Kontinyen “Raport Bokou Fri”

“Raport bokou fri e par sa zot montre ki zot mon bann disip.”—ZAN 15:8.

 1. (a) Ki kondisyon pour reste en disip ki Zezi ti rapel son bann zapot? (b) Ki kestyon nou devret demann nou lekor?

TI SA zour swar avan son lanmor. Zezi ti’n pran en bon pe letan pour ankouraz son bann zapot par koz avek zot dan en fason entim e fran. Petet minwi ti’n sonnen, me Zezi ki ti ganny motive par lanmour pour son bann zanmi, ti kontinyen koze. Apre, pandan son konversasyon, i ti rapel zot ankor en kondisyon ki zot bezwen ranpli pour reste konman son bann disip. I ti dir: “Mon Papa i ganny glorifye ler zot raport bokou fri e par sa zot montre ki zot mon bann disip.” (Zan 15:8) Eski ozordi nou ranpli sa kondisyon pour reste en disip? Ki savedir “raport bokou fri”? Pour konn larepons, annou revwar sa konversasyon ki ti ganny fer sa zour swar.

 2. Ki konparezon konsernan fri Zezi ti donnen sa zour swar avan son lanmor?

² Sa konsey pour raport fri i form parti en konparezon ki Zezi ti donn son bann zapot. I ti dir: “Mwanmenm vre pye rezen, e mon Papa i zardinyen. Tou brans ki atase avek mwan e ki pa raport fri i koupe. Tou brans ki raporte i tay zot pour fer zot raport ankor plis fri. Lansennyman ki mon’n donn zot, in deza pirifye zot. Reste atase avek mwan parey mon reste atase avek zot. En brans pa kapab raport fri par limenm, amwen ki i reste atase avek son pye. Zot osi parey, zot pa kapab raport fri si zot pa reste atase avek mwan. Mwanmenm pye rezen e zot, zot bann brans. . . . Mon Papa i ganny glorifye ler zot raport bokou fri, e par sa zot montre ki zot mon bann disip. Parey mon Papa in kontan mwan, mon’n kontan zot parey, reste dan mon lanmour. Si zot obei mon bann konmannman, zot pou reste dan mon lanmour.”—Zan 15:1-10.

 3. Ki bann disip Zezi i devret fer pour kapab raport fri?

³ Dan sa konparezon, Zeova i Zardinyen, Zezi i sa pye rezen, e bann brans i bann zapot ki Zezi ti pe koz avek. Osi lontan ki bann zapot ti fer zefor pour “reste atase” avek Zezi, zot ti pou raport fri. Zezi ti apre eksplike konman bann zapot ti pou kapab mentenir sa linite enportan: “Si zot obei mon bann konmannman, zot pou reste dan mon lanmour.” Plitar, kan zapot Zan ti ekrir son bann konpanyon Kretyen, i ti dir preski menm parol avek sa ki Zezi ti dir: “Sa ki obzerv komannman [Kris] i reste atase avek li.”a (1 Zan 2:24; 3:24, NW ) Alors, par gard komannman Kris, son bann disip i reste atase avek li, e an retour, sa linite i fer zot raport fri. Ki karakteristik sa fri ki nou devret raporte i annan?

Loportinite pour fer Progre

 4. Ki nou kapab aprann lefe ki Zeova i ‘koup’ tou brans ki pa raport fri?

⁴ Dan sa konparezon lo pye rezen, Zeova i ‘koup’ en brans ler i pa raport fri. Ki sa i dir nou? Sa i pa zis dir nou ki tou disip i ekspekte raport fri me osi ki zot tou zot kapab fer li, nenport ki sitiasyon ki zot ladan oubyen kantmenm i kapab annan serten keksoz ki pe anpes zot. Apre tou, Zeova pa ti pou ‘koup,’ oubyen diskalifye en disip Kris akoz i’n fel pour akonplir en keksoz ki an deor son kapasite. Sa ti pou al kont son fason azir ki ranpli avek lanmour.—Psonm 103:14; Kolosyen 3:23; 1 Zan 5:3.

 5. (a) Konman konparezon Zezi i endike ki nou kapab fer progre pour raport fri? (b) Ki sa de kalite fri ki nou pou egzaminen?

⁵ Sa konparezon lo pye rezen ki Zezi i servi, i osi montre nou ki nou devret rod loportinite pour fer progre dan nou bann aktivite konman disip otan ki nou sirkonstans i permet nou. Remarke konman Zezi i eksplik sa: “Tou brans ki atase avek mwan e ki pa raport fri i koupe. Tou brans ki raporte i tay zot pour fer zot raport ankor plis fri.” (Zan 15:2, nou ki’n met an italik.) Alafen son konparezon, Zezi ti sipliy son bann disip pour raport “bokou fri.” (Verse 8, nou ki’n met an italik.) Ki mesaz nou gannyen la? Etan bann disip, nou devret pa zanmen neglizan e pa santi nou konsernen. (Revelasyon 3:14, 15, 19) Plito, nou devret rod fason pour progrese dan raport fri. Ki kalite fri ki nou devret fer zefor pour raport plis? I annan de kalite: (1) “fri Lespri” ek (2) fri Rwayonm.—Galat 5:22, 23; Matye 24:14.

Bann Kalite ki Kretyen i demontre

 6. Konman ki Zezi Kri ti aksantye valer sa premye fri lespri?

⁶ Premye parmi “fri Lespri” i lanmour. Lespri sen Bondye i prodwir lanmour dan bann Kretyen, akoz zot obeir sa komannman ki Zezi ti donnen zis avan i ti donn sa konparezon lo pye rezen ki prodwir fri. I ti dir son bann zapot: “La mon donn zot en konmannman nouvo: kontan kanmarad.” (Zan 13:34) Anfet, toudilon son konversasyon ki Zezi ti fer sa dernyen swar, i ti kontinyen rapel son bann zapot ki zot bezwen montre lanmour.—Zan 14:15, 21, 23, 24; 15:12, 13, 17.

 7. Konman zapot Pyer ti montre ki raport fri i relye avek demontre bann kalite parey pour Kris?

⁷ Pyer, ki ti la sa zour swar, ti konpran ki bann vre disip Kris i devret montre lanmour parey pour Kris ek lezot kalite ki relye avek li. Plizyer lannen plitar, Pyer ti ankouraz bann Kretyen pour kiltiv bann kalite tel parey disiplin lo nou lekor, lafeksyon fraternel, ek lanmour. I ti azoute ki si nou fer sa i pou ‘rann nou aktif e prodiktif.’ (2 Pyer 1:5-8) Nenport sitiasyon ki nou ladan, i posib pour nou demontre fri lespri. Alors, annou fer zefor pour demontre plis lanmour, labonte, ladouser, ek lezot kalite parey pour Kris. “Lalwa pa kont sa bann keksoz,” oubyen met en limit pour sa. (Galat 5:23) Annou vreman raport “bokou fri.”

Raport Fri Rwayonm

 8. (a) Ki relasyon i annan ant fri lespri ek fri Rwayonm? (b) Ki kestyon nou merit konsidere?

⁸ Bann fri ki annan en zoli kouler e ki’n mouste i fer zoli en pye dibwa. Toudmenm, valer sa fri pa depan zis lo son labote. Bann fri i osi enportan pour fer propaze sa kalite pye dibwa atraver zot lagrenn. Pareyman, fri lespri pa zis fer zoli nou personnalite Kretyen. Bann kalite parey lanmour ek lafwa i osi motiv nou pour partaz sa mesaz Rwayonm dan Parol Bondye, ki parey en lagrenn. Remarke konman zapot Pol i fer resorti sa relasyon enportan. I dir: “Parski nou annan sa menm lespri lafwa [en parti fri lespri] nou osi, e se pour sa rezon ki nou pe koze.” (2 Korentyen 4:13) Dan sa fason, Pol ti eksplike ankor ki nou “touzour rann glwar Bondye, setadir, . . . par nou labous.” Sa i dezyenm kalite fri ki nou devret manifeste. (Ebre 13:15) Eski i annan loportinite dan nou lavi kot nou kapab vin pli prodiktif, pour vreman raport “bokou fri,” konman bann proklanmater Rwayonm Bondye?

 9. Eski raport fri i menm parey avek fer disip? Eksplike.

⁹ Pour kapab byen reponn, nou bezwen premyerman konpran kisisa fri Rwayonm. Eski i pou byen pour dir ki raport fri savedir fer disip? (Matye 28:19) Eski sa fri ki nou pou raporte i refer prensipalman avek bann dimoun ki nou ede pour vin bann adorater batize Zeova? Non. Si sa ti leka, sitiasyon ti pou vreman dekourazan pour bann Temwen ki’n proklanm mesaz Rwayonm pour plizyer lannen dan bann teritwar kot dimoun pa montre preski ditou lentere. Wi, si fri Rwayonm ki nou raporte i ganny reprezante selman par nouvo disip, sa bann Temwen ki travay dir ti pou parey sa bann brans ki pa raporte dan konparezon Zezi! Byensir, sa i pa leka. Alors, lekel fri Rwayonm prensipal dan nou minister?

Raport Fri par propaz Lagrenn Rwayonm

10. Konman parabol senmer lagrenn ki Zezi ti rakonte i montre kisisa fri Rwayonm e ki i pa ete?

¹⁰ Parabol senmer lagrenn ki Zezi ti rakonte i donn nou larepons. I en larepons ankourazan pour bann ki pres dan bann teritwar ki mwen prodiktif. Zezi ti dir ki sa lagrenn i mesaz Rwayonm ki trouve dan Parol Bondye, e ki sa later i reprezant leker senbolik en dimoun. Serten lagrenn “ti tonm dan bon later, zot ti pouse, zot ti donn en rekolt.” (Lik 8:8) Ki rekolt? Bon, apre ki boutir en pye dible i pouse e vin matir, i pa prodwir bann pti boutir konman son fri me nouvo lagrenn. Pareyman, en Kretyen i pa neseserman prodwir bann nouvo disip konman son fri me nouvo lagrenn Rwayonm.

11. Konman ou pou dekrir fri Rwayonm?

¹¹ Alors dan sa ka, sa fri pa ni bann nouvo disip ni bann bon kalite ki Kretyen i demontre. Vi ki sa lagrenn i mesaz Rwayonm, sa fri i bezwen refer avek plis lagrenn. Raport fri dan sa ka i vedir koz lo Rwayonm. (Matye 24:14) Nenport ki sitiasyon ki nou ladan, eski i posib pour nou raport sa fri Rwayonm, setadir proklanm bon nouvel lo Rwayonm? Wi! Dan sa menm parabol, Zezi i eksplike akoz.

Donn nou Meyer pour Laglwar Bondye

12. Eski i posib pour tou Kretyen raport fri Rwayonm? Eksplike.

¹² Zezi ti dir: “Lagrenn ki tonm dan bon later, . . . i raport bann fri, ki san, ki swasant, ki trant.” (Matye 13:23) Lagrenn ki ganny senmen dan en plantasyon, pa raport menm kantite fri depandan lo sirkonstans. Pareyman, sa ki nou kapab fer pour proklanm sa bon nouvel i kapab varye depandan lo nou sirkonstans. Zezi ti montre ki i ti rekonnet sa. Serten i kapab annan plis loportinite; lezot i kapab annan en pli bon lasante ek plis lenerzi. Alors, sa ki nou fer i kapab plis oubyen pli pti gin avek sa ki lezot i fer. Me si nou pe donn nou meyer, Zeova i satisfe. (Galat 6:4) Si nou’n avanse dan laz oubyen nou annan en maladi ki rann nou fay, sa i kapab limit sa ki nou kapab fer dan predikasyon. Kantmenm sa, Zeova, nou Papa ki annan konpasyon, i sirman vwar nou konman enn ki kontinyen “raport bokou fri.” Akoz? Parski nou donn li ‘tou sa ki nou annan,’ setadir nou servi li avek tou nou leker.b—Mark 12:43, 44; Lik 10:27.

13. (a) Ki rezon prensipal nou annan pour nou “ale” e raport fri Rwayonm? (b) Kwa ki pou ed nou kontinyen raport fri dan bann teritwar kot dimoun pa montre preski ditou lentere? (Vwar bwat lo paz 29.)

¹³ Nenport ki kantite fri Rwayonm ki nou kapab prodwir, nou pou ganny motive pour ‘ale e kontinyen raport bokou fri’ kan nou gard antet rezon akoz nou pe fer sa. (Zan 15:16) Zezi ti mansyonn rezon prensipal: “Mon Papa i ganny glorifye ler zot raport bokou fri.” (Zan 15:8) Wi, nou aktivite predikasyon i sangtifye non Zeova devan limanite. (Psonm 109:30) Honor, en Temwen fidel ki annan apepre 75 an, i dir: “Menm dan bann teritwar kot dimoun pa montre preski ditou lentere, i en privilez pour reprezant sa Enn ki Tre O.” Claudio i en Temwen devoue depi 1974. Kan i ti ganny demande akoz i kontinyen prese menm si en pti gin dimoun dan son teritwar i montre lentere, i ti sit Zan 4:34, kot nou lir parol Zezi: “Mon nouritir se pour obei lavolonte sa enn ki’n anvoy mwan, e fini travay ki i’n donn mwan.” Claudio ti azoute: “Parey Zezi, mon pa anvi zis konmanse me osi fini mon travay konman en proklanmater Rwayonm.” (Zan 17:4) Bann Temwen Zeova partou dan lemonn i annan menm lopinyon.—Vwar bwat “Konman pour ‘raport Fri avek Perseverans,’ ” lo paz 29.

Prese e ansennyen

14. (a) Ki de lobzektif ki travay Zan-Batis ek Zezi ti annan? (b) Konman ou pou dekrir aktivite bann Kretyen ozordi?

¹⁴ Premye proklanmater Rwayonm ki ganny mansyonnen dan Levanzil i Zan-Batis. (Matye 3:1, 2; Lik 3:18) Son bi prensipal ti ‘pour temwannyen,’ e i ti fer sa avek en lafwa profon, avek lespwar ki “tou dimoun a tande e krwar.” (Zan 1:6, 7) Annefe, serten avek ki Zan ti prese ti vin bann disip Kris. (Zan 1:35-37) Alors, Zan ti prese e i ti osi fer disip. Zezi osi ti en proklanmater ek en ansennyan. (Matye 4:23; 11:1) I pa sirprenan alor, ki Zezi ti demann son bann disip pour pa zis proklanm mesaz Rwayonm, me osi pour ed sa bann ki aksepte sa mesaz pour vin son bann disip. (Matye 28:19, 20) Alors, nou travay ozordi i enkli prese e ansennyen.

15. Ki similarite i annan dan reaksyon bann dimoun anver predikasyon dan premye syek N.L. e ozordi?

¹⁵ Parmi bann dan premye syek N.L. ki ti tann Pol prese e ansennyen, serten “ti aksepte sa ki i ti pe dir, me i annan ki pa ti krwar.” (Akt 28:24) Ozordi, reaksyon i plizoumwen parey. Malerezman, laplipar lagrenn Rwayonm i tonm lo bann later ki dir. Kantmenm sa, serten lagrenn i tonm dan bon later, i pran rasin, e pouse, zis parey Zezi ti predir. Anfet, partou dan lemonn, en mwayenn 5,000 dimoun i vin bann vre disip Kris sak semenn! Sa bann nouvo disip i ‘aksepte sa ki’n ganny dir,’ menm si laplipar lezot dimoun pa aksepte. Kwa ki’n ede pour fer zot leker aksepte sa mesaz Rwayonm? Souvan se sa lentere personnel ki bann Temwen i montre. Dan en sans, zot in aroz sa nouvo lagrenn ki zot in plante e sa i fer en diferans. (1 Korentyen 3:6) Annou egzamin zis de legzanp dan sa kantite ki annan.

Lentere personnel i fer en Diferans

16, 17. Akoz i enportan pour montre lentere personnel dan bann dimoun ki nou zwenn dan predikasyon?

¹⁶ Karolien, en zenn Temwen an Belzik, ti al pres kot en madanm aze ki pa ti montre okenn lentere dan sa mesaz Rwayonm. Vi ki sa madanm ti annan en bandaz lo son lanmen, Karolien ek son konpanyon ti ofer li led, me sa madanm pa ti aksepte. De zour plitar, zot ti retourn kot lakaz sa madanm e demann li konman i sava. Karolien ti dir: “Sa ti fer en diferans. I ti enpresyonnen pour vwar ki nou ti vreman enterese avek li. I ti envit nou dan son lakaz, e en letid Labib ti konmanse.”

¹⁷ Sandi, en Temwen an Letazini, i osi montre lentere personnel avek bann dimoun ki i pres avek. I tyek bann zournal lokal kot i anons nesans bann pti baba e apre i vizit sa bann nouvo paran avek Mon Liv Zistwar Labib.c Vi ki sa manman i normalman kot lakour e fyer pour montre bann viziter son pti baba, souvan en konversasyon i devlope. Sandi i eksplike: “Mon koz avek bann paran lo lenportans pour fer zot baba atase avek zot par lir avek zot. Plitar mon koz lo bann problenm pour elve en zanfan dan sa lemonn ozordi.” Resaman, gras a en tel vizit, en manman avek son sis zanfan ti konmans servi Zeova. Kan nou montre linisyativ ek lentere personnel, sa i kapab anmenn menm rezilta ki fer nou zwaye dan nou minister.

18. (a) Akoz i posib pour nou tou ranpli sa kondisyon pour “raport bokou fri”? (b) Dapre Levanzil Zan, ki sa trwa kondisyon pour reste en disip ki nou determinen pour ranpli?

¹⁸ Pa i ankourazan pour nou konnen ki i posib pour nou kontinyen “raport bokou fri”! Ki swa nou zenn oubyen vye, ki swa nou an bonn sante oubyen non, ki swa nou pres dan bann teritwar ki annan bon reaksyon oubyen non, nou tou nou kapab raport bokou fri. Konman? Par demontre fri lespri dan en pli gran degre e par fer tou sa ki nou kapab pour partaz sa mesaz Rwayonm Bondye. Anmenmtan, nou fer zefor pour ‘reste atase avek parol Zezi’ e pour “kontan kanmarad.” Wi, par ranpli sa trwa kondisyon pour reste en disip ki Levanzil Zan i mansyonnen, nou prouve ki nou ‘vreman disip Kris.’—Zan 8:31; 13:35.

[Not anba lo paz]

Kestyon Revizyon

• Ki kalite fri ki nou bezwen raporte plis ankor?

• Akoz i posib pour nou tou atenn sa lobzektif pour “raport bokou fri”?

• Dapre Levanzil Zan, ki sa trwa kondisyon enportan pour reste en disip ki nou’n egzaminen?

[Bwat/Portre lo paz 29]

KONMAN POUR ‘RAPORT FRI AVEK PERSEVERANS’

KWA ki ed ou pour kontinyen pres sa mesaz Rwayonm fidelman dan bann teritwar kot napa bokou dimoun ki enterese? La detrwa larepons ki kapab itil pour ou.

“Letan nou konnen ki nou annan sipor total Zezi, sa i ankouraz nou pour reste konfidan e persevere, nenport ki reaksyon nou gannyen dan teritwar.”—Harry, aze 72 an; batize 1946.

“Sa verse dan 2 Korentyen 2:17 in toultan ankouraz mwan. I dir ki nou partisip dan predikasyon ‘devan Bondye, an konpanni avek Kris.’ Kan mon dan predikasyon, mon rezwir konpanni mon bann bon zanmi.”—Claudio, aze 43 an; batize 1974.

“Fransman, mon trouv travay predikasyon difisil. Kantmenm sa, mon eksperyans sa parol dan Psonm 18:29: ‘Gras a mon Bondye mon kapab grenp en miray.’ ”—Gerard, aze 79 an; batize 1955.

“Si mon kapab lir omwen en verse dan predikasyon, mon satisfe akoz mon konnen ki en dimoun in les Labib egzamin son leker.”—Eleanor, aze 26 an; batize 1989.

“Mon kontinyen esey diferan lapros. I annan sitan en kantite ki mon pa pou kapab arive servi zot tou pour larestan mon lavi.”—Paul, aze 79 an; batize 1940.

“Mon pa ofanse kan bann dimoun pa byen resevwar mwan. Mon esey apros bann dimoun dan en fason pli relaks. Mon fer konversasyon avek zot e ekout zot pwennvi.”—Daniel, aze 75 an; batize 1946.

“Mon’n zwenn bann nouvo ki fek batize e zot dir mwan ki mon travay predikasyon in zwe en rol pour fer zot vin Temwen. San ki mon konnen, plitar en dimoun in etidye Labib avek zot e ed zot progrese. I donn mwan bokou lazwa pour konnen ki nou predikasyon i en travay lekip.”—Joan, aze 66 an; batize 1954.

Kwa ki ed ou pour ‘raport bokou fri avek perseverans’?—Lik 8:15.

[Portre lo paz 28]

Par demontre fri lespri e par proklanm mesaz Rwayonm, nou raport bokou fri

[Portre lo paz 31]

Ki Zezi ti oule fer resorti kan i ti dir son bann zapot: ‘Kontinyen raport bokou fri’?