Kontinyen devlop plis lanmour pour bann frer ek ser

“Les zot lavi ganny kontrole par lanmour, parey Kris in kontan nou.”—EFE. 5:2.

 1. Ki laspe enportan Zezi ti fer resorti konsernan son bann disip?

PRES sa bon nouvel Rwayonm Bondye portanport i sa mark ki idantifye Temwen Zeova. Me, Zezi ti swazir en lot laspe pour idantifye son bann vre disip. I ti dir: “La mon donn zot en komannman nouvo: kontan kanmarad. Zot devre kontan kanmarad parey mwan mon’n kontan zot. Dimoun pou war ki zot mon bann disip si zot kontan kanmarad.”—Zan 13:34, 35.

2, 3. Ki lefe lanmour ki nou demontre i annan lo bann dimoun ki asiste nou bann renyon Kretyen?

² Napa personn ki demontre sa kalite lanmour parey i egziste ant bann vre Kretyen. Zis parey en lema i atir en bout metal, lanmour i atir bann serviter Zeova ansanm dan linite e bann dimoun senser ver vre ladorasyon. Pran par egzanp, Marcelino en zonm sorti Kameroun ki ti vin aveg akoz en aksidan dan son travay. Apre son aksidan, dimoun ti pe fann rimer konmkwa i ti’n vin aveg akoz i ti en sorsye. Olye donn li rekonfor, son paster ek lezot manm son legliz ti pous li pour ki i nepli asosye avek zot. Ler en Temwen Zeova ti envit li pour vin en renyon, Marcelino ti ezite pour ale. I pa ti anvi ganny rezete ankor.

³ Marcelino ti sirprann ki mannyer keksoz ti pase kot Lasal Rwayonm. I ti ganny byen akeyir e i ti ganny rekonfor atraver lansennyman Labib ki i ti tande. I ti konmans asiste tou renyon kongregasyon, i ti progrese dan son letid Labib e i ti batize an 2006. Aprezan i pe partaz laverite avek son fanmir ek vwazen e i’n konmans plizyer letid Labib. Marcelino i anvi ki sa bann dimoun ki pe etidye Labib avek li i santi sa menm lanmour ki i’n eksperyanse parmi pep Bondye.

 4. Akoz nou devret pran aker konsey Pol ‘pour les nou ganny kontrole par lanmour’?

⁴ Menm si sa lanmour ki egziste ant bann frer ek ser i atiran, nou tou nou bezwen fer zefor pour prezerv li. Zis mazin en dife pe brile aswar e pe atir dimoun o bor son laflanm pour zot ganny sofe. Si bann dimoun ki pe apresye sa dife pa azout dibwa, sa dife pou tennyen. Pareyman, sa lanmour ekstraordiner ki ini nou dan kongregasyon pou diminyen si sak Kretyen pa fer zefor pour fer li vin pli for. Ki mannyer nou kapab fer sa? Zapot Pol i donn larepons: “Les zot lavi ganny kontrole par lanmour, parey Kris in kontan nou e i’n donn son lavi pour nou, konman en lofrann, en sakrifis ki fer plezir Bondye.” (Efe. 5:2) Sa kestyon ki nou oule egzaminen i: ‘Dan ki fason mon kapab kontinyen les mon lavi ganny kontrole par lanmour?’

‘Ouver gran zot leker, zot osi’

5, 6. Akoz Pol ti ankouraz kongregasyon Korent pour “ouver gran zot leker”?

⁵ Zapot Pol ti ekrir bann Kretyen dan ansyen lavil Korent: “Nou’n koz fran avek zot, ser zanmi Korentyen, e nou’n ouver nou leker byen gran. Nou pa’n ferm nou leker avek zot, se zot ki’n ferm zot leker. Mon koz avek zot konman mon bann zanfan, alor ouver gran zot leker pour nou, zot osi.” (2 Kor. 6:11-13) Akoz Pol ti ankouraz bann Kretyen Korent pour ouver gran zot leker?

⁶ Annou vwar ki mannyer kongregasyon dan ansyen lavil Korent ti konmanse. Pol ti vin Korent tar dan lannen 50 N.L. Kan Pol ti konmans son predikasyon i ti rankontre difikilte, me sa zapot pa ti bes lebra. Dan lespas en ptigin letan, en kantite dimoun dan sa lavil ti annan lafwa dan sa bon nouvel. Pour “enn an edmi” Pol ti pas letan pour ansennyen e fortifye sa nouvo kongregasyon. I kler, ki i ti devlop en gran lanmour pour bann Kretyen Korent. (Akt 18:5, 6, 9-11) Zot ti annan tou rezon pour kontan e respekte li an retour. Me, serten dan kongregasyon ti elwanny zot avek li. Petet i ti annan detrwa ki pa ti kontan son konsey fran ki i ti donnen. (1 Kor. 5:1-5; 6:1-10) I kapab ki lezot ti’n ekout mansonz sa “bann zapot ki [ti] pas zot pour siperyer.” (2 Kor. 11:5, 6) Pol ti anvi ki tou son bann frer ek ser i annan en lanmour senser pour li. Alor i ti sipliy zot pour “ouver gran zot leker” pour vin pli pros avek li ek lezot frer ek ser.

 7. Ki mannyer nou kapab “ouver gran [nou] leker” par demontre lanmour pour nou bann frer ek ser?

⁷ Be nou? Ki mannyer nou kapab “ouver gran [nou] leker” par demontre lanmour pour nou bann frer ek ser? Bann frer ek ser ki annan preski menm laz oubyen ki annan menm kiltir i kapab vwar li pli fasil pour demontre lanmour pour kanmarad. Bann ki kontan menm kalite divertisman i souvan pas en kantite letan ansanm. Me si akoz nou partaz menm lentere avek serten Kretyen sa i elwanny nou avek lezot, nou bezwen “ouver gran [nou] leker.” I ti pou saz pour demann nou lekor: ‘Eski mon toultan pres oubyen fer bann aktivite zis avek bann frer ek ser ki mon pros avek? Eski kot Lasal Rwayonm mon pa tro koz avek bann nouvo akoz mon krwar ki mon bezwen donn zot letan pour zot montre ki zot vreman merit mon lanmitye? Eski mon dir bonzour bann aze ensi ki bann zenn dan kongregasyon?’

8, 9. Ki mannyer konsey Pol dan Romen 15:7 i ed nou pour akey kanmarad dan en fason ki fer nou lanmour pour bann frer ek ser vin pli for?

⁸ An rapor avek akey kanmarad, sa ki Pol ti dir avek bann Romen i kapab ed nou pour devlop sa bon pwennvi lo nou bann frer ek ser. (Lir Romen 15:7.) Sa mo Grek ki’n ganny tradwir “resevwar” oubyen akeyir i vedir “byen resevwar en dimoun oubyen demontre lospitalite, aksepte li dan ou group zanmi.” Ler en dimoun ti demontre lospitalite anver son bann zanmi kot son lakour, i ti fer zot konnen ki i ti kontan pour vwar zot. Dan en sans senbolik, Kris in resevwar nou dan sa menm fason dan kongregasyon e nou ganny ankouraze pour imit li ler nou resevwar bann frer ek ser.

⁹ Kan nou akey nou bann frer ek ser kot Lasal Rwayonm ouswa lezot landrwa, nou kapab al ver bann ki nou pa’n vwar oubyen koz avek tou resaman. Akoz nou pa pas detrwa minit pour fer en konversasyon avek zot? Dan lot renyon nou kapab fer parey avek lezot. Dan en ptigin letan, nou pou’n ganny bann konversasyon agreab avek preski tou nou bann frer ek ser. Pa bezwen ki nou trakase si nou pa ganny sans koz avek tou dimoun sa menm zour. Personn pa devret ofanse si nou pa arive dir zot bonzour sak renyon.

10. Ki sa bon loportinite nou tou nou annan dan kongregasyon, e ki mannyer nou kapab profit omaksimonm sa loportinite ki nou annan?

¹⁰ Sa premye pa pour resevwar lezot se pour dir zot bonzour. I en pa ki kapab anmenn ver bann konversasyon agreab ek en lanmitye dirab. Par egzanp, ler bann dimoun ki pe asiste lasanble distrik ek rezyonal i entrodwir zot lekor avek lezot e konmans koze, zot enpasyan pour revwar kanmarad ankor. Bann volonter dan konstriksyon Lasal Rwayonm ensi ki bann ki pe partisip dan travay sekour i souvan vin bann bon zanmi akoz zot aprann konn bann kalite kanmarad par partaz zot leksperyans ansanm. I annan en kantite loportinite pour devlop en lanmitye dirab dan lorganizasyon Zeova. Si nou “ouver gran [nou] leker,” nou pou ganny plis zanmi e ranforsi sa lanmour ki ini nou dan vre ladorasyon.

Fer letan pour lezot

11. Parey dan Mark 10:13-16 i montre, ki legzanp Zezi in kite?

¹¹ Tou Kretyen i kapab fer zefor pour vin en dimoun ki fasil pour aprose, parey Zezi ti ete. Annou vwar ki mannyer Zezi ti reakte ler son bann disip ti esey anpes bann paran pour anmenn bann zanfan kot li. I ti dir: “Les bann zanfan vin kot mwan, pa anpes zot, akoz Rwayonm Bondye i pour sa ki resanble zot.” Apre “i ti pran bann zanfan dan son lebra, enpoz lanmen lo zot e beni zot.” (Mark 10:13-16) Zis mazinen, pa sa bann zanfan ti bezwen vreman kontan lefet ki sa Gran Ansennyan ti demontre en latansyon ranpli avek lanmour anver zot!

12. Kwa ki kapab anpes nou pour fer konversasyon avek lezot?

¹² Sak Kretyen i devret demann son lekor, ‘Eski mon fer letan pour lezot, oubyen mon souvan paret tro okipe?’ Bann labitid ki pa move i kapab parfwa anpes nou pour fer konversasyon avek lezot. Par egzanp, si nou souvan pe servi telefonn portab oubyen pe ekout bann keksoz ki ganny anrezistre lo telefonn ouswa lezot mwayen ki nou annan ler nou avek lezot, sa i kapab fer zot santi ki nou pa apresye zot prezans. Si lezot i souvan vwar nou okipe pe get nou pti konpiter ki nou kapab mars avek, zot kapab ganny sa lenpresyon ki nou pa enterese pour koz avek zot. Byensir, i annan “en letan pour reste trankil.” Me, ler nou parmi lezot dimoun, i souvan “letan pour koze.” (Ekle. 3:7) Serten i kapab dir: “Mon pli kontan reste mon tousel” oubyen “Mon pa kontan koze letan mon fek leve dan bomaten.” Kantmenm sa, fer konversasyon amikal menm ler nou pa anvi i demontre lanmour ki “pa rod son prop lentere.”—1 Kor. 13:5.

13. Ki pwennvi Pol ti ankouraz Timote pour annan pour bann frer ek ser Kretyen?

¹³ Pol ti ankouraz zenn Timote pour annan respe pour tou manm dan kongregasyon. (Lir 1 Timote 5:1, 2.) Nou osi nou devret tret bann Kretyen aze konmsi zot ti nou manman ek nou papa e bann zenn konman nou bann frer ek ser, setadir zanfan nou prop paran. Ler nou annan sa latitid, napa enn ant nou bann frer ek ser ki pou santi zot konman etranze dan nou prezans.

14. Ki byenfe ou gannyen atraver konversasyon ankourazan avek lezot?

¹⁴ Kan nou fer lezot partisip dan konversasyon ankourazan, nou kontribye anver zot byennet spirityel e emosyonnel. En frer ki dan Betel i gard en bon souvenir lo ki mannyer detrwa Betelit ki ti dan Betel depi lontan ti souvan pran letan pour koz avek li ler i ti fek antre Betel. Zot bann parol ankourazan ti fer li santi ki i ti vreman form parti fanmir Betel. Aprezan i esey imit zot par fer konversasyon avek lezot Betelit.

Limilite i ed nou pour fer lape

15. Kwa ki montre ki parler nou pa tonm dakor avek kanmarad?

¹⁵ De ser Kretyen dan kongregasyon ansyen lavil Filip, Evodi ek Sentis ti aparaman annan serten difikilte pour rezourd en problenm ki ti leve antre zot. (Fili. 4:2, 3) Sa gro dispit ki ti leve ant Pol ek Barnabas ti vin piblik e ti fer zot fer sakenn pour li pandan en pe letan. (Akt 15:37-39) Sa bann resi i montre ki i arive parler ki bann vre adorater pa tonm dakor avek kanmarad. Zeova i donn nou led pour rezourd bann konfli e reetabli lanmitye. Me i demann nou pour fer en keksoz.

16, 17. (a) Akoz i enportan annan limilite pour rezourd bann dezakor personnel? (b) Ki mannyer sa resi konsernan latitid Zakob anver Ezai i montre valer limilite?

¹⁶ Fer konmsi ou pe al fer en vwayaz zot de en zanmi dan loto. Avan ki ou kapab konmans sa vwayaz, ou bezwen met lakle lo kontak pour start moter sa loto. Pour kapab rezourd bann dezakor i osi konmans avek en lakle. Sa lakle i limilite. (Lir Zak 4:10.) Parey sa bann legzanp swivan dan Labib i montre, sa lakle i permet bann frer ek ser ki fase avek kanmarad pour konmans aplik bann prensip Labib.

¹⁷ Ven-t-an ti’n pase depi ki Ezai ti’n vin ankoler akoz i ti’n perdi son drwa premye ne ki i ti’n vann avek son frer Zakob e i ti anvi touy li. Sa de zimo ti pe al rezwenn kanmarad ankor apre tou sa letan, “e Zakob ti vreman per e i ti trakase.” I ti santi ki i ti annan en gran posibilite ki Ezai ti pou atak li. Me ler zot zwenn kanmarad, Zakob ti fer en keksoz ki Ezai pa ti pe ekspekte. I “ti prostern ater” anmezir ki i ti apros son frer. Ki ti arive apre? “Ezai ti konmans taye pour zwenn li, e ti may li, ser li dan son likou e anbras li e zot ti konmans plere.” Sa ti anpes lager arive. Limilite Zakob ti ed li pour sirmont tou laenn ki Ezai ti annan pour li.—Zen. 27:41; 32:3-8; 33:3, 4.

18, 19. (a) Ler bann dezakor personnel i leve, akoz i enportan ki nou pran linisyativ pour aplik konsey Labib? (b) Akoz nou pa devret bes lebra si sa lot dimoun pa byen reazir deswit?

¹⁸ I annan bon konsey dan Labib lo konman pour rezourd bann dezakor. (Mat. 5:23, 24; 18:15-17; Efe. 4:26, 27)a Me si nou pa aplik sa konsey avek limilite, i pou difisil fer lape. Ler nou zis espere ki sa lot dimoun i demontre limilite sa i pa solisyon kan nou osi nou annan sa lakle dan nou lanmen.

¹⁹ Si o konmansman nou zefor pour fer lape pa marse pour serten rezon, nou pa devret perdi lespwar. I kapab ki sa lot dimoun i bezwen en pe letan pour konpran son santiman. Bann frer Zozef ti mal azir avek Zozef. I ti pas en bon pe letan avan ki zot ti revwar li, e aprezan i ti’n vin premye minis Lezip. Me finalman zot leker ti sanze e zot ti sipliy li pour pardonn zot. Zozef ti pardonn zot e bann garson Zakob ti vin en nasyon ki ti annan sa privilez pour port non Zeova. (Zen. 50:15-21) Ler nou prezerv lape avek nou bann frer ek ser, nou kontribye pour ki i annan linite ek lazwa dan kongregasyon.—Lir Kolosyen 3:12-14.

Montre lanmour par aksyon ek laverite

20, 21. Ki leson nou kapab aprann avek Zezi atraver sa legzanp kot i ti lav lipye son bann zapot?

²⁰ En pti pe letan avan son lanmor, Zezi ti dir avek son bann zapot: “Mon’n donn zot en legzanp pour ki zot osi, zot a fer parey mon’n fer pour zot.” (Zan 13:15) I ti’n fek fini lav lipye zot tou le douz. Sa ki Zezi ti fer pa ti zis en koutim ni en fason pour demontre labonte. Avan ki i ti rakont sa resi konsernan lav lipye, Zan ti ekrir: “I ti’n touzour kontan bann dimoun ki ti pour li dan lemonn, e i’n kontan zot ziska lafen.” (Zan 13:1) Son lanmour pour bann disip ki ti motiv Zezi pour rann zot en servis ki ti normalman ganny fer par en lesklav. Aprezan avek limilite zot ti bezwen fer keksoz pour kanmarad avek lanmour. Wi, lanmour senser pour bann frer ek ser i devret motiv nou pour pran swen e demontre lentere anver tou nou konpanyon Kretyen.

²¹ Pyer, enn bann zapot ki Garson Bondye ti lav son lipye, ti byen konpran sinifikasyon sa ki Zezi ti fer. I ti ekrir: “Zot, zot in ganny pirifye par lobeisans laverite, pour zot kontan zot bann frer senserman. Kontan kanmarad bokou avek tou zot leker.” (1 Pyer 1:22) Zapot Zan, en lot zapot ki Senyer ti osi lav son lipye ti ekrir: “Mon bann pti zanfan fodre pa ki nou montre lanmour zis par bann zoli parol, e zoli diskour, me vreman par nou laksyon” ek laverite. (1 Zan 3:18) Fotespere nou leker i motiv nou pour montre lanmour pour nou bann frer ek ser par nou aksyon.

[Not anba lo paz]

Eski ou rapel?

• Dan ki fason nou kapab “ouver gran [nou] leker” pour kontan kanmarad?

• Kwa ki pou ed nou pour fer letan pour lezot?

• Ki rol limilite i zwe pour fer lape?

• Kwa ki devret motiv nou pour annan lentere pour nou bann frer ek ser?

[Portre lo paz 24]

Resevwar byen bann frer ek ser

[Portre lo paz 26]

Pa les pase bann loportinite pour fer letan pour lezot