Zezi i koz lo divors ek lanmour pour zanfan

Zezi ek son bann disip i kit Galile, al lot kote Larivyer Zourden e zot pas Pere pour al dan sid. Dernyen fwa ki Zezi ti al Pere, i ti’n dir bann Farizyen pwennvi Bondye lo divors. (Lik 16:18) Aprezan zot lev sa topik pour teste Zezi.

Moiz ti ekri ki en msye ti kapab divors son madanm si son madanm ti’n fer en “keksoz ki pa satisfer li.” (Deterononm 24:1) I annan diferan lopinyon konsernan ki rezon en msye i kapab divors son madanm. Serten i menm krwar ki sa i kapab refer avek bann keksoz ki pa sitan grav. Alor bann Farizyen i demande: “Eski i kont lalwa pour en zonm divors son madanm pour nenport ki rezon?”​—Matye 19:3.

Zezi pa baz son larepons lo lopinyon bann zonm, me i refer avek lafason ki Bondye ti oule maryaz i ganny fer. “Zot pa’n lir ki sa enn ki ti kree zot o konmansman ti fer zot zonm ek fanm e ti dir: ‘Se pour sa rezon ki en zonm pou kit son papa ek son manman e i pou atase avek son madanm e zot de pou vin en sel,’ pour ki zot nepli de me en sel? Alor, sa ki Bondye in ini ansanm zonm pa devret separe.” (Matye 19:4-6) Ler Bondye ti entrodwi maryaz ant Adan ek Ev, zot maryaz pa ti sipoze fini.

Bann Farizyen i reponn Zezi: “Alor, akoz Moiz ti demann en zonm pour donn son madanm en sertifika divors pour divors li?” (Matye 19:7) Zezi i dir zot: “Akoz zot leker dir Moiz ti aksepte ki zot ti kapab divors zot madanm, me sa pa ti leka depi o konmansman.” (Matye 19:8) Ler Zezi i dir “o konmansman,” i pa pe refer avek letan Moiz me avek ler Bondye ti entrodwi maryaz dan zarden Edenn.

Apre Zezi i dir en laverite enportan: “Mwan mon dir zot ki nenport zonm ki divors son madanm, eksepte si i’n komet imoralite seksyel [Grek, por·neiʹa] e i marye avek en lot i komet adilter.” (Matye 19:9) Alor dapre Labib, imoralite seksyel i sa sel rezon ki en dimoun i kapab divorse.

Sa i pous bann disip pour dir: “Si maryaz ant en msye ek son madanm i koumsa, vomye pa marye.” (Matye 19:10) I kler ki en dimoun ki pe mazin pour marye i devret konsider li konman en keksoz permanan!

Konsernan reste selibater, Zezi i eksplike ki serten i ne enpotan akoz en dezabilite, setadir zot pa kapab fer sèks. Lezot in vin enpotan e zot osi zot pa kapab fer sèks. Par kont, i annan serten ki kontrol zot dezir pour annan relasyon seksyel. Zot fer sa pour pli byen konsantre lo bann keksoz ki annan pour fer avek Rwayonm. Zezi i ankouraz bann ki pe ekout li: “Si en dimoun i kapab fer sa [reste selibater], fer li.”​—Matye 19:12.

Aprezan bann dimoun i konmans anmenn zot zanfan kot Zezi. Par kont, bann disip i reprimann zot, petet akoz zot pa oule ki zot deranz Zezi. Ler Zezi i vwar sa i mekontan e i dir zot: “Les sa bann zanfan vin kot mwan, pa bezwen anpes zot vini, parski Rwayonm Bondye i pour bann ki parey sa bann zanfan. Laverite mon dir zot, sa ki pa aksepte Rwayonm Bondye parey en zanfan pa pou zanmen antre dan sa Rwayonm.”​—Mark 10:14, 15; Lik 18:15.

Pa sa i en bon leson! Pour antre dan Rwayonm Bondye, nou bezwen annan limilite e pare pour aprann, zis parey bann zanfan. Aprezan Zezi i montre ki i kontan bann zanfan. I pran zot dan son lebra e beni zot. Zezi i kontan tou bann ki “aksepte Rwayonm Bondye parey en zanfan.”​—Lik 18:17.