LESON 17

Ki kalite personnalite Zezi i annan?

Edisyon ki enprimen

Ler nou vwar sa ki Zezi ti dir e fer ler i ti lo later, nou konn son personnalite e sa i fer nou vin pli pros avek li ek son Papa, Zeova. Ki serten zoli kalite ki nou kapab vwar dan son personnalite? Ki mannyer nou kapab swiv legzanp Zezi dan nou lavi toulezour?

1. Dan ki fason Zezi i parey son Papa?

Pour plizyer bilyon lannen, Zezi in obzerv son Papa lanmour dan lesyel e i’n aprann bokou keksoz avek li. Sanmenm ki i mazin, santi e azir parey li. (Lir Zan 5:19.) Anfet, personnalite Zezi i sitan parey pour son Papa ki i ti kapab dir: “Sa ki’n vwar mwan, i’n vwar mon Papa osi.” (Zan 14:9) Anmezir ki ou aprann plis lo personnalite Zezi, ou pou konn Zeova pli byen. Par egzanp, sa konpasyon ki Zezi i annan pour dimoun i montre ki santiman Zeova i annan anver ou.

2. Ki mannyer Zezi in montre ki i kontan Zeova?

Zezi ti dir: “Pour ki lemonn i konnen ki mon kontan mon Papa, mon pe fer sa ki mon Papa in donn mwan lord pour fer.” (Zan 14:31) Ler i ti lo later, Zezi ti montre ki kantite i kontan son Papa par obei li, menm ler i ti difisil pour fer li. Zezi ti osi kontan koz lo son Papa e ed bann dimoun pour devlop en lanmitye avek li.—Zan 14:23.

3. Ki mannyer Zezi in montre ki i kontan dimoun?

Labib i dir ki Zezi i “vreman kontan bann dimoun.” (Proverb 8:31) I ti demontre sa lanmour par ankouraz dimoun e fer tou pour ed zot. I ti fer mirak pa zis pour montre son pouvwar me osi pour montre son konpasyon. (Mark 1:40-42) I ti zantiy avek dimoun e pa ti fer lapreferans. Sa ki i ti dir ti rekonfort tou bann dimoun senser ki ti ekout li e donn zot en lespwar. Zezi ti pare pour soufer e mor akoz i kontan tou dimoun. Me i kontan sirtou bann ki obei son lansennyman.—Lir Zan 15:13, 14.

AL PLI O PROFON

Aprann plis lo personnalite Zezi. Vwar ki mannyer nou kapab demontre lanmour ek zenerozite zis parey Zezi ti fer.

4. Zezi i kontan son Papa

Legzanp Zezi i montre nou ki mannyer nou kapab eksprim nou lanmour pour Bondye. Lir Lik 6:12 ek Zan 15:10; 17:26. Apre ki ou’n lir sak sa bann verse reponn sa kestyon:

Parey Zezi ki mannyer nou kapab montre ki nou kontan Zeova?

Zezi pe priye. — Zezi ti kontan son Papa dan lesyel e i ti koz avek li souvan dan lapriyer

5. Zezi i pran pitye pour bann dimoun ki dan bezwen

Zezi ti met lentere lezot dimoun avan sa ki pour li. Menm ler i ti fatige, i ti servi son letan ek lenerzi pour ed dimoun. Lir Mark 6:30-44 e apre reponn sa bann kestyon:

Dan sa resi, ki serten fason Zezi ti montre ki i enterese avek lezot?—Vwar verse 31, 34, 41 ek 42.
Kwa ki ti pous Zezi pour ed dimoun?—Vwar verse 34.
Vi ki personnalite Zezi i parey pour Zeova, ki tousala i ansenny nou lo Zeova?
Zezi ti demontre lentere dan lezot, ki mannyer nou kapab swiv son legzanp?

Zezi pe donn manze dan en fason mirakile avek milye dimoun. I miltipliye senk dipen ek de pwason. Bann disip pe distribye sa nouritir avek bann zonm, madanm ek zanfan.

6. Zezi i zenere

Zezi ti zenere menm si i ti napa bokou keksoz e i ti ankouraz nou pour nou zenere anver lezot. Lir Akt 20:35 e apre reponn sa kestyon:

Dapre Zezi, ki mannyer nou kapab trouv lazwa?

Zwe sa VIDEO e apre reponn sa kestyon.

VIDEO: “I annan plis lazwa pour donnen”—⁠Ekstre (4:00)

Ki serten fason ki nou kapab donnen, menm si nou napa bokou keksoz?

Eski ou ti konnen?

Labib i ansenny nou pour priy avek Zeova o non Zezi. (Lir Zan 16:23, 24.) Ler nou priy dan sa fason, nou montre ki nou rekonnet sa ki Zezi in fer pour ed nou vin zanmi Zeova.

SERTEN DIMOUN I DIR: “Bondye pa ni enterese si nou pe soufer.”