En madanm i ganny geri ler i tous lenz Zezi

Bann Zwif ki pe reste lo lakot nor was Lanmer Galile i tande ki Zezi in retournen sorti Dekapol. I kapab ki en kantite dimoun in tande ki Zezi in kalmi en tanpet lo lanmer e ki i’n geri en zonm posede par demon. Alor, “en gran lafoul” i rasanble o bor lanmer, petet dan zanmirant Kapernaoum pour akeyir Zezi. (Mark 5:21) Ler i poz lipye lo lans, tou dimoun i kontan pour vwar li.

Zairis, en zofisye sinagog, petet sa enn ki Kapernaoum i parmi bann dimoun ki byen anvi vwar Zezi. I tonm azenou devan Zezi e sipliy li plizyer fwa: “Mon pti fiy i gravman malad. Silvouple vini e poz ou lanmen lo li pour ki i a byen e viv.” (Mark 5:23) Zairis i annan zis en fiy ki annan zis 12 an e i kontan li en kantite. Ki mannyer Zezi pou reazir anver son siplikasyon?​—Lik 8:42.

Ler i pe al kot lakaz Zairis, Zezi i trouv li dan en lot sityasyon fer lapenn. Bann dimoun ki pe swiv Zezi i eksite akoz zot pe mazinen si zot pou vwar li fer en lot mirak. Par kont, i annan en madanm parmi zot ki pe mazin son prop problenm lasante.

I fer 12 an depi ki sa madanm Zwif pe soufer avek lemorazi. I’n rod led avek plizyer dokter e i’n depans tou son larzan lo bann tretman ki zot in donn li. Me tousala pa’n abouti dan nanryen. Anfet, son problenm in “vin pli pir.”​—Mark 5:26.

Nou tou nou kapab konpran ki son problenm pa zis fer li fay me i osi vreman anbarasan pour li. An zeneral dimoun pa tro tro koz lo en maladi koumsa. An plis ki sa, dapre Lalwa Moiz, ler en madanm i perdi disan i ganny konsidere enpir pour fer servis Bondye. Si en dimoun i tous li oubyen son lenz ki’n tase avek disan, i bezwen bennyen e i ganny konsidere konman enpir ziska aswar.​—Levitik 15:25-27.

Sa madanm in ‘tann sa ki dimoun pe rakonte lo Zezi’ e la aprezan i pe rod Zezi. Vi ki sa madanm i enpir, i pas dan lafoul byen trankil pour dimoun pa remark li e i dir dan li menm: “Si zis mon tous son lenz, mon pou byen.” Ler i tous lenz Zezi, deswit i santi ki i’n aret perdi disan! I’n ganny ‘geri avek sa maladi ki’n fer li soufer.’​—Mark 5:27-29.

Ler sa i arive Zezi i dir: “Lekel ki’n tous mwan?” Ki mannyer ou krwar sa madanm i santi ler i tann sa? Me li Pyer dan zar pe koriz Zezi i dir: “Ansenyan, i annan en lafoul ki pe pouse otour ou.” Alor akoz Zezi i demande “Lekel ki’n tous mwan?” Zezi i eksplike: “I annan en dimoun ki’n tous mwan, parski mon’n santi ki en lafors in sorti dan mwan.” (Lik 8:45, 46) Zezi in santi ki en pe son lafors in sorti dan li pour geri sa madanm.

Sa madanm i realize ki i’n ganny dekouver, alor i tonm azenou devan Zezi, pe tranble avek lafreyer. La devan tou dimoun, i dir laverite lo son maladi e ki i fek ganny geri. Avek lanmour, Zezi i rekonfort li: “Mon fiy, ou lafwa in fer ou byen. Al anpe, ou’n geri avek sa maladi ki ti pe fer ou soufer.”​—Mark 5:34.

I kler ki sa Enn ki Bondye in swazir pour diriz later i zantiy, bon, i annan konpasyon e i pa zis kontan bann dimoun me i osi annan sa pouvwar pour ed zot!