“Zanmen okenn dimoun in deza koz koumsa avan”

Zezi i ankor Zerizalenm pour Lafet bann Latant (oubyen Payot). I kontan ki ‘en kantite dimoun dan lafoul i konmans annan lafwa dan li,’ me bann sef relizye pa kontan. Zot anvoy bann zofisye ki parey bann gard pour aret li. (Zan 7:31, 32) Par kont, Zezi pa esey kasyet.

O kontrer, Zezi i kontinyen ansenny an piblik Zerizalenm. I dir: “Mon pou avek zot pour ankor en pti pe letan avan ki mon al kot sa Enn ki’n anvoy mwan. Zot pou rod mwan, me zot pa pou vwar mwan e kot mon ete, zot pa pou kapab vini.” (Zan 7:33, 34) Bann Zwif pa konpran, alor zot dir antre zot: “Me kot sa zonm pe mazin ale kot nou pa pou vwar li? I pa pe mazin al kot bann Zwif ki reste parmi bann Grek e ansenny bann Grek, non? Ki i pe esey dir ler i dir, ‘Zot pou rod mwan, me zot pa pou vwar mwan e kot mon ete, zot pa pou kapab vini’?” (Zan 7:35, 36) Par kont, Zezi pe koz lo son lanmor ek son rezireksyon dan lesyel kot son bann lennmi pa pou kapab swiv li.

Setyenm zour lafet i arive. Tou le bomaten pandan lafet, en pret in al pran delo dan Basen Siloam e vid li dan en basen pour sa delo koule ziska kot lotel dan tanp. Petet Zezi i fer bann dimoun rapel sa koutim ler i dir: “Si en dimoun i swaf, vin kot mwan e i a bwar. Sa ki annan lafwa dan mwan, parey lekritir in dir: ‘Delo lavi pou kontinyen koule sorti dan fon son leker.’”​—Zan 7:37, 38.

Zezi pe koz lo sa ki pou arive ler son bann disip pou ganny swazir avek lespri sen pour al viv dan lesyel. Sa pou arive apre ki Zezi in mor. Zour Lapannkot lannen 33, delo lavi i konmans koule ler bann disip ki’n ganny swazir gras a lespri sen i anons laverite avek bann dimoun.

Ler serten dimoun i tann lansennyman Zezi, zot dir: “Vreman li menm sa Profet.” I paret ki zot pe refer avek sa profet ki ti pou pli gran ki Moiz. Lezot dimoun i dir: “Li menm Kris.” Me serten i dir: “Kris pa sorti Galile li, non? Eski pa lekritir i dir ki Kris i sorti dan desandans David e i sorti Betleenm, vilaz David?”​—Zan 7:40-42.

Alor lafoul pa tonm dakor. Menm si serten i anvi ki Zezi i ganny tyonbo, personn pa met lanmen lo li. Ler bann zofisye i retourn kot bann sef relizye san Zezi, bann sef pret ek bann Farizyen i demande: “Akoz zot pa’n anmenn li?” Bann zofisye i reponn: “Zanmen okenn dimoun in deza koz koumsa avan?” Dan zot lakoler, bann sef relizye i boufonn zot: “Pa dir mwan zot osi zot in ganny anbete? Napa ni en sef ouswa en Farizyen ki’n krwar dan li, non? Me sa lafoul ki pa konn nanryen dan Lalwa i bann dimoun modi.”​—Zan 7:45-49.

Ler Nikodenm ki en Farizyen e en manm Sannedren i tann sa, i ganny kouraz pour defann Zezi. Apepre de-z-an edmi pase, Nikodenm ti al kot Zezi aswar e eksprim son lafwa dan li. Aprezan Nikodenm i dir: “Dapre nou Lalwa, nou pa ziz en zonm amwen ki nou ekout li premye e konnen ki i’n fer, non?” Ki bann sef relizye i dir pour defann zot lekor? “Ou pa sorti Galile ou osi non? Al etidye Lekritir e ou a vwar ki napa okenn profet ki sorti Galile.”​—Zan 7:51, 52.

Lekritir pa direkteman dir ki en profet ti pou sorti Galile. Par kont, Parol Bondye i montre ki Kris pou sorti laba ler i ti predir ki zot ti pou vwar “en gran lalimyer,” dan rezyon “Galile kot lezot nasyon i reste.” (Izai 9:1, 2, NWT; Matye 4:13-17) Deplis, parey i ti’n ganny predir, Zezi ti ne Betleenm e i en desandans David. Menm si i posib ki bann Farizyen i konn sa, i tre probab ki zot menm ki’n fann bann rimer pour ki dimoun i annan en move pwennvi lo Zezi.