Zot pou vin “en rwayonm pret”

1, 2. Ki proteksyon desandans sa madanm ti bezwen e akoz?

SA PREMYE profesi dan Labib i vreman enportan pour konpran ki mannyer plan Bondye pou ganny realize. Kan i ti pe fer sa promes dan zarden Edenn, sa vre Bondye ti dir: “Mon pou met en laenn ant ou [Satan] ek sa madanm, ant ou desandans ek son desandans.” Ki kantite laenn i ti pou annan? Zeova ti dir: “I [desandans sa madanm] pou kraz ou latet [Satan] e ou pou kraz son talon.” (Zen. 3:15) I ti pou telman annan laenn ant sa serpan ek sa madanm ki Satan ti pou fer tou zefor posib pour detri desandans sa madanm.

² I pa etonan alor ki dan son lapriyer en psalmis ti priy konsernan pep ki Bondye in swazir. I ti dir: “Gete! parski ou bann lennmi i ankoler e bann ki ay ou i azir dan en fason arogan. Avek riz zot pe fer konplo an kasyet kont ou pep. Zot fer plan kont bann ki ou apresye. Zot dir: ‘Vini, annou detri sa nasyon.’” (Ps. 83:2-4) Fanmir ki desandans sa madanm ti pou sorti ladan ti pou bezwen ganny proteze pour zot pa ganny touye oubyen kontaminen. Pour arive fer sa, Zeova ti fer lezot lalyans pour ki sa desandans i ganny proteze e ki son plan i ganny akonplir.

3, 4. (a) Kan ki lalyans Lalwa ti pran lefe e ki nasyon Izrael ti dakor pour fer? (b) Ki lalyans Lalwa ti sipoze anpese?

³ Zeova ti fer desandans Abraam, Izaak ek Zakob vin en nasyon anmezir ki zot ti pe ogmante pour vin plizyer milyon. I ti apel zot nasyon Izrael. Zeova ti fer en lalyans avek nasyon Izrael atraver Moiz ler i ti donn zot Lalwa e zot ti dakor avek bann kondisyon ki vin avek sa lalyans. Labib i dir: “[Moiz] ti pran sa liv lalyans e lir aotvwa avek sa pep e zot ti dir: ‘Tou sa ki Zeova in dir nou pare pour fer e nou pou obeir.’ Alor Moiz ti pran sa disan e fann li lo sa pep e dir: ‘Sa i disan sa lalyans ki Zeova in fer avek zot an armoni avek tou sa parol.’”​—Egz. 24:3-8.

⁴ Lalyans lalwa ti pran lefe an 1513 A.N.L kot Montanny Sinai. Atraver sa lalyans, Zeova ti swazir nasyon Izrael pour zwe en rol spesyal. Aprezan Zeova ti vin zot Ziz, i ti donn zot lalwa e i ti vin zot Lerwa. (Iza. 33:22) Listwar bann Izraelit i montre nou ki i arive kan bann standar Bondye i ganny obeir oubyen pa ganny aplike. Vi ki Lalwa ti anpes zot marye avek bann payen e partisip dan fo ladorasyon, sa ti fer ki desandans Abraam pa ti ganny kontaminen.​—Egz. 20:4-6; 34:12-16.

 5. (a) Ki loportinite lalyans Lalwa ti donn nasyon Izrael? (b) Akoz Bondye ti rezet nasyon Izrael?

⁵ Lalyans Lalwa ti fer ki bann pret ti kapab ganny apwente pour servi Izrael. Sa bann pret ti pe reprezant en lot group pret ki ti pou servi bann imen dan en pli bon fason a lavenir. (Ebr. 7:11; 10:1) Anfet, atraver sa lalyans, bann Izraelit ti annan sa loportinite spesyal pour vin “en rwayonm pret” si zis zot ti obei sa bann kondisyon ki ti dan lalwa Zeova. (Lir Egzod 19:5, 6.a) Me bann Izraelit pa ti arive gard zot parol. Dan plas aksepte Mesi ki premye parti desandans Abraam, sa nasyon ti rezet li. Sa ti fer ki Bondye ti rezet sa nasyon.

 6. Ki Lalwa in akonpli?

⁶ Nasyon Izrael pa ti arive reste fidel avek Zeova, alor pa zis bann Izraelit ki ti pou vin sa rwayonm pret, me sa pa vedir ki sa Lalwa pa’n akonplir son bi. Sa Lalwa ti pou protez sa desandans e anmenn imen ver Mesi. Kan Kris ti vini e ganny idantifye sa Lalwa ti akonpli son rol. Labib i dir: “Kris i lafen lalwa.” (Rom. 10:4) Me sa i fer nou demande: Lekel ki ti pou annan sa loportinite pour vin en rwayonm pret? Zeova ti fer en lot lalyans pour form en nouvo nasyon.

 7. Ki Zeova ti predir atraver Zeremi konsernan nouvo lalyans?

⁷ Bokou letan avan ki lalyans Lalwa ti ganny aboli, Zeova ti predir atraver profet Zeremi ki I ti pou fer en “nouvo lalyans” avek nasyon Izrael. (Lir Zeremi 31:31-33.b) Sa lalyans pa ti pou parey lalyans Lalwa kot nou ti pou bezwen sakrifye zannimo pour ganny pardonnen nou pese. Ki mannyer i ti pou fer sa?

8, 9. (a) Ki disan Zezi in akonpli? (b) Ki loportinite bann ki dan sa nouvo lalyans ti gannyen? (Vwar portre lo paz 13.)

⁸ Plizyer syek pli tar, Zezi ti met an plas Repa Senyer le 14 Nizan lannen 33 N.L. Konsernan sa lakoup diven, Zezi ti dir son 11 zapot fidel: “Sa lakoup i nouvo lalyans ki’n ganny sele par mon disan, verse pour zot.” (Lik 22:20) Resi Matye i fer resorti ki Zezi ti dir sa konsernan sa diven: “Sa i mon disan, disan lalyans ki’n koule pour bokou, pour pardon pese.”​—Mat. 26:27, 28.

⁹ Disan Zezi ti fer posib pour sa nouvo lalyans vin an egzistans. Sa disan i osi fer li posib pour nou pese ganny pardonnen enn fwa pour tou. Zezi pa form parti dan sa nouvo lalyans. Vi ki i napa pese i pa bezwen ganny pardonnen. Me Bondye ti kapab servi disan Zezi pour benefisye desandans Adan. I ti osi kapab adopte serten imen devoue atraver lespri sen pour “fer zot vin garson Bondye.” (Lir Romen 8:14-17.) Vi ki dan lizye Bondye zot ganny vwar konman san pese, sa i fer ki dan en sans zot ti pou parey Zezi, Garson Bondye ki san pese. Sa bann ki’n ganny swazir ti pou vin “zeritye ansanm avek Kris” e annan sa loportinite pour vin “en rwayonm pret.” Sa ti en privilez ki nasyon Izrael ti kapab annan anba Lalwa. An rapor avek bann ki “zeritye ansanm avek Kris,” zapot Pyer ti dir: “Zot, zot en ras ki’n ganny swazir, en group pret rwayal, en nasyon sen, en pep ki pour Bondye, ki i’n swazir pour proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye.” (1 Pyer 2:9) Pa sa nouvo lalyans i vreman enportan! Sa i permet bann disip Zezi pour vin dezyenm parti desandans Abraam.

10. Kan ki sa nouvo lalyans ti pran lefe e akoz pa avan sa?

¹⁰ Kan ki sa nouvo lalyans ti pran lefe? I pa ler Zezi ti fer referans avek sa lalyans sa dernyen swar ki i ti lo later. Pour ki i konmans pran lefe, disan Zezi ti bezwen ganny verse e son valer ganny prezante devan Zeova dan lesyel. An plis, lespri sen ti bezwen ganny anvoye lo bann ki ti pou vin “zeritye ansanm avek Kris.” Alor sa nouvo lalyans ti pran lefe zour Lapannkot lannen 33 N.L. kan bann disip fidel Zezi ti ganny swazir avek lespri sen.

11. Ki mannyer sa nouvo lalyans ti fer li posib pour bann Zwif ek dimoun dan lezot nasyon form parti Izrael spirityel? Ki kantite dimoun pou annan dan sa nouvo lalyans?

¹¹ Menm si dan en sans lalyans Lalwa ti “vin ansyen” kan Zeova ti anonse atraver Zeremi ki I ti pou fer en nouvo lalyans avek Izrael, i pa ti terminen ziska ki sa nouvo lalyans ti pran lefe. (Ebr. 8:13) Kan sa ti arive, Bondye ti kapab vwar bann Zwif ek bann dimoun dan lezot nasyon ki ti krwayan dan menm fason, vi ki zot ti ganny “sirkonsi dan [zot] leker, par en sirkonsizyon enteryer e pa zis eksteryer selon lalwa.” (Rom. 2:29) Par fer sa nouvo lalyans avek zot, Bondye ti pou met son bann lalwa “dan zot lespri, [i ti] pou ekri li dan zot leker.” (Ebr. 8:10) Dan sa nouvo lalyans, i ti pou annan 144,000 ki ti pou form en nouvo nasyon, “Izrael Bondye,” setadir Izrael spirityel.​—Gal. 6:16; Rev. 14:1, 4.

12. Kwa ki parey ant lalyans Lalwa ek nouvo lalyans?

¹² Kwa ki parey ant lalyans Lalwa ek sa nouvo lalyans? Lalyans Lalwa ti ant Zeova ek nasyon Izrael, sa nouvo lalyans i ant Zeova ek Izrael spirityel. Moiz ti medyater sa lalyans Lalwa, Zezi i Medyater sa nouvo lalyans. Lalyans Lalwa ti vin an egzistans atraver disan zannimo e sa nouvo lalyans ti vin an egzistans atraver disan Zezi ki ti ganny verse. Moiz ti gid nasyon Izrael anba lalyans Lalwa e Zezi sef Kongregasyon i gid bann ki dan sa nouvo lalyans.​—Efe. 1:22.

13, 14. (a) Ki sa nouvo lalyans i annan pour fer avek sa Rwayonm? (b) Kwa ki neseser pour ki Izrael spirityel i kapab renny avek Kris dan lesyel?

¹³ Sa nouvo lalyans i annan pour fer avek sa Rwayonm dan sa sans ki i’n prodwir en nasyon sen ki annan sa privilez pour vin lerwa ek pret dan sa Rwayonm dan lesyel. Sa nasyon i sa dezyenm parti desandans Abraam. (Gal. 3:29) Alor, sa nouvo lalyans i montre ki sa lalyans avek Abraam pou ganny akonpli.

¹⁴ I ankor annan en laspe sa Rwayonm ki pa ankor ganny etablir. Gras a sa nouvo lalyans, bann manm Izrael spirityel i ganny rasanble e vin “zeritye ansanm avek Kris.” Me pour zot kapab vin lerwa ek pret ansanm avek Zezi dan son Rwayonm dan lesyel zot pou bezwen en lagreman legal.

15. Ki lalyans spesyal Zezi ti fer avek son bann zapot fidel?

¹⁵ Apre ki Zezi ti met an plas Repa Senyer, i ti fer en lalyans avek bann disip fidel, sa lalyans i apel lalyans pour en Rwayonm. (Lir Lik 22:28-30.) Kontrerman avek lezot lalyans kot Zeova i form parti, sa i en lalyans spesyal ant Zezi ek son bann disip swazir. Kan Zezi ti dir, “parey mon Papa in donn mwan pouvwar [oubyen “fer en lalyans avek mwan,” NW]” i paret ki i ti pe refer avek sa lalyans ki Zeova in fer avek li pour vin “en pret pour touzour selon lord Melkisedek.”​—Ebr. 5:5, 6.

16. Ki sa lalyans pour en Rwayonm i fer posib pour bann Kretyen swazir?

¹⁶ Sa 11 zapot fidel ti ‘reste fidel anver Zezi dan tou son difikilte ek soufrans.’ Sa lalyans pour en Rwayonm ti asir zot ki zot ti pou avek li dan lesyel e asiz lo tronn pour renny konman lerwa e servi konman pret. Anfet, pa zis sa 11 zapot ki ti pou annan sa privilez. Zezi ti aparet avek zapot Zan dan en vizyon e dir: “Sa ki ganny laviktwar mon pou akord li asiz avek mwan lo mon tronn, parey mwan mon’n ganny laviktwar e mon’n asiz avek mon Papa lo son tronn.” (Rev. 3:21) Alor lalyans pour en Rwayonm i ganny fer avek sa 144,000 Kretyen swazir. (Rev. 5:9, 10; 7:4) Sa i sa lalyans ki form sa baz legal pour zot renny avek Zezi dan lesyel. Sa i parey en nouvel marye ki sorti dan en bon fanmir ki marye avek en lerwa e enn fwa ki zot in marye zot kapab diriz ansanm. Anfet, Labib i refer avek bann Kretyen swazir konman “Nouvel-Marye” Kris, “en zenn fiy vyerz” ki’n fiyanse pou marye avek Kris.​—Rev. 19:7, 8; 21:9; 2 Kor. 11:2.

17, 18. (a) Eksplik sa sis lalyans ki nou’n vwar ki relye avek Rwayonm Bondye. (b) Akoz nou kapab annan en lafwa solid dan sa Rwayonm?

¹⁷ Tou bann lalyans ki nou’n vwar dan sa de lartik i relye avek bann laspe enportan sa Rwayonm. (Vwar sa latab “Lafason ki Bondye pou akonpli son plan” dan sa lartik avan.) Sa i montre klerman ki laranzman sa Rwayonm i solidman baze lo bann kontra legal. Pa sa i fer ki nou annan bokou plis rezon pour met tou nou konfyans dan sa Rwayonm Bondye dirize par Kris konman sa mwayen ki Bondye pe servi pour fer son plan konsernan later ek imen vin vre!​—Rev. 11:15.

¹⁸ Eski i kapab annan okenn dout ki sa ki sa Rwayonm pou fer pou anmenn benediksyon pour limanite? Avek konfyans nou kapab dir ki Rwayonm Bondye i sa sel solisyon pour problenm limanite. Alor avek devouman annou fer tou dimoun konn sa laverite.​—Mat. 24:14.