LO KOUVERTIR | ESKI TOU I FINI AVEK LANMOR?

Eski tou i fini avek lanmor?

Betani ti en pti vilaz ki ti apepre 3 km avek Zerizalenm. (Zan 11:18) En maler ti arive laba, zis detrwa semenn avan lanmor Zezi. Lazar, en zanmi pros Zezi ti tonm gravman malad en sel kou e i ti mor.

Ler Zezi ti tann sa nouvel premye kou, i ti dir son bann disip ki Lazar ti pe dormi e ki i ti pe al lev li. (Zan 11:11) Me bann disip Zezi pa ti pe konpran sa ki Zezi ti pe dir, alor Zezi ti klerman dir zot: “Lazar in mor.”​—Zan 11:14.

Zezi ti ariv Betani kat zour apre ki Lazar ti’n ganny antere. I ti esey konsol Mart, ser Lazar, me Mart ti dir li: “Si ou ti la mon frer pa ti a’n mor.” (Zan 11:17, 21) Zezi ti reponn li: “Mwanmenm, larezireksyon ek lavi, sa ki krwar dan mwan, menm si i a’n mor, i pou viv.”​—Zan 11:25.

Pour montre ki sa ki i ti pe dir ti vre, Zezi ti al o bor tonbo e kriye: “Lazar, sorti!” (Zan 11:43) Bann ki ti la ti etonnen pour vwar sa zonm ki ti’n mor aparet en sel kou.

Zezi ti’n deza resisit de dimoun avan sa. En fwa, i ti resisit fiy Zairis. Zis avan resisit li, ankor enn fwa Zezi ti dir ki sa pti fiy ti pe dormi.​—Lik 8:52.

Eski ou’n remarke ki Zezi ti konpar lanmor Lazar ek fiy Zairis avek en dimoun ki pe dormi? Sa i en bon konparezon. Akoz? Parski kan en dimoun pe dormi i pa konsyan nanryen e i osi pa santi douler oubyen soufrans. (Eklezyast 9:5; vwar bwat, “Lanmor i parey en sonmey profon.”) Bann disip Zezi ti konpran klerman kondisyon bann mor. Encyclopedia of Religion and Ethics i dir: “Pour bann disip Zezi lanmor ti konmsi zot pe dormi e bann ki ti’n mor fidelman, latonm ti en landrwa pour zot repoze.”a

I rekonfortan pour konnen ki bann mor pe dormi dan zot tonbo e pa pe soufer. Alor, napa okenn mister avek lanmor e nou pa bezwen per lanmor.

“SI EN ZONM I MOR, ESKI I KAPAB VIV ANKOR?”

Me menm si nou byen kontan pour al repoze aswar, napa personn ki anvi al dormi pour touzour. Ki lespwar nou annan ki bann ki pe dormi dan zot latonm pou reviv, parey Lazar ek fiy Zairis?

Zob ti demann sa menm kestyon ler i ti pros pour mor. I ti demande: “Si en zonm i mor, eski i kapab viv ankor?”​—Zob 14:14.

I ti pe koz avek Bondye Tou-Pwisan e i ti reponn son prop kestyon an dizan: “Ou pou apel mwan, e mon pou reponn ou. Ou pou vreman anvi vwar travay ou lanmen.” (Zob 14:15) Zob ti asire ki Zeova pe esper avek enpasyans sa zour kan i pou resisit son serviter fidel. Eski Zob ti pe zis swete ki sa ti le ka? Pa ditou!

Lefet ki Zezi ti kapab resisit bann dimoun i klerman montre ki Bondye ti donn Zezi pouvwar lo lanmor. Anfet, Labib i dir ki aprezan Zezi i annan “lakle lanmor.” (Revelasyon 1:18) Alor, Zezi pou ouver baro bann latonm, zis parey i ti donn lord pour tir sa ros lo latonm Lazar.

Labib i repet sa lespwar lo rezireksyon plizyer fwa. En lanz ti donn profet Danyel sa lasirans: “Ou pou repoze, me ou pou debout pour ganny ou par a lafen bann zour.” (Danyel 12:13) Zezi ti dir bann Sadiseen, setadir bann sef Zwif ki pa ti krwar dan rezireksyon: “Zot dan lerer, akoz zot pa konn ni Lekritir ni pisans Bondye.” (Matye 22:23, 29) Zapot Pol ti dir: “Mon annan sa menm lesperans dan Bondye parey zot ki tou dimoun bon konman move, pour resisite.”​—Akt 24:15.

KAN KI BANN MOR POU RESISITE?

Kan ki bann bon ensi ki move dimoun pou resisite? Lanz ti dir Danyel, ki ti en zonm drwat, ki i ti pou resisite “a lafen bann zour.” Mart osi ti krwar ki son frer Lazar ti pou “resisite zour larezireksyon.”​—Zan 11:24.

Labib i relye “dernyen zour” avek dominasyon Rwayonm Kris. Pol ti ekri: “Parski fodre ki Kris i rennyen ziska ki i’n met tou son lennmi anba son lipye. Dernyen lennmi ki pou ganny detri, se lanmor.” (1 Korentyen 15:25, 26) Se pour sa rezon akoz nou devret priye pour ki Rwayonm Bondye i vini e lavolonte Bondye i ganny fer lo later.b

Zob ti konn byen ki lavolonte Bondye se pour resisit bann mor. Ler sa zour pou arive, lanmor pou vreman ganny detrir. Vreman, personn pa pou zanmen demann ankor sa kestyon: ‘Eski tou i fini avek lanmor?’

[Not anba lo paz]

[Bwat lo paz 6]

Lanmor i parey en profon sonmey

“Fer mon lizye briye, pour ki mon pa tonm dormi dan lanmor.”​—Psonm 13:3.

“‘Nou zanmi Lazar pe dormi, me mon pe al lev li dan son sonmey.’ Bann disip ti dir li, ‘Senyer, si i pe dormi i ava byen.’ Zezi ti oule dir ki Lazar ti’n mor.”​—Zan 11:11-13.

“Tou dimoun ti pe kriye e plere. Me Zezi ti dir, ‘Pa plere, i pa’n mor, i pe dormi.’ Me zot ti riy li, akoz zot ti byen konnen ki sa fiy ti’n mor.”​—Lik 8:52, 53.

[Bwat lo paz 7]

Bann mor pou resisite

“Ou bann mor pou viv. Mon bann kadav pou leve. Leve e kriye avek lazwa.”​—Izai 26:19.

“Bokou parmi bann ki pe dormi dan lapousyer later pou leve.”​—Danyel 12:2.

“Sa ler pe arive kan tou bann mor ki dan tonbo pou tann son lavwa, e zot pou sorti dan zot tonbo.”​—Zan 5:28, 29.

[Portre lo paz 6]

“Lazar, sorti!”