Sa ki nou aprann avek ler Zezi ti plere

1-3. Ki serten keksoz ki kapab fer nou plere?

KI DERNYEN fwa ou ti plere? Parfwa nou plere akoz nou dan lazwa. Me normalman nou plere akoz nou sagren. Par egzanp, i kapab ki nou plere ler en dimoun ki nou kontan i mor. En ser ki apel Lorilei, ki reste Leta-z-ini, i ekri: “Parfwa mon ti vreman sagren akoz lanmor mon fiy e i paret ki nanryen pa ti kapab rekonfort mwan. Mon pa ti krwar ki mon ti pou kapab andire.”b

² I kapab ki nou plere pour lezot rezon. En ser ki apel Hiromi, ki reste Zapon, ti dir: “Parfwa mon sagren akoz dimoun ki mon zwenn dan predikasyon pa enterese avek Labib. Parfwa avek larm dan mon lizye, mon demann Zeova pour ed mwan trouv en dimoun ki anvi konn laverite.”

³ Eski parfwa ou santi parey sa bann ser? En kantite parmi nou i santi koumsa. (1 Pyer 5:9) Nou anvi “servi Zeova dan lazwa” me parfwa nou plere parski en dimoun ki nou kontan in mor, parski nou santi nou dekouraze oubyen parski nou pe fer fas avek en problenm ki fer li difisil pour nou reste fidel. (Ps. 6:6; 100:2, NWT) Ki nou kapab fer ler nou santi nou koumsa?

 4. Ki nou pou vwar dan sa lartik?

⁴ Nou kapab aprann avek legzanp Zezi. Parfwa li osi, i ti fer fas avek bann sityasyon ki ti fer li plere. (Zan 11:35; Lik 19:41; 22:44; Ebr. 5:7) Annou vwar sa bann sityasyon. Anmezir nou fer sa, nou pou vwar ki nou kapab aprann avek Zezi ek son Papa, Zeova. Nou pou osi vwar ki nou kapab fer ler nou pas dan bann sityasyon ki fer nou plere.

 5. Ki nou aprann lo Zezi dan Zan 11:32-36?

⁵ Pandan liver lannen 32, Lazar ki ti bon zanmi Zezi, ti tonm malad e mor. (Zan 11:3, 14) Lazar ti annan de ser, Mari ek Mart e Zezi ti kontan sa fanmir en kantite. Sa de ser ti vreman sagren akoz zot frer ti’n mor. Apre ki Lazar ti’n mor, Zezi ti al Betani kot Mari ek Mart ti reste. Ler Mart ti tande ki Zezi ti pe vini, i ti taye pour al zwenn li. Imazinen ki kantite Mart ti sagren ler i ti dir Zezi: “Senyer, si ou ti la, mon frer pa ti pou’n mor.” (Zan 11:21) Ler Zezi ti vwar Mari ek lezot pe plere, “larm Zezi ti koule.”​—Lir Zan 11:32-36.

 6. Akoz Zezi ti plere ler Lazar ti mor?

⁶ Akoz Zezi ti plere ler Lazar ti mor? Insight on the Scriptures i dir: “Lanmor son zanmi Lazar ek sagrinasyon sa de ser Lazar ti fer Zezi ‘vin emosyonnel e son larm ti koule.’”c I kapab ki Zezi ti pe mazin sa douler ki son zanmi Lazar ti’n santi ler i ti malad e lafason ki Lazar ti santi ler i ti realize ki i ti pou mor. Zezi ti osi plere ler i ti vwar ki mannyer lanmor Lazar ti afekte son de ser, Mari ek Mart. San dout ou’n santi parey si enn ou bon zanmi oubyen en manm ou fanmir in mor. Annou vwar trwa leson ki nou kapab aprann avek sa ki ti arive ler Lazar ti mor.

 7. Ler Zezi ti plere pour son bann zanmi, ki sa i montre nou lo Zeova?

⁷ Zeova i konpran ki mannyer ou santi. Zezi i “resanblans egzakt” son Papa. (Ebr. 1:3) Ler Zezi ti plere, sa ti montre lafason ki Zeova i santi. (Zan 14:9) Si en dimoun ki ou kontan in mor, ou kapab asire ki Zeova pa zis vwar ki ou pe soufer me i osi konpran lafason ki ou pe santi. I anvi retir sa sagrinasyon ki ou pe santi.​—Ps. 34:18; 147:3.

 8. Akoz nou kapab asire ki Zezi pou resisit bann dimoun ki nou kontan ki’n mor?

⁸ Zezi i anvi resisit bann dimoun ki ou kontan ki’n mor. Zis avan ki Zezi i plere, i ti dir Mart: “Ou frer pou resisite.” Mart ti krwar dan sa ki Zezi ti’n dir li. (Zan 11:23-27) Vi ki Mart ti ador Zeova, i ti konnen ki profet Eliya ek Elisa ti’n resisit dimoun dan lepase. (1 Rwa. 17:17-24; 2 Rwa. 4:32-37) I tre probab ki i ti’n tann lo bann rezireksyon ki Zezi ti’n fer. (Lik 7:11-15; 8:41, 42, 49-56) Ou osi ou kapab asire ki ou pou revwar bann dimoun ki ou kontan ki’n mor. Alor ki nou kapab aprann avek lefet ki Zezi ti plere ler i ti pe rekonfort son bann zanmi ki ti sagren? Nou aprann ki Zezi i vreman anvi resisit bann mor!

 9. Parey Zezi, ki mannyer ou kapab rekonfort bann ki sagren? Donn en legzanp.

⁹ Ou kapab siport bann ki sagren. Zezi pa ti zis plere ansanm avek Mart ek Mari me i ti osi ekout zot e rekonfort zot. Nou osi nou kapab fer sa avek bann ki sagren akoz en dimoun ki zot kontan in mor. En ansyen ki reste Lostrali ki apel Dan i dir: “Apre ki mon madanm ti’n mor, mon ti bezwen sipor. En kantite koup ti pare pour ekout mwan. Zot ti les mwan eksplike ki mannyer mon ti pe santi e zot pa ti kanmi ler mon ti plere. Zot ti osi fer serten keksoz pour mwan ler mon pa ti kapab, parey lav mon loto, aste mon konmisyon e kwi manze. Souvan zot ti fer lapriyer avek mwan. Zot ti montre ki zot bann vre zanmi e zot bann frer ek ser ‘ki la dan letan maler.’”​—Prov. 17:17, NWT.

10. Dekri sa ki ti arive dan Lik 19:36-40.

¹⁰ Zezi ti ariv Zerizalenm le 9 Nizan lannen 33. Anmezir ki i ti pe apros sa lavil, en lafoul dimoun ti vin zwenn li e zot ti tal zot lenz lo semen devan li pour montre ki zot aksepte li konman zot Lerwa. Sa ti sirman en moman zwaye. (Lir Lik 19:36-40.) Alor i kapab ki son bann disip pa ti pe ekspekte sa ki ti arive apre. “Ler Zezi ti ariv pli pros avek Zerizalenm, i ti get lavil e plere.” Avek larm dan son lizye, Zezi ti koz lo bann move keksoz ki ti pou arive byento avek bann dimoun Zerizalenm.​—Lik 19:41-44.

11. Akoz Zezi ti plere pour bann dimoun ki reste Zerizalenm?

¹¹ Zezi ti sagren akoz i ti konnen ki laplipar Zwif pa ti pou aksepte sa mesaz Rwayonm. Sa i fer ki Zerizalenm ti pou ganny detrir e bann Zwif ki ti pou sirviv, ti pou vin lesklav. (Lik 21:20-24) Malerezman parey Zezi ti dir, laplipar dimoun ti rezet li. Ki mannyer laplipar dimoun kot ou reste i reazir anver sa mesaz Rwayonm? I kapab ki pa bokou dimoun ki ekout sa mesaz laverite ki nou pe anonse. Alor ki nou kapab aprann avek lefet ki Zezi ti plere pour bann dimoun ki i ti anons sa bon nouvel avek? Annou vwar ankor trwa leson.

12. Ler Zezi ti plere pour bann dimoun ki i ti anons sa bon nouvel avek, ki sa i montre nou lo Zeova?

¹² Zeova i kontan bann dimoun. Ler Zezi ti plere sa i fer nou rapel ki kantite Zeova i kontan bann dimoun. “I pa oule ki personn i ganny detrir, me i oule ki zot tou zot arive repantir.” (2 Pyer 3:9) Ozordi nou montre ki nou kontan bann dimoun ki nou anons sa bon nouvel avek, par toultan esey ed zot pour aprann konsernan sa bon nouvel Rwayonm.​—Mat. 22:39.

13-14. Ki mannyer Zezi ti demontre konpasyon pour bann dimoun e ki mannyer nou kapab devlop sa kalite?

¹³ Zezi ti travay dir dan predikasyon. I ti montre ki i kontan bann dimoun par kontinyen servi tou loportinite pour ansenny zot. (Lik 19:47, 48) Kwa ki ti motiv li pour fer sa? Zezi ti annan konpasyon pour zot. Parfwa en kantite dimoun ti sitan anvi tann lansennyman Zezi, ki li ek son bann disip “pa ti ni menm kapab pran en repa.” (Mark 3:20) Ler en zonm ti anvi koz avek Zezi aswar, Zezi ti aksepte pour zwenn li. (Zan 3:1, 2) Laplipar dimoun ki ti ekout Zezi pa ti vin son bann disip. Me tou sa ki tann li ti ganny en bon temwannyaz. Ozordi nou anvi donn tou dimoun sa loportinite pour tann sa bon nouvel. (Akt 10:42) Pour reisi fer sa, petet nou bezwen sanz fason ki nou fer nou predikasyon.

¹⁴ Nou bezwen pare pour fer bann sanzman neseser. Si nou toultan fer predikasyon menm ler, petet nou pa pou zwenn serten dimoun ki ti pou kontan aprann konsernan sa bon nouvel. En pionye ki apel Mathilda i dir: “Mwan ek mon msye nou esey zwenn dimoun dan diferan ler. Dan granmaten, nou fer predikasyon dan teritwar biznes. Dan midi ler dimoun i lo semen, nou servi prezantwar. Dan apremidi, nou zwenn plis dimoun kot zot lakour.” Nou pa devret fer predikasyon zis ler ki i konvenab pour nou. Me nou devret pare pour sanz nou progranm pour fer predikasyon en ler ki nou pou kapab zwenn dimoun. Si nou fer sa, nou kapab asire ki nou pou fer Zeova kontan.

15. Dapre Lik 22:39-44, ki ti arive pandan sa dernyen lannwit avan Zezi i mor?

¹⁵ Tar aswar le 14 Nizan lannen 33, Zezi ti al dan zarden Zetsemane. Ler i ti laba, i ti devid son leker avek Zeova. (Lir Lik 22:39-44.) Pandan sa moman, Zezi ti fer “siplikasyon . . . avek gran leokri ek larm.” (Ebr. 5:7) Ki Zezi ti priy lo la pandan dernyen lannwit avan i mor? I ti demann Zeova lafors pour reste fidel e pour fer Son lavolonte. Atraver sa lapriyer ki Zezi ti fer, Zeova ti vwar ki son Garson i vreman tris e i ti anvoy en lanz pour ankouraz li.

16. Akoz Zezi ti vreman sagren ler i ti pe priye dan zarden Zetsemane?

¹⁶ Zezi ti plere ler i ti pe priye dan zarden Zetsemane parski i ti vreman sagren ki dimoun ti pou krwar ki i napa respe pour non Bondye. I ti konnen ki degre i enportan pour li reste fidel e sanktifye non son Papa. Si ou pe fer fas avek en sityasyon ki teste ou fidelite anver Zeova, ki ou kapab aprann avek ler Zezi ti plere? Annou vwar trwa lezot leson.

17. Ki nou kapab aprann lo Zeova avek lefet ki i ti reponn bann lapriyer senser ki Zezi ti fer?

¹⁷ Zeova i ekout ou bann siplikasyon. Zeova ti ekout bann lapriyer senser ki Zezi ti fer. Akoz? Parski sa ki ti pli enportan pour Zezi, ti pour reste fidel avek son Papa e sanktifye Son non. Si sa ki pli enportan pour nou i pour reste fidel avek Zeova e pour sanktifye son non, Zeova pou reponn nou lapriyer ler nou rod son led.​—Ps. 145:18, 19.

18. Dan ki fason ki Zezi i en bon zanmi ki konpran nou byen?

¹⁸ Zezi i konpran ki mannyer ou santi. Ler nou vreman sagren, nou kontan pour annan en zanmi ki konpran ki mannyer nou santi, sirtou en zanmi ki’n pas dan en problenm ki en pe parey avek sa ki pour nou. Zezi i sa kalite zanmi. I’n deza santi li sagren e bezwen led. I konpran nou bann febles e i pou fer sir ki nou ganny sipor “ler nou bezwen.” (Ebr. 4:15, 16) Zis parey Zezi ti aksepte led en lanz ler i ti dan zarden Zetsemane, nou devret pare pour aksepte led ki Zeova i donn nou ki swa atraver en piblikasyon, en video, en diskour oubyen ler en ansyen ouswa en zanmi i vizit nou pour ankouraz nou.

19. Ki mannyer ou kapab ganny lafors dan bann sityasyon ki teste ou fidelite anver Bondye? Donn en legzanp.

¹⁹ Zeova pou donn ou “lape Bondye.” Ki mannyer Zeova pou donn nou lafors? Ler nou priye, nou pou ganny “lape Bondye ki depas tou sa ki nou kapab konpran.” (Fili. 4:6, 7) Sa lape ki Zeova i donnen i fer nou kalm e i ed nou pour reflesir byen. I sanmenm ki en ser ki apel Luz ti eksperyanse. I dir: “Souvandfwa mon ti santi mwan tousel. Parfwa sa ti fer mwan krwar ki Zeova pa kontan mwan. Me ler sa i arive, deswit mon dir Zeova sa ki mon pe santi. Lapriyer i ed mwan pour santi mwan byen.” Leksperyans Luz i montre ki nou kapab ganny lape lespri ler nou priye.

20. Ki leson nou’n aprann avek ler Zezi ti plere?

²⁰ Nou’n aprann en kantite leson pratik e rekonfortan avek ler Zezi ti plere. Nou’n vwar ki nou bezwen siport nou bann zanmi ki sagren e pour annan konfyans ki Zeova ek Zezi pour siport nou ler en dimoun ki nou kontan i mor. Nou ganny ankouraze pour demontre konpasyon dan predikasyon parski Zeova ek Zezi Kri i demontre sa zoli kalite. Nou ganny rekonforte ler nou konnen ki Zeova ek son Garson i konpran ki mannyer nou santi, konpran nou bann febles e zot anvi ed nou pour andire. Annou kontinyen aplik sa ki nou’n aprann ziska ki Zeova i akonpli son promes pour “eswiy tou larm dan [nou] lizye.”​—Rev. 21:4.