“Pour zot pa tonm dan Tantasyon”

“Veye e priye pour zot pa tonm dan tantasyon.”—MATYE 26:41.

SA PRESYON ti entans. Zanmen Zezi Kri, Garson Bondye, ti’n deza eksperyans sa kalite presyon avan sa. I ti pros pour fini son lavi lo later. Zezi ti realize ki i ti pros pour ganny arete, kondannen amor, e kloute lo en poto. I ti konnen ki son desizyon ek aksyon ti pou reflekte lo non son Papa. Zezi ti osi konnen ki lespwar lavi eternel pour limanite ti an zwe. Avek tou sa presyon lo li, ki i ti pou fer?

² Zezi ti al dan zarden Zetsemane avek son bann disip. Sa ti landrwa prefere Zezi. Ler i ti ariv laba, i ti al alekar avek son bann disip. La li tousel, i ti tourn ver son Papa dan lesyel pour ganny lafors. Pa zis en fwa me trwa fwa, i ti devid son leker avek son Papa dan lapriyer. Menm si i ti parfe, Zezi ti santi ki i pa ti pou kapab fer fas avek sa presyon lo li tousel.—Matye 26:36-44.

³ Ozordi, nou osi nou anba presyon. Pli boner dan sa brosir, nou ti vwar bann levidans ki nou pe viv dan bann dernyen zour sa move sistenm. Bann tantasyon ek presyon lemonn Satan pe vin pli for. Desizyon ek aksyon nou tou ki dir nou pe servi sa vre Bondye i reflekte lo son non e i annan en gran lefe lo nou lespwar pour viv dan son nouvo lemonn. Nou kontan Zeova. Nou anvi “reste fidel ziska lafen”—lafen nou lavi oubyen lafen sa sistenm, nenport sa ki vin premye. (Matye 24:13) Me ki mannyer nou kapab kit antet ki letan i kourt e kontinyen veye?

⁴ Zezi ti konnen ki son bann disip dan premye syek ek ozordi ti pou osi anba presyon. Alor i ti konsey nou tou: ‘Kontinyen veye e kontinyen priye pour zot pa tonm dan tantasyon.’ (Matye 26:41) Ki sa parol i vedir pour nou ozordi? Ki kalite tantasyon ki ou rankontre? Ki mannyer ou kapab ‘kontinyen veye’?

Ki nou ganny tante pour fer?

⁵ Toulezour nou tou nou ganny tante pour tonm dan ‘pyez dyab.’ (2 Timote 2:26) Labib i averti nou ki Satan in target sirtou bann adorater Zeova. (1 Pyer 5:8; Revelasyon 12:12, 17) Pour ki bi? I pa neseserman anvi touy nou. Si nou mor fidel sa i pa en laviktwar pour Satan. Satan i konn byen ki dan Son letan fikse, Zeova pou retir lanmor par mwayen rezireksyon.—Lik 20:37, 38.

⁶ Satan i anvi detrir en keksoz ki pli presye ki nou lavi. Sa se nou fidelite avek Bondye. Satan pe fer tou sa ki i kapab pour prouve ki i kapab fer nou aret ador Zeova. Alors, si i kapab kas nou fidelite—fer nou aret pres sa bon nouvel oubyen rezet bann standar Kretyen—sa pou en laviktwar pour Satan! (Efezyen 6:11-13) Alor “Dyab” i met devan nou bann tantasyon.—Matye 4:3.

⁷ Bann “riz” Satan i vin dan diferan fason ek metod. (Efezyen 6:11) I kapab tant nou pour tay deryer keksoz materyel, lanmizman, oubyen i kapab senm lafreyer ek dout. Me enn son bann metod pli efikas i dekourazman. Zis parey en dimoun rize ki pare pour profit tou loportinite, Satan i konnen ki bann santiman dekourazman i kapab afeblir nou. I konnen ki ler nou dekouraze nou kapab fasilman tonm dan tantasyon. (Proverb 24:10) Alor, sirtou ler nou moral i ba, i tant nou pour nou abandonnen.—Psonm 38:8.

⁸ I paret ki pli nou ariv ver lafen bann dernyen zour, rezon pour dekouraze i ogmante, e nou santi son bann lenfliyans. (Vwar bwat “Detrwa Keksoz ki fer en Dimoun dekouraze.”) Nenport keksoz ki fer nou dekouraze, dekourazman i kapab afeblir nou. Si ou fatige fizikman, mantalman, e emosyonnelman i kapab difisil pour “servi byen tou bann lokazyon” pour nou bann lobligasyon spirityel—ki enkli etidye Labib, asiste renyon Kretyen, e partisip dan predikasyon. (Efezyen 5:15, 16) Pa oubliye ki Satan i oule ki ou arete. Me la pa lemoman pour ralanti oubyen oubliye ki nou pe viv dan en letan irzan! (Lik 21:34-36) Ki mannyer ou kapab reziste tantasyon e kontinyen veye? Annou vwar kat sizesyon ki kapab itil.

‘Kontinyen priye’

⁹ Depan lo Zeova atraver lapriyer. Mazin legzanp Zezi dan zarden Zetsemane. Ki Zezi ti fer kan i ti santi li anba bokou presyon emosyonnel? I ti tourn ver Zeova pour led. I ti priy avek sitan bokou santiman ki “son transpirasyon ti tonm ater parey gro gout disan.” (Lik 22:44) Zis mazin sa. Zezi ti konn Satan byen. Depi ler Zezi ti dan lesyel i ti’n obzerv tou tantasyon ki Satan pe servi pour esey met bann serviter Bondye dan pyez. Me Zezi pa ti santi ki i ti pou fasilman sirmont nenport keksoz ki Satan ti kapab met devan li. Si Garson parfe Bondye ti santi sa nesesite pour priy Bondye pour ganny led ek lafors, pa nou nou devret priy plis ankor!—1 Pyer 2:21.

¹⁰ Pa oubliye osi ki apre ki Zezi ti ankouraz son bann disip pour ‘kontinyen priye,’ i ti dir zot: “Lespri i dispoze, me laser i feb.” (Matye 26:41) Zezi ti pe koz lo laser lekel? Sirman pa sa ki pour li. Ti napa nanryen feb dan son laser imen parfe. (1 Pyer 2:22) Me keksoz ti diferan avek son bann disip. Vi ki zot ti’n ne enparfe e zot ti osi annan tandans pour fer pese, zot ti pou sirtou bezwen led pour reziste tantasyon. (Romen 7:21-24) Pour sanmenm rezon Zezi ti ankouraz zot e osi tou lezot vre Kretyen apre zot, pour priy pour led pour ki zot a reisi fer fas avek tantasyon. (Matye 6:13) Zeova i reponn bann lapriyer koumsa. (Psonm 65:2) Ki mannyer? Dan omwen de fason.

¹¹ Premyerman, Bondye i ed nou pour rekonnet bann tantasyon. Bann tantasyon Satan i parey bann latrap ki’n ganny mete en pe partou lo en santye ki fernwanr. Si ou pa vwar zot, ou kapab ganny atrape. Par mwayen Labib ek bann piblikasyon baze lo Labib, Zeova i met bann latrap Satan dan kler, ki ed nou pour evite tonm dan tantasyon. Diran bann lannen ki’n pase, bann piblikasyon ek progranm lasanble in kontinyen averti nou konsernan bann danze parey per sa ki lezot i dir, imoralite seksyel, tay deryer keksoz materyel, ek lezot tantasyon sorti kot Satan. (Proverb 29:25; 1 Korentyen 10:8-11; 1 Timote 6:9, 10) Eski ou pa rekonesan anver Zeova pour fer nou konn bann lentansyon Satan? (2 Korentyen 2:11) Tou sa bann lavertisman i en larepons ou lapriyer pour ed ou reziste tantasyon.

¹² Dezyenmman, Zeova i reponn nou lapriyer par donn nou lafors pour andir tantasyon. Son Parol i dir: “Bondye . . . pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti.” (1 Korentyen 10:13) Si nou kontinyen depan lo Bondye, i pa pou les en tantasyon vin sitan for ki nou pou napa lafors spirityel pour reziste. Ki mannyer i “donn mwayen pour sorti”? I “donn son Lespri Sen tou bann ki demann li.” (Lik 11:13) Sa lespri i kapab ed nou rapel bann prensip Labib ki kapab ranforsi nou determinasyon pour fer sa ki byen e ed nou fer bann bon desizyon. (Zan 14:26; Zak 1:5, 6) I kapab ed nou pour demontre sa bann kalite ki nou bezwen pour kapab ganny laviktwar lo bann move tandans. (Galat 5:22, 23) Lespri Bondye i kapab osi motiv lezot frer ek ser pour ‘vin en led fortifyan pour nou.’ (Kolosyen 4:11, NW) Eski pa ou kontan ki Zeova i reponn ou lapriyer pour led dan en bon fason?

Fodre rezonnab dan ou Ekspektasyon

¹³ Pour kontinyen veye, nou bezwen rezonnab dan sa ki nou ekspekte avek nou lekor. Akoz presyon lavi, nou tou nou arive fatige parler. Me nou bezwen mazinen ki Bondye pa’n zanmen promet ki nou pou annan en lavi san okenn problenm dan sa sistenm. Menm dan letan Labib, bann serviter Bondye ti fer fas avek bann difikilte, enkli persekisyon, lamizer, depresyon, ek maladi.—Akt 8:1; 2 Korentyen 8:1, 2; 1 Tesalonisyen 5:14; 1 Timote 5:23.

¹⁴ Ozordi, nou osi nou annan problenm. Nou kapab fer fas avek persekisyon, problenm larzan, lite avek depresyon, tonm malad, e soufer dan lezot fason. Si Zeova ti fer mirak pour protez nou kont tou maler, eski sa pa ti pou donn Satan en rezon pour provok Zeova? (Proverb 27:11) Zeova i les son bann serviter ganny tante e teste, dan serten ka menm mor avan ler dan lanmen bann ki opoz zot.—Zan 16:2.

¹⁵ Alor, ki Zeova in promet? Parey nou’n dir avan, i’n promet ki i pou fer nou kapab reziste okenn tantasyon nou rankontre, osi lontan nou met tou nou konfyans dan li. (Proverb 3:5, 6) Atraver son Parol, son lespri, ek son lorganizasyon, i protez nou spirityelman, e i osi ed nou pour protez nou relasyon avek li. Si sa relasyon i reste solid, menm si nou mor, nou ganny laviktwar. Napa nanryen—ni menm lanmor—ki kapab anpes Bondye rekonpans son bann serviter fidel. (Ebre 11:6) Deplis dan sa nouvo lemonn ki tre pros, Zeova pou sirman akonpli tou larestan son bann promes merveye pour bann ki kontan li.—Psonm 145:16.

Kit antet bann Kestyon konsernan Drwa Zeova pour dirize

¹⁶ Pour andire ziska lafen, nou bezwen rapel bann kestyon enportan ki enplik rezon akoz Bondye in permet mesanste. Si parler nou prop problenm i paret tro lour pour anmennen e nou ganny lanvi arete, nou devret rapel nou lekor ki Satan in met odefi drwa ki Zeova i annan pour dirize. Satan in osi kestyonn devosyon ek fidelite bann adorater Bondye. (Zob 1:8-11; 2:3, 4) Nou lavi pa pli enportan ki sa bann kestyon ek fason ki Zeova in swazir pour rezourd zot. Ki mannyer?

¹⁷ Vi ki Bondye in permet difikilte pour en serten letan, sa in donn ase letan pour lezot aksepte laverite. Mazin sa: Zezi in soufer pour ki nou ganny lavi. (Zan 3:16) Eski nou pa rekonesan pour sa? Me eski nou pare pour siport nou difikilte pour ankor en pe letan afen ki lezot i kapab ganny lavi? Pour andire ziska lafen, nou bezwen apresye ki lasazes Zeova i pli gran ki pour nou. (Izai 55:9) I pou met en lafen avek mesanste ler sa pli bon moman i arive pour rezourd sa bann kestyon pour touzour e pour nou prop boner eternel. Annefe, eski i annan en lot pli bon fason? Bondye pa zanmen enzis!—Romen 9:14-24.

“Apros avek Bondye”

¹⁸ Pour nou reste vizilan, nou bezwen reste pros avek Zeova. Pa zanmen oubliye ki Satan pe fer tou sa ki i kapab pour detrir nou bon relasyon avek Zeova. Satan i anvi fer nou krwar ki lafen pa pou zanmen arive e ki napa okenn lenportans pour pres sa bon nouvel oubyen pour viv an armoni avek standar Labib. Me “i manter e papa tou mansonz.” (Zan 8:44) Nou bezwen determinen pour “reziste kont Dyab.” Nou relasyon avek Zeova i en keksoz ki nou pa devret zanmen pran alalezer. Avek lanmour, Labib i ankouraz nou: “Apros avek Bondye, e i ava apros avek zot.” (Zak 4:7, 8) Ki mannyer ou kapab vin pli pros avek Zeova?

¹⁹ Lapriyer ansanm avek refleksyon i tre enportan. Ler presyon lavi i paret tro lour, devid ou leker avek Zeova. Pli ou presi dan ou lapriyer, pli i pou fasil pour ou vwar larepons ou lapriyer. Petet larepons i pa pou toultan egzakteman sa ki ou ti annan antet, me si ou dezir se pour onor li e reste fidel, i pou donn ou led neseser pour ou kapab andire. (1 Zan 5:14) Ler ou vwar son gidans dan ou lavi, ou pou vin pli pros avek li. I osi tre enportan pour lir e reflesir lo son bann kalite ek aksyon, parey Labib i revele. Sa bann refleksyon pou ed ou konn li pli byen, i pou tous ou leker e ogmant ou lanmour pour li. (Psonm 19:14) Sa lanmour, plis ki okenn lezot keksoz, pou ed ou reziste tantasyon e kontinyen veye.—1 Zan 5:3.

²⁰ Pour reste pros avek Zeova, i osi enportan ki nou reste pros avek nou konpanyon Kretyen. Sa pou ganny diskite dan dernyen seksyon sa brosir.

KESTYON LETID

• Ki Zezi ti fer ler i ti anba bokou presyon ver lafen son lavi lo later, e ki i ti ankouraz son bann disip pour fer? (Paragraf 1-4)

• Akoz Satan in target bann adorater Zeova, e dan ki fason i tant nou? (Paragraf 5-8)

• Pour reziste tantasyon, akoz nou bezwen kontinyen priye (Paragraf 9-12), rezonnab dan sa ki nou ekspekte avek nou lekor (Paragraf 13-15), kit antet bann kestyon ki enplike (Paragraf 16-17), e apros avek Bondye (Paragraf 18-20)?

[Bwat lo paz 25]

Detrwa Keksoz ki fer en Dimoun dekouraze

Lasante oubyen lavyeyes. Si nou pe soufer lontan avek en maladi oubyen si nou pa kapab fer otan ki nou anvi akoz lavyeyes, nou kapab dekouraze akoz nou pa kapab fer plis dan servis Bondye.—Ebre 6:10.

Dezapwentman. Petet nou kapab perdi kouraz si nou vwar dimoun pa tro byen reazir anver nou zefor pour pres Parol Bondye.—Proverb 13:12.

Santi nou pa vo nanryen. Si en dimoun in ganny maltrete pour plizyer lannen, i kapab santi ki personn menm Zeova pa kapab kontan li.—1 Zan 3:19, 20.

Ler nou ganny ofanse. Si en konpanyon Kretyen in ofans nou en kantite, sa i kapab telman trouble nou ki nou anvi aret asiste renyon oubyen partisip dan predikasyon.—Lik 17:1.

Persekisyon. Lezot dimoun ki pa partaz ou lafwa i kapab opoz, persekit nou oubyen sikann ou.—2 Timote 3:12; 2 Pyer 3:3, 4.

[Portre lo paz 26]

Zezi ti ankouraz nou pour ‘kontinyen priye’ pour ganny led pour reziste tantasyon