I enportan pour priye e annan limilite

Zezi in fini donn son bann disip en legzanp konsernan lenportans pour persevere dan lapriyer. (Lik 11:5-13) I posib ki la i Samari oubyen Galile e ankor enn fwa i dir ki i enportan pour pa aret priye. I servi en lot legzanp pour met lanfaz lo sa pwen:

“Dan en serten lavil, i ti annan en ziz ki ti napa respe ni pour Bondye ni pour dimoun. I ti osi annan en vev dan sa lavil ki ti kontinyen al kot sa ziz e dir, ‘Fer mwan ganny lazistis kont mon adverser.’ Pour en serten letan i pa ti oule ed li, me apre i ti dir dan li menm, ‘Menm si mon napa respe ni pour Bondye ni pour dimoun, me akoz sa vev pe kontinyen fatig mwan, mon pou fer sir ki i ganny lazistis pour ki i aret kontinyen vin fatig mwan avek sa zafer.’”​—Lik 18:2-5.

Zezi i fer sa laplikasyon: “Eski zot in tande ki sa ziz ti dir menm si i ti move? Sirman, pa Bondye pou rann lazistis bann ki i’n swazir ki kriy li lizour konman aswar, menm si i demontre pasyans anver zot?” (Lik 18:6, 7) Ki Zezi pe esey dir konsernan son Papa?

Definitivman Zezi pa pe dir ki Zeova i parey sa move ziz. Plito, i pe dir ki si en move ziz i pare pour ed sa dimoun akoz i’n persiste, konbyen plis Bondye pou ekout nou ler nou kontinyen demande. Bondye i drwat, i bon e i pou reponn son pep si zot kontinyen priye. Nou kapab vwar sa dan sa parol ki Zezi i dir apre: “Mon dir zot, deswit i pou rann lazistis pour zot.”​—Lik 18:8.

Normalman bann dimoun ordiner oubyen bann ki pov pa touzour ganny trete avek lazistis, tandis ki laplipar ditan dimoun i fer lapreferans pour bann ki annan pouvwar ek larzan. Me Bondye pa koumsa. Ler i’n ariv ler, i pou azir avek lazistis e fer sir ki bann move dimoun i ganny pini e ki son bann serviter i ganny lavi eternel.

Lekel ki annan lafwa parey sa vev? Konbyen dimoun ki vreman krwar ki Bondye pou ‘deswit rann lazistis pour zot’? Zezi fek donn en legzanp konsernan lenportans pour kontinyen priye. Aprezan i demann en kestyon konsernan bann ki annan lafwa dan pouvwar lapriyer: “Ler Garson zonm i arive, eski i pou trouv sa kalite lafwa lo later?” (Lik 18:8) I paret ki i pou napa bokou dimoun ki annan sa kalite lafwa ler Kris i arive.

Serten ki pe ekout Zezi i asire ki zot annan lafwa. Zot krwar ki zot drwat devan Bondye e zot mepriz lezot. Zezi i donn en legzanp pour sa bann dimoun:

“De zonm ti al dan tanp pour priye, enn ti en Farizyen e lot en kolekter taks. Sa Farizyen ti debout e konmans priye dan li menm, ‘Ar Bondye, mon remersye ou ki mon pa parey lezot dimoun ki vole, fer sa ki mal, komet adilter oubyen menm parey sa kolekter taks. De fwa par semenn mon zennen, mon donn en dizyenm tou sa ki mon gannyen.’”​—Lik 18:10-12.

Bann Farizyen i renonmen konman bann dimoun ki fer keksoz an piblik pour fer krwar ki zot drwat devan Bondye. Zot fer sa pour enpresyonn lezot. Normalman i annan plis dimoun dan bann gran bazar dan Lendi ek Zedi, alor bann Farizyen i zennen sa bann zour, en keksoz ki zot in enpoz lo zot menm, pour ki bokou dimoun i vwar zot. Zot donn egzakteman en dizyenm tou bann keksoz, menm bann pti plant. (Lik 11:42) Zis detrwa mwan pase, zot ti montre ki kantite zot mepriz bann dimoun ordiner ler zot ti dir: “Sa lafoul ki pa konn nanryen dan Lalwa [dapre pwennvi bann Farizyen] i bann dimoun modi.”​—Zan 7:49.

Zezi i kontiny rakont son legzanp: “Me sa kolekter taks li ti pe debout en zistans e i pa ti ni menm oze get anler, me i ti kontinyelman tap son lestoman e dir, ‘Ar Bondye, pran pitye pour mwan akoz mon fer pese.’” Sa kolekter taks i annan limilite e i aksepte son bann fot. Finalman, Zezi i dir: “Mon dir zot, sa zonm ti retourn se li e i ti ganny trouve pli drwat ki sa Farizyen. Parski en dimoun ki oule ganny onore pou ganny imilye, me sa ki abes son lekor pou ganny onore.”​—Lik 18:13, 14.

Alor Zezi i fer li kler ki nou bezwen annan limilite. Sa i bann bon konsey pour son bann disip, ki’n grandi dan en sosyete kot bann Farizyen ki krwar zot pli siperyer ki lezot in met bokou lanfaz lo pozisyon ek ran. Deplis, sa konsey i osi bon pour tou bann disip Zezi.