Kestyon lekter

Serten Levit ki pa ti pret ti annan lezot responsabilite, tel parey servi konman gard tanp. Zot ti anba konmann sef gard tanp. En ekriven Zwif ki apel Philo i dekri travay sa bann gard. I dir: “Serten sa bann [Levit] ti ganny mete kot baro konman gardyen larantre tanp. Lezot ti ganny mete devan larantre landrwa sen dan tanp pour anpes okenn dimoun ki napa drwa antre, ni menm par aksidan. Serten ti fer letour tanp pour gardyen e zot ti fer sakenn son tour, lizour ek aswar.”

Sannedren ti kapab demann lasistans sa bann gard. Sa ti sel group Zwif ki gouvernman Romen ti permet zot annan zarm.

Spesyalis Labib Joachim Jeremias i dir ki letan bann gard ti aret Zezi, i ti demann zot akoz ler i ti pe ansennyen dan tanp zot pa ti aret li. (Mat. 26:55) Zezi pa ti pou’n demann sa kestyon si sa bann gard pa ti form parti gard tanp. Sa menm spesyalis Labib i krwar ki sa bann ki ti anvi aret Zezi avan sa, ti osi bann gard tanp. (Zan 7:32, 45, 46) Pli tar, Sannedren ti anvoy sef gard tanp ek serten son bann gard pour atrap bann zapot e anmenn kot zot. I tre probab ki i ti sa bann gard tanp ki ti trenn zapot Pol an deor tanp.​—Akt 4:1-3; 5:17-27; 21:27-30.