Revelasyon 5:10) Labib i klerman ed nou pour konpran ki Mari i parmi sa bann ki’n ganny sa gran privilez. Kwa ki fer nou dir sa?

Petet ou rapel ki apre lanmor Zezi, Mari ti persevere “dan lapriyer” avek bann disip ek bann frer Zezi. Apepre 120 dimoun ti zwenn ansanm pour priye, enkli “bann madanm” osi. (Akt 1:12-15) Labib i dir ki zour “Lapannkot, tou bann disip ti’n rasanble ansanm dan en menm landrwa,” lespri sen ti desann lo zot e fer zot koz dan lezot langaz.—Akt 2:1-4.

Vi ki Mari ti enn parmi sa 120 dimoun ki ti resevwar lespri sen, sa i levidans ki li osi i ti’n ganny swazir pour al rennyen ansanm avek Zezi dan son Rwayonm dan lesyel. Alor, nou annan tou rezon pour krwar ki Mari pe aprezan asiz ansanm avek Zezi dan son laglwar dan lesyel. (Romen 8:14-17) Zis mazin lo sa rol spesyal ki li ek lezot ki’n ganny swazir pou annan dan lakonplisman plan Bondye.

I pou ede pour anmenn benediksyon merveye

Liv Revelasyon dan Labib i dir ki 144,000 dimoun pou ganny resisite pour al rennyen avek Zezi dan son Rwayonm konman bann pret, ziz ek lerwa. (Revelasyon 14:1, 4; 20:4, 6) Konman bann pret zot pou ed bann imen obeisan tir byenfe avek sakrifis Zezi e fer zot vin parfe spirityelman, moralman e fizikman. (Revelasyon 21:1-4) Pa i pou vreman spesyal pour tou bann adorater fidel Zeova pour eksperyans sa moman merveye!a

Mari ti annan e i ankor annan en rol dan lakonplisman plan Bondye. I vo lapenn ki nou imit li pour son bann kalite ki i ti annan tel parey limilite, lafwa, lobeisans, son devosyon konman en manman e fodre pa ki nou oubliy son landirans dan leprev. Vi ki i’n donn nesans Mesi e i annan en rol dan sa laranzman pour ed limanite tir byenfe avek sakrifis Zezi, i merit byen ganny respekte.

Annefe, sa leson pli enportan ki nou kapab aprann avek Mari i ki ansanm avek tou lezot serviter fidel Bondye, zot pa ador okenn lezot bondye eksepte Zeova. Mari, ansanm avek lezot ki pou al rennyen ansanm avek Kris dan lesyel, zot kriye an dizan: “Pour li, sa Enn ki pe asiz lo tronn [Zeova] e pour Lanyo [Zezi Kri], [l]ouanz, loner, laglwar, pisans pour touzour!”—Revelasyon 5:13; 19:10.

[Not anba lo paz 4]

[Ekstre lo paz 4]

I vo lapenn ki nou imit limilite, lafwa ek lobeisans ki Mari ti annan