Lafwa​—En kalite ki ranforsi nou relasyon avek Zeova

LAFWA i donn nou lafors pour fer en kantite keksoz. Par egzanp, menm si Satan i anvi gat nou relasyon avek Zeova, lafwa i ed nou pour “tenny tou bann dart alimen sorti kot sa enn move.” (Efe. 6:16) Si nou annan lafwa, nou pou kapab fer fas avek bann problenm ki parey montanny. Zezi ti dir son bann disip: “Si zot annan lafwa groser en lagrenn moutard, zot pou dir sa montanny, ‘Sorti la al laba’ e i pou ale.” (Mat. 17:20) Vi ki lafwa i kapab ranforsi nou relasyon avek Zeova, i enportan pour nou konn larepons sa bann kestyon swivan: Kisisa lafwa? Ki lefe nou kondisyon leker i annan lo nou lafwa? Ki mannyer nou kapab ranforsi nou lafwa? Finalman, dan lekel nou devret annan lafwa?​—Rom. 4:3.

Lafwa i plis ki krwar dan sa ki Labib i dir, akoz “menm bann demon i krwar ki i annan en Bondye e zot tranble avek lafreyer.” (Zak 2:19) Alor, kisisa lafwa?

Labib i dir ki lafwa i enplik de keksoz. Premyerman, “lafwa i ler nou asire ki sa ki nou pe espere pou vin vre.” (Ebr. 11:1a) Si ou annan lafwa, ou vreman krwar ki tou sa ki Zeova in dir i vre e ki i pou akonpli tou sa ki i’n promet. Par egzanp, Zeova ti dir bann Izraelit: “Personn pa kapab kas lalyans ki mon’n fer avek lizour ek lannwit. Eski ou kapab kas lalyans lizour avek lannwit e lannwit avek lizour pour fer ki lizour i nepli swiv lannwit. Si sa ti arive, alor, mon lalyans avek mon serviter David ti ava’n kase.” (Zer. 33:20, 21) Eski ou’n deza per ki soley pa pou leve e ki i pa pou kouse e ki aprezan i pou nepli annan lizour ek lannwit? Byensir non! Si nou asire ki soley pou leve e kouse toulezour, pa nou devret asire ki sa Enn ki’n met bann lalwa an plas dan lanatir pou akonpli son bann promes?​—Iza. 55:10, 11; Mat. 5:18.

Dezyenmman, lafwa i “levidans kler ki sa ki nou krwar i reel menm si nou pa vwar li.” (Ebr. 11:1b) Annou vwar en legzanp ki pou ed nou konpran sa. Meton en zanfan i demann ou, ‘Ki mannyer ou konnen divan i egziste?’ Menm si ou pa’n zanmen vwar divan, ou kapab ed sa zanfan pour vwar levidans ki divan i egziste. Par egzanp, nou kapab tann divan soufle e nou kapab vwar fey kot i bouze ler divan i soufle. Ler sa zanfan i vwar levidans ki divan i egziste, i pou konpran ki i posib pour krwar dan en keksoz ki nou pa kapab vwar. Pareyman, lafwa i baze lo levidans kler.​—Rom. 1:20.

Vi ki lafwa i baze lo levidans, en dimoun i bezwen “ganny konnesans egzakt lo laverite” pour li kapab annan lafwa. (1 Tim. 2:4) Me konnesans pa ase. Zapot Pol ti ekri: “Se avek son leker ki en dimoun i demontre lafwa.” (Rom. 10:10) I pa ase pour en dimoun zis krwar ki sa ki Labib i dir i vre, me i osi bezwen kontan sa ki Labib i dir. Sa i sel fason ki i pou kapab demontre lafwa, setadir viv dan en fason ki fer plezir Bondye. (Zak 2:20) Me akoz en dimoun pou refize aksepte bann levidans kler ki sa ki Labib i dir i vre? Sa i kapab arive ler sa dimoun pa’n devlop lanmour pour sa ki Labib i dir. Alor i pou rezet bann levidans parski i pa anvi sanz son krwayans oubyen akoz i oule fer sa ki i anvi. (2 Pyer 3:3, 4; Zid 18) I pour sa rezon ki dan letan Labib, pa tou bann ki ti vwar bann mirak ki ti devlop lafwa. (Nom. 14:11; Zan 12:37) Bondye i servi son lespri sen pour ed zis bann dimoun ki vreman kontan laverite pour devlop lafwa.​—Gal. 5:22; 2 Tesa. 2:10, 11.

Lerwa David i enn bann dimoun ki ti annan en lafwa for. (Ebr. 11:32, 33) Par kont, pa tou dimoun dan fanmir David ki ti annan sa kalite lafwa. Annou vwar ki Eliyab, gran frer David ti fer en fwa. Ler Golyat ti sifok pep Izrael, sa ti fatig David e i ti anvi fer en keksoz. Sa ti fer Eliyab dispit avek David. Par fer sa, Eliyab ti montre ki i ti napa lafwa ki Zeova ti kapab sov zot. (1 Sam. 17:26-28) Vi ki personn pa’n ne avek lafwa oubyen erit lafwa avek son paran, i kler ki David ti annan lafwa akoz i ti annan en relasyon personnel avek Bondye.

Dan Psonm 27, David i ed nou konpran ki mannyer i ti devlop en lafwa for dan Zeova. (Verse 1) David ti medit lo sa ki i ti’n pas ladan e lafason ki Zeova ti’n ed li pour fer fas avek son bann lennmi. (Verse 2, NWT, 3) I ti vreman apresye sa laranzman ki Zeova ti’n met an plas pour ador li kot tabernak. (Verse 4) David ti ador Bondye ansanm avek lezot kot tabernak. (Verse 6) I ti demann Zeova led dan lapriyer. (Verse 7, 8) David ti osi anvi ki Zeova i montre li son bann prensip. (Verse 11) Lafwa ti sitan enportan pour David ki i ti demande: “Ki mannyer mon ti pou ete si mon ti napa lafwa?”​—Verse 13, NWT.

Ou kapab annan lafwa parey David si ou annan menm fason panse ek labitid parey i’n ganny dekrir dan Psonm 27. Parey in ganny mansyonnen, lafwa i baze lo konnesans egzakt. Alor pli ou etidye Parol Bondye ek bann piblikasyon baze lo Labib, ou konnesans pou ogmante e i pou pli fasil pour ou devlop lafwa ki en laspe lespri sen Bondye. (Ps. 1:2, 3) Ler ou etidye, pran letan pour medite. Si ou medit lo sa ki ou lir, ou lapresyasyon pour Zeova pou ogmante. Anmezir ki ou lapresyasyon i ogmante, ou pou pli anvi ador Zeova pour demontre ou lafwa dan li. Alor ou pou asiste tou bann renyon e anons sa bon nouvel avek lezot. (Ebr. 10:23-25) Osi, nou demontre nou lafwa ler nou kontinyen “priye e pa dekouraze.” (Lik 18:1-8) Alor, “toultan priye” e annan konfyans ki Zeova “i enterese avek” ou. (1 Tesa. 5:17; 1 Pyer 5:7) Lafwa i motiv nou pour fer sa ki byen e ler nou fer sa ki byen, nou lafwa i vin pli for.​—Zak 2:22.

Sa zour swar avan ki Zezi ti mor, i ti dir son bann disip: “Demontre lafwa dan Bondye e osi dan mwan.” (Zan 14:1) Alor, nou osi bezwen demontre lafwa dan Zezi. Me ki mannyer nou kapab fer sa? Annou vwar trwa fason.

Premyerman, vwar ranson konman en kado ki Bondye in donn ou personnelman. Zapot Pol ti dir: “Mon pe viv mon lavi annakor avek lafwa ki mon annan dan Garson Bondye ki’n kontan mwan e donn son lavi pour mwan.” (Gal. 2:20) Ler ou demontre lafwa dan Zezi, ou vreman krwar ki sa ranson i kapab ed ou e ki ou pese i kapab ganny pardonnen. Ou osi krwar ki atraver sa ranson, ou kapab ganny lavi eternel e ki i sa pli gran laprev ki Bondye i kontan ou. (Rom. 8:32, 38, 39; Efe. 1:7) Si ou krwar ki sa ranson i kapab ed ou, ou pa pou santi ou koupab e ou pa pou annan bann move santiman lo ou lekor.​—2 Tesa. 2:16, 17.

Dezyenmman, apros avek Zeova dan lapriyer ki posib gras a sakrifis Zezi. Sa ranson i fer li posib pour nou “koz avek Bondye libreman, pour ki i pran pitye e demontre labonte ekstraordiner anver nou ler nou bezwen led.” (Ebr. 4:15, 16; 10:19-22) Lapriyer i fer nou pli determinen pour reziste tantasyon.​—Lik 22:40.

Trwazyenmman, obei Zezi. Zapot Zan ti ekri: “Sa enn ki demontre lafwa dan Garson i ganny lavi eternel, sa enn ki dezobei Garson pa pou ganny lavi, me i pou eksperyans lakoler Bondye.” (Zan 3:36) Dan sa verse, Zan i montre ki i annan de kalite dimoun, enn ki demontre lafwa dan Zezi e lot ki dezobei Zezi. Alor, ou demontre lafwa dan Zezi ler ou obei li. Ou obei Zezi ler ou swiv “lalwa Kris,” setadir, tou sa ki Zezi ti ansennyen e donn nou lord pour fer. (Gal. 6:2) Ou osi obei Kris ler ou swiv gidans ki i donnen atraver “lesklav fidel e pridan.” (Mat. 24:45) Ler ou obei Zezi, ou pou annan sa lafors pour fer fas avek bann problenm ki kapab parey en tanpet danzere ki fer per.​—Lik 6:47, 48.

En fwa, en zonm ti dir Zezi: “Mon annan lafwa! Me ed mwan pour annan plis lafwa!” (Mark 9:24) Sa zonm ti deza annan lafwa, me i ti modes e i ti konnen ki i ti bezwen plis lafwa. Parey sa zonm, nou tou nou pou fer fas avek bann sityasyon kot nou pou bezwen plis lafwa. Nou tou nou kapab ranforsi nou lafwa depi la konmela. Parey nou’n vwar, nou ranforsi nou lafwa ler nou etidye Parol Bondye e medit lo la akoz sa pou ogmant nou lapresyasyon pour Zeova. Nou lafwa pou vin pli for ler nou ador Zeova ansanm avek lezot, ler nou travay ansanm avek nou bann frer ek ser pour anons sa bon nouvel e ler nou toultan priye. Deplis, ler nou ranforsi nou lafwa, nou ganny sa pli gran rekonpans. Parol Bondye i ankouraz nou: “Zot ki mon kontan, batir zot lafwa tre sen . . . pour ki zot reste dan lanmour Bondye.”​—Zid 20, 21.